Koi Au na Rarama kei Vuravura, mai vei James Fullmer

14–20 ni Sepiteba

3 Nifai 8–11

“Tucake ka Lako Mai Vei Au”

Ni ko raica lesu na veivakauqeti o sa vola ena gauna ni nomu vuli vakai iko ena 3 Nifai 8–11 e rawa ni uqeta na vakasama ni veivakavulici. Na veivakatutu e ra e rawa ni solia vei iko na vakasama tale eso.

Vola na Veika o Uqeti Kina

Sureta na Veiwasei

Ena so na gauna era na veiwasei na tamata kevaka ko taroga e dua na ka vakatabakidua. Me ivakaraitaki, e rawa ni o sureta na lewe ni kalasi me wasea na veika eso mai na 3 Nifai 8–11 ka sa vakavulica vei ira me baleta na ivakarau ni bula i Jisu Karisito. E rawa ni o solia na veisureti oqo ni vo toka e vica na siga me rawa ni ra vakavakarau mera wasea.

Vakavulica na iVunau

3 Nifai 8–10

Kevaka eda veivutuni, na iVakabula ena vakasokomuni, taqomaki, ka vakabulai keda.

• Na veiwase oqo e tiko kina na itukutuku eso ni veivakarusai kei na veivakacacani, ia era vakavulica talega na lesoni vakayalo e rawa ni vukei keda me da lako voleka vei Jisu Karisito. E rawa beka ni o wasea tolu na kalasi ka lesia na ilawalawa yadua mera vaqara e dua na wase mai na 3 Nifai 8–10, ka vakasaqara na vosa se malanivosa e vakamacalataka na cava era vulica se sotava na tamata. Me qai dua na lewe ni ilawalawa me wasea na veika eratou sa veitalanoataka na nona ilawalawa. Vakauqeti ira na lewe ni kalasi me ra veitalanoataka ena vukei keda vakacava na veilesoni vakayalo oqo meda toro voleka vua na iVakabula.

• E dua na itukutuku yaga sara ena veiwase oqo oya ni sa dodoliga tiko na iVakabula ena loloma kei na loloma cecere ena gauna sara mada ga ni noda vakatovolei dredre duadua. E rawa ni o sureti ira na lewe ni kalasi mera vakasamataka e dua era kila e sa lako curuma tiko na gauna veibolei ka qai vakasaqara na vosa ni iVakabula ena 3 Nephi 9:13–22 kei na 10:1–10 me kunei kina na malanivosa eso e rawa ni vukea na tamata oya. E rawa tale beka ga ki na lewe ni kalasi mera wasea na veika era dui sotava ni ra a vakila na iVakabula ni dodoliga vei ira.

3 Nifai 9:19–22

Sa gadreva na Turaga “na yalo sa raramusumusu ka bibivoro.”

• Ni bera na nona lako mai na iVakabula, o ira na yalodina ena vanua yalataki era a vakamuria na lawa i Mosese, ka okati kina na nodra isoro manumanu. Me vukei ira na lewe ni kalasi mera kila vakamatata cake na lawa oqo, e rawa ni ko railesuva vakalekaleka na Mosese 5:5–8. Na cava na vuna era a vakaroti kina na tamata ni Kalou mera sorovaki manumanu ena gauna e liu? Na ivakaro vou cava sa solia na iVakabula ena 3 Nifai 9:20, ka sa dusi keda vakacava yani ki Vua kei na Nona solibula? Na qaqanivosa eso me baleta na lawa ni solibula ena “iKuri ni iVurevure” ena rawa ni veivukei.

• E rawa vakacava mo vukei ira na lewe ni kalasi ni kila vakamatata na ibalebale ni kena tiko na yalo sa raramusumusu ka bibivoro? E rawa mo tekivu ni o vola ena vava ni volavola na vosa raramusumusu, bibivoro, kei na solibula. O qai rawa ni kerei ira na lewe ni kalasi me ra droinitaka na iyaloyalo e vakaraitaka vei ira na cava na ibalebale ni veivosa oqo se vola na vosa se malanivosa e ra veisemati vata kei na veivosa oqo. Ni ra wasea tiko na lewe ni kalasi na nodra iyaloyalo, vosa se na malanivosa, e rawa mera veitalanoataka e semati vakacava na veika oqo kei na ka e kerea vei keda na iVakabula ena 3 Nifai 9:19–22. E rawa talega ni veivukei na qaqanivosa nei Elder D. Todd Christofferson ena “iKuri ni iVurevure”.

3 Nifai 11:1–17

Sai Jisu Karisito na Rarama kei Vuravura.

• Na veika e vakamacalataki ena 3 Nifai 11:1–17 e sa tu kina na veika tabu duadua ena iVola i Momani. Navuca mo solia ki na nomu lewe ni kalasi e vica na gauna mera wilika kina na veitikina oqo ena vakanomodi. E rawa beka mo vola na taro eso oqo ena vava ni volavola me ra tugana ni ra sa wilika, me vakaoqo: E vakacava na nomu bau vakila kevaka ko sa tiko ena kedra maliwa na tamata oqo? Na cava e vakurabuitaki iko me baleta na iVakabula ena veitikina oqo? Na cava o sa vulica mai na ivakaraitaki i Jisu? se Na veika sotavi cava sa solia vei iko e dua na ivakadinadina i Jisu Karisito ni sa nomu iVakabula? E rawa mo vakatara na lewe ni kalasi me ra wasea eso na nodra vakasama se na vakanananu.

  

  Yadudua, mai vei Walter Rane

3 Nifai 11:10–41

O Jisu Karisito a tauyavutaka na Nona ivunau kei na Nona Lotu.

• Ena rawa ni veivakavulici na noda kila ni imatai ni ka e a digitaka na iVakabula me tukuna ka cakava ena nona a rairai mai na vanua ko Vanuasautu. Era rawa ni makataka se vola na lewe ni kalasi na veika dina era sa vakatakila mai na vosa kei na ivalavala ni iVakabula ena 3 Nifai 11:10–41. Sureti ira me ra wasea na veika era raica. Na cava eda sa vulica baleta na iVakabula mai na veitikina oqo? Na cava eda vulica me baleta na Nona Lotu?

• Me rawa ni da tinia na duidui laurai levu ena kedra maliwa na tamata e sema ki na papitaiso, e a vakatakila kina na iVakabula na dina bibi me baleta na cakacaka vakalotu oqo ena 3 Nifai 11. Me vukei ira na lewe ni kalasi mera kunea na veidina oqo, e rawa mo vola na iwiliwili ni tikina oqo ena vava ni volavola: 21–25, 26–27, 33–34. Sureti ira yadua na lewe ni kalasi me ra digia e dua na tikina se rua ka wasea e dua na dina e vakavulica tiko me baleta na papitaiso.

Vakauqeta na Vuli e Vale

E rawa ni ra malele mera kila na nomu kalasi ni nona veisiko na iVakabula ki vei ira na Nifaiti kei na Leimanaiti e tarai ira sara vakatitobu ka yaco ni ko ira na tamata dau veisei eliu oqo era veisaututaki ena 200 na yabaki ka tarava (raica na 4 Nifai 1). Oqo e rawa ni veivakauqeti vei ira na lewe ni kalasi me ra vulica na 3 Nifai 12–16 me ra vulica na cava e vakavulica na iVakabula vei ira na tamata ka sa vagolei ira ki na dua na veisau vakasakiti.

iKuri ni iVurevure

Na lawa ni vakacaboisoro

E vakamacalataka o Peresitedi M. Russell Ballard e dua na ivakarau ni noda bulataka na lawa ni vakacabo isoro nikua:

“Ni oti na isoro cecere ni iVakabula, sa vakayacori kina e rua na veisau ena ivakarau [ni lawa ni vakacabo isoro]. Taumada, na cakacaka vakalotu ni sakaramede e sosomitaka na cakacaka vakalotu ni vakacabo isoro; ka ikarua, na veisau oqo e yavalata rawa na vakanamata ni solibula ni manumanu ena vuku ni tamata ki na tamata vakataki koya. Ena dua na vakasama, na solibula e veisau mai na isolisoli kivua e dausolia.…

“… Sa sega ni gadreva na Turaga ena gauna oqo na noda manumanu se vuata, sa vinakata O Koya me da biuta laivi na veika kecega sa sega ni vakalou. …

“… Ni da ulabaleta na noda dui gagadre kocokoco ka vakaliuca taumada na Kalou ena noda bula ka yalataka me da qaravi Koya veitalia na kena isau, eda sa qai bulataka tiko na lawa ni solibula” (“Na Lawa ni Vakacaboisoro,” Ensign, Okot. 1998, 10).

E kaya o Elder Neal A. Maxwell ena Kuoramu ni iApositolo Le Tinikarua: “Na solibula dina, ka noda yadua e sega ni kena cabori na manumanu ena icabocabo ni soro. Ia, sai koya na noda lomarawarawa meda biuta na manumanu e tu e lomada ka laiva me kama yavu yani!” (“Vakuwai Kemudou mai na Ka Kecega sa Sega ni Vakalou,” Ensign, Me 1995, 68).

Na yalo sa raramusumusu ka bibivoro

E a vakamacalataka o Elder D. Todd Christofferson na ibalebale ni kena tiko na yalo sa raramusumusu ka bibivoro:

“E rawa mo solia vua na Turaga na isolisoli ni lomamu raramusumusu, se veivutuni, kei na yalomu e bibivoro, se talairawarawa. Na ka e dina, oqo o sa soli iko—na nomu bula kei na veika o sa yacova tiko.

“E tiko beka e dua na ka vei iko se ena nomu bula ka se dukadukali se tawayaga tiko? Ni o sa vakasava tani, oqori e sa dua na isolisoli vua na iVakabula. E tiko li e dua na itovo vinaka se ivakarau uasivi ka sa yali tiko ena nomu bula? Ni ko susuga ka cakava mera sa tiki ni nomu itovo ni bula, o sa solia tiko e dua na isolisoli vua na Turaga” (“Ni Ko sa Saumaki Mai, ” Ensign se Liaona, Me 2004, 12).

Vakatorocaketaki Noda Veivakavulici

Cakacaka vata kei na lewe ni matavuvale. “O ira na tamata era kaukauwa duadua na nodra veivakauqeti vua e dua na tamata—me baleta na ka vinaka se ca—sa vakalevu ni o ira era tiko vata ena nona itikotiko. Baleta ni sa usutu na itikotiko ena kena bulataki ka vulici ni kosipeli, na nomu sasaga mo vaqaqacotaka e dua na lewe ni kalasi ena mana sara ni ko cakacaka vata kei na … lewe ni matavuvale eso” (Veivakavulici ena iVakarau ni iVakabula, 8–9).