Sa curu o Ica ki na dua na qara vatu

E Vuni Tiko o Ica ena Loma ni Qara Vatu, mai vei Gary Ernest Smith

23–29 ni Noveba.

Ica 12–15

“Sa Vakayacori Rawa na Ka Kecega ena Vakabauta”

Na inaki ni ituvatuva oqo e sega ni lewa na cava ena yaco ena kalasi. Sa ikoya e dua na ikuri — ena sega ni sosomitaka — na ivakatakila ki na tamata yadua. Mena dusimaki iko na Yalo ena nomu vuli kei na vakavakarau, ka raica kevaka e rawa ni veivuke na itaviqaravi ena ituvatuva oqo ki na kalasi mera raica ka wasea na ivakavuvuli bibi ena Ica 12–15.

Vola na Veika o Uqeti Kina

ivakatakilakila ni veiwasei

Sureta na Veiwasei

Me vukea na kalasi mera wasea na veika era sa vulica mai na nodra vulica vakayadudua se vakamatavuvale na ivolanikalou, e rawa mo vola ena vava ni volavola “Au sa kila ni…” “Au sa vakadinadinataka ni…” kei na “Au sa vakila kina…” Sureti ira na lewe ni kalasi me ra wasea e dua na ka mai vei Ica 12–15 ka rawa ni vakacavara e dua vei ira na itukutuku ena vava ni volavola.

ivakatakilakila ni veivakavulici

Vakavulica na iVunau

Ica 12:2–22

Eda na ciqoma e dua na ivakadinadina ni ka dina ni da cakacakataka noda vakabauti Jisu Karisito.

• Me vukei ira na lewe ni kalasi mera vakasamataka vakatitobu na ibalebale ni vakabauti Jisu Karisito, sa rawa mo tarogi ira na vakasama se vosa cava era nanuma rawa ni ra rogoca na vosa cakacakataka. (Sa rawa mo raica na vosa oqo ena dikiseniri.) Na ka vinaka cava e yaco ki yagoda ni da vakaukauwa yago? Eda na vakayagataka vakacava na ivakavuvuli oqo ki na vakabauta? Ena sala cava meda “cakacakataka kina noda vakabauta” na Karisito? Mera qai vakasaqaqara na kalasi ena Ica 12:2–22 ka veivosakitaka na sala era a cakacakataka kina nodra vakabauta na tamata era tukuni tiko ena veitikina oqo. Eda na muria vakacava na nodra ivakaraitaki? Me vaka e tukuni tiko ena veitikina oqo, na cava soti na macala ni cakacakataki na vakabauti Jisu Karisito?

• Na ivakaraitaki ni vakabauta ena Ica 12:7–22 e railesuvi vinaka kina na italanoa veivakauqeti eso ko ni a vulica vata ena iVola i Momani. Sa rawa ki na kalasi mera wasea eso tale na ivakaraitaki ni vakabauta kei na veika era sa vulica mai kina (eso e rawa ni kune ena Iperiu 11). Era rawa talega ni ra wasea na nodra ivakaraitaki yalodina mai na nodra ituvatuva ni kawa, se na nodra dui bula. Sa vaqaqacotaka vakacava na nodra vakabauti Jisu Karisito kei na Tamada Vakalomalagi na ivakaraitaki oqo?

• NaIca 12 e sinai tu ena vakasama vinaka kei na veika dina me baleta na vakabauta. Sa rawa ki na lewe ni kalasi mera raica na veitikina ena iwase oqo e vakavulica vei ira na veika e baleta na vakabauta. Mera qai vola na ilawalawa yadua ena vava ni volavola na veika era sa kila rawa.

Ica 12:1–9, 28, 32

Na vakabauta e veimuataki ki na “vakanuinui ki na dua na vuravura vinaka cake.”

• E rawa ni dua ena nomu kalasi me vakamacalataka na cava e bibi kina na ikelekele ki na dua na waqa? Sa rawa mo vakaraitaka e dua na iyaloyalo ni waqa kei na dua na ikelekele (se droinitaka e dua ena vava ni volavola) ka veivosakitaka na cava ena yaco ki na dua na waqa e sega na kena ikelekele. Na cava ena yaco vei keda ni sega na noda inuinui? Sa rawa ki na kalasi mera qai wilika na Ica 12:4 ka veivosakitaka na sala e yaco kina na inuinui me “sa dua na ikelekele ki na [yaloda].” Sa rawa talega mera wilika na Ica 12:1–9, 28, kei na 32 ka wasea na rarama era rawata me baleta na inuinui. Na cava meda na nuitaka tiko? (raica na Ica 12:4; Moronai 7:41; raica talega na Joni 16:33).

Ica 12:23–29

Ena loloma soliwale i Jisu Karisito, sa rawa ^kina ki na veika malumalumu me kaukauwa sara. (P.158 in Galley, last subheading - file 46 in Trados)

• Me vukei ira na lewe ni kalasi mera taura vei ira na dina a vulica o Moronai baleta na malumalumu kei na kaukauwa ena Ica 12, ka rawa mo sureti ira na lewe ni kalasi me ra vakasamataka e dua era rairai yalolailai tiko ena vuku ni nodra malumalumu. Mo qai vakayaloqaqataki ira na lewe ni kalasi me ra vakasaqara ena Ica 12:23–29 na itukutuku ena rawa ni vukea na tamata oya. Kevaka e tiko eke nikua o Moronai, na cava e rawa ni tukuna vei koya na tamata o ya? Sa rawa mera wasea na lewe ni kalasi na gauna a veivuke kina na iVakabula me “vu ni nodra kaukauwa na veika malumalumu” (Ica 12:27). E duidui vakacava na veisau oqo mai na sasaga ni vakavinakataki koya vakai koya e dua na tamata ni sega ni vakararavi vua na iVakabula? Me baleta na ikuri ni ulutaga oqo, raica na vosa nei Peresitedi Henry B. Eyring ena “iKuri ni iVurevure.”

• Na veika a sotava o Moronai sa dua vei ira e vuqa ena ivolanikalou e vakaraitaka ni loloma soliwale ni iVakabula e rawa ni veisautaka na noda malumalumu mera ka kaukauwa. Ena rawa ni veivuke mera wasei vakailawalawa na kalasi, ka lesia ki na ilawalawa yadua mera digitaka e dua mai na ivolanikalou e tu na nona malumalumu, ka veivosakitaka na sala a vakaukauwataka kina na tamata o ya na Turaga. Era vakarautaki tu eso na ivakaraitaki ena “iKuri ni iVurevure.” Sa rawa talega mo vakatura mera railesuva na lewe ni kalasi na ibalebale ni loloma soli wale ena Bible Dictionary se Tudei ena Vakabauta (tabana e 77–78). Era sa vakaraitaka vakacava na ivakaraitaki ena ivolanikalou era sa vulica na kaukauwa ni loloma soliwale ni iVakabula? Eda na sureta vakacava na kaukauwa oqo ki na noda bula?

• Sa kena ivakarau meda vakatauvatana na noda malumalumu ki na nona kaukauwa e dua tale na tamata; ni a vakatauvatani koya talega kina vakaoqo o Moronai vei tuakai Jereti (raica na Ica 12:24). Na cava e rerevaki kina me da vakatauvatani keda kina vei ira tale eso? Me vaka ena Ica 12:26–27, na sala cava e vinakata kina na Turaga meda raica kina na noda malumalumu? (raica talega na vosa nei Peresitedi Henry B. Eyring ena “iKuri ni iVurevure”). Na sala cava e vinakata o Koya meda raica kina na nodra malumalumu e so tale? (raica na Ica 12:26).

Ica 13–15

Na nodra vakanadakui na parofita ena kauta mai na veika rerevaki vakayalo.

• Solia na dina bibi e vakavulici ena Ica 12, o rawa ni digitaka me kua ni tauri vakalevu na gauna ena kalasi ena wase 13–15. Ia, ena rawa ni yaga me kerei e dua na lewe ni kalasi me vakamacalataka vakalekaleka na ka e yaco ena wase oqo. Ni gadrevi mera vukei na lewe ni kalasi mera raica na itukutuku e vakaibalebale ena itukutuku oqo, mo kerei ira me ra vakacavara na malanivosa “eda sa raica …” vata kei na dua na lesoni era sa vulica mai na nodra lutu na Jeretaiti. E tautauvata vakacava na nodra lutu ki na nodra lutu na Nifaiti? (raica, me vakataka na, Ica 15:19 kei na Moronai 8:28). Na cava e vinakata na Turaga meda vulica mai na itukutuku oqo, kei na cava e rawa ni da cakava me da levea na nodra ivotavota na Jeretaiti? Sa rawa mera raicalesu na lewe ni kalasi na sala e semati kina na itinitini ni ivola i Ica ki na Omanai 1:19–22; Mosaia 8:8; kei na Mosaia 28: 11–18.

ivakatakilakila ni vuli

Vakayaloqaqataka na Vuli e Vale

Na lewe ni kalasi ena macawa mai oqo era na tekivu vulica na iVola i Moronai. Era na rairai taleitaka ni ra sa kila ni a sega ni lalawataka taumada o Moronai me vola e dua tale na ka ni sa mai cava na ivola i Ica, ia a sega ni namaka me bula vakadede tale tiko. Ena macawa oqo era na tekivu wilika na iotioti ni itukutuku a vakauqeti kina o Moronai me vola ni se bera ni mate.

ivakatakilakila ni ivurevure

iKuri ni iVurevure

E gadrevi ki na noda tubu vakayalo meda raica na noda malumalumu.

E vakavulica o Peresitedi Henry B. Eyring, ni vosa tiko baleta na Ica 12:27: “e kaya o Moronai ni sa ‘rogoca na vosa oqo,’ ka ‘sa vakacegui’ (Ica 12:29). E rawa talega ni veivakacegui vei keda kece. O ira era sega ni raica na nodra malumalumu era na sega ni toso ki liu. Na nomu kila na nomu malumalumu e veivakalougatataki, baleta ni na vukei iko mo yalomalumalumu tiko ga ka gole tiko ga vua na iVakabula. Na Yalo e sega walega ni vakalomavinakataki iko ia, o Koya e ivurevure tale ga ni cakacakataki ni kau mai na veisau ena Veisorovaki, ena kemu ituvaki. Ia sa kaukauwa sara na veika era sa malumalumu” (“Au sa Laiva Vei Kemudou Na Noqu Vakacegu,” Ensign se Liaona, Me 2017, 16).

Kena ivakaraitaki: Era sa vakaukauwataki na ka malumalumu.

• Inoki (Mosese 6:31–34; 7:13)

• Mosese (Lako Yani 4:10–12; 14:31)

• Kitioni (Dauveilewai 6:12–16; 8:22–23)

• Pita (Luke 5:8–10; 22:55–62; Cakacaka 4:13–21)

• Moronai (Ica 12:23–29)

• Josefa Simici (Josefa Simici—Ai Tukutuku 1:28; VV 35:17; 135:3)

Vakatorocaketaki Noda Veivakavulici

Vakatavuvulitaka na “vuna.” “Ena so na gauna era dau vakataroga o ira na vuli—vakabibi o ira na itabagone—se veiwekani vakacava vei ira na ivakavuvuli ni kosipeli kei na vuna me ra talairawarawa kina ena so na ivakaro. Ia, kevaka era kila na ituvatuva tawamudu nei Tamada Vakalomalagi me baleta nodra bulamarau na Luvena, sa yaco me makare cake na inaki ni ivakavuvuli ni kosipeli kei na ivakaro ka vakauqeti vakalevu cake na talairawarawa.” (Veivakavulici ena iVakarau ni iVakabula, 20).