Era sa Biubiu na Jeretaiti mai Pepeli, mai vei Albin Veselka

9–15 ni Noveba.

Ica 1–5

“Dresuka Kina na iUbi ni Tawavakabauta”

Na dina cava soti o sa vulica ena gauna ni nomu vulica vakai iko na Ica 1–5 ka rawa mo wasea vei ira o vakavulica tiko? Na madigi cava ko na solia vei ira me ra wasea na veika era sa vulica?

Vola na Veika o Uqeti Kina

Sureta na Veiwasei

Sa rawa mo vakayagataka na sala vou oqo me sureti kina na veiwasei: Solia eso na vatu ki na 16 na lewe ni kalasi, ka sureta e vica vei ira mera wasea e dua na ka era nanuma mai na nodra vulica yadudua se vakamatavuvale na Ica 1–5. Na veika cava era sa cakava ena vuku ni ka era sa vulica?

Vakavulica na iVunau

Ica 1–3; 4:8–19

Ni da dau kerea tikoga vua na Turaga, ena vakatakilai mai na Lomana.

• Eda dau segata vakaukauwa oi keda yadudua meda kunea na isaunitaro ki na dua na leqa se taro. Ena rawa vakacava na veika a sotava na tukai Jereti me vukei ira ko vakavulica tiko mera kerea na veivuke ni Turaga? Sa rawa mo droinitaka e dua na ituvatuva ena vava ni volavola e vica na kolomu me volai kina na taro nei taci Jereti, na ka a cakava o taci Jereti, kei na veika a sauma mai na Turaga. Mo qai wasea na kalasi ki na tolu na ilawalawa ka solia vei ira yadua e dua na kolomu. Sa rawa mera dui cakacaka na ilawalawa yadua mera vakadikeva na Ica 1:33–43 kei na 2:16–3:6 ka vola ena nodra kolomu na veika era sa raica rawa. Ni oti mera qai veivosakitaka na kalasi na taro vakaoqo: Na cava eda sa vulica me baleta na sala eso e vinakata na Turaga me vukei keda kina? Na cava eda sa vulica me baleta na noda itavi ena ivakarau ni kena dau ciqomi na ivakatakila? Sa rawa mera wasea na lewe ni kalasi na ivakaraitaki tale eso mai na ivolanikalou e vakavulica na ivakavuvuli vata vakaoqo. Na itukutuku nei Elder Richard G. Scott ena “iKuri ni iVurevure” e vakarautaka na ikuri ni veivakararamataki me baleta na sala na Turaga e dau sauma kina na masu.

• Na masu nei taci Jereti ena Ica 3:1–5 e rawa ni vakauqeti ira na lewe ni kalasi me ra dikeva na nodra dui masu. Sa rawa mera raitayalotaka na lewe ni kalasi ni ra sa vakasalataka tiko e dua se qai vulica tiko na sala me dau masu kina. Na ivakasala cava era na solia? Ia sa qai rawa mera vakasaqaqara ena Ica 3:1–5 ka vakamacalataka vakaleleka na tikina yadua vata kei na dua se rua na iwalewale se na ivakavuvuli ni sala me mana kina na masu. Sa rawa mo solia ki na lewe ni kalasi e vica na miniti me ra vakasamataka na nodra masu kei na sala e rawa ni ra muria kina na ivakaraitaki nei taci Jereti me vakaibalebale vakalevu cake kina na nodra masu.

• Ni oti na veiwaseitaki ni ivakatakila a yaco vei taci Jereti ena Ica 3, a vakasala o Moronai ena Ica 4 me baleta na sala e rawa ni da ciqoma kina na ivakatakila mai vua na Turaga. Ni gadrevi mera vukei na lewe ni kalasi mera vuli mai na ivakasala oqo, sa rawa mo vakaraitaka e dua na iyaloyalo kei Jisu Karisito ka sureta na kalasi mera vasaqara ena Ica 4:8–10 na veika e rawa ni vakataotaki keda meda ciqoma na ivakatakila se dina mai vua na Turaga. Ni ra veiwasei tiko na kalasi ena veika era sa kunea, sa rawa mo ubia vakamalua na iyaloyalo kei Karisito ena dua na isulu se pepa. E rawa vakacava ni da levea na veivakataotaki vakayalo oqo ena noda bula? Tarava sara, mera vakasaqara na lewe ni kalasi ena Ica 4:7, 11–15, na sala sa rawa meda ciqoma kina na dina mai vua na Turaga. Ni ra sa wasea tiko na kalasi na veika era sa kunea, mo qai cereka na isulu se pepa. Na cava na kena ibalebale “meda vakabauta … na Turaga, me vaka a vakayacora na tuakai Jereti”? (Ica 4:7; raica talega na Ica 3:1–9). Na cava na ibalebale mo “dresuka [na] iubi ni tawavakabauta” ki na noda bula? (Ica 4:15). Eda na vukei ira vakacava tale e so mera cakava vakakina? Mera raica talega na lewe ni kalasi na dina me baleta na ivakatakila ki na tamata yadua ena itukutuku nei Peresitedi Russell M. Nelson “iVakatakila ki na Lotu, iVakatakila ki na Noda Bula” (Ensign se Liaona, Me 2018, 93 – 96).

Ica 2:14–15

Ena nona veivunauci, sa sureti keda kina na Turaga meda veivutuni ka lako mai Vua.

• Me vakataka na parofita e cecere vakataka na tuakai Jereti sa vunauci vakakina mai vua na Turaga. Io e dina, na ka a yaco me cecere kina o koya o ya na sala a ciqoma kina na nona vunauci. Ni gadrevi mera vukei na lewe ni kalasi mera vuli mai na ivakaraitaki nei taci Jereti, mo sureti ira mera veisa vakayarurua ka wilika na Ica 2:14–15 . Qai kerei ira me vaka ni dua sa taci Jereti kei na kena ikarua me dua se qai vunauci oti ga mai vua e dua na itubutubu se na iliuliu ni Lotu. Me ra veivosakitaka se dramataka na ka ena rawa ni kaya na tuakai Jereti me baleta na veika a sotava me vukea kina na tamata oqo. Na ivakasala cava e rawa ni solia? Na lesoni cava eda sa vulica ka na vukei keda meda toro voleka vua na Tamada Vakalomalagi? E rawa talega mo veivosakitaka na sala a vunauci taci Jereti kina na Turaga kei na ka a cakava o koya a rawa ni vukea me vakarautaki koya ena ka a sotava ena Ica 3:1–20. Oqo eso tale na ivurevure ena rawa ni veivuke: Na itukutuku nei Elder D. Todd Christofferson “O Ira Kecega Kau sa Lomana, Kau sa Vunauca ka Cudruva” (Ensign se Liaona, Me 2011, 97–100) se ena ulutaga ni iwasewase “Bula Vakaivakarau” ena vosa nei Elder Lynn G. Robbins “Na Turaganilewa Yalododonu” (Ensign se Liaona, Nove. 2016, 96–97).

Ica 5

E tolu na dauivakadinadina e ratou vakadinadinataka na dina ni ivola i Momani.

• Na kena vulici vakalevu na parofisai nei Moronai me baleti iratou na Tolu na Dauivakadinadina ena rawa ni vukea na nodra ivakadinadina na lewe ni kalasi baleta na iVola i Momani. Sa rawa me wilika e veimama ni kalasi na Ica 5 kei na ikarua ni veimama me wilika “Na iVakadinadina ni Lewe Tolu” (ena itekivu ni iVola i Momani) ka veiwaseitaka vakai ira na veika era nanuma me sa inaki ni Turaga me vakatarai iratou na Lewe Tolu na Dauivakadinadina me ratou raica na agilosi kei na peleti. Era rawa ni ra veivosakitaka talega eso tale na gauna era a vakadinadinataka kina eso na dina (raica, me kena ivakaraitaki, Maciu 3:13–17; 18:15–16; Joni 5:31–47; VV 128:3). Na ivakadinadina cava ena noda bula e vakauqeti keda meda vakabauta? Sa yaco vakacava “na kaukauwa ni Kalou kei na nona vosa” sa “vakaraitaki yani” vei keda ena iVola i Momani? (Ica 5:4).

Vakayaloqaqataka na Vuli e Vale

Sureti ira na lewe ni kalasi mera raitayalotaka mada ni ra sa veivesu ka veivakamatei tiko vakai ira na nodra iliuliu vakapolitiki. Ena Ica 6–11, era na wilika kina na kena yaco oqo kivei ira na kawa i Jereti kei tuakana. Era na raica talega eso na ivakaro ena vukea mera levea na leqa era a sotava na Jeretaiti.

iKuri ni iVurevure

Noda kila na isau ni masu.

E vakavulica o Elder Richard G. Scott:

“Ni da vakamacalataka e dua na leqa kei na dua na kena iwali vakaturi, ena so na gauna e sauma mai o Koya io, ena so na gauna na sega. Sa dau vakavuqa me qai sauma malua mai o Koya, sega ni baleta ni sega ni kauwai kina, ia e baleta ga ni lomani keda o Koya—vakavinaka sara. E vinakata o koya meda bulataka na dina e sa solia vei keda o Koya. Ni gadrevi meda tubu, ena gadreva meda nuitaka noda gugumatua meda vakatulewa vakadodonu. Meda sa cakava ga na ka eda vakila ni sa dodonu. Ena yaco na gauna, mena sauma mai o Koya. Ena sega ni vakadrukai keda. …

“… E gadreva o Koya meda cakacakataka meda kila kina:

“Ni sa sauma mai o Koya ena io, meda na nuidei kina.

“Ni sa sauma mai o Koya ena sega, ena tarova na ka cala.

“Ni sa gauna me qai sauma malua mai kina, sa baleta meda tubu cake ena vakabauti Koya, talairawarawa ki na Nona ivakaro, ka lomada meda cakacaka ena dina. Sa namaki vei keda me da nanuma tiko ni sa noda ilesilesi meda vakatulewa e vakaivakarau ki na Nona ivakavuvuli ka sega ni veivakadeitaki taumada. Meda kakua ni dau dabe wawa voli se vosa kudrukudru baleta ni sa sega ni vosa mai na Turaga. Meda sa cakacakataka yani” (“Vulica Mo Kila na iSau ni Masu,” Ensign, Nov. 1989, 31-32).

Vakatorocaketaki Noda Veivakavulici

Lako mada e liu ki na ivolanikalou Na ivolanikalou e dodonu me ivurevure taumada ni nomu vuli kei na vakavakarau. Kakua ni guilecava ni nodra vosa na parofita ni gauna oqo sa vakaqaqacotaka tiko na ivolanikalou vakarautaki ka ra sa ivolanikalou talega kina (raica na Veivakavulici ena iVakarau ni iVakabula, 17–18).