Sa rairai na Karisito vei ira na Nifaiti

Na ivakaraitaki kei Karisito nona rairai vei ira na Nifai mai vei Andrew Bosley

12–18 ni Okotova

3 Nifai 20–26

“Sai Kemudou na Gone ni Veiyalayalati”

Laiva na Yalotabu me dusimaka na nomu vulica na 3 Nifai 20–26. Ena vukei iko o Koya mo kila na ivakavuvuli e rawa ni vakaibalebale vakalevu sara vei ira na tamata o vakavulica tiko.

Vola na Veika o Uqeti Kina

ivakatakilakila ni veiwasei

Sureta na Veiwasei

Ni oti nomuni wilika vata na vosa ni iVakabula ena 3 Nifai 23:1, e rawa mo taroga vei ira na lewe ni kalasi na veika era a vakasaqara ena nodra wilika na ivolanikalou ena macawa oqo. Na cava era sa kunea?

ivakatakilakila ni veivakavulici

Vakavulica na iVunau

3 Nifai 20:25–41; 21:9–11, 22–29

Ena iotioti ni gauna, ena vakayacora na Kalou e dua na cakacaka levu ka veivakurabuitaki.

• A tukuna na iVakabula “e dua na cakacaka levu ka veivakurabuitaki” (3 Nifai 21:9) ni na cakava na Tamana ena veisiga mai muri. De rawa ni ra wasea na lewe ni kalasi na veika era sa vulica me baleta na cakacaka o ya ni ra vulica na veiwase oqo mai vale. Na veitaro oqo e rawa ni vakauqeta na veivosaki: Na cava a tukuna na iVakabula ni na yaco ena dua na siga mai muri? (raica vakabibi 3 Nifai 20:30–32, 39–41; 21:22–29). Na cava beka ena vakatoka kina o Koya na veika oqo me “levu” ka “veivakurabuitaki”? Na ivakadinadina cava eda raica ni sa yaco tiko na cakacaka oqo? Eda na vakaitavi kina vakacava?

• Me vukea nodra raica na lewe ni kalasi nona a veivuke na parofita o Josefa Simici ena kena rawati na nona cakacaka levu ka veivakurabuitaki na Turaga, e rawa ni o vakaraitaka e dua na iyaloyalo ni Parofita ka sureti ira na kalasi me ra wilika na 3 Nifai 21:9–11, ka vakasaqara na vosa kei na malanivosa me vakananuma vei ira na bula kei na veiqaravi nei Josefa Simici. Me kena ivakaraitaki, na sala cava “a solia kina [vua na Turaga] na kaukauwa me kauta yani vei ira na Matanitu Tani na kosipeli”? (tikina 11). Na cava na vuna e bibi kina me kilai ni a sa tukuna rawa na iVakabula na ilesilesi nei Josefa Simici? (raica tale ga na 2 Nifai 3).

• E rawa talega ni o vukei ira na lewe ni kalasi me ra raici ira ena cakacaka levu sa tukuni rawa tu ena iwase eso oqo ni wiliki vata na 3 Nifai 20:25–27. Kevaka e ganita, e rawa ni o dusimaka ni gauna eda veiyalayalati kina kei na Turaga, sa yaco me da kawa i Eparaama. E rawa vakacava ni da vakalougatataki ira “na veimataqali kecega e vuraviura” ni da kawa i Eparaama? (tikina e 25). E rawa ni ra vakasamataka vakatitobu na taro oqo na lewe ni kalasi ni ra wilika na itukutuku nei Peresitedi Russell M. Nelson ena “iKuri ni iTukutuku” ka wasea na nodra nanuma.

3 Nifai 23; 26:1–12

E vinakata na iVakabula me da vakasaqaqara ena ivolanikalou.

• Na cava e vakatakilai ena nona ivakarau ni veimaliwai na iVakabula vata kei ira na Nifai baleta na ivakarau ni nona raica na ivolanikalou? Me vukea nodra kila na lewe ni kalasi, e rawa ni kerei na veimama ni kalasi me wilika na 3 Nifai 23 kei na ikarua ni veimama me ra wilika na 3 Nifai 26: 1–12; me ra qai veiwaseitaka na veika era raica. E rawa talega ni ra wasea na vakasama eso e tu vei ira ena ivakarau me vakaraitaki kina vua na Turaga ni sa ka bibi vei keda na ivolanikalou. Kena ivakaraitaki, na cava na duidui ni vakasaqaqara ena ivolanikalou kei na noda wilika wale tu ga? (raica na 3 Nifai 23:1).

3 Nifai 24:1–6

Na Turaga e vaka na bukawaqa ni dausava koula.

• E rawa ni vukea vakavinaka na veivosakitaki ni 3 Nifai 24:1–6na iyaloyalo. Kena ivakaraitaki, e rawa ni o vakaraitaka e dua na ilavo siliva se na sovu ni ra wilika na lewe ni kalasi na tikinivola me laurai se semati vakacava vua na iVakabula kei na Nona ilesilesi na iyaya e rua oqo. E rawa talega ni o wasea ki na kalasi na ivakamacala ni sava siliva kei na nona sovu na dausavaisulu ena “iKuri ni iVurevure.” Se e rawa ni o varaitaka na vidio “The Refiner’s Fire” (ChurchofJesusChrist.org). E tautauvata vakacava na Turaga kei na “nona bukawaqa na dausava koula, kei na nona sovu na dausava isulu”? (tikina e 2). Na cava era vakavulica vei keda na ivakaraitaki eso oqo me baleta na ivakarau e vakasavasavataki keda kina na iVakabula?

3 Nifai 24:7–18

Sa dau yalololoma na Kalou vei ira era lesu yani Vua.

• E rawa ni o dusia ni ivakavuvuli me baleta na ikatini ena 3 Nifai 24:8–12 e isau ni taro ena tikina e 7: “Me keimami lesu vakaivei [vua na Turaga]?” Erau veiwekani vakacava na “[lesu] vua na [Turaga]” kei na saumi ikatini? Sa rawa ni ra wasea na lewe ni kalasi na nodra sa ciqoma na veivakalougatataki e tu ena tikina 10–12 ni ra sa sauma tiko na ikatini. Ena veivuke vakacava vua e dua e dredre tiko nona saumi katini na dina oqo?

• Na itovo ni bula cava e vakamacalataki ena 3 Nifai 24:13–15 e dau kune wasoma e vuravura nikua? Vakayaloqaqataki ira na lewe ni kalasi me ra wasea na cava era na kaya vua e dua e nanuma ni na rawarawa se vinaka cake na bula vei ira era sega ni muria na ivunau. Na cava e tukuna na 3 Nifai 24, baleta nona vakalougatataki ira era qaravi koya na Turaga? E rawa talega ni o vakauqeti ira me ra vakasaqara na ivakaraitaki ena 3 Nifai 22. (Raica talega na Mosaia 2:41; Alama 41: 10.)

3 Nifai 25:5–6

Me vagolei na yaloda vei ira na noda qase.

• Me vakaraitaka na vakasama ni vagolea na yaloda vei ira na noda qase, sureta e dua na lewe ni kalasi me gole tani mai na kalasi ka vakamacalataki ira na lewe ni kalasi mai na nona vakanananu (era dabe tiko i vei, cava era dara, kei na so tale). Oti me qai golevi ira mai na kalasi ka tovolea tale. Na cava e rawa ni vakavulica vei keda na ivakaraitaki oqo baleta noda vagoleya na yaloda vei ira noda qase ena cakacaka ni valetabu kei na tuvakawa? Ni wiliki oti na 3 Nifai 25: 5–6, de rawa ni ra wasea na lewe ni kalasi se sa gole vakacava na yalodra vei ira na tubudra. Sa rawa talega mo sureta na dautuvakawa ni tabanalevu me vakaveikilaitaki ira ki na so na iyaya ni tuva kawa. E semati vakacava na cakacaka oqo ki na kena vakasoqoni vata o Isireli ka vakamacalataka tiko o Peresitedi Russell M. Nelson ena “iKuri ni iVurevure”?

ivakatakilakila ni vuli

Vakayaloqaqataka na Vuli e Vale

Ena 3 Nifai 27–4 Nifai eda wilika kina me baleti ira na “tamata [mamarau] duadua vei ira na tamata kecega sa bulia na liga ni Kalou” (4 Nifai 1:16). Vakatura vei ira na kalasi ni kena wiliki na veiwase oqo e rawa ni vukei keda me da vulica na sala me da kunea kina marau o keda kei na noda matavuvale.

ivakatakilakila ni ivurevure

iKuri ni iVurevure

E rawa ni o vakaitavi ena dua na ka cecere.

E vakatavulica o Peresitedi Russell M. Nelson:

“Oqo dina na iotioti ni gauna, ka sa maqusataka tiko na Turaga na Nona sokumuni Isireli. Na vasokumuni oqo sa ka bibi duadua e yaco tiko e vuravura nikua. E sega tale ni vakatauvatani rawa na kena cecere, na kena sa rui bibi, ka sega ni vakatauvatani rawa na kena qaqa. Ke o sa digitaka, se o sa vinakata, sa rawa mo tiki ni cakacaka oqo. Sa rawa mo mai tiki ni dua na ka levu, dua na ka cecere, dua na ka vakaturaga!

“Ni da tukuna tiko na sokumuni, eda sa kaya tiko na ka dina oqo: ni luvena yadua na Tamada Vakalomalagi, ena yasa ruarua ni ilati, e dodonu me ra rogoca na itukutuku ni kosipeli vakalesuimai i Jisu Karisito.

“… Vakasamataka mada! Vei ira kece na tamata era a bula e vuravura, sai keda eda na vakaitavi tiko ena iotioti, ni vakasokumuni cecere oqo. Sa ka marautaki dina! …

“Na vakasokumuni oqo e dodonu me kena ibalebale vei iko na ka kecega . Oqo na itavi o talai mai kina ki vuravura ” (“Hope of Israel” [Lotu e vuravura raraba ni itabagone, 3 ni June, 2018], broadcasts.ChurchofJesusChrist.org).

Veivakadodonutaki kei na veivakasavasavataki.

E kune na siliva ni waki vata kei na so tale na ka ena loma ni oa. Ena gauna e liu, e dua na dausava siliva ena waruma tani mai na siliva ena nona biuta na oa ki na dua na lovo vakatakatai vakaukauwa sara. Oqo ena vakavudera mai dela ni oa waicala na drose (veika tawasavasava se veika sega ni vinakati). Ena qai karia tani o koya na dausava siliva na drose, ka biuta tu yani na siliva dina, ka rawa ni kilai ena kena taliva.

Na dausavaisulu sai koya e dau savata ka vakavulavulataka na isulu. Ena toni na isulu ena wai sa vakasovu tu na ena nona “sovu na dausavaisulu,” ka na kauta laivi na waiwai kei na duka. Ni sa toni tu na isulu, ena qai mokuta se butubutuka o koya na dausavasava me takali na duka. (Raica na “Refiner’s Fire and Fuller’s Soap,” New Era, June 2016, 6–7.)

Vakatorocaketaki Noda Veivakavulici

Vakavulica na tamata, ka sega ni lesoni. Na ivakarau ni nomu sotavi ira na tamata e tautauvata na kena bibi kei na veika o vakavulica vei ira. Eso na gauna ni da vakatabakidua tikoga ki na soli lesoni ena rawa me tarova na noda vakaraitaka ni da lomani ira eda vakavulica. Kevaka e a yaco oqo vei iko, vakasamataka na sala e rawa ni o vakanamata tikoga kina ena ka e bibi duadua” (Veivakavulici ena iVakarau ni iVakabula, 6).