Minerva Teichert (1888 – 1976), E Veipapitaisotaki o Alama ena Wai o Momani, 1949 – 1951, waiwai ena masonite, 35⅞ x 48 na idi. Vale ni Yaya Maroroi e Brigham Young University Museum ni Cakacaka ni liga, 1969

30 ni Noveba-6 ni Tiseba

Moronai 1–6

“Mera Tiko Ga Kina ena Sala Dodonu”

Sa gadreva o Moronai me “na bau yaga” na veika sa vola vei ira era na bula ena iotioti ni gauna (Moronai 1:4). Ni o wilika na Moronai 1–6, vakasamataka ena masumasu na veika e na yaga sara vei ira ko vakavulica.

Vola na Veika o Uqeti Kina

Sureta na Veiwasei

Ena so na gauna sa na vinaka cake me ra wasea na lewe ni kalasi na vakasama eso mai na nodra vuli yadudua ni lailai wale na gauna mera nanuma tiko na veika era sa wilika. Mo taura e vica na miniti ena itekivu ni kalasi me ra railesuva na ulutaga ni wase ena Moronai 1 – 6. (Oqo ena rawa talega ni vukei ira na lewe ni kalasi era sega ni wilika e vale.) Sureti ira na lewe ni kalasi mera vakasaqara na wase me baleta e dua na tikina era raica ni vakaibalebale vakalevu ka vinakata mera wasea ki na vo ni kalasi.

Vakavulica na iVunau

Moronai 2–6

Sa dodonu me vakayacori na cakacaka vakalotu ni matabete me vaka na ivakaro ni Turaga.

• Kevaka e dua na lewe ni nomu kalasi (se na nodra daulomani) sa vakavakarau tiko mera ciqoma na cakacaka vakalotu ni matabete, ena vinaka mo railesuva na veika a vakavulica o Moronai me baleta na cakacaka vakalotu ena Moronai 2 – 6. Mera veisasa yarua na lewe ni kalasi mera dramataka eso na ivakaraitaki vakaoqo. (1) Sa vakarau tabaki o tuakamu ki na matabete. Na ivakasala cava o na solia vua mai vei Moronai 3? (2) E dua na itokani ni dua tale na matalotu e vakataroga voli na vuna me tauri kina na sakaramede ena veimacawa. Na cava o na kaya? (raica na Moronai 4 – 5). (3) Sa vakanamata ki na papitaiso na luvemu yalewa, ia e sega ni vakadeitaka ni sa vakarau tu. O na vukei koya vakacava? (raica na Moronai 6:1 – 3). Ni sa oti na drama, mera qai veivosakitaka na kalasi na veika era sa vulica mai vei ira yadua. Era rawa talega ni ra wasea nodra ivakadinadina me baleta na kena cakacaka vakalotu vakaoqo sa kauti ira mai vakavoleka vua na Tamada Vakalomalagi kei Jisu Karisito.

• Ni gadrevi me vakayacori e dua na veivosaki me baleta na vakavakarau ki na papitaiso, sa rawa mo kerea e dua na lewe ni kalasi me vakamacalataka na sala eso era sa vakarautaka tu me baleta na itavi bibi ena nodra bula, me vaka na kaulotu, vakamau, bula vakaitubutubu, se dua na cakacaka vou. E vakatauvatani vakacava na vakavakarau oya ki na vakavakarau e gadrevi me rawa kina me ra papitaiso, me vaka e tukuni tiko ena Moronai 6:1 – 3? (raica talega na Mosaia 18:8 – 10; VV 20:37). Na cava era sa bibi kina na ivakarau e tukuni tiko ena itukutuku oqo ki na papitaiso? Eda na kila vakacava ke da sa vakarautaki tu me baleta na cakacaka vakalotu oqo? Vakayaloqaqataki ira na lewe ni kalasi mera vakasamataka vakatitobu na vinaka era sa bulataka tiko kina na itagede oqo vakatekivu mai na nodra papitaiso kei na veika mera vakavinakataka cake. Sa rawa talega mo sureti ira me ra vola e dua na veivakauqeti era sa ciqoma ka dau talevi ira wasoma.

  

  Na cakacaka tabu vakalotu kece era na vakayacori ga ena kaukauwa ni matabete.

Moronai 4–5

Ni da kania na sakaramede ena vukea meda toro voleka vei Jisu Karisito.

• Na ituvatuva ni macawa oqo ena Lako Mai, Mo Muri Au—Me Baleta na Tamata Yadua kei na Matavuvale e vakaturi kina na itaviqaravi ni vuli e baleta na sakaramede. De rawa mo sureta e vica na lewe ni kalasi me ra vakacavara na itaviqaravi oqo e vale ka lako mai ki kalasi ka vakavakarau me ra wasea na veika era sa vulica. Sa rawa talega mo sureti ira na lewe ni kalasi me ra veiwaseitaka vakai ira na veika era sa cakava mera vakarautaki ira kei na nodra matavuvale me ra sotava na veika vakalou ena sakaramede.

• E vuqa vei keda sa rogoca na masu ni sakaramede e vuqa na gauna, ia eda nanuma beka vakalevu na ibalebale ni vosa? Ni gadrevi mera vakasamataka vakatitobu na masu oqo na kalasi, mo solia vei ira e vica na miniti me ra vola na masu ni sakaramede e rua mai na nodra vakanananu. Mo qai sureti ira me ra vakatauvatana na veika era vola ki na Moronai 4:3 kei na 5:2. Na cava so era nanuma vakarawarawa? Na cava era a calata? Era sa raica beka e dua na ka ena masu oqo era a sega ni raica e liu? Sureti ira na lewe ni kalasi me ra wasea na vosa kei na malanivosa mai na masu ni sakaramede e cecere vei ira se vukei ira mera vakila ni sa vakalou na cakacaka vakalotu oqo. Me vakatitobutaki nodra vakavinavinakataka na lewe ni kalasi na sakaramede, sureta e dua na lewe ni kalasi me lagata se vakatagitaka e dua na sere ni sakaramede. Sa rawa talega mo vakaraitaka na vidio “Always Remember Him” (ChurchofJesusChrist.org).

Moronai 6:4–9

Era veiqaravi vakai ira yadua na tisaipeli i Jisu Karisito.

• Sa rawa mo vakayagataka e dua na veivakatauvatani me vukei ira na lewe ni kalasi me ra kila na bibi ni “vakani ena vosa vinaka ni Kalou” (Moronai 6:4). Me kena ivakaraitaki, na mataqali kakana cava e gadrevi me baleta e dua na sorenitei, se gonelailai? Na cava ena yaco kevaka mo vakawalena e dua na ka e gadrevi kina na kakana? Era sa tautauvata vakacava na lewe ni Lotu vou kei ira sa lesu tale mai ki na vunikau lailai se gone dramidrami e gadreva me vakani? Mera vakasaqara na lewe ni kalasi ena Moronai 6:4–9 na vakasama baleta na sala mera “veivakani” vakai ira vakayalo. E rawa talega mera raica na veivakasama ena “iKuri ni iVurevure.” Sa rawa mo wasea na gauna a mai qaravi iko kina e dua na tisaipeli vakataki iko. Sa rawa talega ki na kalasi mera wasea na veika vata vakaoqo.

• Ena rawa ni veivuke naMoronai 6:4–9 ki na kalasi mera kila vakavinaka na sala eda vakalougatataki ni da sa “wili vata kei ira na lewe ni Lotu i Karisito” ka tiko ena soqoni ni Lotu. Eda na vakamacalataka vakacava na veivakalougatataki oqo vua e dua e taroga tiko na vuna e gadrevi kina e dua na Lotu vakaituvatuva? Sa rawa ki na kalasi mera vakasaqara na veitikina oqo me ra kunea e dua na ka era rawa ni wasea. Se sa rawa mera vola eso na veivakalougatataki era sa ciqoma me vaka ni ra lewe ni Lotu (raica na D. Todd Christofferson, “Cava na Lotu,” Ensign se Liaona, Nove. 2015, 108 – 11). Na cava eda rawa ni cakava me vakadeitaki kina na noda itokani tisaipeli mera “na daunanumi ka vakani ena vosa vinaka ni Kalou” ni da “dausoqoni vata wasoma”? (Moronai 6:4–5).

Vakayaloqaqataka na Vuli e Vale

Era na rairai maqusa na lewe ni kalasi mera wilika na Moronai 7–9 ena macawa mai oqo kevaka o vakamacalataka ni oka tiko kina e rua na ivola e vola o Momani me vukei luvena tagane me yalodina tikoga ena veigauna dredre.

iKuri ni iVurevure

Vakani ena vosa vinaka ni Kalou.

E vakavulica o Elder Jeffrey R. Holland: “E levu na tamata era sega ni lako mai ki Lotu ka vakasaqara wale tu ga e vica na dina vou ni kosipeli se mera raica na itokani makawa, e dina ga ni veika kece oqori e bibi. Era gole mai mera vakila e dua na ka vakayalo. Era gadreva na tiko sautu. Era gadreva me vaqaqacotaki na nodra vakabauta ka vakavoui na nodra inuinui. Era gadreva, me vakalekalekataki ga, me ra vakani ena vosa vinaka ni Kalou, mera vaqaqacotaki ena kaukauwa ni lomalagi” (“Na Qasenivuli sa mai Vua na Kalou,” Ensign, Me 1998, 26).

E vakamacalataka o Peresitedi Gordon B. Hinckley ni nodra vakani na saumaki vou ena vosa vinaka ni Kalou “sa cakacaka ni tamata kecega. Oqo sa nodra cakacaka na dauveituberi ni matavuvale kei na dauveisiko [ena gauna oqo sai ira na dauveiqaravi turaga kei na marama]. Sa nodratou cakacaka na matabisopi, kuoramu ni matabete, iSoqosoqo ni Veivukei, cauravou kei na goneyalewa, vakakina o ira na Lalai.

“Au a tiko ena dua na soqoni ni lolo kei na soli ivakadinadina ena Sigatabu sa oti. E dua na gonetagane yabaki 15 se 16 a tucake tu e matadra na ivavakoso ka kaya ni sa lomana me papitaiso.

“Era sa qai tu yani ki na gusu ni vosavosa na cauravou yadua ni kuoramu ni ivakavuvuli mera vakavinavinakataki koya, ka kaya vua ni sa cakava tiko na ka dodonu, ka vakadeitaka vua ni ra na tokoni koya ka vukei koya. Sa dua na ka totoka meda rogoci ira na cauravou oqo mera vakavinavinaka ka vakayaloqaqataki nodra itokani. Au sa marau ni o ira kece na cauravou oqo, oka kina o koya a papitaiso ena macawa sa oti, era na laki kaulotu.

“Au a tarogi ena dua na soli itukutuku raraba, ‘Na cava e dau kauta mai vei iko na marau levu ni ko raica na cakacaka ni Lotu edaidai?’

“Au a kaya: ‘Na marau levu o ya niu dau raica na veika sa cakava na kosipeli oqo vei ira na tamata. E solia vei ira e dua na ivakarau vou ni rai me baleta na bula. E solia vei ira e dua na rai era se bera vakadua ni vakila ena dua na gauna. E laveta cake nodra rai ki na veika vakaturaga ka vakalou. E yaco vei ira e dua na ka veivakurabuitaki ni da raica. Era rai vei Karisito ka ra sa bula.”

“… Au sa kerei kemuni yadua mo ni veivuke ena cakacaka oqo” (“Converts and Young Men,” Ensign, Me 1997, 48).

Vakatorocaketaki Noda Veivakavulici

Vakasaqara na veika e uqeti iko. Mo kua ni raica na ituvatuva oqo ni ra sa idusidusi mo muria, ia mo vakayagataki ira mera ivurevure ni vakasama se vakauqeti iko mo vakananuma titobu na nodra gagadre o vakavulica.