Sa masu vata kei ira na Nifai o Jisu

Christ’s Prayer, mai vei Derek Hegsted

19–25 ni Okotova

3 Nifai 27–4 Nifai

“E Sega Tale e Dua na Matatamata Mamarau Cake”

Na vulici yadudua ni 3 Nifai 27–4 Nifai sai koya na sala vinaka duadua mo vakavakarau kina mo veivakavulici. Na ivunau kei na vakasama mai na ituvatuva oqo ena vukea nomu sotava na veivakauqeti vakayalo o na ciqoma ni o vuli.

Vola na Veika o Uqeti Kina

ivakatakilakila ni veiwasei

Sureta na Veiwasei

E dua na sala me vakayaloqaqataki ira na lewe ni kalasi me ra wasea na vakasama eso mai na nodra vuli yadua sai koya mo sureti ira me ra kunea e dua na serenilotu ka semati ki na dua na dina era sa vulica ena 3 Nifai 27–4 Nifai. Me ra qai wasea na sere ni Lotu era sa kunea ka semati vakacava ki na dina vakaivolanikalou na sere ni Lotu oqo.

ivakatakilakila ni veivakavulici

Vakavulica na iVunau

3 Nifai 27:1–22

Na Lotu i Jisu Karisito e vakatokai ena Yacana ka tarai cake ena Nona kosipeli.

• Ni veivosakitaki na yaca ni Lotu e rawa ni vakatitobutaka nodra vakavinavinaka na lewe ni nomu kalasi ena nodra lewena Na Lotu i Jisu Karisito ni Yalododonu Edaidai. Vakasamataka mo sureti ira na lewe ni kalasi me ra vola na yaca ni veimataisoqosoqo ka vakamacalataka na cava e tukuna vei keda na yaca me baleta na mataisoqosoqo oqori. Oti me ra qai wilika na lewe ni kalasi na 3 Nifai 27: 1–12, ka vaqara na nona ivakavuvuli na iVakabula me baleta na yaca ni Nona Lotu. E rawa talega ni ra wasea na kena ibalebale vei ira me da lewena na Lotu i Karisito. Na cava na kena ibalebale me da taura na yacana?

• Oqo e dua tale na sala me veivosakitaki kina na bibi ni yaca ni nona Lotu na iVakabula. Ni oti na veivosaki me baleta na dina e tiko ena 3 Nifai 27: 1–22, e rawa ni o vola na yaca taucoko ni Lotu ena vava ni volavola. Me ra qai digitaka na lewe ni kalasi na vosa ena yaca ka vakatura na sala e vukei keda kina na vosa yadua me da kila o cei o keda se na cava eda vakabauta. E rawa ni veivuke na itukutuku nei Peresitedi M. Russell Ballard ena “iKuri ni Veivuke.” Na cava na vuna e bibi kina me da vakayagataka na yaca ni Lotu ni da wasea na noda vakabauta vei ira tale eso?

• Ni vakamacalataka oti ni Nona Lotu e dodonu me “tara cake ena [Nona] kosipeli” (3 Nifai 27:10), qai vakamacalataka na iVakabula na cava na Nona kosipeli. De rawa mo sureti ira na lewe ni kalasi me ra wasea se ra na vakamacalataka vakacava vua e dua na itokani na kosipeli. Mo qai sureti ira me ra vaqara ena 3 Nifai 27: 13–22, se vakamacalataka vakacava na iVakabula na Nona kosipeli. Me da na vakalekalekataka vakacava na ka e kaya na iVakabula? Ni da vulica na nona ivakamacala na iVakabula me baleta na kosipeli, na cava eda kila rawa me baleta na sala me bulataki kina na kosipeli e veisiga?

3 Nifai 29–30

Na iVola i Momani e dua na ivakatakilakila ni sa vakayacori taucoko na cakacaka ni Kalou edaidai.

• E rawa beka ni o tekivuna e dua na veivosaki baleta na 3 Nifai 29–30 ena nomu tukuna baleta na ivakatakilakila. Me kena ivakaraitaki, e rawa ni ra tukuna na lewe ni kalasi eso na ivakatakilakila eda na kila kina ni sa lako tiko mai e dua na cava se ni sa veisau tiko na draki. E rawa ni ra qai wilika na 3 Nifai 29: 1–3 me ra kila se cava e vakaraitaki ena yaco mai ni iVola i Momani, ka vakatoka o Momani me “ivosavosa oqo” (raica talega na 3 Nifai 21:1–7). Na itukutuku cava sa solia na Turaga ena 3 Nifai 29: 4–9 vei ira era na “beca” se “cakitaka” na cakacaka ni Kalou ena iotioti ni gauna? Ena vaqaqacotaka vakacava na noda vakabauta na veika era dau “beca” se “cakitaka” eso tale na tamata ena noda gauna oqo na noda wilika e veisiga na iVola i Momani? O na vinakata beka mo sureti ira na lewe ni kalasi me ra wilika na veisureti ni Turaga ena 3 Nifai 30 ka wasea na sala sa vukei ira kina na iVola i Momani me ra ciqoma na veisureti oqo.

4 Nifai

Na saumaki vei Jisu Karisito kei na Nona kosipeli ena vakavuna na duavata kei na marau.

• Na italanoa ena 4 Nifai e vakaraitaka na reki e rawa ni yaco mai ki na noda bula—vakatamata yadua, vakamatavuvale, ka vakakina ena dua na tabanalevu se iteki—ni da segata me taucoko noda saumaki vei Jisu Karisito. Navuca mo tarogi ira na lewe ni kalasi me ra vakasaqara na 4 Nifai 1:1–18 ka vola ena vava ni volavola na veivakalougatataki e yaco kivei ira na tamata ni ra sa saumaki lesu kece vua na Turaga. E tara vakacava na nodra bula veimaliwai na nodra saumaki mai? Ena rawa beka ni ra wasea na lewe ni kalasi se sa kauta mai vakacava ki na nodra matavuvale se na nodra tabanalevu na veivakalougatataki vaqo na kosipeli. Me vukea nodra kila na kalasi na ivakarau eda rawa ni bula kina me vakataki ira na tamata ena 4 ni Nifai kei na ivakarau e rawa ni da vakauqeta kina na duavata cecere kei na mamarau vei ira eda bula veimaliwai, e rawa ni o wilika na itukutuku mai vei Elder D. Todd Christofferson ena “iKuri ni iVurevure.” Me ra qai dikeva na lewe ni kalasi na ivakarau ni nodra dui sasaga ena tolu na tikina e vakamacalataka o Elder Christofferson.

• O ira na tamata ena iVola i Momani era a vakaduiduitaki ira me ra Nifaiti ka Leimanaiti— kei na vuqa tale na mataqali “-aiti”—ena veisenitiuri, ia ni mai cava na nona veiqaravi na iVakabula ena kedra maliwa, sa yali yani na veivakaduiduitaki oqo. Ni oti na wiliki vata ni 4 Nifai 1:17 , ke rawa ni ra wasea na lewe ni kalasi na nodra nanuma me baleta na mataqali “-aiti” vakacava se ilawalawa era tu ena noda veitikotiko nikua. Na cava e rawa ni da cakava me da ulabaleta kina na duidui vaqo ka yaco vakaidina me “duavata ga, na luve i Karisito”? (tikina e 17).

• Na cava e rawa ni ra vulica na lewe ni kalasi mai na malumalumu kei Saioni e vakamacalataki ena 4 Nifai? E rawa mo sureti ira me ra vakasaqara na 4 Nifai 1:19–34, ka vakasaqara na veika a mai vakaotia na mamarau kei na duavata era a vakila tu na tamata ena volekata ni 200 na yabaki ni oti nona veisiko mai na iVakabula. Na dina cava soti ena veitikina oqo e rawa ni vukei keda me da raica na ivakarau ni rai kei na itovo e dodonu me veisau ena noda bula kei na noda itikotiko?

ivakatakilakila ni vuli

Vakayaloqaqataka na Vuli e Vale

NaMomani 1– 6 e vakamacalataka na veika rerevaki ka vakavuna na nodra vakarusai na tamata i Nifai. Me vakayaloqaqataki ira na lewe ni kalasi me ra wilika na iwase eso oqo, sureti ira me ra raica na veika e tu vei ira na Nifai eda raica ni yaco tiko ena noda gauna oqo.

ivakatakilakila ni ivurevure

iKuri ni iVurevure

Na yaca ni Lotu i Karisito.

E kaya o Peresitedi M.Russell Ballard:

“Au sa dau vakasamataka tu vakalevu na cava na vuna e vakatoka kina na Nona Lotu vakalesui mai na iVakabula ena yaca ka ciwa na kena vosa oqo. Sa na rui balavu beka, ia kevaka eda vakasamataka ena ivakamacala raraba ni veika e tutaka na Lotu, sa yaco kina me totoka ka lekaleka vinaka, matata, ka rawarawa. E rawa vakacava ni dua na ivakamacala me vakadodonu ka matata ka vakamacalataki ga ena vica na vosa?

“Na veimalanivosa yadua e ivakamacala ka sega ni rawa ni vakuwai. Na vosa Na e vakaraitaka na itutu ni Lotu vakalesui mai ena kedra maliwa na veimatalotu ni vuravura.

“Na vosa Lotu i Jisu Karisito e tukuna ni oqo e Nona Lotu [raica na 3 Nifai 27: 8]. …

Na “Edaidai e vakamacalataka ni sai koya vata ga na Lotu a tauyavutaka o Jisu Karisito ena gauna ni nona veiqaravi vakalotu ena bula oqo ia sa vakalesui tale mai ena gauna oqo. Eda kila ni a dua na lutu tani, se vukitani, ka yaco kina na kena vakalesui tale mai na Nona Lotu dina ka taucoko ena noda gauna oqo.

“Yalododonu e kena ibalebale o ira na lewena era muri Koya ka saga mera cakava na Nona lewa, maroroya na Nona vunau, ka vakarautaki ira mera laki bula vata tale kei Koya kei na Tamada Vakalomalagi ena gauna mai muri. NaYalododonu sai ira era dau segata me savasava nodra bula ena nodra veiyalayalati me ra muria na Karisito” (“Na Bibi ni Dua na Yaca,” Ensign se Liaona, Nove. 2011, 80).

Na cava me na caka me tara ko Saioni?

A vakatavulica o Elder D. Todd Christofferson: “e Saioni ko Saioni ena vuku ni itovo ni bula, ivakarau, kei na nodra yalodina na lewena [raica Mosese 7:18]. … Kevaka me da tauyavutaki Saioni ena noda vuvale, tabana, tabanalevu kei na iteki, me da na tubu cake ki na ivakatagedegede oqo. Sa ganita (1) me da dubau ena noda yalovata ka vakasama vata; (2) me da yaco kina, vakayadua ka vakamatatamata, me matatamata yalo savasava; ka (3) vukei ira na dravudravua kei na vakaleqai ena gugumatua me kua kina na dravudravua vei keda. Eda na sega ni rawa ni wawa me yacova ni sa yaco mai o Saioni me qai yaco na veika oqo—ena yaco mai ko Saioni ni ra sa yaco” (“Lako mai ki Saioni,” Ensign se Liaona, Nove. 2008, 38).

Vakatorocaketaki Noda Veivakavulici

Vakayagataka na veimataqali iwalewale eso Ena dau rawarawa me vakamatautaki e dua ga na ivakarau ni veivakavulici, ia na duidui ivakarau ni veivakavulici e curumi ira yadua yani na lewe ni kalasi. Vakasamataka mada na iwalewale o sa vakayagataka ena dua gauna oqo—o a vakayagataka beka na italanoa, iyaya, lesoni, iyaloyalo, kei na so tale? (raica na Veivakavulici ena iVakarau ni iVakabula,7).