bwaatua koora

Ritembwa 30–Tianuare 5

Iteraniba ni kabwarabwara Ana Boki Moomon

“Kakoauan Taekan Iesu Kristo”

Kamatebwaia ana Boki Moomon atuun te iteraniba ao kabwarabwaraana; aia koaua Taan Kakoaua aika Teniman, naake Taan Kakoaua aika Waniman, ao te Burabeti Iotebwa Timiti; ao “Te Kabwarabwara ae Kimototo ibukin Ana Boki Moomon.” Ni karaoan aei, ukeri kairi mai iroun te Tamnei ae Raoiroi bwa ko na kanga ni kaungaia kain te Kiraati ni waakina te kamatebwai ae kakawaki man Ana Boki Moomon.

Korea Am Namakin

te aikon ibukin te tibwatibwa

Kaungaa te Tibwatibwa

Ni waakina aei, ko kona ni kaoiia tabeman bwa a na tibwaua te bwai ae a reiakinna man iteraniba ni kabwarabwara Ana Boki Moomon ae e karikirakea aia koaua n te boki ae tabu.

te aikaon ibukin te reirei

Reirei te Reirei

Atuun te iteraniba n Ana Boki Moomon

Ana Boki Moomon e na kakorakora au onimaki iroun Iesu Kristo.

• Warekan te iteraniba ibukin Atuun Ana Boki Moomon, e koreaki iroun Moronaai, e kona ni katauraoia kain te kiraati ni kamatebwaia ana Boki Moomon n te ririki aei. E na kanga rongorongo man atuun te iteraniba ni katamaroa aia kamatebwai? Tao ko kona ni korea teuana ke e raka riki te titiraki iaon te burakibooti—n aron Bukin tera iai inanon baira Ana Boki Moomon? ke E kanga ni kaokoro ana Booki Moomon ma booki ake tabeua?—ao kaoiia kain te Kiraati bwa a na kakaei reeke n aia tai n rinanoa atuun te iteraniba i bon irouia ke n te ikatoatoa. A kona ngkanne n tibwauai namakin ake a roko irouia. Ko kona naba ni kaungaia kain te Kiraati bwa a na maroorooakin aia kainibaire ibukin kamatebwaian Ana Boki Moomon n te ririki aei. Te katooto, tera ae a na taraia? A na kanga n reirei mai iroun te Tamnei ae Raoiroi n aia tai ni kamatebwai?

• Teuana mai ibuakon te kantaninga ae kakawaki man Ana Boki Moomon e koreaki iaon atuun te iteraniba: n anai nanoia “Iutaia ma Tientaire bwa Iesu bon te Kristo.” Ko kona ni kaoiia kain te Kiraati bwa ana tibwauai mwakoro man Ana Boki Moomon ake a tia ni kakorakora aia onimaki iroun Iesu Kristo (a kona naba ni wareki tabeua mwakoro ake a karinanaki ni Bwaai n Ibuobuoki Riki Tabeua”). A kona kain te kiraati ni wareki tabeua kiibu aikai ma temanna are e tekateka irarikiia ao n tibwauaia bwa e kanga Ana Boki Moomon n roota aia kakoaua iroun te Tia Kamaiu.

Kabwarabwaraan ana Boki Moomon

Ana Boki Moomon e kona ni buokiira ni “kaania te Atua.”

• Te kabwarabwara Ibukin Ana Boki Moomon e katauraoi iango aika a kakawaki ibukiia taan wareware bwa a na mataata iai. Kain am kiraati a kona ni buokaki man warekan nako te kabwarabwara ao katebenakoan teniua nakon nimaua iango aika a na ibuobuoki n tibwauaia ma temanna ae ai tibwa ana moan tai ni wareka Ana Boki Moomon. Kaain te kiraati a kona n tibwauai baike a kunei. A bae naba n tangiria ni kan karaoa te kaotioti iaon kabwarabwaraan ana Boki Moomon nakon temanna. Tamnei ake a kaotaki ni “Bwaai n Ibuobuoki Riki Tabeua” a kona naba n ibuobuoki.

• Tabeman kain te kiraati iai aia taneiai aika a na kamatoaa koauan ana taeka Iotebwa Timiti: “E na kaania riki te Atua te aomata ngkana e iri nanon taian reirei ake a taekinaki inanona [ana Boki Moomon] nakon taian boki riki tabeua.” Ko kona n tuangiia kain te kiraati bwa a na tibwauaia bwa e kanga maiuakinan koaua ake a reiakin man ana Boki Moomn ni buokiia ni kaaniaki riki ma te Atua. Ko kona naba ni kaoiia kain te kiraati bwa a na tibwauai aia reke nakon titiraki aika teniua aikai ake e anga BeretitentiRussell M. Nelson: “Te moan, tera aron maium ngkana arona bwa akea ana Boki Moomon? Te kauoua, tera ae ko na aki ataia? Ao te kateniua, tera ae e na akea iroum?” (“Ana Boki Moomon: Tera Aron Maium Ngkana Akea?” (Ensign ke Riaona, Nob. 2017, 61).

• Iai kain te kiraati ae wareki mwakoro ake n Ana Boki Moomon ake a kaoti aara aika kaokoro ibukin te babaire ni kamaiu, are e kaotaki n Nakomai, Iriirai—-Ibukiia Aomata n Tatabemaniia ao Utu? Ngkana iai, kaoiia bwa a na tibwauai baike a reiakin.

“Aia Koaua Taan kakoaua aika Teniman”; “Aia Koaua Taan Kakoaua aika Waniman”

Ti bane ni kona n riki bwa taan kakoaua n Ana Boki Moomon.

• Kamatebwaian aia koaua Taan Kakoaua aika teniman ao Taan Kakoaua aika Waniman bwa a na kona ni kakorakorai aia Koaua kain te kiraati ao ni buokiia n iango bwa a na kanga ni kaota oin aia koaua. Ko kona n tuangiia iteran te kairaki bwa a na wareka “Aia Koaua Taan Kakoaua aika Teniman” ao iterana are teuana bwa a na wareka “Aia Koaua Taan Kakoaua aika Waniman” ao n tibwauai bwaai ake a katikaki iai nanoia ke kabwarabwarai bwaai ake a raka irouia. Tera kaokoron aia Koaua naaka uoman aikai? Tera ae a titebo iai? Tera ae ti reiakinna mai irouia taan kakoaua aikai n tibwauan ara koaua? Ni waakina te marooro bwa bukin tera a kakawaki Taan Kakoaua aika Teniman, ko kona n tibwaua ana taeka Beretitenti Dallin H. Oaks ke ana kakoaua John Whitmer inanon “Bwaai n Ibuobuoki Riki Tabeua,” ke ko kona ni kaota te witeo “Aia Koaua Taan Kakoaua aika Teniman” (ChurchofJesusChrist.org).

Iotebwa Timiti ao Taan Kakoaua Aika Teniman a ikotaki n tataro

Taan Kakoaua Aika Teniman aikai a kaota aia koaua n Ana Boki Moomon.

“Ana Koaua te Burabeti ae Iotebwa Timiti”

Iotebwa Timiti bon ana tabonibai te Atua ni karokoan Ana Boki Moomon.

• Tao a bon mwaatai kain te kiraati n aron bwaai aika a riki ake a kabwarabwaraaki n “Ana Koaua te Burabeti ae Iotebwa Timiti,” ma tao ko kona ni buokiia ni kakaei iango aika a boou. Te katooto, ko kona ni kaoiia bwa a na karinani bwaai aika riki aika kakawaki n rongorongon Iotebwa Timiti. Tera ae ti kona ni karekea man ana taneiai ni kaotan kakawakin Ana Boki Moomon are e anga te Uea?

• Te anene n taromauri “An Angel from on High” (Hymns, no. 13) e taekina rokon Ana Boki Moomon. Imwin anenean ke ongoraeakinan te anene n taromauri aei, a kona kain te kiraati ni kakaei taeka n “Ana Koaua te Burabeti ae Iotebwa Timiti” ae booraoi ke ae kamatoai taekana n te anene.

te aikon ibukin te kamatebwai

Kaungaa te kamatebwai n te Mweenga

Ni kaungaia kain te kiraati bwa a na wareka 1 Nibwaai 1-7; kaoiia bwa a na tarai iango ke koaua aika a tia ni buokaki man aia kaangaanga ni mauia ngkai—n aron te katooto, te kaangaanga n te utu ke n te nakoa n te Ekaretia.

te aikaon ibukin bwaai ni ibuobuoki

Bwaai n Ibuobuoki Riki Tabeua

Mwakoron Ana Boki Moomon aika a kakoaua Iesu Kristo.

• Motiaea 3: 5-8

• Aramwa 5:48; 7:10–13

• Ereman 5:12

• 3 Nibwaai 9:13-18; 11:6-14

• Moronaai 10:32–33

Tamnei n rongorongon Ana Boki Moomon iaon ChurchofJesusChrist.org.

• “Kabwarabwaraan Ana Boki Moomon”

• “Tera ana Boki Moomon? Te 60 n Teekan Kabwarabwaraana”

• “Karaki man Ana Boki Moomon”

Ibukin riki ae mwaiti, taraa te Ikotaki n Tamnei ibukin ana Boki Moomon iaon ChurchofJesusChrist.org ke n te Gospel Library app.

Kakawakiia Taan Kakoaua Aika Teniman.

E kabwarabwaraa Beretitenti Dallin H. Oaks bwa bukin tera e nang korakora Aia Koaua Taan Kakoaua Aika Teniman:

“Aia koaua Taan Kakoaua Aika Teniman n Ana Boki Moomon e tei i moa ma te korakora. Ngaiia ni kateniman iai aia tai ao iai bukina ae mwaiti bwa a na kakewea aia koaua ngkana arona bwa e boni kewe, ke ni kakewea are a tia n taekinna ngkana arona bwa e bon aki eti. E bon ataaki, bwa ibukin taian aki booraoi n iango ke bakantang n irekereke ma taan kairiiri n te ekareti ake tabeman, ni kabane taan kakoaua aika teniman a kabaneaki man Ana Ekaretia Iesu Kristo Ibukiia Aika Itiaki ni Boong aika Kaitira imwain koron waniua te ririki imwin boreetian aia koaua. Naaka teniman aikai a maenako kawaia, ao akea nanoia ae e titebo ni boutokan te kouru ae ibuobuokaki ae raba. Ma ni karokoa tokin maiuia—n te tai ae maan 12 nakon 50 te ririki imwiin kabaneakiia man te Ekaretia—akea temanna mai ibuakoia taan kakoaua aikai ae e tionako man ana koaua ae boreetiaki ke n taekina te bwai ae e na karekea te nanokokoraki man koauana” (“The Witness: Martin Harris,” Ensign, Meei 1999, 36).

Ana kakoaua John Whitmer.

John Whitmer, temanna mai ibuakoia Taan Kakoaua aika Waniman n Ana Boki Moomon are e taku bwa: “I tuai man ongo ae temanna mai ibuakoia taan kakoaua aika teniman aikai ao ake waniman a bon tei matoa ni kakoauai bwaai ake a tia ni kaotia. … Arara a butanako nako aon aaba nako, neewe ma aomata bwa te kaotioti ae tabu aei bon mai iroun te Atua. Ao e na kakoroa bukin ana babaire te Atua n reitaki ma te katanoata are e taekinaki” (in Noel B. Reynold, ed., Book of Mormon Authorship Revisited: The Evidence for Ancient Origins [1997], 55–56).

Kanakoraoan Ara Anga reirei

Ukera oin Kairam mai iroun te Tamnei. Irarikin are taraakin kabwarabwara aikai bwa taian kairi aika ko riai n irii, ni kabonganai ni karekei iango ke ni waakina oin kairam iroun te Tamnei ibukin kainnanoia naake ko reireiniia.