Miin Riaai, iroun Steven Lloyd Neal

Tianuare 13–19

1 Nibwaai 8–10

“Nakomai ao Katoonga te Uaanikai”

Imwain warekan iango n te kamataata aei, wareka 1 Nibwaai 8–10 ao iangoi kakaewenako ao taai aika a kaitarai aomata aika ko reireiniia. Korei am namakin bwa tera reirei man mwakoro aikai aika ko riai ni kabanea am tai iaona n te kiraati.

Korei Am Namakin

Kaungaa te Tibwatibwa

A mwaiti aron kabonganakin miin Riaai ibukin ara bong. Ni moan waakinan te kiraati, ko na bae n tangiria ni kaoiia kaain te kiraati bwa a na tibwaua otaia ngkai a wareka taekan te mii aei. Kaungaia bwa a na tibwauai kiibu aika a onoti ao nanoia aika a kunei ibukin maiuia.

Reirei te Reirei

1 Nibwaai 8:10–16

Ngkana ti ataa ana tangira te Atua, ti tangiria ni buokiia tabeman bwa a na ataia.

• Bon te bwai ae tataneiai te aba iai n tibwauai bwaai aika ti tangiri ma aomata aika ti tangiriia, ma n tabetai ti kunea bwa e matoatoa tibwauakin te euangkerio. Te marooro ibukin miin Riaai e kona ni buokiia kaain te kiraati ni karekea aia tai n tibwaua te euangkerio. Ko kona n anganiia kaain te kiraati te mwakoro ni uaanikai ao n tuanga teuanne ke neienne bwa a na anai nanoia nikiraia kaain te kiraati bwa a na teimatoa ni kana te uaanikai aei. E kanga te bwai n reirei aei n titebo ma ana atatai Riaai n 1 Nibwaai 8:10–16? Tera ae ti reiakinna man ana atatai Riaai are e na buokiira ngkana ti tibwaua te euangkerio? Ngkai mwakoron te marooro aei, ko kona n tibwaua te witeo “Tibwauakin Bwaai Aika a Tamaroa” (ChurchofJesusChrist.org).

• Unimwaane David A. E anga reirei Unimwaane DavidA. Bednar, “Te uaanikai iaon te aroka bon te kanikinaa ibukin kakabwaia n te Mwakuri ni Kamaiu” (“Miin Riaai: Taua ni Kamatoa te Kai te Biti,” Ensign ke Riaona, Okitobwa 2011, 34). Iangoia ni moantaai ni kaongoia tabeman kaain te kiraati ao n tuangiia bwa a na iangoa 1 Nibwaai 8:11–16 ao iangoi titiraki n aron aikai: N na kanga ni kabwarabwaraa kangkangin Ana Mwakuri ni Kamaiu Iesu Kristo are e a tia ni uotia nakon maiu? N na kanga n anoanoia tabeman bwa a na noora kangkangina? (taraa te kibu 15). A kanga tabeman ni kaoai bwa N na ukoukori kakabwaia n Ana Mwakuri ni Kamaiu te Tia Kamaiu? Tera ae I kaungaaki bwa N na karaoi ngkana I wareka 1 Nibwaai 8:11–16? Kaoiia membwa aikai bwa a na tibwaua aia kaeka n tain te kiraati, ao kaoiia kaain te kiraati ni kabane bwa a na anga aia atatai aika a nano n tain te marooro.

Minerva K. Teichert (1888–1976), The House of the World, 1954, te oera iaon te mitionaite, 36 x 48 te inti. Brigham Young University Miutiem ibukin Korobanna

1 Nibwaai 8:19–38

Ana taeka te Atua e uotira nakon te Tia Kamaiu ao ni buokiira n namakina Ana tangira.

• Teuana te kawai ni moana maroroakinan miin Riaai bon kaoakiia tabeman kaain te kiraati bwa a na korea tamnein te mii iaon te burakibooti, ni kabongana 1 Nibwaai 8:19–38 bwa te bwai ni kairi. Ke ko kona ni kaota tamnein miin Riaai man te kabwarabwara n te wiiki aei n Nakomai, Iriirai—Ibukiia Aomata n Tatabemaniia ao Utu. Ko kona ngkanne ni kaoiia kaain te kiraati bwa a na kakaei kibu aika a na anga kabwarabwaraan teuana te kanikinaa n te korotamnei ke te tamnei—a kona ni kuneaki kabwarabwara aikai n 1 Nibwaai 11:4–25, 35–36; 12:16–18; ao 15:21–33, 36. Ngkai a tibwaua te bwai ae a kunea kaain te kiraati, kaoiia bwa a na maroroakina te bwai ae reireiniira taian kanikinaa aikai. Te katooto, tera te bwai ae reireiniira te kateitei ae moan te korakora ma ni buubura ibukin te kainikatonga? Tera ae reireiniira te kai te biti ibukin ana taeka te Atua? A kona naba n taekinna bwa e kanga miin Riaai n tia ni buokiia bwa a na nakon Kristo. Ti kanga n tia n iangoira inanon te mii?

• Teuana te rongorongo ae kakawaki ni miin Riaai bon kakawakin ana taeka te Atua, ae kanikinaeaki n te kai te biti. Ni buokia ni katuruturua te rongorongo anne, ko kona n bwenaua te kiraati nakon aua te kurubu ao anganiia bwa a na reiakin taekaia kurubu n aomata ake e nooria Riaai, ae e kabwarabwaraaki inanon “Bwaai n Ibuobuoki Riki Tabeua” ao inanon 1 Nibwaai 8:21–23, 24–28, 30, ao 31–33. Imwiina ao kariaia kaain te kiraati bwa a na tibwaua imarenaia te bwai ae a reiakinna. Ko kona naba n anga tabeua te miniti ibukiia kaain te kiraati n iangoa te bwai ae a namakinna bwa a na karaoia ni kakoaua bwa a “teimatoa n taua te kai te biti” (1 Nibwaai 8:30).

1 Nibwaai 10:17–19

E na kaoti koaua te Atua nakoira ngkana ti teimatoa n ukoukoria.

• Ao taian bubu n nang aika a roo are e karooa kawaira ao bwanaa ni kaenaena man te kateitei ae moan te buubura ma ni korakora e kona ni karika te kaangaanga ibukira bwa ti na kunea te koaua. Te wareware ni bootaki n ana katooto Nibwaai bwa te tia ukoukora te koaua e kona n ibuobuoki. Ko kona ni moana te marooro man titirakinaia kaain te kiraati bwa a na atai tabeua rongorongo aika a kamangaongao aika e kanakoi te aonaaba. Ibukin te katooto, tera iango n aonaaba aika a kauringiira iai burabeti ao abotoro n te maungatabu ae e a tibwa nako? Iangoia ni koroi ni karinani iaon te burakibooti taian kawai aika e anai Nibwaai ni karekea oin ana kakoaua iaon koauan miin tamana (taraa 1 Nibwaai 10:17–19; 11:1). Ti na kanga n ira ana katooto ngkana ti ukoukora te koaua?

Kaungaa te Kamatebwai n te Mweenga

Ni kaungaia kaain te kiraati bwa a na wareka 1 Nibwaai 11–15, kaoiia bwa a na kakaea te bwai ae a na riai ni karaoi tamnei aikai ma miin Riaai: Iesu te merimeri, te kaibangaki, tinaia kabekaau, ikotakiia aomata aika uanao bwa a na buaka, ao booki.

Bwaai n Ibuobuoki Riki Tabeua

Witeo n Ana Boki Moomon.

Iangoia ni kaoti witeo aika a kabwarabwarai bwaai aika a riki man mwakoro aikai (tarai ikotaki n Tamnei ibukin ana Boki Moomon iaon ChurchofJesusChrist.org ke te Gospel LIbrary app).

Aua kurubu n aomata inanon miin Riaai.

Kurubu 1.“Inanon 1 Nibwaai 8:21–23 ti reiakina taekan te moan kurubu n aomata aika a waaki nako ao ni waaki n te kawai are e kairiia nakon te kai ni kamaiu. E ngae n anne, ngke a kaitibo aomata ma bubu n nang aika a roo, are e tei ibukin ‘ana kariiri nako te riaboro (1 Nibwaai 12:17), a bua kawaia, a tiotio nako, ao a bua. Ko na noria bwa akea taekan te kai te biti ae taekinaki inanon kiibu aikai. Naake a kakea bonganan ke n iangoia bwa e aki kakawaki ana taeka te Atua akea aia reitaki nakon te kambwati mai ieta anne are e kotea te kawai nakon te Tia Kamaiu”

Kurubu 2.“Inanon 1 Nibwaai 8:24–28 ti wareka taekan te kauoua ni kurubu n aomata aika a karekea te kawai ae ineti man irariki are e kairiia nakon te kai ni kamaiu. Te kurubu aei ‘a kamatoaia rinanon te bubu n nang ae roo, n taua te kai te biti, ni karokoa ae a kitanna ao n roko ni katoonga uaan te aroka’ (te kibu 24). E ngae n anne, ngke temanna kaain te auti ae kunnikaia n ae tikiraoi n te kateitei ae moan te korakora ma ni buubura e kaenaena te kauoua ni kurubu n aomata aei, ‘a maama’ ao ‘a bwaka nako nanon kawai aika a katabuaki ao a bua’ (te kibu 28). … E ngae ngke ma te onimaki, motinnano, ao ana taeka te Atua, n tokina ao e bua te kurubu aei—tao ibukina ngkai tii n tabetai a wareware ke ni kamatebwai ke n ukeuke ni booki aika tabu.”

Kurubu 3.“Inanon te kibu 30 ti wareki taekaia kaain te kateniua ni kurubu n aomata aika a nanomatoa “n teimatoa ni kamatoa n taua te kai te biti, ni karokoa a roko ao a bwaka ao ni katoonga uaan te aroka.’ Te taeka ae kakawaki n te kibu aei e kangai teimatoa n taua te kai te biti. E teimatoa naba te kateniua ni kurubu ni waaki nako moa ma te onimaki ao te nanomatoa; e ngae n anne, akea kakoauana ae a kitana te kawai, a bwaka inanon kawai aika a katabuaki, ke ni bua. Tao te kateniua ni kurubu n aomata aei e teimatoa ni wareware ao ni kamatebwai ao n ukoukori booki aika tabu. … Aio te kurubu ae Ngai ao ngkoe ti na kataia ni kainna,”

Kurubu 4.“Te kaaua ni kurubu e aki ukoukora te kai, ma e tangira riki te kateitei ae moan te korakora ma ni buubura bwa tokin kawaia (taraa 1 Nibwaai 8:31–33).”

(David A. Bednar, “Miin Riaai: Taua ni Kamatoa te Kai te Biti,” Ensign ke Riaona, Okitobwa. 2011, 34–36.)

Kanakoraoan Ara Anga reirei

Kaotaa te onimakinaki rinanon te kantaninga ae rietaata. Tabeman taan kamatebwai a aki onimakina aia konabwai ni kamatebwaia te euangkerio i bon irouia. Berita nakoia kaain te kiraati bwa ngkana a kekeiaki ni kamatebwai i bon irouia, te Tamnei ae Raoiroi e na reireiniia. Ko kona n anganiia kawai bwa a na buokiia n aia moan waaki. (Taraa Reirei n ana Kawai te Tia Kamaiu, 29–30.)