te aine e taetae n te kiraati

Kabonganaakin Nakomai, Iriirai—Ibukin Te Reirei n Tabati

Katauraoi n Anga Reirei n te Reirei n Tabati

Te kamatebwai ibon iroum ao te utu n te mweenga e na riki bwa te ne ni botaki ibukin reiakinan te euangkerio. E koaua aio nakoim ao nakoia ake ko reireiniia. N am tai ni katauraoi n anga reirei, moanna man karekean oin am taneiai man koroboki aika tabu. Te kabanea ni kakawaki ni katauraoakim e na riki ngkana ko ukeuke inanon koroboki aika tabu ao ni karekea ana wirikiriki te Tamnei ae Raoiroi.

Nakomai, Iriirai—Ibukiia Aomata n Tatabemaniia ao Utu bon te bwai ae kakawaki ni mwakoron am kamatebwai ibon iroum ao am katauraoi n anga reirei. E na buokiko ni kananoa mataatam ni kabwarabwaraan taian koaua iaon reirei ake a kuneaki inanon koroboki aika tabu. E na anganiko naba te konaa ni kaira nanoia ao ni kaoiia kaain te kiraati ni kabongana Nakomai, Iriirai—Ibukiia Aomata n Tatabemaniia ao Utu ni karababa aron aia kamatebwai i bon irouia ao aia utu ni koroboki aika tabu (te buoka ni karaoan aei, taraa “Iango ibukin Kaungakin te Kamatebwai n Koroboki aika Tabu Ibon Iroum ao Utu” n te bwai n ibuobuoki aei). Ngkana ko karaoia, uringa n taraa aia namakin kaain te kiraati ake tao ni waakin aia utu e na aki rangi ni boutokaki te kamatebwai ni koroboki aika tabu n te utu ao bootakin te utu n te tairiki.

N tain am katauraoi, iango ao namakin a na roko iroum ibukiia te koraki ake ko reireiniia, a na kangaa reirei ni koroboki aika tabu a na kakabwaiai maiuia, ao ko na kangaa ni karekea inanoia bwa a na kunei reirei akanne ngkana a kamatebwaii koroboki aika tabu i bon irouia.

Iango Ibukin te Anga Reirei

N am tai ni katauraoi n anga reirei, tao a na konaa n reke kairiiri riki man te tamnei man norakin waaki ni anga reirei n te kabwarabwara ni bwaai n ibuobuoki aikai. Ko na tai iangoi iango aikai bwa kawai n anga reirei ma bon tii bwaai ake a na kairiko ni karekea oin am iango mai iroun te Tamnei. Ko ataiia kaain am kiraati, ao are ko na kinaiia riki n ae tamaroa inanon ami tai ni waaki n reirei n te kiraati. Te Uea e kinaiia, ao E na kairiko ni kawai aika tamaroa ni buokiia kaain te kiraati ni kateitei iaon reirein te euangkerio are a karaoia ni mweengaia.

A mwaiti bwaai n ibuobuoki aika a tauraoi ibukim inanon am tai ni katauraoi, ni ikotaki ma iango inanon Nakomai, Iriirai—Ibukiia Aomata n Tatabemaniia ao Utu ao ana Maekatin te Ekaretia. Ibukin rongorongo riki iaon baikai ao tabeua bwaai n ibuobuoki, taraa te mwakoro ae atunaki n “Bwaai n Ibuobuoki Riki Tabeua” inanon te boki aei.

Bwaai aika Ko na Uringii

• Te mweenga bon te tabo ae tamaroa ibukin reiakinan te euangkerio. Bon iai bukinam, ngkai te tia reirei ngkoe ni boutokaia, kaungaia, ao ni katea iaoia kaain te kiraati, reiakinan te euangkerio n te mweenga.

• Rairakiia kaain te kiraati nakon Ana euangkerio Iesu Kristo e na nene ngkana a mataata ao ni karaoi nanon reirei aika koaua. Kaungaia bwa a na korei mwiin ao ni mwakuri iaon namakin ake a karekei mai iroun te Tamnei ae Raoiroi.

• Te anga reirei e riaon ae tii te kabwarabwara, ma e bon riaon naba ae ko tii kaira te marooro. Mwakoron bukinam bon te kaungaia bwa a na ira buakon waakin te marooro are e karika te mataata ao e boboto iaon koroboki aika tabu. Ko konaa naba n tibwauai am nonoori aika a reke mai iroun te Tamnei ngkana ko kamatebwai ni koroboki aika tabu.

• Tamara are i Karawa e tangiria bwa ko na tokanikai ngkai tabem bwa te tia reirei ngkoe. E a tia ni katauraoi bwaai n ibuobuoki ibukim, n ikotaki ma te bootaki ni kauntira irouia tia reirei. N tain te bootaki aei kam konaa n ongo taeka n reirei imarenaia tia reirei iaon taian kakaewenako ake kam kaaitarai. Kam konaa naba ni marooro ao ni katai karaoan reirei n aron ana anga reirei Kristo.

• E rin raoi te reirei irouia aomata ngkana e reke aia tai n anga reirei. Tabetai ni waakin te reirei, iangoia ni kariaia kaain te kiraati, ni ikotaki ma te roronrikirake, bwa a na anga reirei ni mwakoron teuana te reirei. Kabotoa te iango aio iaon kainnanoia ao aia konabwai kaain te kiraati. Ngkana ko kaoa temanna kaain te kiraati bwa e na anga reirei, anaa te tai ni buoka teuaane ke neienne ni katauraoi imwain te tai ni kabonganai iango ake a kuneaki n te bwai ni ibuobuoki aio ao inanon Nakomai, Iriirai—Ibukiia Aomata n Tatabemaniia ao Utu. Uringa bwa ngkai ko weteaki bwa te tia reirei, ko na bon bukintaeka nakon bwaai ake a reiakinaki n te kiraati.

• Te boki ni ibuobuoki aio iai inanona kabwarabwaraan reirei ni katoa wiiki n te ririki ma tiaki ibukin uoua te Tabati are e nako iai te maungatabu ni kabuta. N Tabati tabeua are e aki boo iai te Reirei n Tabati ibukina bwa e booaki te maungatabu n te titeiki ke ibukina riki tabeua, utu nako a riai n reitaanako warekan Ana Boki Moomon ni mweengaia n aron bairean te wareware are e kabwarabwaraaki inanon Nakomai, Iriirai—Ibukiia Aomata n Tatabemaniia ao Utu. N taraia bwa e na ira waakin te tai am kiraati n te Reirei n Tabati, ko konaa n rineia bwa ko na riaoa te reirei anne ke ko na bootii uoua te reirei. N totokoa reken te aki mataata, kaain te beretitentii n te Reirei n Tabati a na kaongoia taan reirei ibukin taian bitaki aikai tabeua te bong imwaina.