Mo Dou Kila Kina, mai vei Gary L. Kapp

14–20 ni Tiseba

Moronai 10

“Lako Mai vei Karisito, ka Mo Dou Vakataucokotaki Vua”

Era sa rairai sotava na lewe ni nomu kalasi na veika e vakaibalebale cake ni ra sa mai wilika tiko na iVola i Momani ena yabaki oqo. Vakayagataka na veika e sotavi oqo me vakauqeta na tamata kece ena kalasi me ra vulica na ivolanikalou.

Vola na Veika o Uqeti Kina

Sureta na Veiwasei

Sa rawa mo sureti ira na lewe ni kalasi me ra raitayalotaka mada ni ko Moronai sa na sikova mai na kalasi. Na cava era na kaya vua me baleta na ka e a vola ena Moronai 10? E tiko beka e dua na tikina eso e vakaibalebale vakalevu vei ira? Sa rawa mera wasea na veika era sa sotava ena veitikina oqo.

Vakavulica na iVunau

Moronai 10:3–7.

Au sa rawa ni kila na ka dina ena kaukauwa ni Yalo Tabu.

• Sa rawa ki na lewe ni kalasi mera rawata na veivakararamataki vou kevaka era vulica vakavinaka na Moronai 10:3 – 5 . Me vukei ira, sa rawa ni o vola na malanivosa bibi mai na veitikina oqo ena veitiki ni pepa yadua ka solia e dua vei ira na lewe ni kalasi yadua se ki na dua na ilawalawa lewe ni kalasi. Sureti ira mera vakasamataka vakatitobu se veivosakitaka na ibalebale ni nodra malanivosa, kei na veika e rawa ni ra cakava me ra bulataka kina ena nodra bula. Mo ni qai wilika vata na Moronai 10:3–5 ka cegu ena dua na malanivosa e sa vulica e dua na lewe ni kalasi ka me qai soli vakasama kina o koya.

• Ni gadrevi me ra vakayaloqaqataki na lewe ni kalasi me ra wasea na veika era sa sotava ena nodra cakacakataka na veisureti nei Moronai ena veitikina oqo, sa rawa mo sureti ira me ra raitayalotaka ni ra saga tiko mera vakauqeta e dua na itokani se lewe ni matavuvale me ra rawata e dua na ivakadinadina ni iVola i Momani. Era na vakayagataka vakacava na Moronai 10:3 – 7? Na cava era sa sotava era rawa ni wasea? Eda na vukei ira vakacava eso mera kila vinaka na ibalebale ni kena kilai e dua na ka “ena kaukauwa ni Yalo Tabu”? (Moronai 10:5).

Moronai 10:8–25

“Kakua ni cakitaka na isolisoli ni Kalou.”

• Na cava e bibi dina kina na ivakavuvuli dou “kakua ni cakitaka na isolisoli ni Kalou” ena gauna oqo? (Moronai 10:8). Vakayaloqaqataki ira na lewe ni kalasi mera vakasamataka vakatitobu na taro oqo ni ra wilika na Moronai 10:8–18. Ni gadrevi me vukea na vaqaqacotaki na nodra vakadinata na lewe ni kalasi na isolisoli vakayalo, mo sureti ira mera wasea na ivakaraitaki ni tamata era vakayagataka tiko na isolisoli yadua e volai tiko ena Moronai 10:9–16. Sa rawa ni vakayagataki na ivakaraitaki mai na ivolanikalou, mai na itukutuku makawa ni Lotu, se mai na nodra dui bula. (Na kena ivakaraitaki mai na iVola i Momani era vakaturi tiko ena “iKuri ni iVurevure.”) Sa rawa talega me veivosakitaki na isolisoli oqo era vakamacalataki tiko ena veitikina oqo ena kena a yaco ni vakarau tadu mai na iVola i Momani. Na cava na vuna e bibi kina vua e dua e vakasaqara tiko e dua na ivakadinadina ni iVola i Momani me ra vakabauta na isolisoli vakayalo? Na cava na vuna eda dau “cakitaka” kina na isolisoli oqo ena noda bula? Era na vukei keda vakacava na isolisoli oqo meda “lako mai vei Karisito ka mo dou vakataucokotaki vua” (raica na Moronai 10:30–33).

• E dua tale na sala me vakadikevi kina na isolisoli era vakamacalataki tiko ena veitikina oqo o ya mo vola ena vava ni volavola na taro vakaoqo Na cava mada na isolisoli vakayalo? Era dau soli vei cei? Na cava na vuna era soli kina? kei Na sala cava eda dau ciqoma kina? Mo qai sureti ira na lewe ni kalasi mera vakasaqara ena Moronai 10:8–25 na kena isau. (Na itukutuku nei Peresitedi Brigham Young kei Peresitedi Dallin H. Oaks ena “iKuri ni iVurevure” e rawa talega ni veivukei.) Me ikuri ni veisolisoli vakayalo era volai tiko ena tikina e 9–16, na cava tale eso na “isolisoli ni Kalou” eda sa ciqoma se sa vakalougatataki kina? (Moronai 10:8). Sa rawa mo wasea na veika e vakavulica o Elder Bruce R. McConkie: “Era sa tawawili rawa na isolisoli vakayalo ka tawayalani na kedra veimataqali. Na kena era volai tu ena vosa sa vakatakilai mai era sa ivakaraitaki ga ni sovaraki tawayalani mai ni loloma soliwale vakalou sa solia mai na Kalou dauloloma vei ira era lomana ka qaravi koya” (A New Witness for the Articles of Faith [1985], 371).

Moronai 10:30–33

Sa rawa meu uasivi sara ena loloma soliwale i Jisu Karisito.

• Na cava o vakila mera vukei kina na lewe ni nomu kalasi mera ciqoma na veisureti nei Moronai mo “lako mai vei Karisito, ka mo dou vakataucokotaki vua”? (Moronai 10:32). Sa rawa mo ni tekivu ena dua na serenilotu ena ulutaga oqo, me vaka na “Come, Follow Me” (Serenilotu Vakavalagi, naba 116), me sureti kina na Yalo ki na nomuni veivosaki, ka mera qai wasea na kalasi na kena semati na sere kei na ka dina era laurai ena Moronai 10:30–33. Na cava eda vulica mai na veitikina oqo kei na sere ni Lotu me baleta na ibalebale ni lako mai vei Karisito? Na cava na kena ibalebale me da “uasivi sara vata kei Karisito”? (raica talega na VV 76: 50–53, 69). Wasea na nomu nanuma me baleta na ibalebale meda “uasivi sara ena vukui Jisu” (VV 76:69), ka vakayaloqaqataki ira na lewe ni kalasi me ra wasea na nodra nanuma.

• Baleta ni oqo sa iotioti ni nomudou veivosakitaka vakalasi na iVola i Momani ena yabaki oqo, sa rawa mo kerei ira na lewe ni kalasi me ra wasea eso na veika era sa vakila ka vulica ni ra sa vulica na ivola oqo. Ni gadrevi mera vukei na lewe ni kalasi mera cakava na ka oqo, sa rawa mo ni wilika vata na Moronai 10:32–33 ka kerei ira me ra vakasamataka vakatitobu ena vica na miniti na sala sa vukei ira kina na iVola i Momani mera lako mai vei Karisito. Sa rawa mo taroga: Sa vukei keda vakacava na iVola i Momani me cecere cake noda lomana na Kalou? E sa vukei keda vakacava na ka oqo meda vakararavi vakataucoko ena loloma soliwale i Karisito? E sa vukei keda vakacava meda “kakua ni cakitaka” na kaukauwa ni iVakabula? Sureti ira na lewe ni kalasi me ra wasea na nodra ivakadinadina me baleta na iVola i Momani kei na kena vakadinadinataki Jisu Karisito.

Vakayaloqaqataka na Vuli e Vale

Ni gadrevi mera vukei na lewe ni kalasi mera namaka tiko yani na noda vulica na Vunau kei na Veiyalayalati ena yabaki mai oqo, sa rawa mo ni raicalesu na Moronai 10:9–16 ka vakamacalataka ni veisolisoli oqo sa yaco taucoko tiko ena loma ni Lotu nikua. Ni da wilika na Vunau kei na Veiyalayalati, eda na raica kina na kena vakayagataki na isolisoli oqo vata kei na kaukauwa ni Kalou me vakayacori kina na Nona cakacaka ena siga edaidai.

iKuri ni iVurevure

Na ivakaraitaki ni isolisoli vakayalo mai na iVola i Momani.

• Veivakavulici ena Yalo: O Nifai kei Liai (Ilamani 5:17–19)

• Cecere ni nodra vakabauta: Alama, Amuleki, ko Amoni, kei ira tale eso (Ica 12:13–22)

• Veivakabulai: Alama (Alama 15:5–11)

• Na cakacaka mana lelevu: O iratou na tisaipeli lewe tolu (3 Nifai 28: 19–22)

• Parofisai: Liai (2 Nifai 1:6–7.)

• Raici ira na agilosi: ko Amuleki (Alama 10:7–10.)

• Na vakadewataki ni vosa: Mosaia (Mosaia 28: 11–16)

Na ivakadinadina nei Peresitedi Brigham Young me baleta na isolisoli vakayalo.

“Vakabauta. Ni o sa vakadinata na ivakavuvuli ni Kosipeli ka rawata kina na vakabauta, ka sa isolisoli ni Kalou, sa na qai vakuria vei iko o koya na nomu vakabauta, me vakuri na vakabauta ena vakabauta. …

“Na iSolisoli ni Veivakabulai. Au sa tu oqo meu vakadinadinataka na veigauna e vuqa era vakabulai kina ena kaukauwa ni Kalou na tagane, kei na yalewa, kei ira na gone mai na veitabaki ni liga, kau raica kina na nodra laveti mai na matamata ni mate e vuqa, era vueti kina mai na iyalayala ni vuravura tawamudu, ka so vei ira era sa lecaiyalodra tu, ni sa vakanadaku na yalodra mai na yagodra, ka qai lesu tale mai. Au vakadinadinataka niu sa raica na nodra vakabulai na tauvimate mai na veitabaki, me vaka na nona yalayala ni iVakabula. …

“Na Parofisai, iVakatakila, kei na Kila-Ka. E rawa ni ra dauvakatakila na tagane se yalewa, ka ra na vakadinadinataki Jisu, ka okati me yalo ni parofisai, mera raica rawa na vakasama kei na loma ni Kalou me baleti ira, vorata na veika ca, ka dau vakayacora ga na veika vinaka” (Na Nodra iVakavuvuli na Peresitedi ni Lotu: Brigham Young [1997], 252–53).

“Taura matua na isolisoli vinaka kecega.”

E tukuna o Peresitedi Dallin H. Oaks na kena a vakalougatataki tinana na nona vakasaqara na isolisoli vakayalo: “Ni sa mai takali o watina, sa mai sega tu ni taucoko o tinaqu dawai. Na nona a masulaka na veika e gadreva me vakayacora na nona itavi me susuga na luvena lalai e tolu! A vakasaqara tiko, a bula kilikili kaya, ka sa dau vakalougatataki! A saumi mai na nona masu ena vuqa sara na sala, oka kina na nona sa ciqoma na isolisoli vakayalo. E a levu sara, ia na kena au nanuma vinaka tu ga o ya na isolisoli ni vakabauta, ivakadinadina, kei na vuku” (“iSolisoli Vakayalo,” Ensign, Sepi. 1986, 72).

Vakatorocaketaki ni Noda Veivakavulici

Me tiko na nodra gauna ni veiwasei na vuli tiko. “Ni ra wasea na vuli tiko na veika era sa vulica, e sega walega ni ra vakila na Yalo ka vaqaqacotaka na nodra dui ivakadinadina, ia era vakayaloqaqataki ira talega na vo ni lewe ni kalasi me ra raica vakataki ira na dina.” (Veivakavulici ena iVakarau ni iVakabula, 30).