“Beberuare 24–Maati 1. 2 Nibwaai 26–30: ‘Te Mwakuri ae Kamimi ma ni Kakuba,’” Nakomai, Iriirai—Ibukin te Reirei n Tabati: Ana Boki Moomon 2020 (2020)
“Beberuare 24–Maati 1. 2 Nibwaai 26–30,” Nakomaii, Iriirai—Ibukin te Reirei n Tabati: 2020
E Na Kairiko ni Baina, iroun Sandra Rast
Beberuare 24–Maati 1
2 Nibwaai 26–30
“Te Mwakuri ae Kamimi ma Ni Kakuba”
Uringnga bwa e riai n riki te mweenga bwa te tienta ibukin reiakinan te euangkerio. Am kamatebwai i bon iroum ao n am utu n te ka 2 Nibwaai 26–30 e riai n riki bwa aan am katauraoi n anga reirei. Bairei kawai ni kateitei iaon, ni kakorakora, ao ni kaunga am kamatebwai iroum ao n am utu iaoia aomata n am kiraati.
Korea Am Namakin
Kaungaa te Tibwatibwa
Ni moan waakin te reirei, anganiia kain te kiraati aia tai bwa a na tibwaua te bwai teuana man 2 Nibwaai 26–30 ae a kunei aika uaana ngke a kamatebwai ni mweengaia. Te katooto, ko kona n titirakiniia bwa a na kabwarabwara raoi te kibu are e buokiia n ataa ara bong ao kakaewenako aika ti kaitarai.
Reirei te Reirei
Bwaai ni kabane aika e karaoi te Uea e kakorakoraaki man Ana tangira ibukira.
-
Ngkana ko namakinna ae ko kaungaaki bwa ko na maroroakin ana reirei Nibwaai iaon taekan ana tangira te Uea, ko kona ni kataa aei: Imwin warekan 2 Nibwaai 26:24 ni bootaki, kaoiia kain te kiraati bwa a na karinani bwaai aika e a tia Iesu Kristo ni karaoi ibukiia aika a kaungaaki man te tangira. E kanga ni “kairia aomata ni kabane nakoina.”? Tera ae ti namakinna bwa ti na karaoia ni kaeka nakon kaotan Ana tangira?
-
Ana kakao te Uea inanon 2 Nibwaai 26:24–28, 33 bon bwaai ni kakoaua aika a korakora ibukin Ana tangira. Teuana te kawai ae ko kona ni buokiia kain te kiraati ni karekei kakao aikai bon man tuangakiia bwa a na kakimototoi ana rongorongo te Uea inanon kiibu aikanne nakon teuana te tiententi. Tao a na kona tabeman kain te kiraati ni kukurei n tibwauai aia kakimototo. A kanga kiibu aikai ni kakorakora te kawai ni kaoiia tabeman bwa a na nakon Kristo? Kaungaia kain te kiraati bwa a na koroi mwin aia iango ao aia namakin. Ni buokia ni kaoa te Tamnei, iangoia ni katanga te anene ae e a tia n raweaki iaon taekan ana tangira te Tia Kamaiu, n aron “Mai Nakon Iesu” (Anene n Taromauri, nambwa. 117), ngkai a iango kain te kiraati.
E kakawaki Ana Boki Moomon nakon ana mwakuri te Atua ni boong aika kaitira.
-
A bae ni kainnanoa teutana te ibuobuoki aomata n am kiraati ni kan ataa nanon te taetae ni burabeti inanon 2 Nibwaai 27 iaon te boki ae kainaki ao te mwaane ae rabakau. Rongorongo inanon “Bwaai n Ibuobuoki Riki Tabeua” a na bae n ibuobuoki. E na kona ni mwakuri ibukin am kiraati ngkana tabeman kain te kiraati a katei kain bwaai aika a kabwarabwaraaki n te rongorongo aei ao inanon 2 Nibwaai 27:15–22? Bukin tera e a kaman tia ni kaotaki nakon Nibwaai bwaai aikai inanon ririki aika mwaiti imwain taia? Tera ae reireiniira ana taetae ni burabeti Nibwaai iaon kakawakin Ana Boki Moomon? Kaungaia kain te kiraati bwa a na tibwauaia imarenaia bwa a kanga ni karekei oin aia kakoaua n Ana Boki Moomon.
-
Iai mai ibuakoia kain am kiraati ae iai ana atatai ma kaoakin temanna bwa e na wareka Ana Boki Moomon ae a kona n tibwauaia? Tera bukina tabeua ae e na aki kona temanna ni butimwaea te kakao bwa e na wareka Ana Boki Moomon? Ana kaeka te Uea nakon bukina teuana e kuneaki inanon 2 Nibwaai 29:6–11. Ko kona ni kaoiia kain te kiraati bwa a na wareki kiibu aikai ao imwina katea kaina bwa a na kanga ni kaeka ma te tangira nakon temanna ae taekinna bwa Ana Boki Moomon e aki kainnanoaki. Tera iango riki tabeua aika iai irouia kain te kiraati bwa a na kanga ni buokiia tabeman “n ataia bwa [Ana Boki Moomon] bon te kakabwaia nakoia mai i nanon bain te Atua”? (2 Nibwaai 30:6).
E kataia Tatan ni kewe.
-
Te babaire n te wiiki aei inanon Nakomai, Iriirai—Ibukiia Aomata n Tatabemaniia ao Utu iango ibukin te kakae n ana kewe Tatan a kabwarabwaraaki inanon 2 Nibwaai 28. Tao a kona kain te kiraati n tibwaua te bwai ae a kunea, ke a kona ni waekoa ni wareka 2 Nibwaai 28 inanon te kiraati ao ni koroi ni karinani ana kewe Tatan ake a kunei. E na kona naba n ibuobuoki ngkana a mwakuriia inanon kurubu aika a uarereke ni kakaai booki aika tabu aika aki kakoauai keewe aikai (ngkana a kainnanoa te ibuobuoki, ko kona n tibwauai iango inanon “Bwaai n Ibuobuoki Riki Tabeua”). Ngkanne a kona taian kurubu n tibwauaia imarenaia te bwai ae a kunea ao ni maroroakinna bwa a na kanga ni kona ni kunei aia “reirei aika kewe man aki bongana ao ni burababa” taan kakaitara (2 Nibwaai 28:9).
Kaungaa te Kamatebwai n te Mweenga
A kona kain te kiraati ni kaungaaki bwa a na wareka 2 Nibwaai 31–33 ngkana a ataia bwa iai inanon mwakoro aikai ana taeka Nibwaai aika a tauaki mwiia, n raonaki ma teuana te kabwarabwara ae moan te bebete ma ni bwarabwara raoi n ana reirei Kristo.
Bwaai n Ibuobuoki Riki Tabeua
“Ao e na kangai ae rabakau: I aki kona ni warekia” (2 Nibwaai 27:18).
Ni Beberuare 1828, Martin Harris, raoraon Iotebwa Timiti, e karaoa “te mwananga nako mainikun New York City ma korean tabeua manin te koroboki iaon bwaatua [koora] ni kaotia nakoia ataein te reirei. Tao e tangira kakoauaana riki ae bwaatua aikai tiaki taian katooto, ke e na tia n iangoia bwa e na buokiia te kakoaua n tangoa te mwane ni boreetia te rairairi. Bwa tao tera ae e na riki, e teimatoa n taekinna bwa e a tia te Uea ni kairoroia bwa e na karaoa te mwananga.
“N te tai anne, Iotebwa ke Martin a aki rang ataa taekan te taetae iaon taian bwaatua. A tii ata are e a tia te anera Moronaai n tuanga Iotebwa: are bon te rekooti iaon Amerika n taai ake rimoa. Ngaia are, irarikin ukoukoran te aomata ae iai ana atatai iaon te taetae n Aikubita (E reiakinna Iotebwa imwina bwa te taetae iaon taian bwaatua a atongaki bwa ‘te taetae n Aikubita ae a tia ni bitaki’), Martin e kawariia ataein te reirei tabeman ma nanona iaon bwaai ake rimoa, riki iaoia kain Amerika ake rimoa.
“… [Ibuakoia ataein te reirei ake e kawariia Martin] bon Charles Anthon, te kairake ni burobetia n tuan te taetae ao kamatebwaian te taetae n te Kaoreti i Columbia. E a tia Anthon ni bobotii karakinaia ao aia taetae kain raoi Amerika ibukin boreetiakiia ao e ingainga nanona bwa e na tuoa te beebwa are e uotia Martin nakoina.
“E taku Martin bwa Anthon e katanoatai koauan man ni koroboki ni karokoa e reiakinna bwa e kanga Iotebwa Timiti n tia ni karekei. E tuatua bwa e na uoti nakoina bwaatua Martin. E rawa Martin, ao e kaeka Anthon, ni manga taekina te kibu inanon Itaia, ‘I aki kona ni wareka te boki ae kainaki.’ E ngae ngke Anthon e aki kakoauai ana rongorongon Martin ibukin aia bowi, ti ataa te bwai aei: Martin e nako man ana kakawari ma ataein te reirei mai mainiku n anaaki riki nanoia bwa Iotebwa Timiti e weteaki iroun te Atua ao bwa bwaatua ao manin taekana bon bwain rimoa. Ngaia ma Iotebwa a iangoa te mwananga nakon Anthon bwa kakoroan nanon ana taetae ni burabeti Itaia (e taekinaki naba n Ana Boki Moomon) te ‘boki ae kainaki, are e anga te aomata nakon temanna are e reirei, e taku, Wareka te bwai aei, I butiko: ao e taku, I aki kona; ibukina bwa e kanimwaki’ [Itaia 29:11; taraa naba 2 Nibwaai 27:15–18]” (“The Contributions of Martin Harris,” Kaotioti n taian Taetae [2016], 3–4, history.ChurchofJesusChrist.org).
Booki aika tabu ake aki kariaia ana kewe Tatan.
|
Te reirei ae bure |
Te reirei ae koaua |
|---|---|
|
“Bwa n te bong aei ao bon tiaki ngaia Atuan te kakai; e bon tuai ni karaoa ana mwakuri.” (2 Nibwaai 28:6). | |
|
“Te Atua … e na ti kariaia karaoan te bure ae uarereke” (2 Nibwaai 28:8). | |
|
“E raoi Tion” (2 Nibwaai 28:21). | |
|
“Tiaki ngai te riaboro, bwa bon akea te riaboro” (2 Nibwaai 28:22). | |
|
“Ti aki manga kainnanoa ana taeka te Atua, bwa e tau are ti a tia ni karekea” (2 Nibwaai 28:29). |
Kanakoraoan Ara Anga reirei
Tai maaku ni kainabwaabu. “Titiraki aika a raraoi a anaa te tai ae maan imwain kaekaaia. A kainnanoa te iango, te ukeuke, ao te kairi mai ieta. Te tai are ko kabanea ni kakantaninga kaekaan te titiraki e riki bwa te tai n iango. Totokoa te kariiri ni waekoa ni katoka te tai aei ni kaekaakin oin am titiraki ke ni waaki nakon te bwai teuana are imwina” (Reirei n ana Kawai te Tia Kamaiu, 31).