I Will Bring You up Again out of the Depths, mai vei Jonathan Arthur Clarke

16–22 ni Noveba.

Ica 6–11

“Me Mudu Kina na Ca”

Nanuma tiko na itukutuku era tu ena iVola i Momani e a volai me baleta na noda gauna. Ni ko vakavakarau mo veivakavulici, vakadikeva mada na itukutuku vakaivolanikalou oqo mo kunea na ivakavuvuli e rawa ni vaqaqacotaki ira na lewe ni kalasi me ra sotava na bolebole ena nodra bula.

Vola na Veika o Uqeti Kina

Sureta na Veiwasei

Me vukei ira na lewe ni kalasi me ra wasea e dua na ka era kunea ni vakaibalebale vakalevu ena Ica 6–11, mo sureti ira me ra raitayaloyalotaka ni vakarau caka e dua na iyaloyalo ni wase e vica oqo; na malanivosa cava mai na Ica 6–11 era vakatura me yacana? Solia na gauna me ra vakasamataka kina na ka oqo, ka sureti ira mera wasea na yaca era digitaka ka vakamacalataka na vuna.

Vakavulica na iVunau

Ica 6:1–12

Ena dusimaki keda na Turaga ena noda ilakolako ni bula oqo.

• Na ituvatuva ena macawa oqo ena Lako Mai, Mo Muri Au—Baleta na Tamata Yadua kei na Matavuvale e vakatura me veidutaitaki nodra soko kosova na wasawasa na Jeretaiti ki na noda ilakolako ena bula oqo. Kerei ira na lewe ni kalasi era tovolea mai vale na itaviqaravi oqo me ra wasea na rai era rawata mai na ivakaraitaki oqo. Me vukei ira na lewe ni kalasi me ra vakuria na veidutaitaki ena kalasi, sureti ira me ra raica na Ica 6:1–12 me baleta na ivakamacala ni lakolako ka tu na kena ibalebale ivakatakarakara (me vaka na vatu ni rarama, na waqa, kei na cagi) ka tuvai ira ena vava ni volavola. Me ra qai cakacaka veisasa se vakailala lalai na lewe ni kalasi me vica na miniti me ra vulica na veitikina ka veivosakitaka na veika e rawa ni ra matataka na ivakatakarakara eso oqo ena noda bula. Me kena ivakaraitaki, na cava na noda “vanua yalataki”? (tikina e 8). E dusimaki keda vakacava na Kalou ena noda ilakolako?

• Sa rawa mo vakayagataka na Ica 6:1–12 me vakauqeta na veivosaki me baleta na ivakarau e vukei keda kina na Kalou me da tubu cake ena gauna ni noda vakatovolei. Kena ivakaraitaki, na vosacavuti ena “iKuri ni Veivuke” e rawa ni vukei ira na lewe ni kalasi me ra veidutaitaka kei na “cagi kaukauwa” ka tukuni tiko ena tikina e 5–8 kei na kalouca ni bula. Na cava era cakava na kawa i Jereti ni ra sa “ubi tu e loma ni wai”? (tikina e 7). E rawa ni ra wasea na lewe ni kalasi na gauna a tosoi ira kina ki liu na kalouca era sotava. A vukei ira vakacava ena nodra toso yani ki na nodra “vanua yalataki” na ivakarau ni nodra sotava na nodra veivakatovolei? A vukei ira vakacava na Turaga ena nodra sasaga? Vakayaloqaqataki ira me ra raica na vosa kei na malanivosa mai na Ica 6 ni ra wasea na veika era sotava kei na nodra vakanananu.

  

  Nodra iLakolako Kosovi Esia na Jeretaiti, mai vei Minerva Teichert

Ica 6:7–18, 30; 9:28–35; 10:1–2

Sa dau vakalougatataki keda na Turaga ni da yalomalua.

• E dina ga ni levu na kedra italanoa na Jeretaiti e tukuni kina na revurevu ca ni dokadoka kei na caka ca, e tu talega kina ne veigauna eso ni yalomalumalumu kei na bula sautu e rawa ni da vuli mai kina. Me vukei ira na lewe ni kalasi me ra vuli mai na ivakaraitaki vinaka eso oqo, e rawa ni o wasea vakarua na kalasi me wilika e dua na ilala na Ica 6:7–18 kei na 30. ka wilika na ilala kadua na: Ica 9:28–35 kei na 10:1–2. Kerei ira me ra raica mai ena veitikina oqo na ivakadinadina ni ra a vakayalomalumalumutaki ira na Jeretaiti—se sa vakayalomalumalumutaki ira na nodra ituvaki ni bula—kei na nona vakalougatataki ira kina na Turaga. Ni sa veirauti na gauna e soli vei ira na lewe ni kalasi, sureti ira eso mai na ilala ruarua me ra wasea na veika era vulica. E vukei keda vakacava na yalomalumalumu me da toro voleka vua na Kalou? E rawa ni vakuri na itaviqaravi oqo ena vakarorogo ki na dua na serenilotu me baleta na yalomalumalumu, me vaka na “Au Rai Vei Kemuni” (sere ni Lotu, naba 51).

Ica 7–11

O ira na iliuliu ivalavala dodonu era dusimaka na tamata vua na Kalou.

• O ira mada ga era se bera ni bau ciqoma e dua na itutu vakaveiliutaki e rawa ni ra vuli mai na nodra ivakaraitaki na tui buladodonu kei ira na tui ca ni Jeretaiti; na iitukutuku eso oqo e rawa ni vukei keda me da iliuliu vinaka cake ena noda veivale, ena itikotiko, kei na lotu. E na rawa beka ni o tekivuna e dua na veivosaki ena ulutaga oqo ena nomu kerei ira na lewe ni kalasi me ra vakasamataka e dua era nanuma ni iliuliu vinaka. Sureti ira me ra wasea vakalekaleka eso nona ivakarau ni bula vinaka na tamata oya, ka vola e dua na ituvatuva ena vava ni volavola. Mo qai lesia vei ira yadua na lewe ni kalsi me ra vulica na veika baleta e dua na nodra tui na Jeretaiti ena Ica 7–11. (E dua na lisi ni tui, vata kei na idusidusi ena ivolanikalou ka vakamacalataka na nodra gauna ni lewa, sa tiko ena ituvatuva ena macawa oqo ena Lako Mai, Mo Muri Au—Baleta na Tamata Yadua kei na Matavuvale.) E rawa ni ra wasea na lewe ni kalasi na veika era vulica mai vei ira na tui oqo me baleta na veiliutaki, ka vakuria ena so tale na itovonibula vinaka era kunea ena vava ni volavola. Eso tale na ivakarau vinaka ni veiliutaki sa tuvai tu ena “iKuri ni iVurevure.” E rawa vakacava me da tara cake na ivakarau oqo ka veiliutaki, kevaka sara mada ga e sega ni dua noda ilesilesi ni veiliutaki?

Vakayaloqaqataka na Vuli e Vale

Me vakauqeta nodra taleitaka na lewe ni kalasi me ra wilika na Ica 12–15, e rawa ni o tukuna ni ena iwase eso oqo a vakaraitaka kina o Moronai vua na Turaga eso na nona lomaleqa me baleta na itukutuku a maroroya tiko. Na nona vosa na Turaga e rawa ni vukei keda ni yacovi keda mai eso na yalo vakakoya.

iKuri ni iVurevure

E vakarautaki keda na noda vakatovolei me da ciqoma na bula tawamudu.

Ni vosa tiko ena dua na koniferedi raraba ena veiyabaki dredre ni iKarua ni iValu Levu, a kaya kina o Elder Charles A. Callis ena Kuoramu ni iApositolo Le Tinikarua: “E tukuni ni ena gauna e seredali kina nodra waqa na Jeretaiti me soko mai ki na vanua yalataki qo, a liwa tu e dua na cava kaukauwa. A liwa mai na cagi ka ra sa toka kina ena dua na itokatoka rerevaki ena ilakolako taucoko oya. A tokoni ira tiko na Kalou. Ia eda wilika ni dina ga ni a cudru tu na cava kei na cagilaba oya, ka kauta voli na veivakarusai e nona sala, ia a liwa tikoga yani ki na Vanua Yalataki. Ia ena veigauna dredre eda lakocuruma tiko, na ivalu vakadomobula kei na veika rerevaki tale e yaco tiko, era tiko ena loma ni nona kaukauwa na Kalou. E rawa ni tarova ena gauna e lewa kina, ni sa vakayacori na Nona inaki vakalou. Ia me da kakua ni guilecava ni ena wasawasa oqo ni bula leqaleqa, noda kalouca, na veika eda lako sivita ka na qai cakava vata na Kalou me da vinaka kina, kevaka eda talirawarawa Vua—na veika kece oqo sa biligi keda tiko yani ki na ivakavakacegu, ki na dua na mataka lagilagi, ki na bula tawamudu” (ena Conference Report, Epe. 1943, 62).

Veika e tu vei ira na iliuliu ivalavala dodonu.

“Ena matanitu ni Kalou, na cecere kei na veiliutaki e kena ibalebale nodra raici na tamata ena kedra ituvaki dina—me vaka e raici ira kina na Kalou—ka qai gole yani ka qaravi ira. Sa kena ibalebale na reki vata kei ira sa marau, tagi vata kei ira sa tagi, laveti ira cake era sa tiko leqa, ka lomani ira era tiko tikivi keda me vaka sa lomani keda na Karisito. …

“… Na veiliutaki ena Lotu e sega ni baleta nodra dusimaki na tamata ia e baleta noda tuvakarau me da dusimaki mai vua na Kalou” (Dieter F. Uchtdorf, “O Koya sa Turaga Vei Kemudou,” Ensign se Liaona, me 2017, 79–80).

“O ira ga sa taucoko tu e tu vei ira na kaukauwa me ra veilaveti ka veivakayaloqaqataki ki na veiqaravi cecere cake, ki na rawa ka cecere cake, ki na igu kaukauwa cake” (Nodra iVakavuvuli na Peresitedi ni Lotu: Ezra Taft Benson [2014],244).

E vakatavulica o vuravura ni sa dodonu mera qaqa na iliuliu; e vakatavulica na Turaga ni sa dodonu me ra yalomalumalumu. Era rawata na iliuliu vakavuravura na nodra kaukauwa kei na veivakayarayarataki mai na nodra taledi, kila matai, kei na iyau. Na iliuliu Vakarisito e rawata na mana kei na kaukauwa ni veivakayarayarataki ‘ena veivakauqeti, na vosota vakadede, na yalomalua, na yalomalumalumu, kei na loloma e sega ni veivakaisini’ [VV 121:41]” (Stephen W. Owen, “O Ira na iLiuliu Levu Duadua Sai Ira na Dauvakamumuri Levu Duadua,” Liaona se na Liaona, me 2016, 75).

Vakatorocaketaki Noda Veivakavulici

Vakayaloqaqataka na yalo ni veidokadokai. O vakila beka ni ra sa logavinaka tiko na kalasi ena nodra vakaraitaka na lomadra kei na nodra nanuma? “Vukei ira nomu lewe ni kalasi mera kila vinaka ni o ira yadua era vakayaco-ka ki na yalo ni kalasi. Vakayaloqaqataka mera vukea nomu tauyavutaka e dua na ituvaki rawarawa, veilomani, ka veidokai me ra vakila vakayadua ni sa rawa mera wasea na veika era sotava, taro, ka soli ivakadinadina” (Veivakavulici ena iVakarau ni iVakabula,15).