Samuela na Leimani ena Bai, mai vei Arnold Friberg

31 ni Okosita–6 ni Sepiteba

Ilamani 13–16.

“iTukutuku Rekitaki Dina”

Na ivakavuvuli kei na parofisai cava nei Samuela na Leimanaiti o nanuma ni na veivuke sara vakalevu vei ira na lewe ni nomu kalasi? Ni o vulica na Ilamani 13–16, vakasamataka mo na vukei ira beka vakacava me vakaibalebale vei ira na iwase eso oqo.

Vola na Veika o Uqeti Kina

Sureta na Veiwasei

Sureti ira na lewe ni kalasi me ra wasea vata kei na dua na itokani e dua na ka era sa vulica, e dua na ka era sa kila vakavinaka cake, se e dua na ka era sa vakayagataka ena nodra wilika na italanoa kei Samuela na Leimani mai na Ilamani 13–16. ena macawa oqo. Oti me ratou qai wasea e lewe vica vei ira taucoko na lewe ni kalasi.

Vakavulica na iVunau

Ilamani 13

Era dau vosa ka cakacaka na italai ni Turaga me vaka nona veidusimaki na Kalou.

• A kerei Samuela na Leimani na Turaga me cakava e dua na ka ena rairai dredre beka: me vunautaka na kosipeli vei ira na tamata era a vakasavi koya tani mai na nodra koro ena dua na gauna e liu. Ni ra wilika na Ilamani 13:2–5 ena rawa ni vakananuma vei ira na lewe ni kalasi na veika dredre sa kerea na Turaga me ra cakava. Sureti ira me ra wasea na veika era sa sotava. A vukei ira vakacava na Turaga? Me kena ivakaraitaki, de rawa ni ra wasea na lewe ni kalasi eso na ka era sa sotava ena nona biuta ki yalodra na Turaga e dua na ka e vinakata me ra tukuna vua e dua (raica na tikina e 4). Na veivakalougatataki cava era sa raica tiko na lewe ni kalasi ni ra muria na veidusimaki ni Turaga?

  

  Na parofita e dusimaki keda vei Jisu Karisito.

• E dina ga ni a cavuti na ivakasala nei Samuela vei ira na Nifai yalo kaukauwa, Ilamani 13 e koto kina eso na lesoni kivei keda kece sara. Me vukei ira na lewe ni kalasi me ra raica na kena ibalebale vei ira na nona vosa, e rawa ni o sureti ira me ra vaqaqara ena Ilamani 13 me baleta e dua na itukutuku ka vaka me veiganiti ki na noda gauna. (Kevaka era gadreva na veivuke, sa rawa mo vola na veitikina oqo ena vava ni volavola: 8, 21–22, 26–29, 31, kei 38.) Me ra qai wasea na veika era raica vei kedra isa, ena ilawalawa lalai, se ena kalasi taucoko. Na itukutuku cava era tukuna tiko nikua na parofita e tautauvata?

Ilamani 14; 16:13–23

Na ivakatakilakila kei na veika veivakurabuitaki e rawa ni vaqaqacotaka na nodra vakabauta o ira era sega ni vakaukauwataka na yalodra.

• Na ituvatuva ena macawa oqo ena Lako Mai, Mo Muri Au—Baleta na Tamata Yadua kei na Matavuvale e vakatura me da vakasaqara na ivakatakilakila ni sa solia vei keda na Turaga “me [da] vakabauta kina na yacana” (Ilamani 14:12). De rawa me ra wasea na lewe ni kalasi na cava era sa raica rawa ni ra vakananuma vakatitobu na vakasama oqo. Nanuma mo dusia ni ivakatakilakila ena noda dui bula ena sega soti beka ni laurai levu sara me vaka a yalataka o Samuela ia e ka ni tamata yadua vakalevu cake. Na cava eso tale na inaki ni ivakatakilakila e vakaturi tiko ena Ilamani 14:28–30? E rawa ni ra wasea na lewe ni kalasi eso tale na ka sa vakayacora na Turaga me vukei ira ena nodra tara cake na nodra vakabauti Koya.

• Ni wiliki na ivakarau a vakayacori kina na parofisai nei Samuela e rawa ni tara cake nodra vakabauti Jisu Karisito kei na Nona itavi na lewe ni kalasi. De rawa ni ra vakayagataka na lewe ni kalasi na Ilamani 14 me buli kina e dua na ivolakabi ka tuvai na parofisai nei Samuela baleta na sucu kei na mate i Karisito ena dua na yasana kei na idusidusi vakaivolanikalou sa vakayacori kina na veiparofisai oqori ena dua tale. Eso na idusidusi oqo ena rawa ni oka kina eso na tikina mai na 3 Nifai 1:15–21 kei na 3 Nifai 8:5–25. Na cava e bibi kina me da kila na veiparofisai oqo kei na kedra vakayacori?

• Era sa raica beka na lewe ni kalasi—ena Ilamani 16 kei na veivanua tale eso mai na ivolanikalou—ni sega ni dau vakavuna e veigauna na noda vakabauti Karisito na noda raica na ivakatakilakila kei na veika veivakurabuitaki. Sureti ira me ra wasea eso na ivakaraitaki mai na ivolanikalou ni tamata era raica na ivakatakilakila ia era sega ga ni vakabauta. Me vaka na itukutuku ena Ilamani 16:13–23, na cava na vuna era sega ni vakabauta kina e levu na tamata ena gauna i Samuela na Leimani na ivakatakilakila kei na parofisai? E dau vakauqeti ira vakacava na tamata o Setani me ra “vakararavi ga ki na nodra kaukauwa kei na nodra yalomatua” nikua? (Ilamani 16:15). Na cava eda vulica mai na itukutuku oqo e rawa ni vukei keda me da levea ena mataqali cala vaqo?

Ilamani 15:3

Na Turaga sa dau vunauci ira e lomana.

• E tiko ena vosa nei Samuela eso na vosa kaukauwa ni veivunauci, ia na Ilamani 15:3 e tiko kina e dua na ivakarau ni rai duatani ni veivunauci mai vua na Turaga. E dua na sala me ra vukei kina na lewe ni kalasi me ra kila na ivakarau ni rai oqo sai koya me ra wilika vata na tikina oqo, ka sureti ira me ra wasea na ivakadinadina ni ra sa raica ena parofisai kei na ivakasala ni qaqarauni nei Samuela na loloma kei na loloma cecere ni Kalou. E rawa vakacava me ivakatakilakila ni Nona loloma na Turaga na nona veivunauci?

• Me vukei ira na lewe ni kalasi me ra kila vakavinaka cake na itukutuku ena Ilamani 15:3, sa rawa mo wasea e tolu na inaki ni veivunauci vakalou ka vakatavulica o Elder D. Todd Christofferson (raica na “iKuri ni iVurevure”). Wasea vakatolu na kalasi, ka kerea ki na ilala yadua me ra veivosakitaka e dua vei iratou ( e rawa ni veivuke na ivolanikalou kei na vidio e vakaturi tiko ena “iKuri ni iVurevure” rawa). Oti me qai wasea ki na kalasi na ilala yadua na vakasama mai na nodra veivosaki ena vukea me ra kila ni Turaga e dau vunauca na tamata e lomana.

Ilamani 16

Na parofita e dusimaki keda vua na Turaga.

• Ena Ilamani 16, na cava eda vulica mai vei ira era a ciqoma na ivakavuvuli nei Samuela? Na cava eda vulica mai vei ira era a sega ni ciqomi koya? E rawa ni veivakauqeti me rogoci ira na lewe ni kalasi ni ra wasea na sala era rawata kina na nodra ivakadinadina me baleta na bibi ni noda vakamuria na parofita bula. E rawa talega ni ra wasea na sala e rawa ni ra vakayagataka kina na Ilamani 16 se na vosa nei Elder Andersen ena “iKuri ni iVurevure” me vakamacalataki kina vua e dua na vuna era digitaka kina me ra muria na parofita.

Vakayaloqaqataka na Vuli e Vale

Me ra vakayaloqaqataki na lewe ni kalasi me ra wilika na 3 Nifai 1–7 ena macawa mai oqo, o rawa ni tukuna vei ira ni levu na parofisai era wilika ena macawa qo ena qai vakayacori ena wase oqo.

iKuri ni iVurevure

Na inaki ni veivunauci vakalou.

E wasea o Elder D. Todd Christofferson e tolu na inaki ni veivakasavasavataki vakalou (raica na “O Ira Kecega Kau sa Lomana, Kau sa Vunauca ka Cudruva,” Ensign se Liaona, Me 2011, 97–100):

1. “Me uqeti keda me da veivutuni.” Raica na Ica 2:14–15; Vunau kei na Veiyalayalati 1:27; 93:41–50; 105: 6.

2. “Me ra vakavinakataki keda ka vakasavasavataki keda.” Raica na Mosaia 23:21–22; Vunau kei na Veiyalayalati 101:1–5; 136:31.

3. “Me vagoleya vakadodonu na noda ilakolako ni bula ena sala e kila na Kalou ni vinaka cake.” Raica na italanoa kei Peresitedi Hugh B. Brown kei na vuniberi ena vosa nei Elder Christofferson (tabana e 98–99); “The Will of God” (vidio, ChurchofJesusChrist.org).

Eda reki ni dua tiko na noda parofita.

E vakavulica o Elder Neil L. Andersen:

“E dua na parofita e sega ni tu ena kemudrau maliwa kei na iVakabula. Ia, e tu e yasamu ka dusia na sala vua na iVakabula. Na nona itavi cecere duadua ka nona isolisoli talei duadua vei keda e dua na parofita sai koya na nona ivakadinadina bula, nona kila ka, ni ko Jisu na Karisito. Me vakataki Pita ni gauna makawa, e tukuna kina na parofita, ‘[sai Koya] na Karisito, na Luve ni Kalou bula’ [Maciu 16:16; raica talega na Joni 6:69].

“Ena dua na siga mai muri, ni da raica lesu na noda bula oqo, eda na reki ni da lako voli e vuravura ena nona gauna e dua na parofita bula. Ena siga ko ya, sa noqu masu ni da na rawa ni kaya:

“Eda a vakarorogo vua. Eda a vakabauti koya. Eda a vulica na nona vosa ena vosota kei na vakabauta. Eda dau masulaki koya. Eda tu e yasana. Eda a yalomalumalumu ka muri koya. Eda lomani koya” (“Na Parofita ni Kalou,” Ensign se Liaona, Me 2018, 27).

Vakatorocaketaki Noda Veivakavulici

Mo na kilai ira o vakavulica tiko. Ena sega ni rawa ni rau tautauvata vakavinaka sara e rua na tamata. Na tamata yadua o vakatavulica e tiko na kena ituvaki ga o koya, nona ivakarau ni rai, kei na veika e rawata. Masulaka mo kila na sala e rawa mo vakayagataka kina na duidui oqo me vukea nodra vulika na lewe ni kalasi. Ni o kilai ira vakavinaka cake o vakavulica, e rawa ni o cakava na veigauna ni veivakavulici vakaibalebale ka guiguilecavi dredre. (Raica na Veivakavulici ena iVakarau ni iVakabula,7.)