Te Taetae ni Kaikonaki ibukin te Kai ae te Oriwa, iroun Brad Teare

Maati 16–22

Iakobwa 5–7

E Mwakuri te Uea ma Ngaira

Moana am katauraoi n anga reirei ni wareka Iakobwa 5–7 i bon iroum ao ma am utu. Tera ae ko reiakinna ae a na rang kabwaia iai naake ko reireiniia? Te kaoti aio e na kona ni katauraoi nakoimi iango riki tabeua.

Korea Am Namakin

Kaungaa te Tibwatibwa

Tera ae a kunea kain te kiraati n Iakobwa 5–7 are e kaungaia bwa a na “mwakuri n te nne ni kurebe” n taabo ake a maeka iai? (Iakobwa 5:15).

Reirei te Reirei

Iakobwa 5

Te Uea e kaoiia Ana toro bwa a na mwakuri ma Ngaia n Ana nne ni kurebe.

• Ibukina ngkai e abwaabwaki te taetae ni kaikonaki ibukin te kai ae te oriwa ao n taraa ni kaangaanga, kam na bae n tangiria ni mwakuri ni kabane ma kain te kiraati n rinanoa te taetae ni kaikonaki ae kimototo aei. N aron te katooto, kam kona ni korea raoi oin bukin te taetae ni kaikonaki iaon te burakibooti ke ni karaoi taai ibukin baika riki n te tai teuana (n aron te katooto, taraa te tamnei ni banen te kaoti aio). A kona kain te kiraati n anga taekan taian kibu ke ni kabwarabwaraa te tamnei ao ni maroroakinna bwa tera nanon tabeua taian kanikinaa, n aron aroka aika oriwa aika manana ao ni moaanti, Uean te nne ni kurebe, te toro, ao te uaanikai ae raoiroi ao ae buakaka. N tain te maroro aio, rinanoi kiibu 61–75, ake a kabwarabwaraa ana mwakuri te Uea n ara bong. E kanga arora ni beku n ana nne ni kurebe te Uea? A kanga kiibu aikai n irekereke ma te mwakuri ae ti karaoia?

• Ana taeka “Uean te nne ni kurebe” a kona ni karekea karauan nanoia kaaro ake a tiotionako natiia. N aron te katooto, tera ae taekinaki n Iakobwa 5:41, 46–47 n aron ana namakin Tamara are i Karawa ibukiia Natina ake a tiotionako? E kanga ni kataia ni kamaiuiia? (tarai kiibu 61–75).

• Iakobwa 5:61–75 e reirei bwa te Uea e mwakuri irarikiia Ana toro n Ana nne ni kurebe. A kona kain te kiraati ni wareki kiibu aikai ni kurubu aika a uarereke ao ni maroroakin taneiai ake a kaotia nakoia bwa te Uea e mwakuri ma Ana toro ni kawaaka Ana mwakuri. Tera atatai riki tabeua are a kona kain te kiraati ni karin man ana rongorongo Beretienti Henry B. Eyring “Te Uea E Kaira Ana Ekaretia”? (Ensign ke Riaona, Nob. 2017, 81–84).

  

  Ti kona ni beku ma “Uean te nne ni kurebe” ikai iaon te aba.

Iakobwa 6:3–13

E uringiia ana aomata te Uea n te tangira ao n te nanoanga.

• Nakomai, Iriirai—Ibukiia Aomata n Tatabemaniia ao Utu e kaoiira bwa ti na ukeukera Iakobwa 6:3–5 ibukin te rongorongo are e tangiria ni katuruturua Iakobwa ao ni kakaei rongorongo akanne n te taetae ni kaikonaki ibukin aroka aika oriwe (taraa Iakobwa 5). Tao a na bae n reke kabwaiaia kain te kiraati n ongoraaia mairouia naake a tia ni karaoa te waaki ni kakukurei aio ke man karaoan te waaki ni kakukurei irouiia kain te kiraati. A kona ni korei ni karinani iaon te burakibooti koaua n te euangkerio ake a kunei n Iakobwa 6. Ngkanne, iaan koaua n tatabeua nako, a kona ni karinani kiibu man te taetae ni kaikonaki n Iakobwa 5 ake a irekereke ma te rongorongo anne. A kanga kain te kiraati n tia n noori rongorongo naba akanne ake a oti inanon maiuia?

• Teuana nanon te taeka ae nim bon te kamatoatoaaki raoi nakon te bwai teuana, ni kaaniaki, ao n nene ni matoa. Ko na bae n tangiria ni kan tibwaua nanon te taeka aei ma kain am kiraati ao n titiraki tera taekan te atatai ake e anganiia Iakobwa 6:5.

Iakobwa 7:1–23

Ti kona n teimatoa ni korakora ngkana a katai ara onimaki tabeman.

• Angiina ibuakora ti a tia n rinanon te kakaitara nakon ara onimaki n aron are e kaitara ma ngaia Iakobwa ngke e kaitibo ma Tierem. Teuana te kawai ae e na buokiia kain te kiraati ni katauraoia ibukin te kakaitara bwa a na ukeukera Iakobwa 7:1–23 ibukin reirei ake a tia ni buoka Iakobwa n teimatoa ni kakaonimaki. Tera taian katooto tabeua n te teimatoa ni kakaonimaki n ara onimaki are ti kona n tibwauaia—man booki aika tabu, rongorongon ara utu, ke oin maiura? Tao iai aia rongorongo ara taan kairiiri n te Ekaretia ake a tia ni buokiira ngke tabeman a kataia ni kabwakai ara onimaki (taraa, n aron te katooto, Quentin L. Cook, “Ninikoria ni Kakoaua iroun Iesu,” Ensign ke Riaona, Nob. 2016, 40–43). Kaungaia kain te kiraati bwa a na tibwauai rongorongo ake a tia ni kunei bonganaia.

• Ngke e kaitaraaki Iakobwa iroun Tierem, e taku n ana kantaninga Tierem bwa e na kona ni kamwaea Iakobwa man ana onimaki, ma e bon aki kona ni kamwaeaki Iakobwa n ana onimaki (taraa Iakobwa 7:5). A na bae ni kukurei kain te kiraati ni katea kain te reitaki imarenan Iakobwa ao Tierem, ni kabonganaan Iakobwa 7:1–23 kanga ai aron te karaki ae koreaki. Tera ae ti reiakinaki man kiibu aikai n rongorongon aia baaire ao aia anga reirei naake a kaitara ana mwakuri te Atua? Tera ae ti reiakinna mairoun Iakobwa bwa ti na kanga ni korakora riki n aki kamwaeaki n ara onimaki?

Iakobwa 7:24–25

Ti kona n onimakina te Atua.

• A reitinako ni maeka Nibwaite inanon te kakakiriweeaki irouia Reimwanaite. E ngae ngke tao ti aki kaitara ma kakamaakun te buaka, tera kabuanibwai n tamnei ake ti kaitara ma ngaai? Tera ae ti reiakinna man aia kaeka Nibwaite nakon aia kaangaanga, are e kabwarabwaraaki n Iakobwa 7:24–25? Kam na bae n tangiria ni kan anene ke ni wareware ao ngkanne maroroakin anenen te Ekaretia are a kabongana te buaka bwa aia kabootau, n aron “Onward, Christian Soldiers” ke “Behold! A Royal Army” (Anene n Taromauri, nambwa. 246, 251).

Kaungaa te Kamatebwai n te Mweenga

Ni kaungaia kain te kiraati bwa a na wareka ana boki Enoti, tuangiia bwa e kona n reireiniia bwa a na kanga ni uaana riki aia tataro.

Kanakoraoan ara Anga reirei

Kabotoa am anga reirei iaon te taeka n reirei. Kakoaua raoi bwa kain am kiraati a boboto aia marooro iaon booki aika tabu. Ko kona ni karaoa aei ni butiia kain te kiraati bwa a na wareki booki aika tabu ao ngkanne a na tibwauai koaua ake a kunei, n aron naba aia tataneiai ma maiuakinan koaua akanne. (Taraa Reirei n Ana Kawai te Tia Kamaiu, 20–21.)