“Beberuare 17–23. 2 Nibwaai 11–25: ‘Ti Kimwareirei iroun Kristo,’” Nakomai, Iriirai—Ibukin te Reirei n Tabati: Ana Boki Moomon 2020 (2020)
“Beberuare 17–23. 2 Nibwaai 11–25,” Nakomai, Iriirai—Ibukin te Reirei n Tabati: 2020
Beberuare 17-23
2 Nibwaai 11–25
“Ti Kimwareirei iroun Kristo”
Irarikin are kabootauan 2 Nibwaai 11-25 ni bon nakoim, iangoia bwa ko na kanga ni buokiia ake ko reireiniia ni kabootaui mwakoro aikai nakoia ( taara 2 Nibwaai 11:8). N te tai are e kairiko iai te Tamnei n am kantaninga ke n am iango, korei mwiia.
Korei Am Namakin
Kaungaa te Tibwatibwa
Imwain maroorooakinan mwakoro aika a onoti man 2 Nibwaai 11-25; e na ibuobuoki titirakinaia kaain te kiraati bwa a na katamneia ngkana iai raoraoia ae iai ana kaangaanga ma kakaean baika a uaana ke a kaunganano man ana koroboki Itaia. Tera kiibu ae ko kona n tibwauai ma te rao aei?
Reirei te Reirei
E anga ana koaua Itaia ibukin Iesu Kristo.
-
E kona ni bebete otam n ana taetae ni burabeti Itaia n te tai are ti ataia bwa bukin tera ngkai a koreaki. Ni waakin te marooroo n ana taetae ni burabeti Itaia n te ka 2 Nibwaai ko kona ni kaoiia kaain te kiraati bwa a na taraa mwakoro 11 ao ni karinanii tabeua ana kaantaninga Nibwaai ni korean are e a tia ni koreia Itaia n ae mwaiti. A kona ni tibwauai mwakoro ake a kunei n aia kamatebwai n ae onoti ke n te utu n te ka 2 Nibwaai 12-24 ae a namakinna bwa a kakoroi nanon kaantaninga aikanne. E kanga ataakin ana kaantaninga Nibwaai ni buokiia kaain te kiraati ni reiakina ana koroboki Itaia? Kaungaia bwa a na kawakin kaantaninga aikai n aia iangoi n aia tai ni marooroakina ana koroboki Itaia n te kiraati.
-
Ibukina bwa e kabonganai taetae ni kabotau n ae mwaiti Itaia, e kona n rangi n bebete aki taraan ana kakoaua ae korakora iroun Iesu Kristo. Aio te mwakuri ae e na kona ni buoka am kiraati ni katurua aia taratara n te kakoaua aei. Ko kona ni katauraoi tabeua beebwa ma kiibu man booki aika tabu aika a koreaki iaoia man te ka 2 Nibwaai 12-24 ae reirei rongorongon te Tia Kamaiu (te katooto, 2 Nibwaai 13:13; 14 4-6; 15:1-7; 16: 1-7; 17:14; 18:14-15; 19 6-7; 21:1-5; 22:2). Kaain te kiraati n tatabemaniia a kona n rinea teuana te beebwa, ni kamatebwaii kiibu ake a koreaki , ao ni korei iaon te beebwa baike e reiakin ibukin Iesu Kristo. Ngkanne kaain te kiraati a kona n kaibibiti aia beebwa ma ake tabeman ao ni karinii riki aia iango ma kairi mai iroun te Tamnei ake a reiakin ibukin te Tia Kamaiu man kiibu naba akanne. Ko kona ngkanne n anganiia kaain te kiraati te tai bwa a na tibwauai baike a reiakin man Itaia ao i marenaia ake a kakorakora aia karabwarabwa ibukin Iesu Kristo.
-
Te taetae ni burabeti 2 Nibwaai 19 6 e karinanii tabeua aran Iesu Kristo. Tuanga temanna bwa e na karinan iaon te burakibooti ao ni kaoiia kaain te kiraati bwa a na marooroakinna bwa e aera aara akanne boni kabwarabwaraan raoi te Tia Kamaiu. E kanga n kakoroi nanon nakoa aikai inanon maiura? N reiakina riki ae mwaiti ibukin tabeua aara aikai, e na kona n ibuobuoki n tarai kiibu man booki aika tabu ni bwaai aika a na taraaki mai inano ibukin 2 Nibwaai 19:6.
2 Nibwaai 12 2-5; 21:10-12; 22
Ni boong aika kaitira, ana botanaomata te Atua a na ikotaki ao a na kimwareirei n te rau.
-
Tabeua mwakoron ana taetae ni burabeti Itaia a boni irekereke nakoira ibukina bwa a kabwarabwarai mwakoron nako ana Mwakuri te Atua ni boong aika kaitira. Te katooto, ko kona n taraa 2 Nibwaai 21:10-12, are e kabwarabwaraa te “maniua” (buraeki ke te maniua) ae e na irakeaki n ikotiia ana botanaomata te Atua. Tera aanga ae ti noora iai te Uea ni ikotiia Ana Botanaomata n te aro n Tamnei? Tao tabeman kaain te kiraati a kona n anga aia taetae bwa e aera a tangiria n ikotaki ma ana botanaomata te Atua n te Ekaretia. A kona naba ni kukurei ni karaoi oin aia buraeki nie karinanii ke e kabwarabwarai tabeua koauan te euangkerio ae a namakinna bwa a “ukoukoria” aomata ao ake a na ibuobuoki ni “bobotii” ao ni “ikotii n ti teuana” (kiibu,10 ao 12) natin te Atua ni boong aikai. Ti na kanga ni buoka te ikotaki?
-
Teuana te kawai ibukin marooroakinan te reirei ae tabu aei boni korean oin-iango aikai iaon te burakibooti: Kamaenakoan Iteraera, Ikotakin Iteraera, ao Taetae ni burabeti ibukin Kristo. Ko kona n anga mwakoro man te 2 Nibwaai 12-24 nakoia kurubu ake a kaainaki irouia kaain te kiraati ao kaoiia bwa a na kakaei kiibu ake a reirei taekan bwaai aikai ao korei kiibu aikai i aan atuuia iaon te burakibooti. Tera rongorongo aika ti anganaki man kiibu aikai? (E kona n ibuobuoki ae ko tuangiia kaain te kiraati bwa Reirei ao Berita aika Tabu 113:1–6 e kona ni buokiia ni kamataataia bwa tera ae nanonaki n te ka 2 Nibwaai 21:1-5, 10.)
-
Anene n taromauri n ai aron “Noora te Manuia bwa e Tei iaon te Maunga” (Anene n Taromauri, nambwa 5) ke “Te Uea bon Otau” (Anene n taromauri, nambwa 89), ae e boboto ma taian taetae ni burabeti ake n 2 Nibwaai 12:2–5 ao 2 Nibwaai 22, e kona ni kakorakorai taian rongorongo ao tamnein ana taeka Itaia.
Mweengara ao “taabo ni maeka” ibukin Tion a kona ni riki bwa taabo aika tan man mano.
-
N te 2 Nibwaai 14:4–6 E taetae ni burabeti Itaia te kamanoaki ao te rau ae a na kimwareirei iai aika kororaoi imwin are te Uea e “irei nako” ao e “katiaka” aia bure. E ngae ngke kiibu aikai a kabwarabwarai aroaro aika a na kaoti n te Mereniam, e kona ni buokiia kaain te kiraati n aia tai ni ukokora te kamanoaki n te tamnei n tain te buakaka ni boong aika kaitira. Kaoiia bwa a na iango ao ni marooroakinna bwa tera nanon ae karekean “te nang ao te bubu” ao “uran te ai” n aia “tabo ni maeka” ao n “bootaki” (kibu 5; taraa naba Te Otinako 13:21–22). Tera bwaai tabeua aika a kona ni kabotauaki ma te kabuebue, te angibuaka, ao te karau are e mwaneweaki n te kibu 6? Ti na kanga ni kunea te kamanomano? (taraa naba R&B 115:6). Tao a kona n taekini kawai kaain te kiraati ni taraia raoi bwa mwengara ao te Ikotaki n te Ekaretia a riki bwa taabo ni kamanomano n te tamnei.
“Te kawai ae eti boni kakoauan Kristo.”
-
Kain am kiraati a kona n namakina are e tangiria Nibwaai “bwa ti na kakorakoraia natira, ao tarira naba, bwa a na kakoaua Kristo.” E kanga Nibwaai ni “kakorakora ni koroboiki” ni kakoroa nanon te kouru aei? (2 Nibwaai 25:23). Tao a kona kaain te kiraati ni kamatebwaia te 2 Nibwaai 25:19-29 ni kakaei koaua ibukin te Tia Kamaui ao Ana euangkerio are e tangiria Nibwaai bwa a na ataia ana botannaomata. Ngkanne a kona n tibwaia bwa tera ae a tia ni karaoia n reirei koaua aikai nakoi aia utu ke raoraoia. Te katooto, a kanga n reirei te koaua are “rinanon te akoi are ti kamaiuaki iai, imwiin bwaai ni kabane ake ti bon kona ni karaoi”? (Te rongorongo mairoun Beretitenti Dieter F. Uchtdorf inanon “Bwaai n Ibuobuoki Riki Tabeua” a kona ni katauraoi tabeua atatai aika nano n te koaua aei.) A kanga ni buokiia tabeman ni “kimwareirei iroun Kristo”?
Kaungaa te Kamatebwai n te Mweenga
A kona kaain te kiraati ni kan ataia bwa 2 Nibwaai 26-30 e kona ni buokiia n kaeka nakoia aomata ake a taekinna bwa, “Ti aki kainnanoa Ana Boki Moomon.”
Bwaai n Ibuobuoki Riki Tabeua
“Bwa ibukina e a bungiaki te ataei.”
Ni buoka am marooro iaon te 2 Nibwaai 19:6, mataku ke ongora nakon te Moomon Tabaenako Kuaea n anenea “For unto Us a Child Is Born” (ChurchofJesusChrist.org).
“Ti ataia bwa man ana akoi are ti a kamaiuaki iai, ma ti kona ni karaoi ni kabane.”
E anga ana taeka iaon Nibwaai n 2 Nibwaai 25:23, Beretitenti Dieter F. Uchtdorf e taku:
“I tabeaianga ngkana n tabetai ao ti kaburea rairan te te kibuntaeka ae e kangai ‘imwiin bwaai ni kabane ake ti kona ni karaoi.’ Ti riai n oota bwa ‘imwiina’ tiaki titebo ma ‘ibukina bwa.’
“Ti aki kamaiuaki ‘ibukin’ bwaai ni kabane ake ti kona ni karaoi. Iai mai ibuakora ae e a tia ni karaoi bwaai ni kabane ake ti kona ni karaoi? E na tataninga Tamara are i Kawara ni karakoa te tai are ti anga ni kabane ara kekeiaki imwain ae e roko inanon maiura ma Ana Akoi ni Kamaiu? …
“I aki nanokokoraki bwa e ataia Nibwaai bwa Ana Akoi te Tia Kamaiu e kariaia ao e karekea nakoira te kona n tokanikai iaon te bure [taraa 2 Nibwaai 4:19–35; Aramwa 34:31]. Aio bukina ngkai Nibwai e mwakuri korakora n anai nanoia natina ao tarina bwa a na kakoaua Kristo, ao bwa aonga ni manga tangiraki iroun te Atua’ [2 Nibwaai 25:23].
“Imwiin anne, anne te bwai ae ti kona ni karaoi! Ao anne tabera ibukin te maiu ae mamate!” (“The Gift of Grace,” Ensign ke Riaona, Meei 2015, 110).
Kanakoraoan Ara Anga reirei
Tabeki taian titiraki aika a kaoa te kakoaua. “Kanakoan te titiraki are e kaungaia taan reiakinaki ni kaota aia koaua n te reirei ake a reiakinaki e kona n riki bwa te kawai ae mwaakaroiroi ni kaoa te Tamnei. … Aia koaua—ao aia kakoaua ake tabeman n te kiraati—e na rikirake ngkai te Tamnei e kaota koauan te koaua” (Reirei n Ana Kawai te Tia Kamaiu, 32).