“Tianuare 6–12. 1 Nibwaai 1–7: ‘N na Nako ao N na Karaoi,’” Nakomai, Iriirai—Ibukin te Reirei n Tabati: Ana Boki Moomon 2020 (2020)
“Tianuare 6–12. 1 Nibwaai 1–7,” Nakomai, Iriirai—Ibukin te Reirei n Tabati: 2020
Riai e Mwanaga Irarikin Tari ae Uraura, iroun Gary Smith
Tianuare 6–12
1 Nibwaai 1–7
“N na Nako ao N na Karaoi”
Am katauraoi ngkai te tia reirei n te Reirei n Tabati e moanaki ma oin am kamatebwai ni booki aika tabu. Kabanea am iango nako iai ao taui mwiin wirikiriki n te tamnei aika ko karekei. Nakomai, Iriirai—Ibukiia Aomata n Tatabemaniia ao Utu e kona ni kakorakoraa am kamatebwai.
Korei Am Namakin
Kaungaa te Tibwatibwa
A mwaiti mai ibuakoia kaain ami kiraati aika a tataneiai ma 1 Nibwaai 1–7, ma ni katoa tai ngkana ti wareki booki aika tabu, ti kona n reiakin koaua aika a kaineti nakon ara kaangaanga aika ngkai. Ni moanakin am marooro, ko kona n titirakiniia kaain te kiraati te bwai ae a reiakinna ke aika a kauringaki iai ngkana a kamatebwai n te wiiki aei.
Reirei te Reirei
Booki aika Tabu bon bwaai aika moan te kakawaki.
-
Teuana te rongorongo ae kinaaki n Ana Boki Moomon bon kakawakin ana taeka te Atua. E kona n riki aei bwa te rongorongo ae tamaroa n tibwauaki ngkana a moana kamatebwaian Ana Boki Moomon kaain am kiraati. Ko kona ni moanna n tuangiia kaain te kiraati ni kabane bwa a na rinea te mwakoro man 1 Nibwaai 1; 3–6 ao ni waekoa ni warekia, n tarai kawai ae a tia ana taeka te Atua ni kakabwaiaia ana utu Riaai n ae waekoa ke n ae waeremwe. (A kona kaain te kiraati ni karekei kakabwaia man karaoan te waaki ni kakukurei aei inanon kurubu aika uarereke.) Imwina ao kaoiia n tatabemaniia bwa a na tibwaua te bwai ae a kunea. Tera ae a reireiniira rongorongo aikai iaon kakawakin booki aika tabu?
-
Teuana mai ibuakon am kouru n tabem ae te tia reirei bwa ko na kaungaia Aomata n tatabemaniia ao utu bwa a na kamatebwaia te euangkerio itinanikun te kiraati. Tao ko kona ni kaoiia kaain te kiraati bwa a na ukoukoria bwa e kanga Riaai ni kamatebwai bwaatua aika buraati (taraa 1 Nibwaai 5:10–19), ao ngkanne ko kona n titirakiniia titiraki n aron aikai: Tera ana iango Riaai nakon booki aika tabu? Tera te bwai ae e kunea n aron kakawakiia? A kona naba kaain te kiraati n ukoukora ana rongorongo Unimwaane Richard G. Scott “Mwaakan Booki Aika Tabu” (Ensign ke Riaona, Nob. 2011, 6–8) ke wareka te mwakoro man te rongorongo aei inanon “Bwaai n Reirei riki Tabeua.” Ti na kanga ni kamwakura ana reirei Unimwaane Scott ngkana ti kamatebwaia Ana Boki Moomon n te ririki aei?
-
Kam kona n anenea te anene iaon taekan booki aika tabu, n te kiraati, n aron “As I Search the Holy Scriptures” (Anene n Taromauri, nambwa 277). Ko kona ngkanne ni kaoiia kaain te kiraati n tibwauaia bwa e kanga aia kamatebwai ni booki aika tabu ni kakabwaia maiuia. A kona naba n tibwauaia bwa a kanga booki aika tabu ni kaungaia bwa a na “nakon te … Atua … bwa a na kamaiuaki” (1 Nibwaai 6:4).
Ti kona ni karekei ara koaua ngkana ti kamarau nanora.
-
E kinaaki Nibwaai ibukin ana onimaki ae korakora iroun te Uea, ma e na kona n ibuobuoki ibukiia kaain te kiraati bwa a na ataia bwa e mwakuri ni karekea ana koaua—n te kawai naba are ti bane ni karaoia. Tao a kona kaain te kiraati ni kinaa n 1 Nibwaai 2:16–19 te bwai ae karaoia Nibwaai bwa e na kona ni karekea ana kakoaua. A kona naba n rinanoi kiibu 11–14 n iangoia bwa bukin tera aki karekea aia kakoaua Reimwan ao Remuera. E kona n riki bwa te tai ae tamaroa ni kaoiia kaain te kiraati bwa a na tibwauaia bwa a kanga ni karekei aia koaua.
-
N tabetai ti tangiria ni karekea ara atatai aika a kamimi bwa ti aonga ni karekei ke ni kakorakorai ara koaua. Ma a kaitibo Reimwan ao Remuera ma te anera, ao aia onimaki e taraa n rootaki teutana. Tera ae a kona kaain te kiraati n reiakinna man te atatai aei, ae kabwarabwaraaki n 1 Nibwaai 3:28–31, iaon te bwai ae kakorakorai ara koaua? (taraa naba 1 Nibwaai 2:16). Iangoia n tibwaua te karaki mairoun Beretitenti Thomas B. Lee inanon “Bwaai n Ibuobuoki Riki Tabeua.” Tera ae ti kona ni karaoia ni kateimatoa ara koaua bwa e na korakora?
E na katauraoa te kawai te Atua ibukira ni karaoa Ana kantaninga.
-
Ana atatai natin Riaai mwaane n 1 Nibwaai 3–4 e na taraa n rangin n onoti, ma a mwaiti mai ibuakora aika a tia n rinanon are ngkana ti ira ana kantaninga te Atua e ngae ngke e taraa ni kaangaanga. Ngkana kaain te kiraati a wareka 1 Nibwaai 3–4 n te wiiki aei, tera koaua aika a kunei aika e kauringiia n oin aia taneiai? Tao ko kona n titirakiniia kaain te kiraati bwa a na tibwauai kiibu aika a reiakin koaua aikai, ao kaoiia bwa a na tibwauai aia atatai. A kanga koaua aikai ni buokiira ngkana ti kantaningaaki mairoun te Atua bwa ti na karaoa te bwai teuana ae taraa ni kaangaanga?
-
Ko kona n bwenaua te kiraati inanon teniua te kurubu ao n anganiia kurubu n tatabemaniia bwa a na kamatebwaia teuana te kakatai ni karekei bwaatua aikai mairoun Rabwan (taraa 1 Nibwaai 3:9–21; 1 Nibwaai 3:22–31; 4:1–4; ao 1 Nibwaai 4:5–38). Ngkanne ko kona ni kaoiia kurubu aikai n tatabemaniia bwa a na tibwauaia bwa tera ae reireiniira kakatai aikai iaon kakoroan nanon ana kantaninga te Uea. A kanga katooto aikai ni kaineti nakon oin ara kekeiaki ni karaoa ana kantaninga te Atua?
A Onrake n te Kimwareirei, iroun Walter Rane
Kaungaa te Kamatebwai n te Mweenga
Ni kaungaia kaain te kiraati bwa a na wareka 1 Nibwaai 8–10, ko na bae n tibwaua te rongorongo mairoun Beretitenti Dieter F. Utchtdorf: “Ma taian katikitiki aika mwaiti ni kataia ni kairira nako, ti na kanga ni kabotoa ara taratara iaon te kukurei ae e rianako are e beritanaki nakoia aika onimaki? I kakoaua bwa e kona ni karekea te kaeka n te mii are e karekea te burabeti ngaa ririki n nako. Aran te burabeti bon Riaai, ao e tauaki mwiin miina n Ana Boki Moomon ae kakawaki ao e kamimi” (“Aine aika Teniman,” Ensign ke Riaona, Nob. 2017, 18–19).
Bwaai n Ibuobuoki Riki Tabeua
Witeo n Ana Boki Moomon.
Kakaai witeo aika a kaoti rongorongo man 1 Nibwaai 1–7 inanon te ikotaki n Tamnei ibukin ana Boki Moomon iaon ChurchofJesusChrist.org ke te Gospel Library app.
Iai mwaakan booki aika tabu aika korakora.
Unimwaane Richard G. Scott e kakoaua aron kakawakin booki aika tabu:
“Booki aika Tabu titebo ma bakete n taura aika a kaotai ara iango ao n anga te tabo ni kairi ao te kairiiri mai i eta. A kona n riki bwa te kiing ni kauka te kawai n ara reitaki ma Tamara are i Karawa ao Natina ae Tangiraki, Iesu Kristo.
“Booki aika tabu … a kona n riki bwa raao aika a kakaonimaki are a kona n reke n taabo ni kabane ao n te tai ae aki akaka. A tatauraoi n tainako ngkana a kainnanoaki. Kabonganakiia a katauraoa aan te koaua are e kona n namakinaki mai iroun te Tamnei ae Raoiroi. Reiakinan, iangoan, ukoukoran, ao kamatenanoan booki aika tabu titebo ma kanoakin taian kaebineti ma raoraom, bwaai aika a kakawaki, ao koaua aika a kona ni weteaki n te tai ae aki akaka, n taabo nako n te aonaaba. …
“Iangoakin te kibu man booki aika tabu e kona n riki bwa te kiing ni kauki kaotioti ao te kairi ao te kairiiri mairoun te Tamnei ae Raoiroi. A kona booki aika tabu ni karaua nanon te tamnei ae un, n anga te rau, te kantaninga, ao kaokan te onimaki n ana konabwai temanna n tokanikai iaon kakaewenako n te maiu. Iai korakoran mwaakaia ni katoki kaangaanga n te namakin ngkana iai aia onimaki iroun te Tia Kamaiu. A kona ni karaoi kamaiu aika a kawaekoaaki” (“Mwaakan Booki Aika Tabu,” Ensign ke Riaona, Nob. 2011, 6).
A riai ara koaua ni kabouaki ni katoabong.
Beretitenti Harold B. E reirei, “Te koaua are ko karekea n te bong aei e na aki riki bwa am koaua n te bong are imwina ma ti ngkana ko karaoa te bwai teuana ibukina” (Aia Reirei Beretitenti n te Ekaretia: Harold B. Lee [2000], 43).
Kanakoraoan Ara Anga reirei
Kabonganai karaki ao katooto n reirei taekan te euangkerio. A mwaiti koaua aika akea tokiia inanon booki aika tabu aika a reiakinaki rinanon taneiai ke karaki ake inanona. Ngkana ko katauraoi n anga reirei, iangoi taneiai aika ko a tia ni karekei ake a na kona ni karekea riki te kauoua ni kaotioti nakon taian rongorongo inanon booki aika tabu ao reirei aika a kamatatai. (Taraa Reirei n ana Kawai te Tia Kamaiu, 22.)