Boni Ngkoe te Tia Reirei n Ana Ekaretia Iesu Kristo

Ko a tia ni weteaki mai iroun te Uea bwa ko na reireiniia Natina n ana kawai te Tia Kamaiu. Ko a tia ni kaokoroaki nakon te wewete aei man te kariaia n Ana nakoanibong ae tabu. E ngae ngke bon tiaki ngkoe te tia reirei ae mwaatai, ngkana ko maiuna te itiaki, tataro ni katoa bong, ao ni kamatebwaia koroboki aika tabu, Tamara are i Karawa e na anganiko namakinan ao mwakan te Tamnei ae Raoiroi ni buokiko n tokanikai (taraa 2 Nibwaai 33:1).

Koraki ake ko anganaki bwa ko na tararuaiia bon natin Tamara are i Karawa, ao E ataia bwa tera ae a kainnanoia ao e kangaa aron buokaia. Rinanon te Tamnei ae Raoiroi, te Uea e na kairiko n am tai ni katauraoi ao inanon am tai n anga reirei. E na kaotia nakoim bwa tera ae ko na riai n taekinna ao tera ae ko na riai ni karaoia (taraa 2 Nibwaai 32:5).

Oin te kaantaninga n reirein te euangkerio ao kamatebwaiana bon bitakin te maiu. Am kouru ngkai te tia reirei bon te buokiia te koraki ake ko reireiniia ni karaoa aia kabanea ni konaa n rairaki nakon ana euangkerio Iesu Kristo–te kekeiaki are e reitinako itinanikun tain te kiraati. Kaoiia te koraki ake ko reireiniia bwa a na ira buakon reiakinan bwaai ake ko kona ni karaoi ao Ana reirei Iesu Kristo ao ni mwakuriia te bwai are a reiakinna. Kaungaia bwa a na karaoa aia kamatebwai ibon irouia ke aia utu itinanikun te kiraati are bon ngaia oin aia kamatebwai n te euangkerio. N aia tai nikaraoa te mwakuri n kamatebwai ibon irouiia ao aia utu, ana bon kaoa te Tamnei inanon maeuia, ao bon te Tamnei are e karika te rairaki ni koaua. Bwaai ni kabane ake ko karaoi ngkai tabem bwa te tia reirei ngkoe e na riai ni kairiia nakon te kaantaninga ae tabu aei.

Anga reirei iaon reirein Ana euangkerio Iesu Kristo ae kaokaki n aron are a kuneaki ni koroboki aika tabu ao n aia taeka burabeti ni bong aikai. Reirei aika itiaki—akea tokiia, koaua aika aki bibitaki ake a reiakinaki iroun te Atua ao Ana toro—a kaoa te Tamnei ao iai mwakana ni bita te maiu.

Te wewete n anga reirei bon te onimakinaki ae kakanato, ao e na bon rereke n tabetai te nano ae ko a aki konaa ni karaoia. Ma uringa bwa Tamam are i Karawa ngaia ae e weteiko ao E na bon aki kitaniko. Aio bon ana mwakuri te Uea, ao ngkana kam beku “ma nanomi, marurungimi, ami iango ao korakorami ni kabane” (RB 4:2), E na karababa ami konabwai, bwaai ake iroumi, ao tarena, ao ami mwakuri a na kakabaiai mauia te koraki ake kam reireiniia.