Minerva Teichert (1888–1976), Moronai: Na iOtioti ni Nifaiti, 1949–1951, waiwai ena masonite, 34¾ x 47 na idi. Na Brigham Young University Museum ni Cakacaka ni Liga, 1969

7–13 ni Tiseba

Moronai 7–9

“Me Laveti Iko Cake Mada Ko Karisito”

Sa nomu inaki mo vukei ira na tamata me ra toro voleka mai vua na Kalou, e sega walega ni vakaraitaki e dua na lesoni. Vakavakarau me baleta na Matawilivola ni Sigatabu ena nomu wilika na Moronai 7–9 vata kei na lewe ni kalasi ena vakasama oqo, ka vakasaqara na ivakavuvuli ena vukei ira.

Vola na Veika o Uqeti Kina

Sureta na Veiwasei

Sureta na lewe ni kalasi yadua me railesuva na Moronai wase 7, 8, se 9 ka raica kina e dua na dina e vakaibalebale vua. Mera qai wasea na lewe ni kalasi na dina oqo era sa kunea kei na sala era sa vakalougatataki kina.

Vakatavulica na iVunau

Moronai 7:3–19

“Sa veisureti ka veivakayarayarataki tikoga ki na vinaka na veika sa mai vua na Kalou.”

• Ni gadrevi meda sa tisaipeli i Jisu Karisito, eda sa dodonu meda vakatulewa ena vinaka kei na ca. Na kena veivosakitaki na dina e tiko ena Moronai 7:3–19 ena rawa ni vukei ira na lewe ni kalasi me yaco nodra lewa me “kakua ni cala” (Moronai 7:18). Ena vakavakarau ki na veivosaki, me veimama na kalasi mera vakasaqara ena veitikina oqo na ivakasala a solia o Momani me baleta na sala me ra kunea na veika sa mai vua na Kalou, ka rawa mera vakasaqara na ikarua ni veimama ni kalasi na veika sa mai vua na tevoro. Mera qai veivosakitaka na ka era sa kunea ka wasea na veika sa sureti ira mera “caka vinaka, ka lomana na Kalou ka qaravi koya” (Moronai 7:13). Eda na vakayagataka vakacava na ivakasala nei Momani ena noda vakatulewa ena veisiga? E rawa vakacava me da digidigi dodonu ka se vakaraitaka na loloma vei ira era tu vakavolivoliti keda ka ra sega ni bulataka na kosipeli?

• E vuqa na tamata era taroga, “Meu na kila vakacava e dua na veivakauqeti sa mai vua na Kalou se sa noqu vakasama ga?” Sa rawa mo vola na taro oqo ena vava ni volavola ka sureti ira na lewe ni kalasi me ra vakasaqara ena Moronai 7:13–16 na ivakavuvuli ena vukea me sauma na taro oqo. Ena vukei keda vakacava na veitikina oqo meda kila kina na veivakauqeti sa vakalou? Ena veivuke me vakamacalataka ni “na Yalo i Karisito,” sa kilai talega me rarama i Karisito, e dau vakatokai tu ni sa noda lewa e loma. Na itukutuku nei Peresitedi Gordon B. Hinckley “iKuri ni iVurevure” kei na vidio “Patterns of Light: Discerning Light” (ChurchofJesusChrist.org) e rawa talega ni veivuke.

Moronai 7:21–48

Era na vakasaqara na tisaipeli i Jisu Karisito na vakabauta, inuinui, kei na loloma.

• Me vukea nomu kalasi ka kila vakavinaka cake na isema ni vakabauta, na inuinui kei na loloma cecere, mo vakaraitaka e dua na idabedabe yavatolu (se na kena iyaloyalo) ka kerei ira na lewe ni kalasi mera raica ni sa vakatauvatani na vakabauta, inuinui, kei na loloma ki na yavatolu oqo (raica na vosa nei Peresitedi Dieter F. Uchtdorf ena “iKuri ni iVurevure”). Mo qai sureti ira mera digitaka e dua na ivakarau oqo ka vakaraica na veika e veivakavulici kina o Momani ena Moronai 7:21–48. Veivosakitaka na veitaro oqo: Na cava na vuna eda gadreva kina na vakabauta kei na inuinui tu meda ciqoma kina na isolisoli ni loloma? Era sa semati keda vakacava na ivakarau yadua oqo vei Jisu Karisito? Na cava era ka bibi kina vua e dua na tisaipeli i Jisu Karisito na ivakarau oqo? Na cava ena yaco vei keda ke sa yali na noda vakabauta? na inuinui? na loloma? Sureti ira na lewe ni kalasi mera taura e vica na gauna me ra vola na veivakauqeti taumada.

Moronai 8:4–21

Ni da kila vakamatata na vunau dodonu ena rawa me vukei keda meda digidigi dodonu.

• Ena sega ni gadrevi beka ki na nomu kalasi me ra veivosakitaka ni cala na nodra papitaiso na gone, ia na vosa nei Momani ena ulutaga oqo ena vukei ira mera raica vakararaba na kena rerevaki na vunau lasu. Ni gadrevi me vakaraitaki ni iVola i Momani e “[vakamaduataka] na ivakavuvuli lasu” (2 Nifai 3:12), mo sureti ira na lewe ni kalasi me ra wilika na Moronai 8:4–21 vakailawalawa se tamata yadua. Me veimama na kalasi mera vakasaqara na ivunau ni Momani e vakila ni sega ni kila na tamata, oka kina na Veisorovaki i Jisu Karisito (raica na tikina e 20) kei na vakatulewa vakataki koya (raica na tikina e 10). Na ikarua ni veimama ni kalasi me raica na isau ni cala ni tamata. Mera na qai wasea na ilawalawa yadua ki na kalasi na veika era sa kunea. Na cava era vakavulica na veitikina oqo me baleta na bibi ni kena vulici ka bulataki tiko na ivakavuvuli dodonu? Eda na kunea evei na ivakamacala dodonu ni ivunau i Karisito? Me da na vakadeitaka vakacava ni sa donu tu na noda kila vakavinaka na ivunau?

• Ena rawa me yaga ki na nomu kalasi ni ra muria na ivakaraitaki nei Momani o ya me vukea e dua me dodonu nona digidigi ena nodra vakavulici ena ivakavuvuli dodonu. Sa rawa mo cakava oqo ena nodra sureti na lewe ni kalasi me ra vakasamataka e dua mai na ivolanikalou ka cakava e dua na digidigi cala. Na dina vakaivunau cava ena vukea na tamata oqori me kakua ni cakava tale na digidigi cala o ya? Solia vei ira na lewe ni kalasi e vica na miniti mera vakasaqara na ivolanikalou se itukutuku mai na koniferedi raraba sa oti ka na vukea na tamata me ra kila na dina vakaivunau. Sa rawa mo kerei ira na lewe ni kalasi me ra wasea na veika era sa kunea.

Moronai 9:25–26

Eda rawa ni vakanuinui tikoga vei Karisito, se cava ga na ituvaki ni noda bula.

• Na iotioti ni itukutuku nei Momani vei luvena ena Moronai 9:25 – 26 e rawa ni vukei ira na lewe ni kalasi mera kunea na inuinui vei Karisito, ena gauna ni sa sega na nodra inuinui. Sa rawa mo tekivu ena nomu kerei ira na lewe ni kalasi me ra wasea na vuna a rairai yalolailai kina o Moronai. Mera na qai wilika sara na veitikina oqo ka vola ena vava ni volavola na dina a vakayaloqaqataki Moronai kina o Momani me raimatua kina. Ena rawa vakacava ki na dina oqo me “laveti [keda] cake” ena siga nikua? Sa rawa talega ki na kalasi mera wasea eso na ivakaraitaki ni “loloma veivueti kei na vosota vakadede” ni Kalou era sa vakadinadinataka. Se me ra wasea na vakasama mera veivukei kina vakai ira mera maroroya tikoga na iVakabula kei na Nona kosipeli “ena [noda] vakasama me sega ni mudu,” ena gauna mada ga eda yalolailai kina (tikina e 25).

Vakayaloqaqataka na Vuli e Vale

Ni gadrevi mera vakayaloqaqataki na lewe ni kalasi me ra wilika na Moronai 10, mo vakatura ni sa gauna uasivi duadua oqo me ra vakananuma na sala era sa sotava oti ni a vakavoui kina na nodra ivakadinadina ni sa dina na iVola i Momani, era a vulica ena yabaki oqo.

iKuri ni iVurevure

E sa lako beka mai vua na Yalo?

Mena sauma kina na taro “Eda na vakila vakacava na veivakauqeti ni Yalo?” A vakaraitaka kina o Peresitedi Gordon B. Hinckley na Moronai 7:13 ka kaya: “Au sega ni nanuma [ni] dredre, sara. … Ena vukica beka e dua me caka vinaka, me duri cake, me tu vakadodonu, me kitaka na ka dodonu, me yalovinaka, me dau lomasoli? Ia e na Yalo ni Kalou”(Na iVakavuvuli nei Gordon B. Hinckley [1997], 260 – 61).

Vakabauta, inuinui, kei na loloma.

E vakatauvatana o Peresitedi Dieter F. Uchtdorf na vakabauta, inuinui, kei na loloma ki na dua na idabedabe yavatolu, ka vakamacalataka ni ivalavala dodonu e tolu oqo e “ratou vakatudonutaka na noda bula se cava ga na voravora se sukusukura ni vanua eda na lakova. …

Na “vakabauta, na inuinui kei na loloma era veitokoni vakai ira, ni gauna e tubu cake kina e dua, rau na tubu talega na kena vo. E yaco ga na inuinui ena vakabauta, ni sega na vakabauta, e sa sega na inuinui. Sa vakaoqo na vakabauta e yaco ena vakanuinui, ni vakabauta sa ‘vaka ni sa vakayacori na veika sa vakanuinuitaki.’

“Sa ka bibi dina ki na vakabauta kei na loloma na inuinui. Ni yaco na talaidredre, na yalo ca, kei na lokuyara me vakaluluqataka na vakabauta, sa tiko na inuinui me tutaka na noda vakabauta. Ena gauna ni lomaocaoca kei na yalototolo me bolea na loloma, sa yaco na inuinui me qaqacotaka na noda inaki kei na igu meda karoni ira na wekada ka sega mada ga ni da saumi kina. Na rarama cake ni noda inuinui, na levu cake ni noda vakabauta. Ni kaukauwa cake na noda inuinui, sa na savasava cake na noda loloma” (“Na Kaukauwa Vakalou ni Vakanuinui,” Ensign se Liaona, Nove. 2008, 21, 23–24).

“Na loloma savasava i Karisito.”

A vakatura o Elder Jeffrey R. Holland e rua na ibalebale ni malanivosa “na loloma savasava i Karisito”:

“E dua … sai koya na mataqali loloma veivueti, loloma dauveivosoti ni tisaipeli Vakarisito ki na tamata yadua. …

“[E dua tale na kena ibalebale] o ya na loloma veisorovaki i Karisito vei keda sa sega ni luluqa, ka qaqa sara. … Ena loloma oqo — na nona loloma uasivi me baleti keda — ke sega eda sa ka walega” (Na Karisito kei na Veiyalayalati Vou: Na iTukutuku Vakamesaia ni iVola i Momani [1997], 336).

Vakatorocaketaki Noda Veivakavulici

Vukei ira na vuli me ra taracake na bula rawati ira vakayalo. “Ni o veivakavulici, ka sega ni itukutuku tikoga, vukea [na lewe ni kalasi] mera kunea na dina ni kosipeli me baleti ira. … Ni ra vakatataro, ena so na gauna ena vinaka cake me ra vakavulici me ra kila na ivakarau me kunei kina na isaunitaro.” (Veivakavulici ena iVakarau ni iVakabula, 28). Me vakataka, nomu dusimaki ira na kalasi ki Na Ulutaga ni Kosipeli ena topics.ChurchofJesusChrist.org, ka koto kina na itukutuku e veivuke sara vakalevu ena vica na ulutaga.