Te Beku Ibukin te Atua, iroun Walter Rane

Eberi 20–26

Motiaea 4–6

“Te Bitaki ae Moan te Korakora”

Wareka Motiaea 4–6, ao korei mwiin am namakin. Ngkana ko karekei namakin, ko kona n titiraki, n aron are e taekinna Unimwaane Richard G. Scott, “Iai riki te bwai ae I riai n ataia?” (“To Acquire Spiritual Guidance,” Ensign ke Riaona, Nob. 2009, 8).

Korea Am Namakin

Kaoa te Tibwatibwa

Ko na bae n tangiria ni waakina am marooro n am kiraati ni butiia kain am kiraati bwa a na tibwaua teuana mai ibuakon ana reirei te Uea Beniamina man Motiaea 4–5 are a tangiria riki ni kan kabongana inanon maiuia.

Reirei te Reirei

Motiaea 4:1–12

Rinanon Iesu Kristo, ti kona ni karekea ao n teimatoa ni kaawakina kamaunaan ara bure.

• Tabeman aomata a kairua n aia koaua ae te rairannano e kainnanoa teutana te mwakuri; tabeman a kakoaua ae e kainnanoa te mwakuri korakora. Ni buokiia kain te kiraati bwa a na ataia bwa tera ae kainnanoaki ibukin kamaunaan buure, ko kona ni kaoiia bwa a na ukoukora ana reirei te Uea Beniamina n Motiaea 4:1–12, ni kakaea te tua are e na kona te Tama are i Karawa n anga ibukin kabwaraan buure. A kona kain te kiraati ni koroi ni karinani iaon te burakibooti bwaai ake a kunei. Tuangiia bwa a na iangoa te kaikonaki ni buoka kabwarabwaraan te bwai ae a reiakinna. Te katooto, a kona ni kabotaua kabwaraan buure ma te tia tarau are e “kabwaraaki” ana tarau ke ni kamaunaaki ana tarau. Ke a kona ni kabotaua te teimatoa ni kaawakina kamaunaan ara bure nakon tabeakinan te bwai ae e na teimatoa ni kakaraoakia, n aron te onaroka ke te mweenga.

• Iangoia n titirakiniia kain te kiraati te bwai ae a na taekinna nakon temanna ae aki koaua ngkana e na bongana karaoan te rairannano. A na kanga ni buoka temanna ae e bwara nanona ao temanna ae namakinna ae kaangaanga te tokanikai iaon te bure ao te mamaara? Ko kona n ibuobuoki ni katauraoia kain te kiraati ibukin marooro aikanne n tuangiia bwa a na kabanea tabeua te miniti n ukoukori ana taeka te Uea Beniamina n Motiaea 4:1–12 ibukin koaua ake a na kona ni buoka temanna n teuana mai ibuakon kaangaanga aikai. A kona ngkanne kain te kiraati n tibwauai koaua aika a kunei ma temanna ae tekateka irarikiia.

Motiaea 4:11–27

Ngkana ti raira nanora, ti na kaonaki ma ana tangira te Atua.

• Ti na kanga n ataia ngkana ti a tia ni karekea kabwaraan ara bure? Te Uea Beniamina e kabwarabwarai tabeua mwiin te rairannano ni koaua—kaoiia kain am kiraati bwa a na kakaea ni Motiaea 4:13–16. Ko kona naba ni kaoiia bwa a na iangoa oin maiuia ao n taraia bwa a kanga raoi aroia ni maiuakin reirei inanon kiibu aikai. Tera kanikinaa aika a nooria kain te kiraati ae a tia n rairaki? E kanga ara reitaki ma tabeman ni bitaki ngkana ti nakon Kristo rinanon te rairannano? Tao a kona kain te kiraati n tibwauaia bwa a kanga n noora aei n riki inanon maiuia.

• Motiaea 4:11–12 ao 14–16 a kona ni karika te marooro iaon te bwai ae kaungaa aron te tobwa ae raoiroi. Tera ae ti reiakin man kiibu aikai bwa ti na kanga n riki bwa kaaro aika a raoiroi riki?

• Ngkana ko namakina te kaungaaki bwa kam na maroroakin ana reirei te Uea ae Beniamina iaon tabeakinaia rarikin ao kainnano, ko kona ni kaoiia kain te kiraati bwa a na tibwatibwa n aron warekan kiibu man Motiaea 4:16–27. Imwin warekan kiibu aikanne, te aomata are e wareware e kona ni kakimototoi n oin ana taeka ana reirei te Uea ae Beniamina. Ana rongorongo Unimwaane Jeffrey R. Holland “Tiaki Ngaira Taan Bubuti Ni Kabane?” (Ensign ke Liahona, Nob. 2014, 40–42) e kona ni kabonganaaki bwa kabwaninan te marooro aei. Ti na kanga ni kona n ira ana reirei te Uea Beniamina n “aki kabirimwaka riki te aomata [nakon] are riaon korakorara”? (Motiaea 4:26–27). E kanga te tua n “anganako [ara] bwai nakoia aika kainnano” n irekereke ma kabwaraan ara bure?

Motiaea 4:29–30

Ti riai n tarai ara iango. ara taeka, ao ara mwakuri.

• N tabetai e na taraa ni bebete riki ngkana e anganiira te Uea bwaninin rinanin te bure aika a kona n riki. Irarikin anne, E tuangiira, “Tarataraingkami … man teimatoa n te onimaki n aron are kam a tia n ongo ibukin rokon ara Uea” (Motiaea 4:30). Ni buokiia kain am kiraati ni maroroakina te reirei aei, ko kona n titirakiniia titiraki n aron aikai: A na kanga ara iango, ara taeka, ma aroarora n rotiira ma tabeman? Tera ae nanonaki n “teimatoa n te onimaki”? Tera te reirei ae ti kona n tibwauaia ma ngaira n tatabemaniira bwa e na buokiira n “tarataraira”?

Motiaea 5:1–7

E kona Tamnein te Uea ni karika te bitaki ae Moan te Korakora inanora.

• Ni moana te marooro iaon taekan te bitaki ae akea kabotauana are e kona ana euangkerio Iesu Kristo ni uotia nakon maiura, ko kona ni kaoiia kain te kiraati bwa a na tibwauai tabeua bukina bwa bukin tera e kaangaanga n tainako karaoan bitaki ni maiura ae teimatoa. Ngkanne kaoiia bwa a na wareka Motiaea 5:1–5, ni ukoukora “te bitaki n nano ae korakora” ake a tia n rinanona ana aomata te Uea ae Beniamina. Tera koaua n te bitaki n nano ae ti reiakin man aia taneiai? Iangoia n titirakiniia tabeman kain te kiraati n tibwauaia bwa e kanga te Tamnei ae Raoiroi n tia ni buokiia ni bitii nanoia. Ko kona naba ni mataku n teuana te witeo are kaotaki inanon “Bwaai n Ibuobuoki Riki Tabeua.”

  

  E kona te Uea ni bita nanora ao maiura. Baai ni Kamaiu, iroun Adam Abram

• Imwin maroroakinan koaua n Motiaea 5:1–7, tabeman kain te kiraati a na miimi bwa bukin tera bitakin nanoia e taraa n aki korakora ke ni waekoa n aron are a rinanona ana aomata te Uea ae Beniamina. Te rongorongo mairoun Unimwaane D. Todd Christofferson inanon “Bwaai n Ibuobuoki Riki tabeua a taetae iaon te titiraki aei. Tera ae ti kona n reiakinna mairoun Unimwaane Christofferson n taekan te rairaki?

Motiaea 5:5–15

E kaoai te Atua bwa N na karaoi berita aika a tabu ma Ngaia.

• Motiaea 5:5–15 e kona ni buokiia kain te kiraati n atai kakabwaia aika a karekei ngke a karaoi ao a kawakin berita aika a tabu ma te Atua. Ko kona ni kaoiia bwa a na rinanon kiibu aikai ngkai ti iangoi taekan berita n te bwabetito ao otenanti n te toa ao n tibwaua te bwai ae a reiakinna. (Taraa naba R&B 20:77, 79.)

Kaungaa te Kamatebwai n te Mweenga

A mwati kain am kiraati aika tao a tibwa rinanon ke a tia n rinanon kaangaanga ke te kataaki. Tuangiia bwa n Motiaea 7–10 a na wareka iai taekaia kurubu n aomata aika a reiakinna bwa a na kanga n onimakina te Uea n aia tai ni kataaki.

Bwaai n Ibuobuoki Riki Tabeua

Witeo iaon ChurchofJesusChrist.org ibukin te “te bitaki n nano ae korakora” (Motiaea 5:2).

• “Te Kariki ni Katoabong: Bitaki”

• “Te Bitaki n Nano”

• “Te Bitaki ae Moan te Korakora: Te Rairaki”

Te bitaki n angin te tai bon te bwai ae reitinako.

Unimwaane D. Todd Christofferson e taetae iaon te bitaki n nano ae moan te korakora ae kabwarabwaraaki ni booki aika tabu:

“Ko kona n titiraki, Bukin tera te bitaki ae korakora aei e aki waekoa n riki n au kaangaanga? Ko riai n uringnga bwa aia katooto aika a kamimi ana aomata te Uea ae Beniamina, Aramwa, ao tabeman riki inanon booki aika tabu bon ti ngaia anne—e kamimi ao e aki kaokoro. Ibukiia angiina mai ibuakora, bitaki a waeremwe ao n riki n tabetai. Te manga bungiaki, n aki ti tebo ma bungiakira n rabwata, e raka riki n aron karaoana nakon te bwai ae riki. Ao te katabeaki n te kawai anne e kakawaki n te maiu aei.

“N te tai naba anne, ti na aki kakoauaira n te mwakuri ae aki kantaningaaki. Ti na aki kakukureira ni kawakin tabeua kateira ni karaoa te buakaka. Ti na tauraoi ni kororaoi n taua te toa ni katoa wiiki ao n reitinako ni iangoa te Tamnei ae Raoiroi bwa e na kanakoi ni kabane kanikinaean te bareka are inanora. I kakoaua bwa ngkana ko teimatoa ni kawain te manga bungiaki n tamnei, ana mwakuri n akoi Iesu Kristo e na kamaunai am bure ao memean buure akana iroum, a na manga akea ana katikitiki te kariiri, ao rinanon Kristo ko na riki n tabu, ngkai Ngaia ao Tamara are i Karawa a tabu” (“Born Again,” Ensign ke Riaona, Meei 2008, 78).

Kanakoraoan Ara Anga reirei

Ukeukeri katooto aika a raraoi inanon booki aika tabu. Ngkana ko wareka ana marooro te Uea ae Beniamina nakoia ana aomata, tarai reirei n ana katooto aika a na kona ni buokiko n riki bwa te tia reirei ae nakoraoi riki. Ibukin te katooto, tera ae e karaoia te Uea ae Beniamina ni kakaea bukina ngkana a oota ana aomata ni bwaai aika e anga reirei iaona?