17–23 ni Okosita

Ilamani 1–6

“Na Uluvatu ni Noda Dauveivueti”

O sa kila dina li na nomu kalasi? Tovolea mo kila vinaka cake e dua na lewe ni kalasi ena vei macawa yadua. Ni ko vakayacora, ko na rawa vakavinaka cake ni nanuma tiko na nodra gagadre ni ko vakavakarau mo veivakavulici.

Vola na Veika o Uqeti Kina

Sureta na Veiwasei

Vakasamataka mo sureti ira na lewe ni kalasi me ra lako mai ki kalasi ka vakavakarau me ra wasea e dua na iyaya e rawa ni ra vakayagataka me vakavulici kina e dua na ivakavuvuli era sa vulica ena wase eso oqo. Na cava tale eso na sala eda rawa ni vakavulica kina na ivakavuvuli oqo vei ira na tani?

Vakavulica na iVunau

Ilamani 1–6

Na viavialevu e tawasei keda mai na Yalo Tabu kei na kaukauwa ni Turaga.

• Na ituvatuva ni macawa oqo ena Lako Mai, Mo Muri Au—Baleta na Tamata Yadua kei na Matavuvale e vakamacalataka e dua na “bula cowiri ni dokadoka” ka a dewavi ira tu na Nifaiti. E rawa beka ni dua ena kalasi me tuva vakaivola na cowiri oqo ena vava ni volavola. Era na qai rawa ni kunea na lewe ni kalasi na veitikina ena Ilamani 1–6 ka ra nanuma ni vakaraitaka na veiyasa ni cowiri ka vola vata kei na veitikina veisemati ena ivola tuvani. (Ke ra gadreva na veivuke na lewe ni kalasi, o rawa ni vakatura me ra raica na Ilamani 3:24–36; 4:11–26.) Eda sa vakataki ira vakacava na Nifaiti ena so na gauna? E rawa vakacava ni da levea na nodra malele yani ki na dokadoka? E rawa talega ni ko wasea na veitiki ni “Chapter 18: Beware of Pride” (Nodra iVakavuvuli na Peresitedi ni Lotu: Ezra Taft Benson [2014], 229–40).

  

  Na “bula cowiri ni dokadoka.”

• O rawa ni sureti ira na lewe ni kalasi me ra wilika na Ilamani 4:13, kei na 24–26 ka kunea e dua na sere e vakavulica na noda vakararavi vua na Kalou, me vaka na “Au Rai Vei Kemuni” (Serenilotu, naba 51). Na cava na vuna e tawasei keda kina mai vua na Kalou na dokadoka? Eda na kidava rawa vakacava na noda vakararavi vua na Kalou? Sa rawa ni wasea na lewe ni kalasi na sala era a vaqaqacotaki kina mai na Yalo kei na kaukauwa ni Turaga baleta ni ra sa yalomalumalumu.

• Na lewe ni Lotu e vakamacalataki tiko ena Ilamani 3:33–34 era a vakacacani ira na lewe ni Lotu vata ga. Ena vuku ni nodra dokadoka, era sa vakasaurarataki ira na dravudravua ka kitaka na veimataqali ivalavala ca kece (raica na Ilamani 4:11–13). Vakasamataka mo ni wilika vata na Ilamani 3:33–34 kei na 4:11–13 ka kerei ira na lewe ni kalasi me ra veitalanoataka na sala meda rawa ni vakaraitaka kina e levu cake na noda lomavinaka kei na vakarokoroko vei ira na tani, wili kina na noda itokani lewe ni Lotu ka duidui beka mai vei keda. E rawa talega mo sureta na lewe ni kalasi me ra vakasamataka e dua era kila ena rairai vakararawataki ena vuku ni nodra ivalavala lomaca na tani ka tugana na sala era rawa ni vaqaqacotaka ka vakayaloqaqataka kina na tamata o ya.

Ilamani 3:33–35

Na veivakasavasavataki e lako mai na noda solia na yaloda vua na Kalou.

• Ilamani 3:33–35 e rawa me veivakacegui sara vei ira ena nomu kalasi era rawa ni sotava tiko na “veivakacacani … [se] veivakararawataki e vuqa” (tikina 34). Ena rawa beka mo sureti ira na lewe ni kalasi me ra vakasaqaqara ena veitikina oqo mera raica kina na ivakasala era rawa ni solia vua e dua ka vakacacani tiko. Se e rawa beka mera wasea na lewe ni kalasi era kunea vakacava “na marau kei na vakacegu” ena gauna ni veivakararawataki ena nomu cakava na veika e vakamacalataki ena tikina 35..

• Vakasamataka mo sureti ira na kalasi mera vulica na Ilamani 3:33–35 kei na itukutuku kei na idusidusi me baleta na kena yaco me vakasavasavataki ena “iKuri ni iVurevure.” Na cava e vakavulica na veitikina oqo kei na itukutuku me baleta na vakasavasavataki? E kauta mai vakacava na lolo kei na masumasu na veivakalougatataki ka tukuni tiko ena Ilamani 3:35? Eda sorovaka vakacava na yaloda vua na Kalou? (raica Ilamani 3:35). E vukei keda vakacava oqo me yaco meda vakasavasavataki? E rawa talega ni ko vakarautaka ka veisoliyaka na tiki ni pepa eso e tiko kina e dua na itukutuku se na veitikina mai na “iKuri ni iVurevure” e tabaki vei ira ka sureti ira na lewe ni kalasi mera digia vakailoa e dua me vulici. Mera qai veiwaseitaka na cava era sa vulica me baleta na vakasavasavataki.

Ilamani 5:12

Kevaka meda vakayacora me noda yavu ko Jisu Karisito, eda na sega ni rawa ni lutu.

• O Setani e tala yani na “nona cagi kaukauwa” ki na noda bula kece. E vuqa na tamata ena nomu kalasi era sotava oti oqo, ka levu cake na cava era rawa ni yaco ena veisiga ni mataka. Na cava o rawa ni cakava mo vukei ira nomu lewe ni kalasi ni vakavakarau ki na cava oqo ena kena tarai cake na nodra bula vei Jisu Karisito?

  O na rairai tekivuna e dua na veitalanoa ena nomu vakaraitaka na iyaloyalo ni valetabu se na veivale tale eso ka vakatauvatana na noda bula kei na dua na vale. Na digidigi cava e dodonu me cakava e dua na dautaravale? Na digidigi cava eda cakava e tara na ivakarau sa tara cake kina na noda bula? Sa qai rawa mo ni wilika vata na Ilamani 5:12 ka veitalanoataka na cava e kena ibalebale me tarai cake na noda bula vei Jisu Karisito. E vakayarayarataka vakacava na digidigi tale eso eda cakava na Nona mai noda yavutu voli ni da tara cake tiko na noda bula?

  Sa rawa ni ra wasea na lewe ni kalasi na sala e sa vukei ira kina na iVakabula me nodra yavutu ni vorata kina na cava ni bula. Solia vei ira na lewe ni kalasi na gauna mera tugana kina na mataqali bula era sa tara tiko ka ra na vakadeitaka vakacava ni ra sa yavutaki dei vei Karisito. Na italanoa me baleta na valetabu e Salt Lake ena “iKuri ni iVurevure” ena rawa ni vukea na nomuni veitalanoa.

Ilamani 5:14–50

E sa vaqaqacotaka na noda vakabauta mai “na levu ni ivakadinadina [eda sa] ciqoma.”

• E dua na veivakalougatataki ni vakasoqoni vata ena Matawilivola ni Sigatabu sa ikoya na madigi me da veivaqaqacotaki kina vakaikeda ena vakabauta—me vaka era a cakava na Leimanaiti ena Ilamani 5:50. E rawa beka mo ni wilika vata na Ilamani 5:50 ka kerei ira na kalasi mera raica “na veika ka ra rogoca ka raica [na Leimanaiti]” ena tikina e 20–49. O ira na lewe ni kalasi me qai veiwaseitaka vakai ira e so na veika vakayalo era sotava ka vakadeitaka vei ira ni dina na kosipeli—e dina mada ni ra se sega ni raica na agilosi, se na duru bukawaqa. Na ivakadinadina veivukici cava era sa raica me baleta na kosipeli vakalesui mai i Jisu Karisito?

Vakayaloqaqataka na Vuli e Vale

Ilamani 7–12 e vakamacalata na sala a rawata kina o Nifai na veivakabauti ni Turaga ka sa soli kina vua na kaukauwa levu. Sa rawa ni o vakatututaka ki na nomu kalasi ni mai na nodra wilika na veiwase oqo, era rawa ni vulica na sala me ra rawata vakalevu cake na veivakabauti ni Kalou ena nodra bula.

iKuri ni iVurevure

Vakasavasavataki tu mai vei Jisu Karisito.

• Na vakasavasavataki sa ikoya “na ivakarau e yaco ni da sa galala mai na ivalavala ca, sa maucokona, savasava, ka vakalou tu mai na Veisorovaki i Jisu Karisito” (iDusidusi ki na ivolanikalou, “Vakasavasavataki,” scriptures.ChurchofJesusChrist.org).

• “Ni da sa veivutuni vakaidina, ena kauta tani na Karisito na icolacola ni ora ni noda ivalavala ca. Eda rawa ni kila vakataki keda ni da sa vosoti ka vakasavasavataki. Na Yalo Tabu ena vakadeitaka oqo vei keda; O koya na Dauveivakasavasavataki. Sa sega ni dua tale na ivakadinadina ni veivosoti e rawa ni cecere cake” (Dieter F. Uchtdorf, “Gauna ni Lesu Bula Mai, ” Ensign se Liaona, Me 2007, 101).

• “Na veivakasavasavataki mai na dra i Karisito sai koya me da savasava tu, maucokona, ka vakalou. Kevaka e veivagalalataki mai na itotogi ni ivalavala ca sa yaco oti na vakadonui, na vakasavasavataki e tokia tani na duka se na revurevu ni ivalavala ca” (D. Todd Christofferson, “Vakadonui ka Vakasavasavataki,” Ensign, June 2001, 22).

• “Sa vakasavasavataki na tamata o ya ni sa lomasoli vakaoti na lomana kivua na Kalou kei na nona gagadre” (Brigham Young, “Discourse,” Deseret News, Sepi. 7, 1854, 1).

• Eda sa vakasavasavataki ena kaukauwa ni Yalo Tabu ena vuku ni Veisorovaki i Jisu Karisito (raica na Iperiu 13:12; Alama 13:10–12; 3 Nifai 27:19–20; Moronai 10:32–33; VV 76:40–42).

• Ni oti tu mada ga na noda vakasavasavataki, e se rawa ga me da lutu mai na loloma vakalou (raica VV 20:30–34).

Dua na yavu dei.

Ena gauna a tara kina na valetabu e Salt Lake, e a kunei e levu na kaca lelevu ena vatu ni yavu. E dina ga ni a taura e voleka ni ciwa na yabaki na tara tiko na vale, e a dusimaka o Peresitedi Brigham Young me kau tani na yavu vatu kakaca ka sosomitaki ena vatu vinaka cake. E a taura e lima tale na yabaki na kena vagalalataki na vatu kasere eso ka tara cake tale ena dela ni qele. “Au sa via raica na tara ni valetabu oya,” a kaya o Peresitedi Young, “ena iwalewale me na yacova kina na yabakiudolu” (“Remarks,” Deseret News, 14 ni Okot., 1863, 97).

Vakatorocaketaki Noda Veivakavulici

Cavuta na ivakadinadina kei Jisu Karisito A rairai sega ni yalodei sara o Aminatapi me vakataka e levu na kenadau me vakatavulici ira na Leimani me ra veivutuni ka vakabauta na Karisito (raica na Ilamani 5:35–41). Ia a wasea na ka e kila, ka sa veivakayarayarataki na nona ivakadinadina momona. Na cava o vulica rawa mai na ivakaraitaki oqo?