“Maati 23–29. Enoti–Ana Taeka Moomon: E Mwakuri Inanou Bwa N na Karaoa are Nanona,” Nakomai, Iriirai—Ibukin te Reirei n Tabati: Ana Boki Moomon 2020 (2020)
“Maati 23–29. Enoti–Ana Taeka Moomon,” Nakomai, Iriirai—Ibukin te Reirei n Tabati: 2020
Iakobwa ao Enoti, iroun Scott Snow
Maati 23–29
Enoti–Ana Taeka Moomon
E Mwakuri Inanou Bwa N na Karaoa are Nanona
Katauraoi n anga reirei man warekan Enoti–Ana Taeka Moomon ao ni karaoa te baire n te anga reirei (taraa Reirei n ana Kawai te Tia Kamaiu, 19). Babaire ao reirei n te kabwarabwara aio e kona naba n ibuobuoki n anganiko taian iango.
Korea Am Namakin
Kaungaa te Tibwatibwa
N anganiia kain te kiraati taai bwa a na tibwaua te bwai ae a tia n reiakinna ni mweengaia, ko kona ni bwenauai inanon taian kurubu ao katabeia kurubu n tatabeua bwa a na wareka teuana te mwakoro man Enoti–Ana Taeka Moomon. Tuangiia bwa ana iangoi kiibu man te mwakoro anne ae a namakinna bwa e riai ni maroroakinaki n te kiraati. Koroi ni karinani kiibu aikai iaon te burakibooti, ao rinei tabeua bwa a na maroroakinaki.
Reirei te Reirei
Ti kona ni karekei kabwaraan ara bure ngkana ti kamwakura ara onimaki iroun Iesu Kristo.
-
Aikai tabeua titiraki aika ko kona ni kaoiia iai kain te kiraati bwa a na iangoi ao ni maroroakin ngkana ko kamatebwaia Enoti 1:1–17: Tera ae ti reiakinna man ana atatai Enoti iaon karekean kabwaraan ara bure? E kanga Enoti ni kaota ana onimaki iroun Iesu Kristo? E kanga te atatai aei n roota Enoti ao e kanga n iangoia i bon irouna ma tabeman?
Ara tataro ae a nako mai i nanora a na kaekaaki.
-
Ni buokiia kain te kiraati ni karikirakea otaia n te tataro, ko kona n tibwauai inanon kurubu aika a uarereke ao kaoiia kurubu n tatabemaniia bwa a na kamatebwaia teuana mai ibuakon mwakoron Enoti 1: kiibu 2–8, 9–11, ke 12–17. Imwiina ao titirakiniia kurubu n tatabeua nako bwa a na reireiniia nikiraia kain te kiraati te bwai ae a reiakinna ibukin te tataro man aia kibu ake a tia n anganaki. Te katooto, ko kona ni kaoiia bwa a na tibwauai taeka ao mwakoro ake a kabwarabwaraa aron ana tataro Enoti.
-
Irarikin are reiakinan bwa e kanga Enoti n tataro, ti kona n reiakinna ae mwaiti man te bwai are e tataro ibukina Enoti. Tao a kona kain te kiraati ni kinaa bwa antai ke tera ae e tataro ibukina Enoti Enoti 1:4–17. Ni kaineti ma kiibu aikai, bukin tera Enoti e tangiria n tataro ibukiia tabeman? Tera riki koaua ibukin te tataro ae ti reiakinna mairoun Enoti?
Ngkana ti kawakin tuua, ti na rikirake ni maiu raoi.
-
Iarom ao ana taan koroboki n Ominai a korea taekaia ana aomata Nibwaite, ma aia rongorongo a kaineti naba nakoia Aomata n tatabemaniia. Tera ae ti reiakinna man ana boki Iarom ao Ominai bwa e kanga te raoiroi ni kairiiri nakon te rikirake? (te katooto, taraa Iarom 1:7–12 ao Ominai 1:5–7, 12–18). E na bae n ibuobuoki ibukiia kain te kiraati ni kabwarabwaraa nanon rikirake ni kabongana te rikitinare ao booki aika tabu (ibukin te katooto, taraa Aramwa 37:13; 48:15). E kanga ana kabwarabwara te aonaaba ni kabotauaki ma ana kabwarabwara te Uea? E kanga te Uea ni buokiia Ana aomata bwa a na rikirake?
-
N te kawai naba are a karaoia ana burabeti Nibwaite ngke a beku ma te korakora n reirei tuua nakoia aomata, ara burabeti ni boong aika kaitira a reireiniira naba taekan tuua. Imwiin warekan Iarom 1:9–12, a kona kain te kiraati ni maroroakin aia reirei taan kairiiri n te Ekaretia ake a kakorakoraia ni kawakin tuua. E na na bae n ibuobuoki ibukiia kain te kiraati n rinanoi rongorongo man te maungatabu aika a tibwa nako inanon ana maekatiin te Ekaretia ke n te Gospel Library app. Ke a kona n rinanoi kainibaire aika maroroakinaki inanon Ibukin Kakorakorakiia Kairake. Ngkana e kainnanoaki, ko kona n nakon rinanin rongorongo inanon “Bwaai n Ibuobuoki Riki Tabeua.” E kanga te ongotaeka nakon tuua ni buokiira n “rikirake” inanon maiura?
E uotiia aomata aika mwaiti te Uea nakon te aba ni berita.
-
Iai inanon Ana Boki Moomon te rongorongo ae kaangaanga arona, ao tauan mwiin kurubu n aomata aika a kakaokoro are e kabwarabwaraia e kona ni kaangaanga. Teuana te kawai n reirei taekaia aomata n tatabemaniia inanon Ana Boki Moomon e kona n ae korean te tiata iaon te burakibooti ao kaoiia kain te kiraati bwa a na kanoaia ma rongorongoia kurubu n aomata n tatabemaniia (n aroia Nibwaite, Remwanaite, ao aomatan Taraemera). Te katooto, aikai atuu tabeua iaon tiata: Aran te kurubu, Ningai ao a kanga n roko, ao Tera ae riki nakoia. Bootaki ni maroroakinna bwa bukin tera e nang ibuobuoki ataakin bwaai ake ko a tia n reiakin ni kaineti ma taian kurubu. Aikai kawai n te Boki ni kairi nakon booki aika tabu (ChurchofJesusChrist.org) a kona n ibuobuoki: “Koriantamwa,” “Iaretaite,” “Reimwanaite,” “Mureki,” “Nibwaite,” ao “Taraemera.”
Te Atua e na bon mwakuri rinanora ngkana ti ira Ana kairiiri.
-
Ngkai mwakoron te marooro n Ana Taeka Moomon, ko kona ni kaoa kain te kiraati bwa e na katauraoa ana tibwatibwa bwa bukin tera Moomon e anaaki nanona bwa e na karinii bwaatua ake a uarereke (1 Nibwaai–Ominai) inanon Ana Boki Moomon. A kona kain te kiraati ni katauraoi man warekan Ana Taeka Moomon ao bwaai n ibuobuoki riki tabeua, n aron Reirei ao Berita aika Tabu 10:8–19, 39–45; te kabwarabwara n te wiki aei n Nakomai, Iriirai—Ibukiia Aomata n Tatabemaniia ao Utu; ao mwakoro 5 n Aomata aika Itiaki, waorium 1. Kaungaia kain te kiraati bwa a na kairii rongorongo aika a kakawaki iaon buan 116 iteraniba n Ana Boki Moomon ao bukin tera bwaatua ake a uarereke a kainnanoaki bwa a na onei mwiin ake a bua. Tera taian koaua ae a reiakinna kain te kiraati iaon ana mwakuri te Uea rinanoia aomata? Tera ae a kunea kain te kiraati n Ana Taeka Moomon 1:1–8 ae anaa nanoia bwa a na iri kaetieti mai iroun te Atua riki ngkana aki bwanin raoi ootaia bwa tera bukina?
TamneiMoomon e bootii bwaatua aika kooraE ikoti Bwaatua Moomon, iroun Jorge Cocco
-
Moomon e kakabwaiaia mirion aomata bukina bwa e irira ana wirikiriki te Tamnei iaon bwaatua ake a uarereke. (taraa Ana Taeka Moomon 1:7). Iangoi kawai aika ko kona iai ni buokiia kain am kiraati bwa a na ataia ae a kona ni kakabwaiaia tabeman ngkai a ukoukoria n riki bwa ana tabonibai te Atua ao n iriira ana wirikiriki te Tamnei ae Raoiroi. E kanga te Atua ni mwakuri rinanon Moomon? Tera ae a nooria kain te kiraati n ana mwakuri te Uea are e karaoia rinanoia ke tabeman ngkai a ongo bwanaan te Tamnei ao n ukoukoura ana kantaninga te Atua? Karakinan Beretitenti Thomas S. Monson ni “Bwaai n Ibuobuoki Riki Tabeua” e katauraoa te katooto are e na kona n buokiia kain te kiraati n iangoi katooto tabeua man maiuia.
Kaunga te Kamatebwai n te Mweenga
Bukina bwa te Maungatabu ni kabuta ao te Itita a nang roko inanon tabeua te wiiki ma ngkai, kaungaia kain te kiraati bwa a na ongora n taian rongorongo mairouia te Moan ni Beretitentii ao te Kooram n Abotoro n te Tengaun ma Uoman n tibwaua aia kakoaua ae e onoti ibukin Iesu Kristo.
Bwaai n Ibuobuoki Riki Tabeua
Witeo n rongorongon Enoti n Ana Boki Moomon.
Kakaai witeo aika a kaoti rongorongo man ana boki Enoti n te ikotaki n Tamnei ibukin ana Boki Moomon iaon ChurchofJesusChrist.org ke te gospel library app.
Rongorongo n te maungatabu ni kabuta iaon kawakinan tuua.
-
Thomas S. Monson, “Kawakin Tuua,” Ensign ke Riaona, Nob. 2015, 83–85
-
Dieter F. Uchtdorf, “Living the Gospel Joyful,” Ensign ke Riaona, Nob. 2014, 120–23
-
Dallin H. Oaks, “No Other Gods,” Ensign ke Riaona, Nob. 2013, 72–75
“Taui baia ataei ni kabane.”
Ngke e beku Beretitenti Thomas S Monson te Kooram n Abotoro n te Tengaun ma Uoman, e taetae nakoia ataein te Moanrinan ni kaawan Samoa. Imwiina, e wirikiriki te tamnei bwa e na kamauriia 247 ataei ni kabane ake a roko. Ma, e kunea bwa e na bon aki tau ana tai, e kataia n aki iangoia ae e na aki kamauriia ataei ma e bon aki kona.
N tokina ao e rairaki nakon aia tia reirei ataei ao e taku, “I tangiria ni kan taubai ma ataeinaine ao ataeinimwaane ni kamauriia. E raoiroi aio?”
E wii ngare te tia reirei ao e taetae n Samoa nakoia ataei. A katoutoui atuuia ni kaota kukureia n aia kaeka. Te tia reirei e tuanga Unimwaane Monson bwa ngke e a ataia bwa temanna mai ibuakoia Abotoro n te Tengaun ma Uoman e na roko ni kawara Samoa, e berita nakoia ataei bwa ngkana a tataro ma nanoia ni koaua ao n onimaki, Unimwaane Monson e na bon roko ni kawara aia kaawa ao n wirikirikinaki mai iroun te Tamnei ae Raoiroi bwa e na taubai ma ataei ni kabane (taraa Thomas S. Monson, “Friend to Friend: Talofa Lava,” Friend, Meei 1972, 12–13).