E Volavola Tiko o Moronai ena Peleti Koula, mai vei Dale Kilborn

2–8 ni Noveba.

Momani 7–9

“Au sa Vosa vei Kemudou me Vaka Sara Ga Dou sa Tiko Dina Oqo”

Raica lesu ^Railesuva na vaka^yarayaratakisama o a vola ena gauna o a vulica vakai iko na Momani 7–9 ena macawa oqo. (P.133 in Galley, 1st para, 1st line - file 43 in Trados) Na itukutuku cava mai na wase oqo o nanuma ena vakaibalebale cake ni raici lesu vata kei na nomu kalasi?

Vola na Veika o Uqeti Kina

Sureta na Veiwasei

Ni gadrevi me soli vei ira na lewe ni kalasi e dua na gauna me ra wasea e dua na ka mai na nodra na vuli vakai ira se vakamatavuvale, sa rawa mo vakayaloqaqataki ira me ra dikeva na Momani 7–9 ka wasea e dua na yatuvosa (se tikina) ni ra sa vakavinavinaka vakalevu ni a digitaka o Momani se o Moronai me ra oka ki na peleti.

Vakavulica na iVunau

Momani 7:8–10; 8:12–22; 9:31–37

Sa yaga vakalevu sara na iVola i Momani.

• Dua na sala mo vakamacalataka e dua na veivosaki me baleta na kena yaga vakalevu na iVola i Momani o ya me veivosakitaki na sala me vakadeitaki kina na kena yaga e dua na ka. Ena yaco vakacava noda kila na yaga ni dua na ka me veisautaka na ivakarau ni noda vakayagataka? Sa rawa ki na kalasi mera vakasaqaqara ena Momani 8:12–22 ka wasea na veika a tukuna o Moronai me baleta na bibi ni Vola i Momani (“itukutuku oqo”). Era rawa talega ni wasea na veika era sa sotava ka sa vakaraitaka vei ira na bibi ni Vola i Momani. E rawa vakacava ni da vakaraitaka ni da karona na iVola i Momani?

  

  Na iVola i Momani e vakamatatataka na ivunau ka vakatavulici ena iVola Tabu.

• Ni gadrevi mera vukei na kalasi mera kila ni iVola i Momani kei na iVola Tabu e rau veitokoni vakai rau, sureti ira mera wilika na Momani 7:8–10 ka vakamacalataka vakalekaleka ena nodra vosa na ivakamacala nei Momani baleta na itukutuku e rua (“itukutuku ena yaco vei ira na kai Matanitu tani mai vei ira na Jiu” vakaibalebaletaki ki na iVola Tabu). Vakasamataka mo droinitaka e rua na iwirini veisemati ena vava ka vola e dua na iVola Tabu kei na kena ikarua na iVola i Momani. Mera qai vola na lewe ni kalasi na veika e rau tautauvata kina na ivolanikalou oqo ena kena isema e loma kei na kedrau duidui ena yasana kadua. (Na vidio “Bible and Book of Mormon” ena ChurchofJesusChrist.org e veivakararamataki.) Mo qai vola e vica na dina vakosipeli ena vava ni volavola ka sureti ira na lewe ni kalasi me ra raica na iDusidusi ki na iVolanikalou mera kunea na tikina mai na iVola i Momani kei na iVola Tabu ena vukei ira mera kila vakavinaka na dina.

Momani 8:1–11

Sa rawa meda yalodina ke da tu duadua mada ga.

• Eso ena nomu kalasi era dau galili ena nodra sasaga me ra bulataka na kosipeli. Na cava e rawa ni ra vulica mai na ivakaraitaki nei Moronai me rawa ni ra vukei kina? Sa rawa mo sureti ira na lewe ni kalasi me ra wilika na Momani 8:1–11 ka vakasamataka na taro era na via taroga vei Moronai me ra vulica na sala a yalodina tikoga kina se cava ga na dredre e sotava. Na cava era sa vakauqeti kina mai na ivakaraitaki oqo? Ni ra wasea na nodra vakasama, vakayaloqaqataki ira me ra wasea na veika era dui sotava ena nodra kila se eso tale e yalodina tikoga, ena gauna mada ga ni ra tiko duadua kina. A vukei ira vakacava na Turaga?

Momani 8:26–41; 9:1–30

Na iVola i Momani a volai me baleta na noda gauna.

• Me vaka ni sa cava tiko ena mua ni yabaki oqo na vulici ni iVola i Momani, sa rawa ki na lewe ni kalasi mera vakasamataka lesu na vuna sa volai kina na ivola oqo me baleti keda ena gauna oqo. E rawa mo tekivuna na veivosaki ena nomu wilika na itukutuku nei Peresitedi Ezra Taft Benson ena “iKuri ni iVurevure.” Mera qai vakayagataka na lewe ni kalasi na taro nei Peresitedi Benson ena Momani 8:26–41. Na cava a vakauqeti Moronai kina na Turaga mera oka kina na vosa oqo ena ivola? Eda na vukei kina vakacava ena gauna edaidai?

• Me vaka e vakavulici tiko ena ituvatuva ena macawa oqo ena Lako Mai, Mo Muri Au—Me Baleta na Tamata Yadua kei na Matavuvale, Momani 9:1–30 era tu kina na itukutuku nei Moronai me baleta tiko na lailai ni vakabauti o Jisu Karisito ena noda gauna oqo. Sa rawa mo wasea na kalasi ki na tolu na ilawalawa ka sureta na ilawalawa yadua me ra raica na ivakasala e dau veivuke sara vakalevu vei ira ena tikina oqo: 1–6 (na isau ni sega ni vakabauta na Karisito), 7–20 (na bibi ni vakabauta na Kalou ni ivakatakila kei na cakamana), kei na 21–30 (ivakasala nei Moronai vei keda).

• E dina ga ni a volai vei “ira era sega ni vakabauta na Karisito” na Momani 9:1–6 e yaga sara vakalevu vei keda kece meda raitayalotaka mada ni da sa tu ena mata ni Kalou ena dua na siga meda lewai. Kerei ira na lewe ni kalasi me ra railesuva na veitikina oqo, ka raica na vosa se malanivosa e vakamacalataka na ituvaki ni yalodra na tamata ivalavala ca ena siga o ya. Na cava eda rawa ni cakava me da drotani mai na yalotani vakaoqo? Sa rawa mera raica na lewe ni kalasi na veivakararamataki veivukei ena italanoa nei Peresitedi Boyd K. Packer ena “iKuri ni iVurevure.”

• E vuqa na tamata nikua era vakabauta ni sa mudu na caka mana. O na vakayagataka vakacava na ivakavuvuli nei Moronai me vukea nomu kalasi mera vakabauta na “Kalou ni cakamana”? Sa rawa mo tekivu ena nomu kerei ira na lewe ni kalasi me ra railesuva ena Momani 9:7–26 na cakamana e vakauqeti keda kina o Moronai meda vakabauta. Na cava eda vulica mai na veitikina oqo me baleta na Kalou kei na nona cakacaka ena noda gauna oqo? Na cava me da cakava me rawa ni cakacaka mana kina na Kalou? (raica na Momani 9:20–21). Na caka mana cava eda sa raica?

Vakayaloqaqataka na Vuli e Vale

Era sa bau vakasamataka tu beka na nomu kalasi na sala mera vakalevutaka kina na nodra vakabauta na Tamada Vakalomalagi kei Jisu Karisito? Kevaka e vakakina, sureti ira mera vakasaqara ena Ica 1–5 na sala me vukea me tubu nodra vakabauta.

iKuri ni iVurevure

A volai na iVola i Momani me baleta na noda gauna oqo.

E kaya o Peresitedi Ezra Taft Benson:

“Era sega ni taura na ivola oqo o ira na Nifai; ka vakakina o ira na Leimani ena gauna makawa. A baleti keda sara ga. …

“O ira yadua era volavola vakalevu ena iVola i Momani era vakadinadinataka ni ra a volavola baleti ira na itabatamata mai muri [raica na 2 Nifai 25:21; Jekope 1:3; Momani 7:1; 8:34 – 35]. …

“Kevaka era sa raica na noda gauna oqo, ka digitaka na veika e na yaga vakalevu me noda, sa sega beka ni ivakarau e dodonu meda vulica kina na iVola i Momani? E dodonu meda qai tarogi keda tiko, ‘Na cava na vuna a vakauqeti Momani kina na Turaga (se o Moronai se Alama) me vola o ya ena nona ivola? Na lesoni cava beka au na vulica mai kina me vukei au meu bula tiko kina nikua kei na veigauna?’” (“Na iVola i Momani—Na Vatuivakadei ni Noda Lotu,” Ensign, Nov. 1986, 6).

Sa rawa meda sega ni tauvi duka.

E talanotaka o Peresitedi Boyd K. Packer e dua na ilakolako ni ono na siga ni se cauravou kina ena mataivalu ena loma ni sitima ni vanua dau usa iyaya, katakata, ka kuvu, ka sega na sili se veisau na isulu. Ni sa kele vakalekaleka na sitima ni vanua, era sa gole na kaimua viakana ki na dua na vale ni kana.

“Sa sinai tu, ka keimami sa qai laini balavu ka wawa tu me keimami dabe. Au a imatai, ka tu e dakudratou eso na marama vakaisulu vinaka. Dina ga ni sega ni vuki mai, na marama a tu e liu vei au sa kila rawa ni keimami sa tu e kea.

“A vuki ka raici keimami mai. A sa qai vuki ka vakaraici au mai cake ki ra. Au sa tucake tu ena noqu unifomu tauvibuno, duka, kuvui, ka sasanukinuki. A qai kaya vakacudrucudru, ‘Oilei, sa qai so na tagane duka!’ Era a rai kece mai na tamata.

“E sega ni vakabekataki ni diva tu na marama o ya me keimami sega ni tu e kea; au a diva vakakina. Au vakila niu sa dukadukali dina tu, logaloga ca, ka madua.”

A qai cavuta o Peresitedi Packer na Momani 9:4 ka vakatauvatana na ka a sotava o ya ki na bula vakayalo tawa savasava ena mata ni Kalou. Ni vakadinadinataka ni Veisorovaki i Jisu Karisito e sala duadua ga e rawa me yaco me savasava vakayalo, a kaya kina:

“E rawa beka mo raitayalotaka na noqu sa raica rawa ni kevaka au na muria na ituvatuva cava ga sa vakarautaka na Dauveivueti, sa sega ni gadrevi kina meu vosota tiko na rarawa levu ni bula dukadukali vakayalo? Raitayalotaka mada na veivakacegui, sereki, bula vakacerecerei ka na yaco mai vei iko ni ko raica na dina ni Veisorovaki kei na rawarawa ni kena yavunibula ena veisiga yaga vei kemuni vakayadua” (“Washed Clean,” Ensign, May 1997, 9–10).

Vakatorocaketaki Noda Veivakavulici

Masulaki ira nomu lewe ni kalasi. E dua beka ena nomu kalasi e sasaga tiko? Me vaka ga a masulaki Pita na iVakabula (raica na Luke 22:31–32), sa rawa mo masulaki ira o vakavulica tiko me ra vaqaqacotaki (raica na Veivakavulici ena iVakarau ni iVakabula, 6).