Raica na Lami ni Kalou, mai vei Walter Rane

21–27 ni Tiseba

Siganisucu

“Ena Lako Mai ki Vuravura me Sereki Ira na Nona Tamata”

Ni ko vulica na sucu i Jisu Karisito ena macawa oqo, vakasamataka na sala mo vukea na nomu kalasi me vaqaqacotaka nodra ivakadinadina baleti Jisu Karisito kei na nona Veisorovaki. E rawa ni veivuke eso na vakasama mai na ituvatuva oqo.

Vola na Veika o Uqeti Kina

Sureta na Veiwasei

Sureti ira na lewe ni kalasi mera dabe yarua se vakailawalawa ka wasea ni nodra vulica na veika baleti Jisu Karisito mai na iVola i Momani ena yabaki oqo sa vaqaqacotaka na nodra vakabauti Koya kei na Nona ivakavuvuli.

Vakavulica na iVunau

1 Nifai 11:13–23; Ilamani 14:1–13; 3 Nifai 1:4–22

A sucu o Jisu Karisito me Noda iVakabula.

• O na vakayagataka vakacava na iVola i Momani mera vakavulici na lewe ni kalasi me baleta na cakacaka vakalou ni nona sucu na iVakabula? E dua na sala o ya me ra wasea na kalasi ki na tolu na ilawalawa ka solia ki na ilawalawa yadua e dua vei ira na ivolanikalou oqo mera wilika vata: 1 Nifai 11:13–23; Ilamani 14:1–13; kei na 3 Nifai 1:4–22. Kerei ira na ilawalawa mera veivosakitaka na cava e vakavulica vei ira na ivolanikalou oqo me baleta na nona sucu na iVakabula. Mera qai wasea na ilawalawa yadua ki na vo ni kalasi na veika era sa veivosakitaka. Na cava na vuna e yaga kina me tiko ena iVola i Momani na ivakadinadina ni nona sucu na iVakabula?

• E ka bibi me kilai na sucu i Karisito, ia na kena kilai na vuna a sucu kina o Koya sa ka cecere dina. E rawa vakacava mo vukei ira o vakavulica mera vakasamataka vakatitobu na kaukauwa ni veivueti i Jisu Karisito? Sa rawa vei ira na lewe ni kalasi mera wasea eso na italanoa kei na itukutuku era sa vulica ena macawa oqo (raica na ituvatuva ena macawa oqo ena Lako Mai, Mo Muri Au —Me Baleta na Tamata Yadua kei na Matavuvale). Vakayaloqaqataki ira mera wasea na kena vakatitobutaki na nodra marautaka na nona sucu na iVakabula kei na Nona kaukauwa ni veivueti mai na veika era sa vulica.

• Me tekivu e dua na veivosaki me baleta na isolisoli sa solia vei keda na Kalou mai Vua na Luvena, sa rawa mo na sureta eso na lewe ni kalasi me ra veivosakitaka na isolisoli talei era sa ciqoma ena gauna ni Siganisucu. Eda na vakaraitaka vakacava na noda vakavinavinaka me baleta na isolisoli eda sa ciqoma? Mera qai wilika na lewe ni kalasi na vosa nei Peresitedi Thomas S. Monson e tiko ena “iKuri ni iVurevure” ka veivosakitaka na va na isolisoli e tukuna tiko o Peresitedi Monson. Na cava na itavi ni iVakabula ena isolisoli oqo? Eda na vakaraitaka vakacava na noda vakavinavinaka vua na Tamada Vakalomalagi me baleta na isolisoli oqo?

• Me tiki ni nomuni veivosaki me baleta na Siganisucu, sa rawa mo sureti ira na lewe ni kalasi mera vakatagitaka se lagata na sere ni Siganisucu. Sa rawa talega mo raica eso na ivurevure era tiko ena “iKuri ni iVurevure.”

Tabana ni ulutaga ni iVola i Momani; ivakamacala taumada ki na iVola i Momani; 2 Nifai 25: 23, 26; 33: 4, 10

Na iVola i Momani e vakadinadinataki Jisu Karisito.

• Me vaka ni sa mai tini tale nomuni vulica na iVola i Momani ena Matawilivola ni Sigatabu, sa rawa mo solia vei ira na lewe ni kalasi na madigi me ra vakasamataka na veika era sa vulica me baleti Jisu Karisito mai na iVola i Momani ena yabaki oqo. Me tekivutaki e dua na veivosaki, mo ni qai wilika vata na 2 Nifai 25: 23, 26 kei 33: 4, 10, vakakina mai na ivakamacala taumada ni iVola i Momani kei na tabana ni ulutaga. Sa rawa talega mo wasea e dua na italanoa se na malanivosa e sa vakavolekataki iko kina vei Jisu Karisito ka solia vei ira na lewe ni kalasi e vica na miniti mera wasea na nodra dui italanoa se na malanivosa. Wasea na nomu ivakadinadina baleta na iVola i Momani, ka sureta na lewenikalasi eso mera vakayacora vakakina.

Vakayaloqaqataka na Vuli e Vale

Ni gadrevi mera vakauqeti na lewe ni kalasi mera tekivu wilika na Vunau kei na Veiyalayalati, sa rawa mo wasea e dua na tikina taleitaki se e dua na ka veivakauqeti dina o sotava ena nomu vulica na Vunau kei na Veiyalayalati.

iKuri ni iVurevure

iVurevure ni Siganisucu.

• Maciu 1:18–25; 2; Luke 2

• iVoladroini Vakosipeli, naba 28, 29, 30, 31, 81

• iYaloyalo ena ituvatuva ni macawa oqo ena Lako Mai, Mo Muri Au—Me Baleta na Tamata Yadua kei na Matavuvale

• “A Savior Is Born—Christmas Video” (vidio, ChurchofJesusChrist.org)

• “Good Tidings of Great Joy: The Birth of Jesus Christ” (vidio, ChurchofJesusChrist.org)

• Christmas.ComeUntoChrist.org

• Lotu ni Siganisucu ni Mataveiliutaki Taumada (ChurchofJesusChrist.org/broadcasts/first-presidency-christmas-devotionals)

Na isolisoli ni iVakabula

A vakavulica o Peresitedi Thomas S. Monson:

“Au vakananuma eke na duidui ni Siganisucu. Na iloloma vakasakiti, ena iolo saulevu ka maqosa sara, yacova nodra ituvuka ni vakaraitaki vakabisinisi vakairogorogo ka kena iulutaga ‘Me baleta na tamata e tu vua na veika kece.’ Ena dua na wiliwili vakaoqo, au a raica kina e dua na itikotiko e va na udolu na sukuwea fute na kena levu e solegi tu ena reveni vakaitamera kei na kena kadi ni vakanuinui vinaka e volai tu kina ‘Me Nomuni na Marau ni Siganisucu.’ Na veika tale eso e oka kina na kau ni golf e vakadaimani, e dua na saravanua ena soko ena Caribbean, kei na dua na ilakolako totoka ki na Swiss Alps. Oqori e vaka me veidonui kei na ulutaga ni dua na katuni ni Siganisucu ka vakaraitaka kina na Lewe Tolu na Tamata Vuku ena ilakolako ki Peceliema vata kei na kato ni iloloma ena nodratou kameli. E dua a kaya, ‘Rogoca na noqu vosa, Balthazar, daru sa cakava tiko e dua na ka ena iloloma oqo ena rairai lako vakatani!’ …

“Me daru biuta mada vakalailai na ivola ni Siganisucu, kei na nodra iloloma vakamacalataki vakalomavinaka. Me da gole tani mai na senikau nei Na, na neketai digitaki me baleti Ta, na matakau matavinaka, na sitima ni vanua e vakasici, na basikeli a waraki tu vakabalavu… ka meda vagolea na noda vakanananu ki na iloloma ni Kalou e gugumatua. Au sa digitaka e va mai na dua na lisi balavu. …

“iMatai, na isolisoli ni nona sucu. Sa mai vakatikori vakacecere kivei keda vakayadua. Sa noda dodonu vakalou meda biuta mai na noda itikotiko vakalomalagi ki na valecavu ena bula vakayago oqo ka vakaraitaka ena noda bula na noda bula kilikili ka rawata ena dua na siga meda lesu tale Vua, ira na daulomani, kei na dua na matanitu e vakatokai o silesitieli. … Sa noda ilesilesi me da vakaraitaka na noda vakavinavinaka ena ivakarau ni noda bula. …

“iKarua, na isolisoli ni vakacegu. Ena vuravura veivakasosataki eda tiko kina oqo, na osooso ni veitosoyaki, na domolevu ni itukutuku raraba, kei na vakasaurarataki ni noda gauna—sega ni tukuni kina na leqa ena vuravura oqo—e vakavuna na mosi ni ulu, vakavuna na mosi, ka vakamalumalumutaka noda igu meda vorata rawa. …

“Ko koya ka a bikai tu ena rarawa ka veikilai kei na yaluma e vosa ki na yalo yadua e rarawa ka vakatikora na isolisoli ni vakacegu. “Au sa laiva vei kemudou na vakacegu, au sa solia vei kemudou na noqu vakacegu; au sa sega ni solia vei kemudou me vaka sa solia o vuravura. Me kakua ni rarawa na yalomudou se rere.” (Joni 14:27). …

“Ikatolu, na isolisoli ni loloma. ‘Vakavuvuli, a cava na ivakaro levu e na ivunau?’ a taroga oqo o vunilawa kivei Jisu. A saumi mai vakatotolo: “Mo lomani Jiova na nomu Kalou ena lomamu taucoko kei na yalomu taucoko kei na nomu nanuma kecega.”

“‘Ai matai ni ivunau oqo ka levu.

“‘A sa tautauvata na kena ikarua, Mo lomana na kai nomu me vaka ko lomani iko” (Maciu 22:36–39). …

“iKava, na isolisoli ni bula—io ena sega tale ni mate. Na ituvatuva nei Tamada Vakalomalagi e tiko kina na ivakaraitaki cecere ni loloma dina. Na veika kece eda vakamareqeta, na noda matavuvale sara ga, noda itokani, noda reki, noda kila-ka, na noda ivakadinadina, ena seyavu yani kevaka me a sega na Tamada kei na Luvena, na Turaga o Jisu Karisito. Ena kedra maliwa na vakanananu kei na volavola vakamareqeti ena vuravura oqo sa tiko na itukutuku dina vakalou: ‘Ni sa lomani ira na kai vuravura vakaoqo na Kalou, me solia kina na luvena e duabau ga sa vakatubura, me kakua ni rusa ko ira yadua era sa vakabauti koya, me ra rawata ga na bula tawamudu’ (Joni 3:16)” (“iSolisoli,” Ensign, Me 1993, 59–62).

Vakatorocaketaki Noda Veivakavulici

E dodonu vinaka ni da kaya “Au sega ni kila.” Me vaka ni sa dodonu mo cakava na nomu vinaka duadua mo sauma na nodra taro na nomu lewe ni kalasi me baleta na kosipeli, na Turaga e sega ni namaki iko mo kila na veika kece. Ena gauna o sega kina ni kila e dua na isaunitaro, sa rawa mo sauma ena nomu sureta na kalasi me ra vakasaqara vata na kena isau mai na ivolanikalou ka wasea na veika era sa kunea. (Raica na Veivakavulici ena iVakarau ni iVakabula, 24.)