E volavola koto o Momani ena peleti koula

Mormon Abridging the Plates, mai vei Tom Lovell

26 ni Okotova–1 ni Noveba

Momani 1–6

“Au Gadreva meu Vakamasuti Ira na Tamata Kecega … me ra Veivutuni”

Ni o wilika na Momani 1–6, raica na dina e rawa ni vukei ira na lewe ni nomu kalasi me ra yalodina tikoga ena gauna ni caka ca, me vaka a vakayacora o Momani.

Vola na Veika o Uqeti Kina

ivakatakilakila ni veiwasei

Sureta na Veiwasei

Ena so na gauna era dau lomalomarua na lewenilotu me ra wasea na nodra vakasama baleta ni ra se bera ni tuva vinaka nodra nanuma. Me vukei ira, solia vei ira e vica na miniti me ra vola na vakasama era rawata mai na nodra vulica mai vale na Momani 1–6 qai kerei ira me ra wasea.

ivakatakilakila ni veivakavulici

Vakavulica na iVunau

Momani 1–6

Eda rawa ni buladodonu se cava ga na ca e vakavolivoliti keda.

• E vuqa vei ira na lewe ni nomu kalasi ena rawa ni kila na veika a sotava o Momani ena nona sasaga me bula dodonu ena dua na vuravura ca. De rawa ni ra wasea na veika era sa vulica mai na ivakaraitaki nei Momani. Me vukea nomu tosoya na veivosaki, e rawa ni o sureti ira na lewe ni kalasi me ra kunea na veika vinaka e tu vei Momani ka vola na veika oqori ena vava ni volavola (raica, me kena ivakaraitaki, Momani 1:2–3, 15–16; 2:1, 23–24; 3:1–3, 12, 17–22). E vukei Momani beka vakacava na veika oqo me kaukauwa tikoga vakayalo? Era vukei keda vakacava me da vakataki Momani vakalevu cake?

  Era veivaluvaluti tiko na Nifaiti kei ira na Leimanaiti

  Battle, mai vei Jorge Cocco

• Dau ^{Dua e}a volavola vakadodonu o Momani vei ira na tamata ena noda gauna oqo. (P. 127 in Galley, 1st para, 1st line, 1st word - file 42 in Trados) Na cava eda rawa ni vulica mai na nona vosa vei keda ena Momani 3:17–22 kei na 5:10–24? Solia vei ira yadua na lewe ni kalasi e dua na tiki ni pepa e volai tu e cake na malanivosa “Na ivakasala i Momani vei keda”, ka vakauqeti ira me ra vakasaqara na itukutuku ena veitikina oqo ka baleta talega na noda gauna. E rawa vakacava ni da vakayagataka na ivakasala nei Momani me vukea na noda tudei vakayalo ena vuravura nikua?

• Kevaka o vakavulici ira na itabagone, sa rawa mo vakayagataka na ivakaraitaki nei Momani me vukea nodra kila ni rawa ni ra iliuliu bula dodonu ni ra se gone. Kevaka o vakavulica na itabaqase, sa rawa mo vakayagataka nona ivakaraitaki me uqeti kina e dua na veivosaki me baleta na madigi eso me ra vukei na itabagone me ra iliuliu vinaka. Me tekivu na veivosaki, sa rawa mo kerei ira eso na lewe ni kalasi me ra railesuva na Momani 1 kei ira tale eso me ra railesuva na Momani 2, ka raica na veimadigi a soli vei Momani me veiliutaki ena nona veiyabaki taumada. Na ivakarau ni bula cava soti sa tiko vua ka yaco kina me dua na iliuliu cecere? E rawa ni ra wasea na lewe ni kalasi na ivakaraitaki era sa raica me baleta na veivakayarayarataki mana ni gonelalai kei na itabagone buladodonu. E rawa talega ni veivosakitaki na madigi e tu vei ira—se vei ira eso na itabagone era kila—me ra veiliutaki me vaka e tu vei Momani.

Momani 2:10–15

Na veivutuni e gadreva na yalo raramusumusu ka bibivoro.

• Me ra vulica me baleta na kedrau duidui na rarawa ena vakavuna na veivutuni kei na rarawa e sega, vakasamataka me wiliki vata na Momani 2:10–15 ka veivosakitaka na taro vakaoqo: Na cava na itavi ni “yalorarawa” ena veivutuni? Na cava e tiko na kedrau duidui na “yalorarawa … ki na veivutuni” kei na nodra “yalorarawa na cudruvi”? Na ivakarau ni rai kei na itovonibula cava e rawa ni vukei keda me “raramusumusu ka bibivoro na yalo”?

Momani 3:12.

Eda rawa ni lomani ira na tani, kevaka sara mada ga eda sega ni duavata ena nodra digidigi.

• Me vakataki Momani, e vuqa na lewe ni nomu kalasi era veimaliwai voleka kei ira na tamata era sega ni duavata kei na nodra vakabauta. O na vakayagataka vakacava na veika a sotava o Momani mo vakavulici ira kina na lewe ni kalasi me baleta na lomani ira na tani se cava ga nodra duidui? Vakasamataka mo ni wilika vata na Momani 3:12 ka veivosakitaka na gauna eso e vakaraitaka kina o Momani na loloma vei ira era sega ni ciqoma na nona itukutuku ka nakita me ra talaidredre vua na Kalou (raica, me kena ivakaraitaki, Momani 1:16–17; 2:12). Na cava e rawa ni ra wasea na lewe ni kalasi mai na nodra bula baleta nodra lomani o ira era sega ni duavata kei na veika era vakabauta se na veika yaga? Na itukutuku nei Peresitedi Dallin H. Oaks ena “iKuri ni iVurevure” ena solia na ikuri ni ivakasala.

Momani 6:17.

Tucake tu o Jisu Karisito ka dolava tu na ligana me ciqomi keda.

• Me baleti ira sa sega beka nodra inuinui ni rawa ni ra vosoti, e rawa ni veivakadeitaki na ivakamacala nei Momani baleta na iVakabula ni tucake “ka tadola tu na ligana me ciqomi keda.” Vakasamataka mo ni wilika vata na Momani 6:17 ka vakaraitaka e dua na iyaloyalo kei Jisu Karisito ni dodo tu na ligana (me vaka na iVola ni iYaloyalo Vakosipeli, naba 66). Na cava e vakavulica na tikina oqo me baleta nona gagadre na iVakabula me vukei keda? E rawa talega mo ni lagata vata e dua na serenilotu ka vakavulica e dua na itukutuku e tautauvata me vaka na “Bau mai vei Jisu” (sere ni Lotu, naba 64). E rawa talega ni o wasea na veika a sotava o Peresitedi Russell M. Nelson ena “iKuri ni iVurevure” ka kerei ira na lewe ni kalasi me ra veivosakitaka na sala e rawa ni da vukei ira kina na tani me ra kila ni rawa na veivutuni.

ivakatakilakila ni vuli

Vakayaloqaqataka na Vuli e Vale

E rawa mo kerei ira na lewe ni kalasi me ra vakasamataka na veika me ra vola ena dua na ivola kivei ira na tamata ena veisiga ni mataka. Eda wilika ena Momani 7–9 na veika erau vola o Momani kei Moronai, ena vica na senijiuri sa oti, vei ira na tamata ena noda gauna oqo.

ivakatakilakila ni ivurevure

iKuri ni iVurevure

Lomani ira na tamata e duatani nodra vakabauta.

A vakamacala kina vaqo o Peresitedi Dallin H. Oaks:

“E dodonu me da muria taucoko na ivakavuvuli ni kosipeli me da lomani ira na wekada ka levea na veiqati. O ira na daumuri Karisito e dodonu me ra ivakaraitaki ni ivalavala malua. E dodonu me da lomana na tamata kecega, dau vakarorogo vinaka, ka kauwaitaka na veika era vakabauta ena yalodina. E dina beka ni da na sega ni duavata, e sega ni dodonu me da vakaraitaka. Na veika eda tutaka kei na noda veivosaki ena ulutaga eda duidui kina me kakua ni veiletitaki. Me da yalomatua ena kena vakamacalataki ka segati na veika eda tutaka kei na noda vakavotukanataka na lomada. Ni da vakayacora vakakina, me da kerea me ra kakua ni cudruvaka na tani na noda vakabauta tudei vakalotu kei na noda bulataka ena galala na noda lotu. Keimami vakayaloqaqataki keda kece me da vakatovotovotaka na nona Lawa Koula na iVakabula: ‘O koya na ka vakaadua ga dou sa vinakata me ra kitaka vei kemudou na tamata, dou kitaka vakatalega kina vei ira’ (Maciu 7:12).

“Ni sega ni yaco na veika eda tutaka, e dodonu me da ciqoma ena yalovinaka na veika e sega ni vaka na lomada, ka dau ivalavala malua ena vukudra na keda meca.” (“Veilomani ka Bulavata ena Maliwa ni Duidui,” Ensign se Liaona, Nove. 2014, 27).

E rawa na veivutuni.

A wasea o Peresitedi Russell M. Nelson na veika a sotakaya:

“Ena yabaki sa oti ni keirau draiva tiko kei Elder David S. Baxter ki na dua na koniferedi ni iteki, keirau a kele ena dua na valenikana. E muri ni keirau sa lesu mai ki na neirau motoka, a torovi keirau mai e dua na marama ka kaci mai. … A taroga ke o keirau na italatala qase ena Lotu. Keirau vakaio. E sega ni bera, nona sa talanoataka mai nona bula leqa, vesuki tu ena ivalavala ca. Ia oqo, se qai yabaki 28, sa rarawa tu vakalevu. E vakila ni sa sega na betena, sega na ibalebale ni bula vua. Na gauna e vosa tiko kina, sa tekivu me basika na taleitaki ni yalona. Ni vakatakekere ena luluvu, a taroga kevaka se vo e dua nona inuinui, na sala cava ga me laveti ka vueti tani kina mai na vakanuinuica.

“‘Io,’ keirau sauma mai, ‘e tu na inuinui. Na inuinui e semati ki na veivutuni. Sa rawa mo veisau. “Io, dou lako mai vei Karisito, ka mo dou vakataucokotaki vua” [Moronai 10:32]. Keirau vakauqeti koya me kakua ni lokuyara [raica Alama 13:27; 34: 33]. A mamakeukeu ena yalomalumalumu ka vakavinavinaka ena yalodina.

“Ni keirau tomana kei Elder Baxter na neirau ilakolako, keirau vakasamataka vakatitobu na veika keirau sotava oqori. Keirau nanuma lesu na ivakasala a solia vua e dua sa sega tu nona inunui o Eroni, ka kaya vua ‘Kevaka ko na veivutunitaka nomu ivalavala ka cuva vua na Kalou, ka kaciva na yacana ena vakabauta, … ia ko na qai ciqoma na inuinui me vaka ko sa gadreva’ [Alama 22:16]. …

“… Ki vua na yalewa yabaki 28 ka sikalutu tu ena lolobo ni ivalavala ca, kei keda yadua, au kaya ni sa tu na veivakalougatataki kamikamica ni veivutuni. E yaco mai ena taucoko ni saumaki vua na Turaga kei na nona cakacaka tabu.”

Me kena ikuri, e dikeva rawa o Peresitedi Nelson: “Eda nanumi ira talega na tamata ivalavala ca ena nona veimarori na nodra iliuliu veikauwaitaki, o Momani, ka a vola, ‘au sa sega ni nuitaka sara, niu kila ni na tau vakaidina vei ira na lewa ni Turaga; ni ra sa sega ni veivutunitaka nodra caka cala, ia era sa sasagataka ga na nodra bula ka sega ni vakararavi vei Koya ka a buli ira’ (Momani 5:2)” (“Veivutuni kei na Saumaki Mai,” Ensign se Liaona, Me 2007, 102, 104).

Vakatorocaketaki Noda Veivakavulici

Na tubucake vakayalo e yaco e vale. Era vakayagataka nomu lewe ni kalasi e 165 na auwa ena veimacawa ena taudaku ni Lotu. Ena gauna oya, era sotava kina na nodra veika vakayalo ka vakavulici ira me baleta na kosipeli. Taroga na taro ena vakayaloqaqataki ira na vuli me ra wasea na veika era sa vulica ena loma ni macawa kei na nodra matavuvale (raica na Veivakavulici ena iVakarau ni iVakabula,18).