Ma Akea Au Taeka, Ma e na Tauaki Am Taeka, iroun Harry Anderson

Beberuare 10–16

2 Nibwaai 6:10

“O Ai Korakorara ana Babaire Atuara!”

Te kawai ae tamaroa ibukin katauraoam n anga reirei ko na wareka moa 2 Nibwaai 6–10 i bon ibukim. Korea am namakin ake ko karekei, ao kabongana te baire aio ni kakaei atatai riki tabeua ao iango ibukin te anga reirei.

Korea Am Namakin

Kaungaa te Tibwatibwa

E reireiniia ana aomata Iakobwa bwa ana anga reirei Itaia “a bon kaineti naba nakoimi” (2 Nibwaai 6:5). Ko kona ni moanna n titirakiniia kain am kiraati bwa a na tibwauai ana anga reirei nako Iakobwa n 2 Nibwaai 6–10 ake a namakinna bwa a na kona ni kabootaua ma maiuia. A kona ni kabwarabwaraa bwa bukin tera iai riain te anga reirei.

Reirei te Reirei

2 Nibwaai 6–8

Te Uea e nanoangaia Ana aomata ao e na kakoroa bukin Ana berita.

• N anga tabeua kabwarabwara n rongorongon 2 Nibwaai 6–8, e na rangin ibuobuoki ibukiia kain am kiraati ni karinani bwaai aika a riki ake a kabwarabwaraaki n 2 Nibwaai 6:8–15. Tera ae a taekinaki n taai aika a riki n aron te Uea ma Ana namakin ibukiia Ana aomata? (taraa naba 2 Nibwaai 7:1–3; 8:3). Ko na bae n tangiria ni kan kamataata bwa ngkai ngaira kain te Ekaretia, bon ngaira ana aomata ni berita te Atua n te bong aei, ao ti na bane n ikotaki mai itinanikun te aonaaba ni kamanoaki inanon te euangkerio. Tera rongorongo ake ti a tia ni karekei ngkai man mwakoro aikai?

2 Nibwaai 9

Rinanon Ana Mwakuri ni Kamaiu, e kamaiuiia aomata ni kabane Iesu Kristo man te mate n rabwata ao n te mate n tamnei.

• Teuana te kawai ni kakorakora ara kakaitau ibukin ana Mwakuri ni Kamaiu Iesu Kristo n tii iangoia bwa a na tera ae e na riki nakoira ngkana akea te Mwakuri Kamaiu. Kain te kiraati a kona n iangoi raoi bwaai aikai ngkai a kamatebwaia te ka 2 Nibwaai 9. Ko kona ni kaoiia kain te kiraati bwa a na waaki ni kamatebwai kiibu 4–9 ao ngkanne imwina a na koreia ni karinani iaon te burakibooti bwa tera ae e na riki ngkana akea ana Mwakuri ni Kamaiu Iesu Kristo. Ni kaineti ma kiibu 10–14, e na kanga te Tia Kamaiu ni kamaiuiira man te bwai ae e na riki aio? Ana rongorongo Unimwaane Jeffrey R. Holland inanon “Bwaai n Ibuobuoki Riki Tabeua” e kona ni buokiia kain am kiraati n ataa kainnanoan ana Mwakuri ni Kamaiu Iesu Kristo. Ko kona naba ni kaota te tamnei are e boboto iaon ana rongorongo—“Ike e Bootaki te Motiraoi, te Tangira, ao te Nanoanga” (ChurchofJesusChrist.org). A kona kain te kiraati ni tibwauai aia iango ke aia namakin bwa ana rongorongo Unimwaane Holland e kaungai nanora ibukin te Tia Kamaiu.

• Titirakiniia kain te kiraati bwa a na iangoia raoi bwa a na kanga ni kabwarabwaraa ana Mwakuri ni Kamaiu Iesu Kiristo nakon temanna are e aki ataia bwa tera ke bukin tera ngkai iai riaina. Koaua ake a kuneaki n te ka 2 Nibwaai 9 a kona ni buokiia kain te kiraati ibukin te marooro n aron anne. Tao a kona ni kakaei kiibu 4–12, n taraia bwa e kanga ana Mwakuri ni Kamaiu te Tia Kamaiu n tokanikai iaon te mate n rabwata ao te mate n tamnei. N ae aanaki iaon baike ti reiakin man booki aika tabu aikai, bukin tera e aranaki ana anga karea te Tia Kamaiu bwa “te mwakuri ni kamaiu ae akea tokina? (2 Nibwaai 9:7).

• E miimi Iakobwa n ana babaire ni kaboomwi te Atua are e a kairaki bwa e na takarua “O ai korakorara” ao “O ai motiraoira” ngkai e kabwarabwaraa te babaire. Ni buokiia kain te kiraati bwa a na mataata riki n namakin aikai ibukin te Tia Kamaiu ao Ana Mwakuri ni Kamaiu, iangoia ni kaoiia bwa a na kakaea 2 Nibwaai 9 ibukin takaruan Iakobwa (angiina a kuneaki inanon kiibu 8–20). Tera ae a taekinaki ni kiibu aikai ibukin te Atua ao Ana babaire? Tera taian taneiai ake a tia ni buokiira n namakina are e namakinna Iakobwa ibukin ana babaire te Atua ibukiia Natina? Ko kona naba n anenea te kuna ibukin motiraoin te Atua, n aron “How Great Thou Art” (Anene n Taromauri, nambwa. 86), ni kamatoatoa te kabwarabwara aio.

2 Nibwaai 9:27–54

Ti kona n roko nakon Kristo ao ni karekei kakabwaia aika a mimitong man Ana Mwakuri ni Kamaiu.

• Ko kona ni moana am kabwarabwara ibukin ana anga reirei Iakobwa inanon kiibu aikai n titirakiniia kain te kiraati n iangoia bwa a na kanga ni kaoa temanna bwa e na raira nanona ao n roko nakon Kristo. E kanga ni karaoa aio Iakobwa n 2 Nibwaai 9:50–53? Tera kakabwaia ake e taekin ake a na roko inanon maiura ngkai ti butimwaai kakao aikai?

• N te ka 2 Nibwaai 9, Iakobwa e kabonganai uoua kibuntaeka aika a mwaakaroiroi ao ni kakaitara: “ana babaire n nanoanga te Tia Karikibwai ae kakannato” ao “ana babaire ni kamwamwane teuare buakaka” (2 Nibwaai 9:6, 28). Ni buokiia membwa n reiakinaki man te kakaitara aio, ko kona ni korea te kawai iaon te burakibooti ao ni korea taekana ana Babaire te Tama are i Karawa. Kaoiia kain te kiraati bwa a na kakaea 2 Nibwaai 9:27–52, n noora ana reirei Iakobwa are e anga ibukin buokara n ira ana babaire te Tama are i Karawa. Butiia bwa a na korei bwaai ake a kunei irarikin te kawai. Tera ae e taekinna Iakobwa bwa e kanga Tatan ni kaririira ni kararoaira man ana babaire Tamara are i Karawa? Tera ae ti reiakinna man kiibu aikai bwa ti na nakea ngkana ti iriira ana babaire te Tama are i Karawa ao ti na nakea ngkana ti iriira Tatan? (taraa 2 Nibwaai 9:9, 18). Ni kaineti ma kiibu aikai, mwaitira riki ae ti na karaoia bwa ti na iriira ana babaire Tamara are i Karawa?

• N 2 Nibwaai 9:28–38, e anga ana kauring Iakobwa ni kaitarai tabeua anua ao katei aike a kararoaira man iriiran ana babaire te Atua ibukira. Iangoia bwa ko na kaoiia kain te kiraati bwa a na kakaei taekaia. E ngaa mai buakon anua ao katei aikai aika a taraa ni kinaaki n te bong aei? Tera ae karaoiia bwa a na rang ni kakamaaku? Tera ae ti reiakinna man 2 Nibwaai 9:50–53 bwa ti na kanga n totokoi kabuanibwai aikai?

Kaungaa te Kamatebwai n te Mweenga

Ni buokiia kain te kiraati n namakina ae iai aia onimaki ni warekan ana koroboki Itaia are e anaaki taekana n 2 Nibwaai 11–24, ko kona ni kabwarabwaraa bwa e karin koroboki aikai Nibwaai bwa e na kakorakorai aia onimaki aomata iroun Iesu Kristo. Kaoiia kain te kiraati bwa a na taraa te wareware nakon te wiiki are imwiina bwa te tibwanga ni katea aia onimaki Irouna.

Bwaai n Ibuobuoki Riki Tabeua

Kainnanoan te Tia Kamaiu Iroura

E karaki Unimwaane Jeffrey R. Holland ae rongorongon te tia tamwarake iaon te bwaa are e tinetine ni katatin te bwaa ae irariki man nano, are bon akea te bwai ae e na tuuka bwakana ni mate iai. Ngkai e nang moanna ni marannako mai mataniwiin te bwaa ae nano ae tantano man katati are e raweia n taua, e namakina bain tarina ae uarereke are e koona tounibaina ao e katikia bwa e na kamanoa. Unimwaane Holland e kabootaua te bwai are e rinanona te tia tamwatamwa ma arora n te aonaaba ae kabwakabwaka aio:

N ae koaua bon iai Atam ao Nei Ewa ake a bwaka mai Eten, mai mwiin te bwaka anne iai te bwai ae e uouotia. … Ibukina ngkanne ngke ti bungiaki nakon te aonaaba ae kabwakabwaka ao ibukina naba ngkai ti na kona n urui ana tua te Atua, a motikaki taekara nakon are a kaitara naba ma ngaia Atam ao Nei Ewa.

“Ai bon te kaangaanga tera! Te botanaomata ae bwanin are a inaomata a bane ni bwaka—mwaane, aine, ao ataei ni kabane ake a mena inanona a bwaka nakon te mate ae reitinako, a karenakoaki n tamneia nakon te nanokawaki ae aki totoki. Ai ngaia anne ae e nanonaki n te maiu? Ai ngaia aio tokin te aomata ae e na rinanona? Ti bane n tinetine inanon te mwarua ae wariki man nano n taabo tabeua n te aonaaba ae kaokoro, ngaira n tatabemaniira ti ukoukora nnera ae ti na mena iai rimwi, ngaira n tatabemaniira ti ukoukora te bwai ae ti na taua ni kamatoatoa i baira—ma akea te bwai ae e na kariaaki ma tii namakinan te marannako ma te tanotano iaani baira, akea te bwai ae e na kamanoira, akea te bwai ae ti na taua ni kamatoa, te bwai ae karako ae e na tauiira ni kamatoaira? …

Kaekaan titiraki akanne e mataata n aki toki ae kangai akea! … [Te] Mwakuri ni Kamaiu e na karekea te tokanikai ae bwanin iaon te mate n rabwata, e anga te mangauti nakoia aomata nako ake a bungiaki ke ake a na bungiaki nakon te aonaaba aio. Ma te nanoanga e na katauraoa naba te kabwarabure ibukin aia bure aomata ni kabane, mairoun Atam nakon tokin aonaaba, ae aanaki iaon te rairannano ao te ongotaeka nakon taian tua” (“Ike e Bootaki te Motiraoi, te Tangira, ao te Nanoanga,” Ensign ke Riaona, Meei 2015, 105–6).

Kanakoraoan Ara Anga reirei

Kaota Am Koaua n taainako. Am kakoaua ae bebete, ibukin te koaua e na iai mwiina iaoia naake ko reireiniia. E aki kainnanoa te wii kateke ke e na abwaabwaki. Iangoia n tibwaua am kakoaua ae onoti ibukin te Tia Kamaiu ngkai ko maroroakina te ka 2 Nibwaai 9.