Riaai ao te Riaona, iroun Joseph Brickey

Tianuare 27–Beberuare 2

1 Nibwaai 16–22

“N na Katauraoa te Kawai Imwaaimi”

Ngkana ko wareka 1 Nibwaai 16–22, iangoia bwa e kanga ana katooto Nibwaai ni kaitarai kakaewenako ni kona n ibuobuoki nakoia aomata n am kiraati.

Korea Am Namakin

Kaungaa te Tibwatibwa

E noora kakawakin kabotauan booki aika tabu Nibwaai ni bon nakoina ao ana aomata (taraa 1 Nibwaai 19:23). Iangoia ni kaoiia kain te kiraati bwa a na tibwauai reirei aika a reiakin man rongorongon mwanangan Nibwaai nakon te aba ni berita are e kaineti nakon oin maiuia.

Reirei te Reirei

1 Nibwaai 16:10–16, 23–31; 18:10–13, 20–22

Te Atua e kabonganai bwaai aika a uarereke ni karaoi bwaai aika a korakora.

• Ko kona, ke temanna man am kiraati, n iangoa te bwai ae uarereke are e kona ni kabonganaki ni uota te bwai ae korakora? (taraa 1 Nibwaai 16:29). Ko kona ni kaoiia kain te kiraati bwa a na marooroakina te bwai ae a reiakinna n te reirei aei imwin warekan booki aika tabu aikai ni kakatemanna ke n te kurubu: 1 Nibwaai 16:25–31; Aramwa 37:3–8; ao Reirei ao Berita aika Tabu 64:33; 123:12–17. E kanga te Atua ni kabonganai bwaai aika a uarereke ni kakoroi nanon bwaai aika a korakora inanon maiura?

• A na kona kain am kiraati ni kabwaia man maroroakinna bwa e kanga te Tama are i Karawa ni kairii kawaira. Ni moanakina, ko na butiia te kiraati bwa a na maroroakin reirei aika a karaoa te Riaona bwa e na mwakuri (taraa 1 Nibwaai 16:10–16, 23–31; 18:10–13, 20–22; taraa naba Aramwa 37:38–47). A kanga reirei aikai n iangoaki bwa “bwaai aika a uarereke”? A kona kain te kiraati ni koroi ni karinani iaon te burakibooti bwaai aika e a tia te Atua ni katauraoi bwa e na kairiira (taraa “Bwaai n Ibuobuoki Riki Tabeua” ibukin iango). Tera mwakuri aika a uarereke aika ti kona ni karaoi ni karekea ana kairi te Atua?

Ngkana ko Tauraoi Ao Ko Na Aki Maaku, iroun Clark Kelley Price

1 Nibwaai 16:18–32; 17:7–16; 18:1–4

Ngkana ti kawakin tuua, ao e na buokiira te Atua ni kaitarai kakaewenako.

• A kona kain am kiraati ni kaitarai mwakuri ao kakaewenako ake a taraa ni kaangaanga. Ko na kanga ni kabongana ana atatai Nibwaai ma ana mwakuri ae kaangaanga—kamwarakeaia ana utu inanon te rereua ao kabaan te kaibuke—ni buokiia? Tao a kona kain te kiraati ni wareka 1 Nibwaai 16:18–32; 17:7–16; ao 18:1–4, ni kakaai reirei aika a kona ni buokiia ngkana a kaitara ma te kakaewenako ae matoatoa (te katooto, 1 Nibwaai 16:24–26 a reirei bwa te tataro ao te nanorinano e anganira te kona ni karekea te kairi mai ieta ao te kaetieti mairoun te Atua). Ko kona ni moanna man anganakiia katotoon te reirei ae ko kunea inanon kiibu aikai. Ngkana a tibwaua te bwai ae a kunea, a kona naba n tibwaua aia atatai aika ti tebo.

1 Nibwaai 16:18–32; 17:7–22

E kairiiri te onimaki nakon te mwakuri.

• Aia atatai Riaai ao ana utu n te rereua e kaota mwaakan te onimaki ao mwiin te aki onimaki. Ni buokiia kain te kiraati bwa a na kunei koaua aikai, ko kona ni koroi titiraki aikai iaon te burakibooti: E kanga Nibwaai ni mwakuriia ana onimaki? E kanga ni kakabwaiaki imwina? Tera mwiin aia aki onimaki Reiman ao Remuera? Kaoiia kain te kiraati n taian kurubu n ukeukeri kaekaan taian titiraki inanon 1 Nibwaai 16:18–32 ke 17:7–22 ao tibwaua te bwai ae a kunea.

1 Nibwaai 19:22–24

Ti kona ni kabotaui booki aika tabu nakoira.

• Ni buokiia kain te kiraati bwa a na reiakinna bwa a na kanga ni kabotaui booki aika tabu nakoia, a kona ni wareki katooto bwa e kanga Nibwaai ni karaoa aei. Te katooto, inanon 1 Nibwaai 4:1–3 ao 17:23–32, 41–45, tera reirei aika e anga Nibwaai man kabotauakin booki aika tabu nakon ana kaangaanga ana utu? Te rongorongo mai iroun Unimwaane Robert D. Hales inanon “Bwaai n Ibuobuoki Riki Tabeua” e kamataata bwa e kanga kabotauan booki aika tabu ma ngaira ni kona ni kakabwaiaira. Iangoia ni kaoiia kain te kiraati bwa a na kinai kakaewenako aika a kaitara ma ngaia ke kain aia utu ao kakaai rongorongo man booki aika tabu aika a kona n anganiia atatai aika a nano ao n ibuobuoki ibukin kaangaanga aikanne. Ni kaineti ma 1 Nibwaai 19:22–24, e kanga kabotauan booki aika tabu ma ngaira ni kakabwaiaira?

• Maroroakinan 1 Nibwaai 19:22–24 e kona n riki bwa te tai ae tamaroa ibukiia kain te kiraati n tibwauaia bwa a kanga “ni kabotaui booki aika tabu” nakoia ao aia utu, n raonaki ma kakabwaia aika a tia ni karekei man karaoakiia. Iangoia ni koroi iaon te burakibooti aia iango kain te kiraati bwa ko na kanga ni kabotaui booki aika tabu nakoia (ibukin iango tabeua, tarai karinan n iango inanon “Bwaai n Ibuobuoki Riki Tabeua”). N te kiraati n taai aika a na roko, ko kona ni kaoiia kain te kiraati bwa a na tibwauai aia atatai ngkana a kabonganai iango ake a karinanaki.

1 Nibwaai 20–21

Te Uea e na ikota te bata are i Iteraera ni boong aika kaitira.

• Ni kaungaia kain te kiraati n tibwauai reirei aika a uaana aika kunei inanon 1 Nibwaai 20–21, iangoia ni koroi atuun rongorongo n aron aikai iaon te burakibooti: Ataein Iteraera, Ana Utu Riaai, ao Aomata n Ara Bong. Anganakiia te tai bwa a na rinanon 1 Nibwaai 20–21 ao ni karinani iaan atuun rongorongo n tatabeua nako bwa e kanga ana taetae ni burabeti Itaia ni kaineti nakoia kain te kurubu aei.

Kaungaa te Kamatebwai n te Mweenga

Ni kaungaia kain te kiraati bwa a na wareka 2 Nibwaai 1–5, kaoiia bwa a na iangoa te bwai ae a na taekinna nakoia aia utu ngkana e a uarereke aia tai iaon te aonaaba. Taekinna bwa moan mwakoro tabeua n te ka 2 Nibwaai iai inanona te kabanea n rongorongo are e anga Riaai nakoia ana utu.

Bwaai n Ibuobuoki Riki Tabeua

Witeo n Ana Boki Moomon.

Kakaai witeo aika a tei ibukin bwaai aika a riki man 1 Nibwaai 16–22 te ikotaki n Tamnei ibukin ana Boki Moomon iaon ChurchofJesusChrist.org ke te Goseple Library app.

Ara “Riaona.”

E reirei Unimwaane David A. Bednar: “Te Tamnei ae Raoiroi e mwakuri ni maiura n te kawai naba are e karaoia te Riaona ibukin Riaai ao ana utu, ni kaineti ma ara onimaki ma nanomatoara ao ongeabara” (“Bwa E Na Memena Tamneina Iroura n Tainako,” Ensign ke Riaona, Meei 2006, 31).

N te maungatabu ni kabuta n Okitobwa 2005, Unimwaane Lowell M. Snow man te Itingaun e taku: “Te maungatabu ni kabuta aei bon te Riaona n taai aikai, te tai ao te tabo ni karekei kairiiri ao kaetieti mai ieta aika a karikirakeira” (“Ana Kambwati te Uea,” Ensign ke Riaona, Nobembwa 2005, 97).

E reirei Beretitenti Thomas S. Monson: “Te Uea naba anne are e anga te Riaona ibukin Riaai e katauraoia ibukim ao ibukiu n te bong aei te bwai n tangira ae kaangaanga ao ni kakawaki n anga kaetieti nakon maiura. … Te bwaintangira ae I nanonna e kinaaki bwa am kakabwaia n te tamanuea” (Thomas S. Monson, “Your Patriarchal Blessing: A Liahona of Light,” Ensign, Nobembwa 1986, 65).

Kabotauan booki aika tabu nakoira.

E reirei Unimwaane Robert D. Hales:

“Tabeua te ririki n nako I reireina natira te mwaane ae uarereke taekan maiun ao te bwai are e rinanona tarin Iareta. E ngae ngke e rangin ni kakaongora te karaki, e aki ongora iai. Ngkanne I titirakinna bwa tera nanon te karaki aei nakoina. Iai nanona ae mwaiti ngke ti titirakiniia ara ataei, ‘Tera nanona nakoim?’ E taku, ‘Ko ataia, akea kaokorona ma te bwai ae e karaoia Iotebwa Timiti n te buakonikai ngke e tataro ao e karekea te kaeka.’

“I taku, ‘Ko a kan uaroro ma Iotebwa. N am iango te tataro n aron aei e na ibuobuoki nakoia?’ N te tai ae waekoa, ti aki taekina taekan te karaki n taai ake rimoa n te aba ae raroa nako. Ti taekina taekan natira te mwaane—taekan maiuna, kainnanona, ao te kawai ae e na kona ni buokaki n te tataro.

“Ngkai ngaira kaaro, iai tabera ni buokiia ara ataei ni ‘kabotaui booki aika tabu [ni koauana, mwakoron nako ana euangkerio Iesu Kristo] nakoira [ao nakoia ara ataei], [ibukin] rakaia ao reireinakiia [ibukiia ara utu]’” (“With All the Feeling of a Tender Parent: A Message of Hope to Families,” Ensign ke Riaona, Meei 2004, 90).

Babaire ibukin kabotauan booki aika tabu.

• Iangoi bwaai aika a riki ke kaangaanga n ara bong aika titebo ma ake ko wareki inanon booki aika tabu.

• Tarai bwaai aika a atai, a reiakin, ke a karaoi aomata inanon booki aika tabu ae e na kona ni buokiko ma am kaangaanga ke am titiraki ae ngkai.

• Iangoi reirei man te karaki anne ae e na kona ni buokiko n oin am kaangaanga.