“Eberi 13–19. Motiaea 1–3: ‘Kaonaki n Tangiran te Atua ma Aomata ni Kabane,’” Nakomai, Iriirai—Ibukin te Reirei n Tabati: Ana Boki Moomon 2020 (2020)
“Eberi 13–19. Motiaea 1-3,” Nakomai, Iriirai—Ibukin te Reirei n Tabati: 2020
Minerva K. Teichert (1888–1976), Ana Taeka ni Kaboo te Uea ae Beniamina, 1935, te oera iaon te mitionaite, 36 x 48 te inti. Brigham Young University ibukin Korobanna
Eberi 13–19
Motiaea 1–3
“Kaonaki n Tangiran te Atua ma Aomata ni Kabane”
A mwaiti reirei ni Motiaea 1–3 are ko na marooroakinna ma kaain am kiraati. Tataro ibukin te kairiiri n ataia bwa tera reirei aika moan te bongana nakoia naake ko reireiniia.
Korei Am Namakin
Kaungaa te Tibwatibwa
N anganiia kaain te kiraati aia tai bwa a na marooroakina taekan aia kamatebwai i bon irouia ke n te utu ni Motiaea 1–3, kaoiia bwa a na tibwaua te kibu ma temanna are a kunea bwa e kaunganano.
Reirei te Reirei
Butimwaean ana taeka te Atua e kainnanoa te katauraoi.
-
Teuana te kawai ni waakinan te kabwarabwara ibukin te katauraoi ni butimwaea ana taeka te Atua bon marooroakinan mwiin te katauraoi—ke te aki katauraoi—ibukin bwaai tabeua. N aron te katooto, a kona kaain te kiraati n tibwauai taneiai bwa e kanga aia katauraoi ke aki taun te katauraoi n rootii baike a rinanona n te tabo n reirei ke n te tabo ni mwakuri ke n tabeua mwakuri ni kakukurei. Imwin aia tibwatibwa, ko kona ni kaoa iteraia kaain te kiraati bwa a na wareka Motiaea 2:1–9, n tarai bwaai ake a karaoi ana aomata Beniamina ni butimwaea ana taeka te Atua. Kain te kiraati ake iterana a kona ni kakaei kiibu akana ti te arona, n tarai bwaai ake e karaoi te Uea ae Beniamina are e kaotia bwa e kanga aron ana namakin ibukin ana taeka te Atua ao kainnanoakin ae e na tibwauaaki. Ngkanne titirakiniia kurubu n tatabeua bwa a na tibwauai aia iango. Tera ae ti kona n reiakinna man kiibu aikai ake a kona ni buokiira ni karekea ana taeka te Atua?
Ngkana ti beku ibukiia tabeman, ti bon beku naba ibukin te Atua.
-
Te Uea ae Beniamna bon ana toro te Atua n te katooto ao nakoia naake a mena irarikina. Tera ae a kona n reiakinna kaain am kiraati mairouna ni buokiia n aia konabwai ni beku ibukiia tabeman? Iangoia ni waakina am kabwarabwara n titirakiniia kaain am kiraati bwa a na korei ni karinani bwaai ake a totoko ake a kaitara ma ngaai aomata ngkai a beku ibukiia tabeman—n aron bukina ngkai tiaki beku ke bukina ngkai e aki manena ara mwakuri n ibuobuoki n aron ae e na bon konaa. Ngkanne a kona ni kamatebwaia Motiaea 2:10–26 ao karaoi karinani koaua ake e reiakin te Uea ae Beniamina ni beku ibukiia tabeman ake a kona ni buokiia n tokanikai iaon bwaai ake a totoko ake a korei ni karinani. Tera ae a kona ni karaoia aomata n tatabemaniia ao utu ni kabanea aia taratara iaon te mwakuri n ibuobuoki inanon maiuia n te bong ae koraki? Iangoia n tibwaua ana karaki Beretitenti Thomas S. Monson inanon “Bwaai n Ibuobuoki Riki Tabeua” bwa teuana te iango.
-
Te anene n taromauri n aron “A Poor Wayfaring Man of Grief” (Anene n Taromauri, nambwa. 29) ke te tamnei n aron “The Old Shoemaker” (ChurchofJesusChrist.org) e kona ni kakorakora te rongorongo are e kuneaki ni Motiaea 2:17—ngkana ti beku ibukiia tabeman, ti beku naba ibukin te Atua. Ko kanga ni kabonganai bwaai n reirei riki tabeua ni kakorakora ana rongorongo te Uea ae Beniamina? Tao kaain te kiraati a kona n tibwauai taneiai ake a karekei ngkai a beku ibukiia tabeman ke ni butimwaea ana mwakuri ni ibuobuoki temanna kanga ai aron ana mwakuri Kristo. Ngkai mwakoron am marooro, iangoia n tibwaua te taeka aei ae nako mairoun Beretitenti Henry B. Eyring: “Ngkana ti anga ara ibuobuoki nakon temanna, e namakinna te Tia Kamaiu ae kanga titebo ma ti Nakoina bwa ti na buokia” (“Is Not This the Fast That I Have Chosen?” Ensign ke Riaona, Nob. 2015, 22). Bukin tera ngkai ko iangoia bwa ti beku ibukin te Atua ngkana ti beku ibukiia aomata?
Te beku ibukiia tabeman e buokiira n namakina tangiran te Atua.
E roko te kukurei man kawakinan ana tua te Atua.
-
Ni buokiia kaain te kiraati bwa “a na iangoa te kakabwaia ma te aro ni kukurei irouia ake a kawakin ana tua te Atua,” e kona n ibuobuoki ngkana e moanaki ma kabwarabwaraan te kukurei. A na kanga kaain te kiraati ni kabwarabwaraa te kukurei are e roko man te ongotaeka nakon ana tua te Atua? Tao a kona n iangoia bwa iai raoraoia are e taku bwa teuanne ke neienne e kukurei ma e aki kawakin tuua. Kaoiia bwa a na wareka Motiaea 2:38–41 ao ni marooroakinna bwa a kanga ni buoka raoraoia n ataa te kaokoro imarenan kakukurein te aonaaba ao te kukurei ae akea tokina. Tera taneiai ke katooto man maiuia aomata ake a na kona kaain te kiraati n tibwaua te katooto ibukin te kukurei ae akea tokina?
E roko te kamaiuaki ti “n aran ao rinanon Kristo, ae te Uea.”
-
Ana rongorongo te Uea ae Beniamina iai inanona taetae ni burabeti aika a mwaakaroiroi man bwarabwara raoi ibukin bungiakin, ana mwakuri, ao ana anga karea ni kamaiu Iesu Kristo. Ko na bae ni butiia kaain te kiraati bwa a na tibwauai kiibu man Motiaea 3:1–20 are a na karekea namakinan te kukurei ao ni buokiia n ataa te Tia Kamaiu ao Ana mition. Butiia bwa a na tibwauaia bwa bukin tera a karekea te namakin ae kakukurei ni kiibu aikai.
-
Te kabwarabwara n ana Boki Moomon e taekinna bwa te boki “e kamatataa te babaire ni kamaiu.” Ni buokiia kaain te kiraati n taraia bwa e kanga ana kabwarabwara te Uea ae Beniamina ni buoka ao ni kakoroa nanon te kantaninga n ana Boki Moomon, ko na bae ni koreia iaon te burakibooti Iesu Kristo e Kakoroa nanon te Kamaiuaki. A kona kaain te kiraati n rinanoa Motiaea 3:1–20, ao ngkanne ngkoe ke ngaiia a kona ni karinani iaon te burakibooti koaua ake a reiakin ibukin te babaire ni kamaiu. Butiia kaain te kiraati tera ae a reiakinna bwa e kanga Iesu Kristo ni kakoroa nanon te babaire ni kamaiu. Ngkanne anganiia kaain te kiraati aia tai n rinanoa Motiaea 3:18–19 ao tibwauaia bwa tera ae ti riai ni karaoia bwa ti aonga n riki bwa aomata aika itiaki ao ni karekea te kamaiuaki. E kanga ana Mwakuri ni Kamaiu Iesu Kristo ni buokiira ni kakoroa nanon aio? Butiia kaain te kiraati bwa a na tibwauai aia namakin ibukin taben te Tia Kamaiu n te babaire ni kamaiu.
Kaungaa te Kamatebwai n te Mweenga
A tia kaain am kiraati ni karekea te namakin ngke a reiakina te reirei inanon te marooro, te reirei, ke booki aika tabu n tia ni bitiia? Tuangiia bwa ni Motiaea 4–6 a na wareka taekan korakoran mwiin taian koaua ake a reiakinaki iroun te Uea ae Beniamina iaoia ana aomata.
Bwaai n Ibuobuoki Riki Tabeua
Buokaia tabeman.
Beretitenti Thomas S. Monson E taku:
“Tabeua te ririki n nako I wareka te rongorongo ae koreaki iroun Jack McConnell, MD. E ikawarake n te tabuki i maiakinmaeaon Virginia n te United States ngkai bon ngaia temanna mai ibuakoia itiman natin te minita n te Methodist ae tiku n te mweenga n tararuaia natina ao kaain mweengana. E mangori aron maiuia. E uringnga bwa inanon ataeina, ni katoa bong ngke a tekateka ni katobibia te taibora n tain te katairiki, e na bae tamana n titirakina temanna ma temanna, ‘Ao tera ae kam a tia n karaoia ibukin temanna n te bong aio?’ A tia ni baireia ataei bwa iai te bwai ae a na karaoia ni katoa bong bwa a aonga ni kona n ribootinna nakon tamaia ae iai temanna ae a tia ni buokia. Dr. McConnell e arana te mwakuri aei bwa kaubwain tamaia ae moan te kakawaki, ibukin te kantaninga anne ao taeka aikanne a kaungaa nanona ma tarina ao mwaanena bwa a na buokiia tabeman inanon maiuia. Ngkai a ikawairake man nanonaomata, ungan nanoia n anga aia ibuobuoki e bitaki nakon te nano ni kan buokiia tabeman.
“Iraikin kinakin Dr. McConnell n ana mwakuri n taokita … e katea te bootaki ni mwakuri are aranna bwa Taokita n Anganano, are a anganaki aia tai taan mwakuri ake a riitaea n anganano ni mwakuri n akea te intiuarenti nakoia. E taku Dr. McConnell bwa n ana tai ni motirawa ngkai e ritaea ‘e a tia ni bitaki nakon 60 te aoa n te wiiki n akea boon ana mwakuri, ma e rikirake [marurungina] ao iai te kukurei inanon [maiuna] are e tuai man riki mai imwaaina.’ [Jack McConnell, “Ao Tera ae Ko a tia ni Karaoia ibukin Temanna n te Bong aio?” Newsweek, Tuun 18, 2001, 13.] …
“E koaua, ti aki kona n riki n aron Dr. McConnell, ni katei taian kiriniki ni buokiia aika a kainnano; ma e ngae n anne, a kaoti kainnanoia tabeman, ao ngaira n tatabemaniira iai te bwai ae ti kona ni karaoia ni buoka temanna. …
“Tariu ao mwaaneu, “Ti katobibiaki irouia naake a kainnanoa ara ibuobuoki, ara kaunganano, ara boutoka, ara karaunano, ara akoi—bwa kaain ara utu, raoraora, ara ikikina, ke iruwa. Ngaira bain te Uea ni buoka ana mwakuri iaon te aba, ma te mwioko ni beku ao ni buokiia Natina. E bon katan iaora n tatabemaniira nako. … Ti bia titirakiniira te titiraki are e taekinaki ni kamauraki iai Dr. Jack McConnell ao tarina ma mwaanena ni katoa tairiki n aia tai ni katairiki: ‘Tera ae I a tia ni karaoia ibukin temanna n te bong aio?’” (“Tera Ae I a Tia Ni Karaoia ibukin Temanna n te Bong Aio?” Ensign ke Riaona, Nob. 2009, 84–87).
Kanakoraoan Ara Anga reirei
Ko na riki bwa te bwai ni mwakuri iroun te Tamnei. Oin te kantaninga ngkai te tia reirei ngkoe tiaki karaoan te marooro ma ko na buokiia tabeman ni karekea uaan te Tamnei ae Raoiroi—te tia reirei ni koaua. (Taraa Reirei n Ana Kawai te Tia Kamaiu, 10.)