The Light of His Countenance Did Shine upon Them, mai vei Gary L. Kapp

28 ni Sepiteba–11 ni Okotova.

3 Nifai 17–19

“Raica, Sa Vuabale na Noqu Marau.”

Dodonu me tekivu kina na nomu vakavakarau ni veivakavulici ena nomu vulica na ivolanikalou. NaLako Mai, Mo Muri Au—Baleta na Tamata Yadua kei na Matavuvale e rawa ni vukea na nomu vulica, ka rawa talega ena ituvatuva oqo me solia na vakasama me vukei iko ena nomu vakavakarau.

Vola na Veika o Uqeti Kina

Sureta na Veiwasei

Ena 3 Nifai 17:1–3, a sureti ira na tamata na iVakabula me ra lesu tale ki na nodra veivale ka “vakarautaka [nodra] vakasama” ni bera ni ra lesu mai me ra vakavulici tale. O na tarogi ira beka nomu gonevuli ena iwalewale era vakarautaka mai kina na veivosaki nikua kei na cava era vakasamataka tiko.

Vakavulica na iVunau

3 Nifai 17; 18:24–25, 28–32

Na iVakabula sa noda ivakaraitaki uasivi ni veiqaravi.

• E dui tu na madigi me da qaravi ira na tamata, ka da rawa ni vinaka cake kece kina. E dua na sala me da vuli kina mai na Nona ivakaraitaki ni veiqaravi na iVakabula sai koya me da wilika vata vakalasi na 3 Nifai 17 ka sureti ira na lewe ni kalasi me ra tukuna e dua na ka ena gauna ga era kunea kina e dua na ka e vakavulica vei ira na veiqaravi. Na cava eda vulica me baleta Nona itovo ni bula na iVakabula ka vakavuna me dua o Koya na ivakaraitaki cecere ni veiqaravi? Na dina cava soti eda sa vulica me baleta na veiqaravi mai na ivakaraitaki ni iVakabula? E rawa talega ni o vakasaqara na ikuri ni veivakararamataki ena 3 Nifai 18:24–25 kei na 28–32. Oti ya sa na rawa vei ira na lewe ni kalasi me ra veivosakitaka na veika era vakauqeti me ra cakava me ra muria kina Nona ivakaraitaki ni veiqaravi na iVakabula.

  

  Raici Ira Nomuni Lalai, mai vei Gary L. Kapp

3 Nifai 17:13–22; 18:15–25; 19:6–9, 15–36

E vakavulica vei keda na iVakabula na ivakarau ni masu.

• Me vukei ira na lewe ni kalasi me ra vuli mai na ivakaraitaki e vuqa kei na ivakavuvuli baleta na masu ena 3 Nifai 17–19, e rawa mo vola ena vava ni volavola na O cei? Caka Vakacava? Ena Gauna Cava? kei na Cava na Vuna? ka sureti ira na kalasi me ra vakaraica na isau ni veitaro oqo ni ra vulica baleta na masu mai na veitikina oqo: 3 Nifai 17:13–22; 18:15–25; kei na 19:6–9, 15–36. Na cava eso tale na vakasama era rawata na lewe ni kalasi ni ra wilika na veitikina oqo? Na itukutuku oqo nei Elder Richard G. Scott ena “iKuri ni iTukutuku” ena rawa me oka ki na veivosaki oqo. E rawa ni o sureti ira talega na lewe ni kalasi me ra wasea na veika era sa cakava me vakaibalebale vakalevu cake kina na nodra masu yadudua kei na masu vakamatavuvale (raica na 3 Nifai 18:18–21).

• Na ituvatuva ena macawa oqo ena Lako Mai, Mo Muri Au—Baleta na Tamata Yadua kei na Matavuvale e vakatura na taro me vakasamataki vakatitobu me baleta na masu ni da wilika na veitikina oqo. E rawa mo kerei ira na lewe ni kalasi me ra wasea na veika era nanuma me baleta na taro oqo. Se e rawa ni o sureti ira e vica na lewe ni kalasi me ra lako mai ki na kalasi ka vakarau tu me ra veivosakitaka e dua na ka era sa vulica me baleta na masu mai na 3 Nifai 17–19. Na cava era a vakauqeti mera cakava me vakaibalebale vakalevu cake kina na nodra masu?

• E vakavulica o Jisu na cava meda dau masu tikoga kina (raica na 3 Nifai 18:15–18). E dua na lesoni vakaraitaki e rawa ni vukei ira nomu kalasi mera kila vakavinaka na veika e vakavulica. Me vaka beka oqo, mo vakatawana e dua na koniteina ena wai me matataka na veivakauqeti nei Setani. Vakadabera vakaukauwa e dua na pepa (me matataki keda) ena boto ni dua na bilo (me matataka na masu wasoma). Vukica vakatobuicu na bilo, ka biliga sobu vakadodonu ki na koniteina wai. E dodonu me na mamaca vinaka toka ga ena boto ni bilo na pepa, dina ga ni wavolita tu na wai. Na cava erau vakavulica vei keda na lesoni vakaraitaki oqo kei na 3 Nifai 18:15–18 me baleta na masu? (raica talega na VV 10:5). Na cava e kena ibalebale me da dau “masu tikoga”? Ena vukei keda vakacava na masu me da vorata rawa na veivakayarayarataki nei Setani? Vakasamataka mo solia e vica na gauna vei ira na lewe ni kalasi me ra vola na veika era vakauqeti kina me vakavinakataka nodra masu.

3 Nifai 18:1–12

Sa rawa me da vakasinaiti vakayalo ni da vakaivotavota ena sakaramede.

• Me tekivutaki e dua na veivosaki me baleta na nona ivakavuvuli na iVakabula baleta na sakaramede ena 3 Nifai 18, e rawa ni o wasea vakailala nomu kalasi ka solia ki na ilala yadua e dua vei ira na ivolanikalou me ra wilika ka veivosakitaka: Maciu 26: 26–28; 3 Nifai 18:1–12; kei na Vunau kei na Veiyalayalati 20: 75–79; 27: 1–4. Ni wiliki oti nodra tikina lesi, e rawa ni ratou vakasamataka na ilala yadua e dua se rua na taro baleta na sakaramede ka saumi ena tikina era wilika ka vola nodra isaunitaro ena papa. Me ra qai vakasaqara ena ivolanikalou na vo ni kalasi na isau ni veitaro oqori. E rawa talega ni ra veivosakitaka na lewe ni kalasi na ivakarau me vakaibalebale vakalevu cake kina nodra vakaivotavota ena sakaramede.

• Na cava na kena ibalebale meda “vakasinaiti” ni da vakaivotavota ena sakaramede? (raica na 3 Nifai 18:4–5, 9; 20:9). Vakasamataka mo sureti ira na lewe ni kalasi me ra veivosakitaka yarurua na taro oqo ni ra wilika vata na 3 Nifai 18:1–12 . Sa rawa mo sureti ira talega na lewe ni kalasi me ra vakasamataka vakatitobu na iotioti ni gauna era vakila kina nodra “vakasinaiti” vakayalo ena nodra vakaivotavota ena sakaramede. E rawa beka ni ra veivosakitaka na veika e rawa ni dau vakataotaka se vagoleya tani noda “vakasinaiti” ena sakaramede ka wasea na vakasama e rawa ni da ulabaleta kina na itatao oqori.

3 Nifai 19:9–15, 20–22

Era dau vakasaqara na isolisoli ni Yalo Tabu na tisaipeli i Jisu Karisito.

• Navuca mo tarogi ira na lewe ni kalasi me ra vakasamataka e dua na ka era gadreva sara vakatitobu. Na cava era sa tuvakarau me ra cakava me rawa ni ra ciqoma? Oqo e rawa ni vakavuna na veivosakitaki ni veika eratou a “gadreva sara vakalevu” na lewe tinikarua na tisaipeli me vaka e vakamacalataki ena 3 Nifai 19:9–15 kei na 20–22. Na cava na vuna sa rui bibi kina vei ira? Na cava e bibi kina vei keda? Me vaka na veitikina oqo, me da vakasaqara vagumatua vakacava na veitokani ni Yalo Tabu?

Vakayaloqaqataka na Vuli e Vale

Na Turaga a kaya, “Sa ka bibi vakaidina na vosa i Aisea” (3 Nifai 23:1). Me vakayaloqaqataki ira na lewe ni kalasi me ra wilika na 3 Nifai 20–26, e rawa ni o tukuna vei ira ni ena wase oqo, e vakamacalataka kina o Jisu na “bibi” ni vosa nei Aisea. Sureti ira na lewe ni kalasi mera vakasamataka vakatitobu na cava na vuna e bibi kina na vosa i Aisea. Vakayaloqaqataki ira me ra vakavakarau mai ena Sigatabu mai qo me ra wasea na veika era sa vulica.

iKuri ni iVurevure

Na yaga ni masu.

E vakadinadinataka o Elder RichardG. Scott na yaga ni masu:

“Eda na masu vua na Tamada Vakalomalagi ena yacana tabu na Luvena Lomani, ko Jisu Karisito. Ena dau mana vakalevu na masu ena gauna eda segata kina me da savasava ka talairawarawa, ka kilikili na noda inaki, ka da tu vakarau me da cakava na veika e gadreva o Koya. Na masu ni yalomalumalumu ena veivakabauti eda na muadonu kina ka da kunea na sautu.

Kua ni leqataka ke sega ni vakamacalataki vakavinaka na lomamu. Vosa ga Vua na Tamamu yalololoma ka dau veiciqomi. O iko na Nona gone taleitaki e daulomana vakavinaka sara o Koya ka gadreva me veivuke. Ni o masu, mo kila ni toka voleka ga na Tamada Vakalomalagi ka vakarorogo tiko.

“Na idola ni masu vinaka cake sai koya me da vulica me da taroga na taro dodonu. Vakasamataka mo veisau mai na nomu kerea na veika o vinakata ki na nomu vakasaqara ena yalodina na veika e vinakata o Koya vei iko. Ni o sa kila na Lomana, masuta mo liutaki me tu vei iko na kaukauwa mo rawata kina.

“Kevaka o mani vakila ni o yawa mai vei Tamada, e rawa ni levu na vuna. Se cava ga e vuna, ni o tomana tikoga na nomu kere veivuke, ena tuberi iko o Koya mo cakava na veika ena vakalesuya mai na yalodei ni tiko voleka ga o Koya. Dau masu ena gauna sara mada ga e sega ni yalomu kina na masu. Ena so na gauna, me vaka e dua na gonelailai, o na cakava beka eso na ka ca ka vakila ni sega ni rawa ni o goleva na Tamada ena dua na leqa. Oqori na gauna o gadreva vakalevu duadua kina mo masu. Kakua vakadua ni nanuma ni sega ni o kilikili mo masu.

“Au dau vakataroga kevaka eda rawa dina ni kila na kaukauwa vakaitamera ni masumasu me yacova na gauna eda na sotava kina e dua na leqa veirawai bibi vakalevu sara, ka da qai vakila ni sega vei keda na kaukauwa me da walia. Eda na qai gole vua na Tamada ena yalomalumalumu ka vakadinadinataka na noda sa vakararavi ga Vua. Ena vukea me da vaqara e dua na vanua vakatikitiki me rawa ni talaucaki kina vakavosa na lomada ena kena balavu kei na kena kaukauwa e ganita” (“Vakayagataki ni iSolisoli Cecere ni Masumasu,” Ensign se Liaona, me 2007, 8).

Vakatorocaketaki Noda Veivakavulici

Saga na loloma sa Vakarisito. Kevaka e dua na lewe ni nomu kalasi e gadrevi me vakaveitokanitaki, vakasamataka na sala e rawa ni o vukea me vakila ni kidavaki ki na kalasi. Me kena ivakaraitaki, o na sureta beka e dua tale na lewe ni kalasi me dabe tikivi koya me nona itokani.