Te Banna ibukin te Anga Reirei

Inanon te bwai ni ibuobuoki aio, ko na kunei teniua aekakin banna aika a okioki inanon taian kabwarabwara: kaungaa te tibwatibwa, reirei te reirei, ao kaungaa te kamatebwai n te mweenga. N am tai n reirei, tabeua iteran te baana aio e na reitinako n reita are imwina ke e na riki n te kawai ae kaokoro. Te katooto, iangoia bwa te tibwatibwa bon te tai n reirei te reirei, ao reiakinan te reirei e na irekereke ma te kakao n tibwatibwa. N arona naba, kaungakin te kamatebwai n te mweenga e konaa n riki inanon tain te marooro. Kariaia ni karaoi bitaki tabeua nakon te banna aio bwa e na riki nakon are e kantaningaaki, ririra ana wirikiriki te Tamnei ni kakoroa nanon kainnanoia te koraki ake ko reireiniia.

Kaungaa te Tibwatibwa

Inanon tain te kiraati, kaoiia kaain te kiraati n tibwauai aia nonoori ao tataneiai ake a tia n reke irouia inanon wiiki aika a nako n aia tai ni kamatebwai i bon irouia ao n te utu ao karaoi nanon baike a reiakin. Buokiia kaain te kiraati n oota bwa baike a reiakin i bon irouia itinanikun te kiraati e kakawaki. Oin rairakiia e na roko tiaki man tii reiakinaia n te Tabati ma bon rinanon baike a riki nakoia ni katoa bong. Ngkana kaain te kiraati a ongo baike a tia n rinanoi n aia tataneiai i bon imarenaia, a na bon tangiria ni kan karekea te aeka n taneiai naba anne i bon irouia.

E na bon aki reke ae ni kabane a bane ni wareka te mwakoro ibukin te reirei teuana, ao tao tabeman ake a warekia tao a na aki rangi ni mwengaraoi n tibwatibwa. Taraia bwa kaain te kiraati ni kabane a namakina ae iai bonganaia n te kiraati, e ngae ngke iai ke akea te bwai ae a kan tibwauaia.

Reirei te Reirei

Ngkoe ao kaain am kiraati kam na katurua ami iango iaon te reirei–koauan te euangkerio ae akea tokina–are e kuneaki man taekan koroboki aika tabu ake a baireaki. N am tai ni maroroakina te reirei man koroboki aika tabu, tera taian kibu, taeka ake a taekinaki, taneiai, titiraki, ao bwai ni ibuobuoki riki tabeua ake ko na tibwauai? Ko na kangaa ni kabonganai bwaai ni ibuobuoki aikai ni buokiia kaain te kiraati ni kunei ao ni mataata n reirein te euangkerio? Ko na kangaa ni kaungaia kaain te kiraati ni korei mwiin ao ni mwakuri iaon iango ao kairi ake a karekei?

Kaungaa te Kamatebwai n te Mweenga

Ni banen te reirei, anaa tabeua te tai n rinanon marooro ake ibukin te wiiki ae e na roko. Iangoia bwa ko na kangaa n kaungai nanoia kaain te kiraati n reitanako aia kamatebwai n Ana Boki Moomon ni mweengaia, i bon irouia ao ma aia utu.