Dua na Siga, Dua na Bogi, ka Dua na Siga, mai vei Jorge Cocco

7–13 ni Sepiteba

3 Nifai 1–7

“Laveta Cake na Ulumu ka Vakacegu”

Na Yalo Tabu e na vakauqeti kemuni mo ni raicamatua tiko eso na ivakavuvuli mai na 3 Nifai 1–7 ena kalasi. Oqori sara beka ga na ivakavuvuli ena vakalougatataka e dua e leqa tu.

Vola na Veika o Uqeti Kina

Sureta na Veiwasei

Me vukei ira na lewe ni kalasi me ra wasea na veika era vulica tiko mai vale, kerei ira mera vola ena tiki ni pepa eso na dina era kunea ena 3 Nifai 1–7 kei na idusidusi vakaivolanikalou me baleta na dina. Biuta na veitikinipepa ena dua na koniteina, ka taura mai e vica me rawa ni veitalanoataki ena kalasi. Ni ra veiwasei na lewe ni kalasi, vakasamataka kevaka e tiko tale eso na vakasama veiwekani ena ituvatuva oqo e rawa ni vakatitobutaka na veivosaki ka vakaitavitaki ira na vo ni lewe ni kalasi.

Vakavulica na iVunau

3 Nifai 1–7

Na saumaki e dua na iwalewale ka na gadrevi kina na sasaga vagumatua.

• Na3 Nifai 1–7 e vakamacalataki ira na tamata era sa saumaki oti vei Jisu Karisito kei na Nona kosipeli kei na so tale ka ra a sega. Me vukea nodra raica na kalasi na vu ni duidui ena iwasewase eso oqo, e rawa ni o vola ena vava e dua na iivolakabi ka tu kina na ulutaga eso oqo: Vakabauta kei na ivalavala ka vakamalumalumutaka na saumaki kei na Vakabauta kei na ivalavala ka vaqaqacotaka (na vakaukauwataka [can infer force in fijian) na saumaki. Wasewasea na idusidusi vakaivolanikalou oqo vei ira na lewe ni kalasi, ka sureti ira mera vakalewena na ivolakabi vata kei na veika era sa kunea (sa vakarautaki tu na ivakaraitaki me baleta na imatai ni tikina).

  • 3 Nifai 1:4–23, 29–30: Vakamalumalumutaka na saumaki: sega ni vakabauta na nona vosa na parofita ka vakalialiai ira na tamata ivalavala dodonu (tikina e 5–6). Vaqaqacotaka na saumaki: vakabauta na nona vosa na parofita ka masuta na veivuke (tikina e 8, 11).

  • 3 Nifai 2:1–3

  • 3 Nifai 3:12–16

  • 3 Nifai 4:8–10, 30–33.

  • 3 Nifai 6:13–18

  • 3 Nifai 7:15–22

  Me da vakaukauwataka tu vakacava noda saumaki mai e dina ni tu na veisaqasaqa?

• Ena taleitaka beka na nomu kalasi me ra dikeva na ivakarau me vaqaqacotaki kina na ka e vakatokai ena 3 Nifai 1:27–30 “na itabatamata tubucake tiko mai.” O na tarogi ira beka na lewe ni kalasi me ra vaqara ena veitikina eso oqo na vuna era a sega ni vorata rawa kina na itabagone ni Nifai kei na Leimani na cakaca e wavoliti ira tu. Oqo ena rawa ni vakavuna na kena veivosakitaki eso na bolebole era sotava tiko nikua na itabatamata e tubucake tiko kei na ivakarau vinaka duadua me ra vukei kina me ra tara cake na vakabauti Karisito. Eso na vakatutu ena kune ena “iKuri ni iVurevure.”

3 Nifai 1:4–21; 5:1–3

Sa vakayacora na Turaga na Nona vosa kecega

• Ni wiliki na itukutuku ena 3 Nifai 1:4–21 kei na 5:1–3 ena rawa ni vaqaqacotaka nodra vakabauta na lewe ni kalasi na nona yalayala na Turaga. De rawa beka nii ra wilika vata na lewe ni kalasi na 3 Nifai 1:4–7 ka vola ena vava ni volavola se cava era na nanuma kevaka o ira, na tamata vakabauta e vakamacalataki ena veitikina oqo. Me ra vakasamataka talega na veituvaki tautauvata e rawa ni da sotava nikua. Na cava eda vulica mai na 3 Nifai 1:8–21 kei na 5:1–3 me baleta na Turaga kei na nona yalayala? Me vakarabailevutaka na veivosaki, e rawa ni o railesuva e dua na serenilotu me baleta na vakanuinui vua na Kalou, me vaka na “When Faith Endures“ (sere ni Lotu, naba 128). E rawa ni ra wasea na lewe ni kalasi na veika era sotava ena gauna e saumi kina nodra vakabauta kei na nodra vakararavi vua na Kalou, dina ga ni tu na veisaqasaqa.

3 Nifai 1:4–15; 5:12–26; 6:10–15; 7:15–26

Eda sa tisaipeli i Jisu Karisito.

• E kaya o Momani, “Raica, au sa tisaipeli i Jisu Karisito” (3 Nifai 5:13). Mo vakasaqara vata kei na nomu kalasi na cava e kena ibalebale me dua na tisaipeli, mo sureti ira beka na lewe ni kalasi me ra vakasaqaqara ena 3 Nifai 1:4–15; 5:12–26; 6:10–15; kei na 7:15–26, ka vakasaqara na itovo vinaka, na vakabauta, kei na ivakarau ni tisaipeli i Karisito. Vakasamataka mo solia vei ira na lewe ni kalasi e vica na miniti me ra vakananuma vakatitobu ka vola e dua na ka era rawa ni cakava me ra tisaipeli vinaka cake i Jisu Karisito.

3 Nifai 2:11–12; 3:12–26; 5:24–26

Ni ra sa soqoni vata na yalododonu, na Turaga e rawa ni vaqaqacotaki ira ka taqomaki ira.

• Dua na vuna e rawa kina vei ira na Nifaiti me ra vakadrukai ira na daubutako i Ketianitoni sai koya ni ra a cokovata kei ira na Leimani era sa saumaki ka muria na idusidusi veivakauqeti i Lakoniasi me ra ”soqoni vata yani” ki Saraemala (3 Nifai 3:22). Na lesoni cava soti e rawa ni kune eke me baleti ira na nomu kalasi? E rawa mo kerei ira me ra wasea na veika era sotava ena nodra a vaqaqacotaki mai vei ira na tamata buladodonu era tu wavoliti ira. Mo qai sureti ira na lewe ni kalasi me ra railesuva na 3 Nifai 3:12–26, ka vakasaqara na vuna era soqoni vata kina na Nifai kei na veivakalougatataki era sotava. Eda na sotava vakacava na veivakalougatataki vata oqo ni da soqoni vata kei ira na lewe ni noda matavuvale se tabana kei na tabanalevu? Na cava tale e rawa me da vulica me baleta na vakasoqoni vata mai na 3 Nifai 5:24–26?

• Ni wiliki na 3 Nifai 3 e rawa ni dua na madigi me ra vukei kina na lewe ni kalasi me ra raica na noda na kaukauwa cake ni da soqoni vata ena buladodonu. De rawa ni o vakasamataka e dua na lesoni vakaraitaki ka vakaraitaka na sala ena kaukauwa cake kina e dua na ka malumalumu ni cokoti vata kei na so tale na ka. Sureti ira na lewe ni kalasi me ra raitayaloyalotaka ni ra kerei me ra vakauqeti ira na Nifaiti baleta na vinaka ni vakasoqoni vata, me vaka e vakamacalataki ena tikina e 12–26. E rawa beka ni ra cakacaka vakailawalawa me veivosakitaka na kena icakacaka, me vaka na veika era sa wilika ena veitikina oqo. Me ra wasea na nodra nanuma. Vakalasi, sa rawa me qai veivosakitaki na veitaro vakaoqo: Na bolebole cava soti eda na sotava ka rawa ni vakatauvatani vei ira na daubutako i Ketianitoni? E rawa vakacava ni da vakarautaka na noda itikotiko kei na noda tabanalevu me ivakaruru?

3 Nifai 3:1–13

Me da kakua ni rerevaki Setani.

• Na ivola a vola o Kitianai, na nodra iliuliu na daubutako i Ketianitoni, a segata kina me vakarerei ka lawakitaki ira na Nifaiti. Ena rawa beka ni ra railesuva na lewe ni kalasi na nona vosa e kunei ena 3 Nifai 3:2–10 ka veidutaitaka kei na sala eso e rawa ni lawakitaki keda kina o Setani nikua. Na cava eda vulica mai na ivakarau i Lakoniasi, na nodra turaganilewa levu na Nifaiti?

Vakayaloqaqataka na Vuli e Vale

Me vakauqeti na nomu lewe ni kalasi me ra wilika na 3 Nifai 8–11 me baleta na kalasi ni macawa mai oqo, tukuna vei ira ni tu ena 3 Nifai 11 na “ituvuka ni itukutuku ni” iVola i Momani—na veiqaravi nei Jisu Karisito vei ira na Nifai (raica na ivakamacala taumada ki na iVola i Momani).

iKuri ni iVurevure

Veivuke ena tarai cake ni vakabauta ena itabatamata e tubucake tiko.

A vakatura o Elder Valeri V. Cordón ena Vitusagavulu e tolu na sala me ra vukei ^kina na itabatamata era tubu cake tiko me ra tudei ena kosipeli: (P.85 in Galley - iKuri ni iVurevure; 1st para, 2nd line - File 36 in Trados)

1. “Gugumatua Cake ka Dau Kauwai mai Vale. … Na vakavulici vakaukauwa ni kosipeli sa rui ka bibi sara me na maroroi kina na kosipeli ena noda itikotiko, ka gadrevi kina na gugumatua kei na sasaga. Eda sa sureti tiko vakavuqa me da na vulica na iwalewale ni vuli ivolanikalou e veisiga vakavuvale kei na tamata yadua. E vuqa na matavuvale era sa cakava tiko oqo era sa vakalougatataki ena veisiga yadua ena duavata cecere kei na veivolekati sara kei na Turaga.

2. “iVakaraitaki Qaqa e Vale. … E sega ni se rauta meda vosa walega vei ira na luveda me baleta na bibi ni vakamau e valetabu, lolo, kei na vakatabui na Siga ni Vakacecegu. E dodonu me ra raici keda meda taura na gauna ka gole vakawasoma ki na valetabu. Ena gadrevi me ra raica ni da sa dina tiko ena lolo ka vakatabui vakataucoko na Siga ni Vakacecegu.

3. “iTovo Vakavanua. … E gadrevi vakamatavuvale, meda kua ni muria na nodra ivakarau na qase ke tarovi keda meda vakatabuya kina na Siga ni Vakacecegu se vulica na ivolanikalou ena veisiga kei na masumasu ena noda itikotiko. Ena gadrevi meda sogota na katuba livaliva ni noda itikotiko ki na iyaloyalo vakasisila kei na veivakauqeti butobuto kece tale eso. Ni gadrevi me valuti na itovo vakavuravura ni noda gauna oqo, sa gadrevi me da vakayagataka na ivolanikalou kei na domodra na parofita nikua me da vakavulici ira kina na luveda me baleta na kedra ivakatakilakila vakalou, na nodra inaki ni bula oqo, kei na ilesilesi vakalou i Jisu Karisito” (“Na Vosa ni Kosipeli,” Ensign se Liaona, Me 2017, 56–57; matanivola kala).

Vakatorocaketaki Noda Veivakavulici

Oka kina o ira era sasaga bula tiko. Eso na gauna era gadreva na lewe ni kalasi era sasaga bula tiko mera bau lomani talega. Vakasamataka mo kerei ira me ra vakayacora e dua na itavi ena lesoni ena tarava mai se me vakadeitaki ni ra vodo mai ki Lotu. Kakua ni yalolailai kera sega ni kauwai taumada mai ki na nomu sasaga. (Raica na Veivakavulici ena iVakarau ni iVakabula, 8–9.)