“Maati 2–8. 2 Nibwaai 31–33: ‘Aio te Kawai,’” Nakomai, Iriirai—Ibukin te Reirei n Tabati: Ana Boki Moomon 2020 (2020)
“Maati 2–8. 2 Nibwaai 31–33,” Nakomai, Iriirai—Ibukin te Reirei n Tabati: 2020
Kristo e Reireiniia Ana Reirei, iroun Justin Kunz
Maati 2–8
2 Nibwaai 31–33
“Aio te Kawai”
Ngkana ko kamatebwaia 2 Nibwaai 31–33, iangoia kain am kiraati n am iango ao iangoi atatai ake a karekei ma koaua ake e reiakin Nibwaai. Ko na kanga ni kaoiia bwa a na reireiniia i bon imarenaia bwaai ake a tia n reiakin ao n namakini ibukin taekan reirei aikai?
Korea Am Namakin
Kaungaa te Tibwatibwa
Iai man am kiraati ae iai ana atatai ae uaana n te wiiki aei ma teuana mai ibuakon te babaire n te kamatebwai inanon Nakomai, Iriirai—Ibukiia Aomata n Tatabemaniia ao Utu? Anganiia kain te kiraati te tai bwa a na tibwaua aia atatai.
Reirei te Reirei
Iesu Kristo ao Ana reirei bon tii te kawai nakon te maiu ae akea tokina.
-
Tao e na kabwaia am kiraati n nooria bwa e kanga te onimaki, te rairannano, te bwabetito, ana bwaintangira te Tamnei ae Raoiroi, ao n teimatoa ni karokoa te toki n irekereke imarenaia ao ana Mwakuri ni Kamaiu Iesu Kristo. Karaoan aei, ko kona ni korea te kawai iaon te burakibooti ao kaoiia kain te kiraati bwa a na koroia irarikin te kawai tabeua reirei aika a kuneaki inanon 2 Nibwaai 31. A kona kain te kiraati n rinea teuana mai ibuakon reirei aikai ao n ukoukora 2 Nibwaai 31–32 ni kakaea te bwai teuana are e a tia n reirei iaona Nibwaai. Ngkanne a kona n tibwauaia imarenaia te bwai ae a kunea ao ni maroroakinna bwa e kanga ni buokiia ni kaotaia riki iaon te reirei. E kanga maiuakinan reirei aikai ni uoti kakabwaia n Ana Mwakuri ni Kamaiu Iesu Kristo nakon maiura?
-
Ko na kanga ni moana te marooro iaon ana kamataata Nibwaai ae itiaki man ni bebete n ”te kawai“ nakon te kamaiuaki? (2 Nibwaai 31:21). Tao ko kona n titirakiniia kain te kiraati tera ae a na taekinna ngkana ai ti 60 te teekan ni kabwarabwaraa te bwai ae e riai ni karaoia te aomata bwa e na karekea te kamaiuaki. Ngkanne a kona kain te kiraati ni waekoa ni wareka 2 Nibwaai 31–32, n tarai rongorongo aika a na kona n ibuobuoki. Tera ae ti reiakinna man mwakoro aikai iaon taben te Tia Kamaiu ae kakawaki ni kamaiuakira? Te rongorongo inanon “Bwaai n Reirei riki Tabeua” aika a na kona n ibuobuoki nakon te marooro aei.
-
N tabetai ti iangoi reirei n te euangkerio bwa a kaokoro ao ni maenako, ma ni koauana bon iai rekerekeia. Ni buokiia kain te kiraati bwa a na nooria bwa a kanga reirei inanon 2 Nibwaai 31 n reitaki, kaoiia kain te kiraati, n tatabemaniia ke ni kurubu aika uarereke, ni wareki kiibu 4–21 ao ni katea te taeakuraem are e kaotia bwa e kanga te onimaki iroun Kristo, rairannano, bwabetito, ana bwaintangira te Tamnei ae Raoiroi, ao te teimatoa ni karokoa te toki ni boutokaia imarenaia, n irekereke imarenaia, ao a mwaiti riki. Kaungaia bwa a na kakauiango. Ngkana a tibwaua te tamnei ma te kiraati, titirakiniia bwa tera ae a tia n reiakinna ibukin reirei aikai. Ti na kanga ni karaoi bwa mwakoron maiura ni katoabong?
“Te aomata are e teimatoa ni karokoa te toki, boni ngaia are e na kamaiuaki.”
-
Ataia kain te kiraati bwa tera ae nanonaki n te teimatoa ni karokoa te toki? Aio te waaki ni kakukurei ae e na kona n ibuobuoki. Koroia iaon te burakibooti N na kanga n ataia bwa I teimatoa ni karokoa te toki? Ngkanne kaoiia kain te kiraati bwa a na ukoukora 2 Nibwaai 31:15–20 ni kakaea kaekaan te titiraki aei. Titirakiniia kain te kiraati bwa a na koreia iaon te burakibooti taeka aika ibuobuoki ke kiibu aika a kunei. Bukin tera te teimatoa ni karokoa te toki mwakoron ana reirei Kristo ae kakawaki? Ko kona naba n tibwaua ana rongorongo Unimwaane Dieter F. Uchtdorf inanon “Bwaai n Reirei riki Tabeua” ke te rongorongo ibukin te teimatoa ni karokoa te toki iaon te iteraniba 6 n Tataekina Au Euangkerio.
-
Iai te aomata ae a kinaa kain te kiraati ae te katooto ibukin te teimatoa ni karokoa te toki? Tera ae a tia ni buoka te aomata aei ni “waaki nako man teimatoa i nanon Kristo”? (te kibu 20). Iangoia n tibwauai karakinaia aomata tabeman aika taekinaki ni booki aika tabu aika a teimatoa ni karokoa te toki.
Te Tamnei ae Raoiroi e na kaota nakoira te bwai ae ti riai ni karaoia.
-
Inanon 2 Nibwaai 32, Nibwaai e taekina te tabeaianga ae a tia n namakinna ana aomatai iaon kabonganakin ana reirei Kristo. Ko kona ni kaoiia kain te kiraati bwa a na taraa te tabeaianga aei inanon 2 Nibwaai 32:1 ao imwiina wareki ana kaeka Nibwaai inanon 2 Nibwaai 32:2–6. A na kanga kain te kiraati ni manga taekinna n oin aia taeka n te bwai ae reirei iaona Nibwaai? Tera atatai aika a tia kain te kiraati ni karekei ngke te Tamnei ae Raoiroi ke ana taeka Kristo e a tia ni kaota nakoia te bwai ae a kainnanoia ni karaoia?
E kaungaira Ana Boki Moomon bwa ti na kakoaua Kristo.
-
E kantaningaia Nibwaai bwa e na kaungaira ana taeka “ni karaoa ae raoiroi [ao] n onimakina [Kristo]” (2 Nibwaai 33:4). Tera kawai ke karaki man 1 ao 2 Nibwaai ae a tia ni kaungaira bwa ti na karaoa ae raoiroi ao ni kakoaua Kristo? Iangoia ni kakaai tabekora anene aika a kona n aneneia kain am kiraati ke ni kakauongo nakon are e kakorakorai rongorongo aikai, n aron “I Believe in Christ” ke “Have I Done Any Good?” (Anene n Taromauri, nambwa 134, 223).
Kaungaa te Kamatebwai n te Mweenga
Teuana te kawai ni kaungaia kain te kiraati bwa a na kamatebwaia Iakobwa 1–4 n te wiiki ae e na roko bon kabwarabwarakin ae inanon mwakoro aikai a na kunei ana kauring Iakobwa iaon uoua buure aika a bwainaki n ara bong.
Bwaai n Ibuobuoki Riki Tabeua
Ana Reirei Kristo.
E reirei Unimwaane Jeffrey R. Holland: “Ana ‘reirei Kristo n aron are e reirei iai Nibwaai n ana kabanea, ni marooro ae kakaongora e boboto iaon te onimaki iroun te Uea Iesu Kristo, te rairannano, te bwabetito n te kateboaki i an te ran, karekean te Tamnei ae Raoiroi, ao te teimatoa ni karokoa te toki. E aki, n te marooro aei, e kataia n taekina bwaninin te babaire ibukin te kamaiuaki, tamaroan te maiu ni Kiritian, ke kaniwanga ake a tataningaira ni karinan kakimwareirein karawa aika a kakaokoro. E aki, n te katanoata aei, e tabe ma nakoa n te nakoanibonga, otenanti n te tembora, ke reirei ni koaua aika a mwaiti. Ni kabane bwaai aikai a kakawaki, ma n aron are e kabonganaaki n Ana Boki Moomon, ‘ana reirei Kristo’ e bebete ao e baireaki raoi. E boboto iaon te moan reirei n te euangkerio, n raonaki ma kaotan te nano ae korakora n teimatoa, ni reitinako, ni waaki nako. Ni koauana, bon itiakin ao bebeten ‘ana reirei Kristo’ are e kuneaki n iai mwiina” (Christ and the New Covenant: The Messianic Message of the Book of Mormon [1997], 49–50).
E taku Unimwaane D. Todd Christofferson: “I bubuti nakoia ni kabane … bwa a na ukeuke rinanon te tataro ao kamatebwaian booki aika tabu [te] kakoaua n anua mai ieta, te Mwakuri ni Kamaiu, ao Mangautin Iesu Kristo. Butimwaai Ana reirei man te rairannano, n te bwabetito, karekean ana bwaintituaraoi te Tamnei ae Raoiroi, ao ngkanne rinanon maium n irakin tuua ao berita aika tabu n ana euangkerio Iesu Kristo” (“Ana Reirei Kristo,” Ensign ke Riaona, Meei 2012, 89).
Te teimatoa ni karokoa te toki.
E kabwarabwaraa Unimwaane Dieter F. Uchtdorf:
“Ngke te ataeinimwaane ngai, ‘te teimatoa ni karokoa te toki’ e nanonaki irou bwa N na riai ni kataia ni kamarurungai ni karokoa tokin ara bootaki n taromauri n te Ekaretia. Imwiina ngke I a ikawai … otau n au tai ni kairake e karikai bwa N na kabotaua ma aia kekeiaki ara membwa aika a kara aika a teimatoa n onimaki ni karokoa tokin maiuia. …
“… Te teimatoa ni karokoa te toki tiaki tii te rinanon kaangaangan te maiu aei ‘ke te kekeiaki n aki bwarannano.’ Bon te aro ni kakamwakuri ara aro aio, buokakia natin te Atua inanon te kawai ae wariki man irariki ni karikirakei aia kantaninga n te maiu aio ao n okiria n te tai teuana. Man te taratara aio, te teimatoa ni karokoa te toki e bon tamaroa ao e mimitong, e aki buakaka ao n roo. Bon te aro ni kimwareirei, n teuana te kantaninga, te korakora, ao ni kainaomataki. …
“Te teimatoa ni karokoa te toki e kainnanoa ‘te botumwaaka ni mwakuri raoi’ (I-Rom 2:7), te kekeiaki ni kawakin tuua (taraa 2 Nibwaai 31:10), ao karaoan mwakuri aika a raoiroi (taraa R&B 59:23)” (“Have We Not Reason to Rejoice?” Ensign ke Riaona, Nobembwa 2007, 20).
Kanakoraoan Ara Anga reirei
Ti uaia n reirei. Te riki n tia reirei, ko karaoa ae bati riki nakon ae ko tii anga te rongorongo—ko reiakinna ma kain am kiraati. Tibwauaia mangaiia bwaai ake ko karaoi n reirei man booki aika tabu.