Atam ao Ewa, iroun Douglas Fryer

Beberuare 3–9

2 Nibwaai 1–5

“Ti Maiuakina te Kukurei”

Moana am katauraoi n te tamnei man warekan 2 Nibwaai 1–5 ao ni korea am namakin. A mwaiti riki reirei inanon mwakoro aikai ae e na reke iai am tai ni maroroakinna inanon teuana te kiraati, ngaia ae ira te Tamnei n am katauraoi ao ni kabanea am iango nakon atatai aika a nano aika a tibwauaki irouia kain te kiraati ni buokiko n iangoia bwa tera taian reirei aika ko na kabanea am tai iaona ao ko na kanga ni kaira te marooro.

Korea Am Namakin

Kaungaa te Tibwatibwa

E kona n ae a tia kain am kiraati ni mwakena ke ni korea te taeka ibukin tao teuana te kibu inanon 2 Nibwaai 1–5. Ni moanakin te kiraati, ko kona ni kaoiia kain te kiraati bwa a na tibwauai kiibu aika a uaana nakoia. Kaoa te kiraati bwa e na koreia ni kakimototoa te reirei ae a reiakinna man kiibu aika a tibwauai.

Reirei te Reirei

2 Nibwaai 2:11–30

Ti inaomata ni mwakuri i bon ibukira.

• N angin te tai, a kabongana inaomataia aomata ni karika te kaangaanga nakoia tabeman. Ngaia ae bukin tera e kakawaki te rinerine nakon te Tama are i Karawa? Tao ko kona ni korea te titiraki aei iaon te burakibooti, ao a kona kain te kiraati n ukoukori rekeia inanon 2 Nibwaai 2:11–30 ao ni koroi aia reke iaon te burakibooti. E kanga teuare e buakaka ni kataia ni kakea bonganan inaomatara n rinerine? E kanga te Tia Kamaiu ni buokiira n “rinea te inaomata ao te maiu are akea tokina”? (2 Nibwaai 2:27). Iangoia ni bootaki n anenea te anene iaon taekan te inaomata n rinerine, n aron “Know This, That Every Soul Is Free” (Anene n Taromauri nambwa. 240), ao kaoiia kain te kiraati bwa a na karin inanon aia rinan n taeka atatai riki tabeua aika a nano aika a karekei man te anene.

• Te Kabwarabwara n te wiiki aei inanon Nakomai, Iriirai—Ibukiia Aomata n Tatabemaniia ao Utu kinai aua bwaai aika a kakawaki aika a na kona ni karika te inaomata n rinerine. Aio te kawai teuana ae ko kona n reita te bwai ae a tia n reiakinna kain te kiraati n te mweenga: Koroi aua kawai iaon te burakibooti. Ngkanne kaoiia kain te kiraati bwa a na tibwaua te rongorongo man 2 Nibwaai 2 are e reirei bukin kakawakin kawai aikai ni karokoira n ara konabwai mairoun te Atua.

2 Nibwaai 2:15–29

Te Bwaka ao Ana Mwakuri ni Kamaiu Iesu Kristo bon mwakoron ana babaire te Tama are i Karawa aika a kakawaki.

• A mwaiti Kiritian aika a kakoaua ae te Bwaka bon te tai ae kananokawaki ao Ewa e karaoa te bure ae moan te buakaka. Kiibu aika inanon 2 Nibwaai 2 e kabwarabwarai koaua iaon Bwakan Atam ao Ewa, ao a kakoaua bwa Iesu e kamaiura man te Bwaka. Teuana te kawai ni maroroakin iango aikai bon kaoakiia kain te kiraati bwa a na kamatebwaia 2 Nibwaai 2:15–25 ao ni koroi ni karinani koaua aika a reiakin n aron te bwai ae riki n te Nne n Aroka are Eten. Tera atatai aika a nano aika a kunei n ana taetae Beretitenti Dallin H. Oaks inanon “Bwaai n Ibuobuoki Riki Tabeua”? E kanga Iesu Kristo ni Kamaiura man te Bwaka? (taraa 2 Nibwaai 2:6–8, 26–29).

• Imwiin karaoan te mwakuri ni kakukurei n aron are mai imwaina, ko kona ni kaoti tabeua titiraki n aron aikai ao kaoiia kain te kiraati bwa a na tibwaua aia atatai aika a nano:

  • A kanga ana reirei Riaai inanon kiibu aikai ni kaeti tabeua baika aki mataata aika a kabuta n taekan te Bwaka?

  • Kawai raa aika a na kaotia are te Bwaka bon te kakabwaia?

  • E kanga atakin raoi te Bwaka ni buokiira n atai riki kainnanora ibukin Iesu Kristo ao Ana Mwakuri ni kamaiu?

  • Tera bukina teuana ae ko kakaitau iai ibukin ana rinerine Atam ao Ewa n te Nne n Aroka are Eten?

  • E kanga am rinerine n nakon te aonaaba n titebo ma ana rinerine Atam ao Ewa ni kana uaan te kai n ataa te raoiroi ma te buakaka?

  • Tera bukin te maiu aei? Bukin tera te Bwaka bon te bwai ae riai ni kakoroa nanon te kaantaninga aei?

2 Nibwaai 4:15–35

Ti kona n nakon te Atua ni mamaarara.

• Ana koroboki Nibwaai inanon 2 Nibwaai 4:15–35 e kona ni uoti nakoira te kantaninga ao te rau ngkana ti namakina ae ti taonaki n te rawawata ae korakora man ara kaangaanga ao mamaarara. Tao a na kona kain te kiraati n rinanon kiibu aikai n ikatoatoa ao ni kakaai kiibu aika a kona ni kabonganai ni kamwengaraoa temanna ae e namakina te rawawata man karawawataakin teuanne ke neienne. Ngkanne a kona taan katoatoa n tibwauai kiibu aikai ma te kiraati. Tao e kona temanna man te kiraati n tibwaua ana atatai are e kunea teuanne ke neienne te mwengaraoi man te rairaki nakon te Atua, n aron are e karaoia Nibwaai.

• Te kawai riki teuana n rinanon 2 Nibwaai 4 bon kaoakiia tabeman kain te kiraati imwain taina bwa a na roko n tauraoi n tibwauai kiibu ao mwakoro n taeka man te mwakoro aei aika a uaana nakoia. Tuangiia bwa a na tibwaua te bwai ae a karaoia ngkana a namakina te rawawata man mamaaraia. Te anene ibukin te rau ao te kaantaninga, n aron “Where Can I Turn for Peace?” (Anene n Taromauri, nambwa. 129), e kona ni karinaki n te marooro aei. Te katooto, a kona kain te kiraati n tibwauaia bwa e kanga te anene ni kakorakora ana katooto Nibwaai n onimakinan te Uea n taai ni bwarannano.

2 Nibwaai 5

E kuneaki te kukurei man maiuakinan te euangkerio.

• N aki tabe ma kakaewenako aika e rinanona Nibwaai ma ana aomata, a katea te kaawa ae boboto iaon reirei are e kairiia nakon te kukurei. Tera reirei aika a kunei kain te kiraati n aia kamatebwai n 2 Nibwaai 5 are e karekea te kukurei are a rinanona tenaan Nibwaite? Ko kona ni katauraoa te mwakoro ni beebwa nakoia kain te kiraati ao kaoiia bwa a na ukeuke inanon 2 Nibwaai 5 ibukin reirei ake a na kairiia nakon te kukurei ao ni koroi taekaia. A kanga kawai n te aonaaba n ukoukora te kukurei ni kaokoro ma aika ti kunei inanon 2 Nibwaai 5? Tera taian kouru aika a na kona kain te kiraati ni katei ni kabongana teuana mai ibuakon reirei aikai?

Kaungaa te Kamatebwai n te Mweenga

Tuangiia kain te kiraati ae iai inanon te 2 Nibwaai 6–10 teuana te kabanea n tamaroa n reirei iaon Ana Mwakuri ni kamaiu Iesu Kristo inanon booki aika tabu ni kabane. Ko kona naba n tibwaua te kibu ae ko kunea inanon mwakoro aikai are e na kaungako bwa ko na warekia.

Bwaai n Ibuobuoki Riki Tabeua

Te Bwaka bon Mwakoron Ana Babaire te Atua.

E reirei Beretitenti Dallin H. Oaks:

“Ngke a karekea te moan n tua Atam ao Ewa, a mena inanon te bitaki ae korakora, a aikoa mena n te aonaaba n tamnei ma a mena n rabwataia n aomata ae tuai kona ni mate ao n tuai ni kona ni kariki. A aki kona ni kakoroa nanon ana moan tua te Tama n akea riaoan te marena imarenan kakukurein te Nne n Aroka are Eten ao kakatai aika a korakora ao taai aika a kakukurei n te maiu ae mamate. …

“… E kabwarabwaraa te Burabeti Riaai ae ‘ngke arona bwa e aki bure Atam ao e na bon aki bwaka’ (2 Nibwaai 2:22), ma e na bon tiku naba n arona ngke e moan karikaki.

“… Te Bwaka e a kaman baireaki, e motikia Riaai, bukina bwa ‘bwaai ni kabane a bane ni karaoaki ni wanawanan teuare e atai bwaai ni kabane’ (2 Nibwaai 2:24).

“Bon Ewa are e moan kaburea aron Eten bwa e aonga ni moana te aro ae mamate. Aekakira, aron ana mwakuri, bon riaon te tua ma te bwai ae riai ae kakimwareirei ae akea tokina are e kauka te kawai nakon te maiu are akea tokina. E kaota wanawanana Atam man karaoan naba aekan aei. Ao ngaia are a bwaka Ewa ma ‘Atam bwa aonga n riki aomata’ (2 Nibwaai 2:25).

“Tabeman Kiritian a kaburea Ewa ibukin ana mwakuri, ni motikia bwa ngaia ma natina aine a kabuakakaaki iai. Tiaki Aomata Aika Itiaki ni Boong aika Kaitira! Ni kaongoaki man te kaotioti, ti bukamarua ana mwakuri Ewa ao ni karinea wanawanana ao ninikoriana n te tai ae kaangaanga ae atongaki bwa te Bwaka. …

“Te kaotioti n taai aikai a kaotia bwa ara moan karo a ota n aron riain te Bwaka. E katanoata Atam, ‘E na neboaki aran te Atua, bwa ibukin riaoan te tua irou a kaukaki matau, ao n te maiu aei N na karekea te kimwareirei, ao N na manga noora te Atua n te iriko’ (Mote 5:10)” (“The Great Plan of Happiness,” Ensign, Nobembwa 1993, 72–73).

Kanakoraoan Ara Anga reirei

Reitaki ma naake aki roko. Te anga reirei e raka riki nakon kairan te marooro n te Tabati; e irekereke ma te ibuobuoki n te tangira ao kakabwaiakiia tabeman n te euangkerio. Tao ko kona n iangoa temanna ae e aki roko ao angan teuanne ke neienne te kakao ae onoti bwa e na tibwatibwa n te reirei ae e na roko. (Taraa Reirei n ana Kawai te Tia Kamaiu, 8–9.)