iKatolu ni Nifai: Na Le Tinikarua Qo Ka’u Sa Digitaka, mai vei Gary L. Kapp

21–27 ni Sepiteba

3 Nifai 12–16

“Koi Au na Lawa, kei na Rarama”

Ena rawa vei ira yadua ena nomu kalasi me ra kunea e dua na ka vakaibalebale vakalevu cake vei ira ena loma ni Nona veivakavuvuli qaqa na iVakabula ena 3 Nifai 12–16. Me ra wasea na lewe ni kalasi na ivakavuvuli e matata vinaka vei ira.

Vola na Veika o Uqeti Kina

Sureta na Veiwasei

Me soli vei ira kece e dua na madigi me ra wasea na veika era sa vulica ena 3 Nifai 12–16, e rawa mo vola na 12 ki na 16 ena vava ni volavola. Me ra qai vaqara na lewe ni kalasi e dua na tikina ena veiwase oqo era raica ni vakaibalebale ka vola na naba ni tikina ena ruku ni kena wase sa tu ena vava ni volavola. Digitaka e vica na tikina me wiliki vata, ka veivosakitaka na cava na vuna era vakaibalebale kina.

Vakavulica na iVunau

3 Nifai 12–14

Na ivakavuvuli ni iVakabula e vakaraitaka vei keda na sala meda tisaipeli dina.

• Na ituvatuva ni macawa oqo ena Lako Mai, Mo Muri Au—Baleta na Tamata Yadua kei na Matavuvale e vakaturi kina na itukutuku umani ena 3 Nifai 12–14 me vakacavari kina na malanivosa “Na tisaipeli dina i Jisu Karisito …” E rawa ni o taroga kevaka sa tuvakarau e dua na lewe ni kalasi a vakaitavi ena itaviqaravi oqo me wasea na veika sa vulica. Se e rawa mo vola na malanivosa sega ni taucoko ena vava ni volavola, vata kei na idusidusi vakaoqo: 3 Nifai 12:3–16, 38–44; 13:1–8, 19–24; kei na 14:21–27 (se na veimalanivosa tale eso o sa raica ena nomu vuli). E rawa ni ra digitaka na lewe ni kalasi e dua na tikina me ra wilika, yadudua se vakailawalawa, ka vakatura e dua na sala me vakacavari kina na malanivosa ena vava ni volavola ka yavutaki ena ka era vakavulica na veitikina oqori. Vakayaloqaqataki ira na lewe ni kalasi me ra vakananuma vakatitobu ka vola na veika me ra cakava me ra muri Jisu Karisito kina ena yalodina me vaka na veika era sa vulica mai na veitikina oqo.

• Me vukea nodra kila na lewe ni kalasi na nona vosa na iVakabula ena 3 Nifai 12:48, o rawa ni sureta e dua se sivia vei ira me ra vulica na itukutuku nei Elder Jeffrey R. Holland “O Koya mo Dou Qai Vinaka Sara—Vakaoti” (Ensign se Liaona, Nove. ni 2017, 40–42) ni bera na kalasi ka wasea na vakasama ena vukei ira me ra kila deivaki na tikina oqo.

3 Nifai 12:21–30

Noda vakanananu e veimuataki ki na cakacaka.

• Ni veivosakitaki na 3 Nifai 12:21–30 e rawa ni vukei ira na lewe ni kalasi me ra raica ni rawa ni vukea noda lewa noda itovo na noda lewa vakavinaka noda vakasama. Me tekivutaki e dua na veivosaki, e rawa ni o cakava e dua na ituvatuva ena vava ni volavola ena ulutaga me vaka na iValavala eda via Levea kei na Vakasama se Yalo e Dau Vakavuna. Oti e rawa ni o qai sureti ira na lewe ni kalasi me ra vakasaqaqara ena 3 Nifai 12:21–22 kei na 27–30 ka tekivu vakalewena na ituvatuva. Cava tale eso na ivalavala kei na vakasama e rawa ni ra vakuria kina na ituvatuva o ira na lewe ni kalasi? Ena rawa vakacava me da “kakua sara ni vakatara me curu ki [lomada] e dua na ka oqo.”? (3 Nifai 12:29). Eda na vakasavi ira rawa vakacava ena gauna era curu mai kina? Ni wiliki oti na ivakasala nei Peresitedi Ezra Taft Benson ena “iKuri ni iVurevure,” sa rawa ni o tauyavutaka e dua na ituvatuva vou ena ulutaga iValavala Va-Karisito Eda Vinakata me da Tara Cake kei na Vakanananu ena Vakavurea Mai ka vakalewena vakalasi.

3 Nifai 13:1–8, 16–18.

Me donu na inaki ni noda veiqaravi kei na noda sokalou.

• Ni vulici na 3 Nifai 13 e vakarautaka e dua na madigi vei ira na lewe ni kalasi me ra vakadikeva na cava me ra cakava kina na cakacaka vinaka. Me tekivutaki e dua na veivosaki, e rawa mo ni wilika vata na tikina e 1–2 kei na 16 ka wasea na ivakamacala oqo ni dauveivakaisini: na vosa va-Kiriki na “Pretenders; [ka vakayagataki ena Veiyalayalati Vou] kena ibalebale ‘dua na daudrama,’ se ‘dua e dau … vakalevulevuya e dua na tikina’” (Maciu 6:2, ivakamacala e ra a). De rairai dua se rua beka na lewe ni kalasi erau na taleitaka me rau vakalecalecataka se matanataka ni rau solika tiko vei ira na dravudravua se lolo tiko. Na cava e vakaibalebale vinaka kina ni veivakaisini na vakalecaleca se matanataka? Me da vakadeitaka beka vakacava ni ka dina ka sega na veivakaisini ena noda veiqaravi, masu, kei na lolo?

• Ni sa kunei na cakacaka vinaka e tukuni tiko ena 3 Nifai 13:1–8 kei na 16–18, e rawa ni ra veivosakitaka na lewe ni kalasi na cava soti e rawa ni vakavuna nona cakava e dua na veika oqo se na veika tale eso e kerea na Kalou me da cakava. Na cava eda na kaya vua e dua e tarogi keda se cava eda cakava kina na ka vinaka? Vakayaloqaqataki ira na lewe ni kalasi mera vakasamataka vakatitobu na veika e dau vakavuna nodra cakava na veika vinaka vakaoqo. Eda na vakasavasavataka rawa vakacava na noda inaki?

3 Nifai 14:7–11

Kevaka eda vakasaqara na “veika vinaka” mai vei Tamada Vakalomalagi, eda na rawata.

• Me da kila na nona veisureti na Turaga me da kerekere, vakasaqara, ka tukituki, e rawa ni veivuke me da vakasaqara na ibalebale ni veivosa oqo. Na cava e tukuna na vosa yadua oqo me baleta na Nona veisureti vei keda na Turaga me da cakava? Eda na kerekere, vakasaqaqara, ka tukituki vakacava? Sa vakayacori vakacava na yalayala ena 3 Nifai 14:7–8 ki na noda bula? E na rawa talega vei ira na lewe ni kalasi me ra railesuva na ivakasala nei Peresitedi Russell M. Nelson ena “iKuri ni iVurevure,” me ra raica na taro a taroga kei na veisureti a vakayacora. Solia vei ira na lewe ni kalasi na gauna me ra vakananuma vakatitobu ka vola na nodra sauma na nona taro kei na nodra ituvatuva me ra cakava nona veisureti.

• Eso na lewe ni kalasi e rawa ni ra sega ni kila na ibalebale ni nona tukuna na iVakabula, “Ni sa rawata ko koya yadua sa kerekere” (3 Nifai 14:8). Na cava na vuna e dau vaka me sega ni saumi mai kina eso na masu, kei na cava na vuna eda dau taura kina na isaunimasu eda sega ni vinakata? Ni o ni railesuva vata vakalasi na ivolanikalou eso oqo e rawa ni veivuke ena kena saumi na taro eso oqo: Aisea 55: 8 – 9; Ilamani 10:4 – 5; 3 Nifai 18:20; kei na Vunau kei na Veiyalayalati 9:7 – 9; 88:64. Kerei ira na lewe ni kalasi me ra wasea na veika era sa kunea. Ena manata beka vakacava na noda ivakarau ni masu na vakasama eso oqo?

Vakayaloqaqataka na Vuli e Vale

Me vakauqeti ira na lewe ni kalasi me ra wilika mai vale na 3 Nifai 17–19 , e rawa mo sureti ira me ra raitayalotaka se na vakacava kevaka era rogoca ni masulaki ira kei na nodra matavuvale na iVakabula. Ena wase eso oqo era na wilika kina baleti ira na tamata era a sotava na veika bibi oqo.

iKuri ni iVurevure

Sa rawa meda lewa na noda vakanananu.

E vakavulica o Peresitedi Ezra Taft Benson:

“Na vakasama e vaka e dua na buturara ni vakatasuasua ka rawa ni caka ga kina e dua na drama ena dua na gauna. Mai na dua na yasana, e tovolea tiko na Turaga, o Koya e lomani iko, me biuta ena buturara ni nomu vakasama na veika ena vakalougatataki iko. Mai na yasana kadua e tovolea tiko na tevoro, o koya e cati iko, me biuta ena buturara ni nomu vakasama na ka mo ca kina.

“O iko na manidia ni buturara—o iko o na vakatulewataka na vakanananu me na tawana tiko na buturara. … Ena yaco mo ka o vakasamataka—na veika o dau vakatara e veigauna me tawana tu na buturara ni nomu vakasama. …

“Kevaka o keda na ka eda vakasamataka, ka me da vakataki Karisito, sa dodonu me da vakanananu Vakarisito” (“Think on Christ,” Ensign, Epe. 1984, 10–11).

Na Kalou e gadreva me vosa vei kemuni.

E kaya o Peresitedi Russell M. Nelson:

“Na cava ena dolava vei iko na nomu vakasaqaqara? Na vuku cava e lailai vei iko? Na cava o vakila ni gadrevi vakabibi mo kila ka me macala? Muria na ivakaraitaki ni Parofita ko Josefa. Vaqara e dua na vanua vagagalu ko rawa ni o dau taleva wasoma. Vakamalumalumutaki iko e mata ni Kalou. Talaucaka na lomamu vua na Tamamu Vakalomalagi. Vuki vei Koya ena isau ni vakatataro kei na vakacegu.

“Masu ena yaca i Jisu Karisito baleta nomu kauwai, nomu taqaya, nomu malumalumu—io, na gagano sara ga ni lomamu. Ka qai vakarorogo! Vola na veivakanananu e lako mai vei iko. Vola nomu nanuma ka taumuria ena iwalewale o uqeti kina. …

“E vinakata dina li na Kalou me vosa vei iko? Io! … Au vakauqeti kemuni mo ni ulabaleta nomuni kaukauwa vakayalo oqo ka rawata nomuni ivakatakila yadua …

“Io, e levu sara na ka e gadreva na Tamamu mai Lomalagi mo kila” (“iVakatakila ki na Lotu, iVakatakila ki na Noda Bula,” Ensign se Liaona, Me 2018, 95).

Vakatorocaketaki Noda Veivakavulici

Vukei ira na vuli voli mera veitokoni vakai ira. “O ira yadua ena nomu kalasi era ivurevure ni ivakadinadina, raititobu, kei na veika sotavi ena bulataki ni kosipeli. Sureti ira mera veiwasei ka veilaveti cake vakai ira” (Veivakavulici ena iVakarau ni iVakabula,5).