Kristo ao Ana Abotoro, iroun Del Parson

Maati 30–Eberi 12

Itita

“E na Mangauti … ma te Kamaiu iaon Baina ni Kiba”

Tabatin te Itita bon te tibwanga ae moan baan te tamaroa ibukiia kaain am kiraati bwa a na kakorakorai aia kakoaua ibukin Iesu Kristo ao Mangautina—ao ni kakorakorai aia kakoaua i bon imarenaia. Kawakina aio n am iango ngkai ko kamatebwai booki aika tabu n am katauraoi ibukin te reirei aio. Ukoukora kairam n te tamnei bwa tera ae e na kona n ringii iai aia iango ma nanoia aomata ake inanon am kiraati.

Korei Am Namakin

Kaungaa te Tibwatibwa

Kain am kiraati a bae ni iai baika a tia n rinanona aika uaana n te wareware inanon uoua te wiiki n nako bwa tera ae taekinaki n ana Boki Moomon ibukin te Mangauti ao ana Mwakuri ni Kamaiu Iesu Kristo. Anganiia tabeua te miniti bwa a na kakaea te karaki are e riingaki nanoia iai, ao ngkanne kaoiia bwa a na tibwauai bwaai ake a kunei.

Reirei te Reirei

2 Nibwaai 9:7–15; Aramwa 11:41–45; 40:21–23

Te mangauti bon ikotan te rabwata ao te Tamnei n ae teimatoa.

• Te kabootau bon te kawai ae e na rangi n nakoraoi n reireia reirein te euangkerio. Tao ko kona ni kaoiia kaain am kiraati bwa a na wareka te ka 2 Nibwaai 9:7–15 ao Aramwa 11:41–45 ao kinai taeka ao kibuntaeka inanon kiibu aikai ake a reireia taekan te mangauti. Tera ae kabotauaki ma te mate? E kanga kabwarabwaraan te mangauti? Bukin tera ti kainnanoa te rabwata ae mangauti? (taraa naba R&B 93:33–34). A kona kaain te kiraati ni marooroakinna bwa a na kanga ni kabonganai kabotau aikai n reireina temanna taekan te mangauti. Ngkai a tibwauai aia iango ma kaain te kiraati, ko kona ni maroorokinna ma ngaiia bukin tera ngkai a ataa bonganan koaua aikai ibukin te Mangauti.

• Iangoia ni kaoiia kaain te kiraati bwa a na tibwauai taai ake ngke a namakina te kakaitau ibukin aia atatai ibukin te Mangauti. E na kanga te rabakau anne bwa e na uaana riki nakon maiura? Ko kona ni buokiia kaain am kiraati ni kaekaa te titiraki aio ni kaoa temanna ma temanna bwa a na kakaea 2 Nibwaai 9:7–15; Aramwa 11:41–45; ke Aramwa 40:21–23 ao korei ni karinani koaua iaon te burakibooti ake a kunei ibukin te Mangauti. Ngkanne ko kona ni korea iaon te burakibooti taeka akana imwina ao n titirakiniia kaain te kiraati bwa a na iango tabeua te miniti imwain ae a tibwauaia bwa a na kanga ni katiai: Ngkana I aki atai bwaai aikai… ao Ibukina bwa I atai bwaai aikai….

Ketetemwane, iroun Michael T. Malm

Motiaea 3:5–7; 15:5–9; Aramwa 7:11–13

Iesu e katokaa Iaona ara bure, marakira, ao aorakira.

• Iangoan ao marooroakinan korakain te Tia Kamaiu are e karaoia ibukira e kona ni kaoa te Tamnei ao ni kaungaa te nano n tangira ao ni kakaitau nakon te Tia Kamaiu. Ni kaungaa te iango ao te marooro, ko kona ni korea tamnein te tiata iaon te burakibooti ae ti te arona ma are e iangoaki n te kabwarabwara n te wiiki aio inanon Nakomai, Iriirai—Ibukiia Aomata n Tatabemaniia ao Utu ao ni kaoiia kaain te kiraati bwa a na katiaa ni kabongana Motiaea 3:5–7; 15:5–9; ao Aramwa 7:11–13 ma oin aia taneiai. N aron ana kairiiri te Tamnei, ko kona naba ni kaoiia kaain te kiraati bwa a na tibwauai aia namakin ibukin te Tia Kamaiu bwa tera ae e a tia ni karaoia ibukiia.

• Katangitang aika a tabu a kona ni kaoa te Tamnei ao ni kamatoa te reirei are ko anga reirei iaona. Tao a kona kaain te kiraati n rinanoa Motiaea 3:5–7; 15:5–9; ao Alamwa 7:11–13 ao ni kakaei ao n anenei anene n taromauri ake a bootau ma rongorongo ake inanon kiibu aikai (ko kona naba ni kaoa temanna bwa e na anene ke ni katang anene n taromauri). Te intekiti mai bukin te boki n anene n taromauri e kona ni ibuobuoki, ao tabeua anene n taromauri a baireaki inanon “Bwaai n Ibuobuoki Riki Tabeua.” Kaungaia kaain te kiraati bwa a na tibwauai kibuntaeka man anene n taromauri ao booki aika tabu ake a buokiia ni kakaitau riki ibukin ana anga karea te Tia Kamaiu.

Enoti 1:1–19; Motiaea 5:1–2; 27:8–28:4; Aramwa 24:7–19

Ana Mwakuri ni Kamaiu Iesu Kristo e kaitiakiira ao ni buokiira ni kakororaoira.

• Teuana te kawai ae nakoraoi bon reiakinan taekan mwaakan te Tia Kamaiu ni bitii maiura ma kamatebwaian katooto bwa e kanga ni biiti maiuia tabeman ngkai a rairi nanoia ao n roko Nakoina. A mwaiti katooto inanon ana Boki Moomon. Tao ko kona ni mwiokoa temanna ma temanna kaain te kiraati bwa a na wareka teuana mai buakon katooto aikai, n aron Enoti (taraa Enoti 1:1–19), ana aomata te Uea ae Beniamina (taraa Motiaea 5:1–2), Aramwa te Ataei (taraa Motiaea 27:8–28:4), ke Aentaai-Nibwaai-Riaai (taraa Aramwa 24:7–19), ke a kona ni iangoi tabeua katooto man booki aika tabu. Ngkanne a kona tabeman kaain te kiraati ni kakimototoi taneiai ake a wareki rongorongoia. Tao ko na bae n kaungaia kaain am kiraati ni karaoa aei n anga te taeka ni karariki are e na buokiia nikiraia kaain te kiraati ni keetinna bwa antai rongorongona are a kabwarabwaraa. A kona naba ni kakabwarabwarai titiraki n aron aikai: A kanga ni bitaki aomata inanon taian katooto aikai? Tera ana mwakuri te Tia Kamaiu inanon bitakiia? Tao a kona tabeman kaain te kiraati ni marooroakinna bwa e kanga te Tia Kamaiu n tia ni karika “te bitaki ae moan te korakora … i [nanoia]” (Motiaea 5:2). N reiakina riki rongorongon te Tia Kamaiu bwa e kanga ni bitiira—ao bukin tera e rangi n kakawaki te bitaki anne—ko kona n tibwaua te kabootau ae ti te arona ma are e anga Beretitenti Dallin H. Oaks inanon “Bwaai n Ibuobuoki Riki Tabeua.”

Kaungaa te Kamatebwai n te Mweenga

Ni kaungai nanoia kaain te kiraati bwa a na wareka Motiaea 1–3, ko na bae ni kaoiia bwa a na iangoa te tai ngke a namakina te nano ni kukurei imwin aia wareware ke imwin ongoraaia n rongorongon te euangkerio. Kaoiia bwa a na tarai koaua ake a na kona ni kukurei iai ngkai a wareka Motiaea 1–3.

Bwaai n Ibuobuoki Riki Tabeua

Anene n taromauri ibukin ana Mwakuri ni Kamaiu te Tia Kamaiu.

• “I Believe in Christ,” Anene n taromauri, nambwa. 134

• “I Ataia Bwa E maiu Au Tia Kamaiu, ” Anene n taromauri, nambwa. 136

• “Thy Will, O Lord, Be Done,” Anene n taromauri, nambwa. 188

• “That Easter Morn,” Anene n taromauri, nambwa. 198

Tamneia kaain te Tabaenako Kuaea n Tembora Tikuea n anenei tabeua anene n taromauri ake a kona ni kuneaki iaon ChurchofJesusChrist.org.

Te kaikonaki: Ti riai n rangi n itiaki.

Beretitenti Dallin H. Oaks e tibwaua te kaikonaki ni kamataata bwa e kanga te Tia Kamaiu ni katauraoira n oki nakon mweengan te Atua:

“Ti kataia n iangoa mwin te rairannano ae e itiaki man te bure, ma anne te atatai ae aki bwanin. … Te aomata ae bure kanga ai aron te aroka are e kai bwaoua n te ang. N te bong ae angang man kakarau, te aroka are e bwaoua ae toko ma aontano are a tanotano baana n te bokaboka, titebo ma te bure. Ngkana ti kabanea ara taratara iaon kaitiakan te naan baanikai, te kabwaka n te aroka are e karika bwaouana ao ni katantanoi baana a na bon tiku. N ae ti te arona, te aomata are e nanokawaki bwa e taonaki n te bure e na manga bure riki n te ang ae korakora are imwina. Te kabwaka n te bwai ae e okioki karaoana e na reitinako ni karokoa are e kamatoatoaaki te aroka.

“Ngkana e a tia te aomata n rinanon te waaki aio are e taekinaki ni booki aika tabu ‘te nano ae uruaki ao te tamnei ae raoraoma,’ e mwaiti riki ae karaoia te Tia Kamaiu ni kaitiaka te aomata anne man te bure. E angan neienne ke teuanne te korakora ae boou. Te kakorakoraaki anne e kakawaki ibukira bwa ti na ataa oin te kantaninga ibukin te itiaki, are ti na oki nakon Tamara are i Karawa. Ni butimwaeaki nakon mweengana, ti riai n rangi n itiaki riki. Ti riai ni bitaki man te aro n aomata ae kabwaka are e a tia ni bure nakon te aomata ae e korakora ma rabwatana n tamnei bwa e na maeka ni mweengan te Atua” (“Te Mwakuri ni Kamaiu ao te Onimaki,” Ensign, Eberi. 2010, 33–34).

Kanakoaraoan Ara Anga reirei

Maiuakina ae tau ibukin ana kairiiri te Tamnei. Ngkana ko maiuakina te euangkerio, ko tau ibukin ana iraoraoi te Tamnei, are bon te tia reirei ni koaua. Ngkai ko ukoukora Ana kairiiri, e na anganiko am iango ma am namakin bwa ko na kanga ni buokii kainnanoia naake ko reireiniia. (Taraa Reirei n ana Kawai te Tia kamaiu, 5.)