aomata a kana uaan te kai ni kamaiu

E Karewe nakon Karewerewe nako, iroun Miguel Ángel González Romero

Tianuare 20–26

1 Nibwaai 11–15

“Otanganiko n te Raoiroi ma Mwaakan te Atua”

Moana am katauraoi n anga reirei man warekan 1 Nibwaai 11–15. Korea am iango ao am namakin ibukin karaki ao reirei ake a kona ni kaungaia iai kaain am kiraati bwa a na marooroakin. Iango aika inano a kona ni ibuobuoki.

Korei Am Namakin

te aikaon ibukin te tibwatibwa

Kaungaa te Tibwatibwa

Mwakoro aikai iai inanona reirei ake a na tangiria kaain te kiraati bwa a na iangoi ngkai a tibwaua te euangkerio ma tabeman. Iangoia ni korei taian titiraki iaon te burakibooti n aron akana a kaotaki ao kaoiia kaain te kiraati bwa a na tibwauai bwaai ake a kunei inanon aia wareware n te wiiki aei ike a na kona ni ibuobuoki ni kaekai titiraki aikai:

• Tera Kiitanan te Koaua ao Kaokan te Euangkerio?

• Bukin tera e kakawaki ana Boki Moomon?

• N na kanga n atai ana koaua te Atua i bon ibukiu?

te aikaon ibukin te anga reirei

Reirei te Reirei

1 Nibwaai 11:1–5, 13–33

Te Atua e kanakomaia Iesu Kristo bwa kaotan Ana tangira.

• Te anera e kaoti kanikinaa ma bwaai aika a riki nakon Nibwaai man maiun te Tia Kamaiu are e kaotaki iai ana tangira te Atua. Ko na bae ni kunea bwa e bon rangi ni buobuoki tuoakin kanikinaa ao bwaai aika a riki aikai n te kiraati ao ni kabwarabwaraa bwa a kanga ni kaota ana tangira te Atua ibukira. Iai tamnei, witeo, ke tabeua bwaai n ibuobuoki aika a nooraki ake ko kona ni kaoti are a na kabwarabwarai tabeua bwaai aika a riki inanon kiibu aikai? (taraa, te katooto, biblevideos.ChurchofJesusChrist.org). E kanga maiun te Tia Kamaiu ma ana Mwakuri ni Kamaiu ni buokiko ni mataata n ana tangira te Atua ibukim?

1 Nibwaai 12–15

E na buokiira te Atua n totokoi ana anainano Tatan.

• Kain am kiraati n tabetai a bae n namakinna bwa kanga ai aroia aomata inanon miin Nibwaai ake a tiotionako n te bubunnang ae roo ke ake a kaitara ma aia bwabwainingare te koraki ake inanon te kateitei ae korakora man buubura. Ko kona ni butiia kaain te kiraati bukin tera ngkai te bubunnang ae roo bon te kainikinaa ae raoiroi ibukin te kariiri (taraa 1 Nibwaai 12:17) ao bukin tera ngkai te kateitei ae korakora man buubura bon te kanikinaa ibukin iango aika akea manenaia ao ana kamoamoa te aonaaba (taraa 1 Nibwaai 12:18). Ngkanne ko kona ni bwenauai mwakoro 12–15 imarenaia kaain te kiraati ao ni kaoiia bwa a na kakaei kiibu ake a taekinaki bwa e kanga te Atua ni buokiira n tokanikai iaon te kariiri, te manrerei, ao te kamoamoa (taraa, n aron te katooto, 1 Nibwaai 13:34–40; 14:14).

• Ko na kanga ni buokiia kaain am kiraati ni kamatataaki riki n te mwaaka are e roko man ana taeka te Atua? (taraa 1 Nibwaai 15:24). Ko na bae ni kaoiia bwa a na marororoakin titiraki n aron akana imwina: Tera ae e reiakinna Nibwaai ibukin mwaakan te Atua? E kanga Tatan ni kataia ni kakea bonganan ana taeka te Atua? (taraa 1 Nibwaai 13:26–29). Tera ae e karaoia te Uea ao Ana burabeti ni kamanoi Ana taeka? Ngkai e riki bwa mwakoron am kabwarabwara, ko na bae n titiranikiniia tabeman kaain am kiraati n tibwauaia bwa a kanga ni kamatebwai booki aika tabu ao tera ae a karaoia ni karika ana taeka te Atua bwa mwakoron maiuia ni katoa bong.

1 Nibwaai 13

E katauraoa te kawai te Uea ibukin Kaokan Ana Ekaretia.

• Tao rinanin te tai ae baireaki n aron rongorongona e na buokiia kaain te kiraati n ataa miin Nibwaai ni bwaai aika a riki ibukin Kaokan te Euangkerio. Ko kona ni kaoiia kaain te kiraati bwa a na karaoa teuana iaon te burakibooti, ma bwaai ake a riki ake a kunei n 1 Nibwaai 13. E ngaa mai buakon aikai aika a tia n riki? E ngaa aika a riki ngkai? Iangoia n tibwaua te taeka inanon “Bwaai n Ibuobuoki Riki Tabeua” iroun George Washington, ana moan beretitenti te United States, are e kaotia bwa e ataa ana kairoro te Atua n te Bitaki ae Korakora n ana Tautaeka Amerika, te tai are e katauraoa te kawai ibukin Kaokan te Euangkerio.

• A na kanga kaain te kiraati ni kabongana 1 Nibwaai 13 ni kamatataa nakon temanna ae kaain te aro teuana bwa bukin tera ngkai e riai Kaokan te Euangkerio? (te katooto, taraa 1 Nibwaai 13:26–29, 35–42). Tera koroboki riki ake tabeua aika a kona ni kabongana kaain te kiraati ni buokiia tabeman n ataia bwa bukin tera e riai Kaokan bwaai? (ibukin katooto tabeua, taraa Topical Guide, “Kaokan te Euangkerio”). Kain te kiraati a na bae n reke rakaia man karaoan aia marooro n te kaotioti bwa a na kanga ni kamataata nakon temanna kainnanoan Kaokan te Euangkerio ao e kanga ni kakabwaiaiia.

1 Nibwaai 13:20–41

Ana Boki Moomon e reirei koaua aika a mataata ma ni kakawaki.

• E na rangi n ibuobuoki aron kabonganaan 1 Nibwaai 13:20–41 ni moanakin te marooro bwa bukin tera ngkai ti kainnanoa ana Boki Moomon. A kona kaain te kiraati ni karinani tabeua “bwaai aika mataata ma ni kakawaki” ake a bua man te Bwaibwara ao a kaokaki rinanon ana Boki Moomon (n aron tabeua katooto, tarai kiibu 26 ao 39 ke rinanin taeka inanon “Bwaai ni Ibuobuoki Riki Tabeua”). Ko bae naba n tangiria ni kan kaoiia kaain te kiraati n tibwauaia bwa e kanga aron kaokan “bwaai aika mataata ma ni kakawaki” n tia ni buokiia ni kaaniaki riki ma te Atua.

  te utu ae a wareware ni koroboki aika a tabu

  E kona ni buokiira te Tamnei ni kunei “koaua aika mataata ma ni kakawaki” i bon ibukira.

• Iangoia bwa ko na kaota tamnein “Ana Boki Moomon—te Boki mairoun te Atua” (ChurchofJesusChrist.org), ao kaoiia kaain te kiraati bwa a na tibwaua te bwai ae a reiakinna man te tamnei aei ao bukin tera ti kainnanoa ana Boki Moomon. Ke ko kona ni kaoiia kaain te kiraati ni korea iaon te burakibooti kamatataakin taekan ana kabwarabwara Unimwaane Tad R. Callister inanon “Bwaai ni Ibuobuoki Riki Tabeua.” A kona ngkanne kaain te kiraati n tibwauaia bwa e kanga ana Boki Moomon ni buokiia ni kamataataia riki n ana euangkerio Iesu Kristo.

te aikaon ibukin te kamatebwai

Kaungaa te Kamatebwai n te Mweenga

Ni kaungaia kaain te kiraati bwa a na wareka 1 Nibwaai16–22 n te wiiki ae e na roko, ko na bae n taekinna ae kairaki ma te rongorongo are e na kaungaiia ao ni buokiia ngkana a kantaningaaki bwa a na karaoa te bwai ae e taraa ni kaangaanga karaoana.

te aikaon ibukin bwaai n ibuobuoki

Bwaai n Ibuobuoki Riki Tabeua

Tamnein Ana Boki Moomon.

Kakaei tamnei ake a kaoti bwaai aika a riki man 1 Nibwaai 11–15 n te ikotaki n Tamnei ibukin ana Boki Moomon iaon ChurchofJesusChrist.org ke n te Gospel Library app.

Bain te Atua n te Kakiriwe ni Bwakan ana Tautaeka Amerika.

E taku George Washington: “E na riai ni buakaka te aomata ae iangoi bwaai aika a tia n riki n aron te Bitaki ae Korakora n ana Tautaeka Amerika n akean ana namakin ni kakaitau nakon te Tia Karika te Aonaaba are angin ana mwakuri aika a rine ake e a manga karinii a aki toki n noraki bwa i bon ibukira” (Letter to Samuel Langdon, Tebetembwa. 28, 1789, founders.archives.gov/documents/Washington/05-04-02-0070).

Unimwaane Russell M. Ana Riiti Nelson n ana Boki Moomon.

Man “Ana Boki Moomon: Tera Aron Maium Ngkana Arona bwa akea?” (Ensign ke Riaona, Nob. 2017, 60–63).

Ana Boki Moomon e kaoti iango aika a bure bwa:

• Te kaotioti e toki n te Bwaibwara.

• Ataei aika a uarereke a riai ni bwabetitoaki.

• Te kukurei e kona n reke man karaoan te buakaka.

• Tamaroan te aomata e tau ibukin te karietataaki (otenanti ao berita aika a tabu a kainnanoaki).

• Bwakan Atam e kabarekaia aomata ma “te moan bure.”

Ana Boki Moomon e kamataata taekan:

• Rikira n te aonaaba n tamnei.

• Te Mate. Bon mwakoron ana baaire ni kakukurei ae korakora te Atua.

• Te aonaaba n tamnei imwin te mate, e moanaki n te bwaretaiti.

• Mangautin te rabwata, n ikotaki ma tamneina, e riki bwa te tamnei ae e aki mamate.

• Motikan taekara iroun te Uea e na kaineti man ara mwakuri ao ara iango inanora.

• A kanga otenanti ni karaoaki raoi: n aron te katooto, te bwabetitio, te toa, anganaki te Tamnei ae Raoiroi.

• Ana Mwakuri ni Kamaiu Iesu Kristo.

• Te Mangauti.

• Tabeia ae kakawaki anera.

• Rikin te nakoanibonga ae akea tokina.

• E kanga te anua n aomata ni kairoroaki riki man mwaakan te taeka nakon mwaakan te kabaang.

Ti Kainnanoa ana Boki Moomon.

Unimwaane Tad R. E reirei Callister:

“Te Bwaibwara bon teuana te kakoaua ibukin Iesu Kristo; ana Boki Moomon ngaia naba teuana. Bukin tera ngkai e rangi ni kakawaki te kauoman n tia kakoaua aei? Te katooto ae imwina e kona n ibuobuoki: Iraua mwaitin te rain ae ineti ae ko kona ni koreia rinanon te mwaake ae tii teuana iaon te mwakoro ni beebwa? Te kaeka bon akea tokina. Ibukin te tai, iangoia bwa man te mwaake ae tii teuana e tei ibukin te Bwaibwara ao tebubua rain aika a ineti ake a koreaki rinanon te mwaake anne e tei ibukin raitaeka aika a kakaokoro ibukin te Baibara ao raitaeka akanne n tatabeua a tei ibukin te ekaretia aika a kakaokoro.

“Tera ae e na riki, e ngae, ngkana tao iaon te mwakoro ni beebwa anne iai te kauoua ni mwaake ae tei ibukin ana Boki Moomon? Iraua rain aika a ineti aika ko kona ni korei imarenan uoua taekan mwaake aikai: te Bwaibwara ao ana Boki Moomon? Tii Teuana. Tii teuana te raitaeka ibukin ana reirei Kristo ae ngaia ae e na riki ibukin aia koaua taan kakoaua aika uoman aikai” (“Ana Boki Moomon—te Boki mairoun te Atua,” Ensign ke Riaona, Nob. 2011, 75).

Kanakoraoan Ara Anga reirei

Kaira te marooro ae kaunganano. Ni kabane aomata iai bwaai ae a kan anga ni marooakin nakon te kiraati, ma n tabetai e aki reke aia tai. Kakaei kawai ni karikirakea aia tai kaain te kiraati bwa a na tibwauai aia koaua. (Taraa Reirei n Ana Kawai te Tia Kamaiu, 33.)