“Tianuare 6–12. 1 Nibwaai 1–7: ‘N na nako ao N na karaoi,’” Nakomai, Iriirai—Ibukiia Aomata n Tatabemaniia ao Utu: Ana Boki Moomon 2020 (2020)
“Tianuare 6–12. 1 Nibwaai 1–7,” Nakomai, Iriirai—Ibukiia Aomata n Tatabemaniia ao Utu: 2020
Riai e Mwanaga Irarikin Tari ae Uraura, iroun Gary Smith
Tianuare 6–12
1 Nibwaai 1–7
“N na nako ao N na karaoi”
Nibwaai e korei “taekan ana bwai te Atua.” (1 Nibwaai 6:3). Ngkai ko kamatebwaia ana rekooti Nibwaai, kakauongo raoi nakon ana bwai te Atua ake ko kunei, riki te wirikiriki mairoun te Tamnei.
Korea am Namakin
Ana Boki Moomon e moanaki ma rongorongon te utu ae koaua ngke a rinanon kaangaanga aika a koaua. E riki inanon 600 IK, ma iai bwaai n taekan te rongorongo aei are e taneiai n riki nakoia utu n te bong aei. Te utu aei a maeka n te aonaaba ae rikirake te buakaka iai, ma te Uea e berita nakoia bwa ngkana a iriiria, E na kairiia nakon te kamanoaki. Inanona kawaia iai taai aika a nakoraoi iai ao aika a nakobuaka; a karekei kakabwaia aika a korakora ao kakai, ma iai naba aia tai n uneaki ao ni ngurengure. E aki bati ni kakaoti ni koroboki aika a tabu rongorongo aika a rangin abwabwaki n taekan te utu ae kataia ni maiuakina te euangkerio: te karo e korakai ni kaunga te onimaki inanon ana utu, nati mwaane a baireia ngkana a na kakoaua tamaia, te tina e maaku ibukin kamanoaia natina, ao te tari are e roko irouna te bakantang ao te un—ao n tabetai a ikabwarabure imarenaia. Ma iaoia ni kabane, iai te mwaaka ae koaua n irakin te banna ni katoto n te onimaki are te utu aei—e ngae ngke aki kororaoi—ma e kaotaki.
Iango ibukin Kamatebwaian Koroboki aika Tabu i bon Iroum
Koroboki aika a tabu a bon rangi ni kakaawaki.
Taian moan kibu aika onoua man Ana Boki Moomon iai inanona taeka aika a bati man booki aika tabu, koroboki aika a tabu, ao ana taeka te Uea. Ngkai ko wareki 1 Nibwaai 1–6, tera ae ko reiakinaki iai ibukin tera ana taeka te Atua “a korakora bonganaia”? (1 Nibwaai 5:21). Tera ae ko reireiaki iai man kibu aikai ni koroboki aika a tabu? Tera ae ko kunea bwa e kaunga riki nanom n ukoukori koroboki aika a tabu ma te motinnano ae korakora riki?
Taraa naba “Scriptures Legacy” (video, ChurchofJesusChrist.org).
Ana Boki Moomon e Reiakina taekan Iesu Kristo.
Koaua nakon te kantaninga are e taekinaki n atun te moan iteraniba—ni kakoaua nakoia ni kabane bwa Iesu bon te Kristo—ana boki Moomon e kaukaki man miin Riaai ae kamimi iroun te Tia Kamaiu. Tera ae ko ataia iroun Iesu Kristo man are e nooria Riaai? Tera tabeua ana mwakuri te Tia Kamaiu ae “korakora man kamimi” inanon maium? (1 Nibwaai 1:14).
Ngkana I ukoukora ao n onimakina te Uea, E kona ni kabebetea nanou.
E ngae ngke Reimwan, Remuera, ao Nibwaai a bane n ikawai rake n te utu ae ti teuana ao titebo aroia, iai te kaokoro n aroia ni kaeka nakon ana kairi tamaia are i karawa are e karekea tamaia n te mwakoro aei. Ngkai ko wareka 1 Nibwaai 2, taraia ngkana ko kona ni kina bwa bukin tera e bebete nanon Nibwaai ao tarina aki. Ko na bae naba n iangoa am kaeka nakon kairiiri mairoun te Uea, tao rinanon te Tamnei ae Raoiroi ke Ana burabeti. Ningai ae ko a tia n namakinna iai bwa e kamaraua nanom te Uea bwa ko aonga n tauraoi riki ni butimwaai Ana kairi ao ana reirei?
Te Atua e na katauraoa te kawai ibukiu ni kakoroan nanon Ana kantaninga.
Ngke e tua te Uea nakon Riaai ma ana utu bwa a na karekei bwaatua koora mairoun Raban, E aki anga te kaetieti ae bwarabwara raoi iaon kakoroan nanon te tua aei. Aio n tabetai e koaua iaon tuua ake tabeua ke kaotioti nakoim ake ti karekei mairoun te Atua, ao aio are e kairiira nakon te namakin are te bwai are e tangiria e “kaangaanga karaoana” (1 Nibwaai 3:5). Tera ae e a tia ni kaunga nanom n ana kaeka Nibwaai nakon ana tua te Uea, are e kuneaki n 1 Nibwaai 3:7, 15–16? Iai te bwai ae ko namakinna iai bwa ko na “nako ao ni karaoia”?
Ngkai ko kamatebwai 1 Nibwaai 1–7, taratarai kawai ake e a tia ni katauraoi te Atua ibukin Riaai ao ana utu. E kanga ni karaoa aei ibukim?
Taara naba Taeka n Rabakau 3:5–6; 1 Nibwaai 17:3; “Ongeaba,” Atuun Rongorongo ibukin te Euangkerio, topics.ChurchofJesusChrist.org; te ikotaki n Tamnei ibukin ana Boki Moomon iaon ChurchofJesusChrist.org ke the Gospel Library app.
1 Nibwaai 4:1–3; 5:1–8; 7:6–21
Uringakin ana mwakuri te Atua e kona n anganai te onimaki n ongeaba nakon Ana tua.
Ngkana a namakinna ae kaanga a ngurengure Reimwan ao Remuera, iai n tainako Nibwaai ao Riaai irarikiia ni kaungaia ao ni kauringiia. Ngkana ko namakina ae kaanga ko ngurengure, warekan ana taeka Nibwaai ao Riaai a kona n anga reirei ao nonoori aika a kakaawaki. A kanga Nibwaai ao Riaai ni kataia ni buokiia kaain te utu ni kakorakoraa aia onimaki iroun te Atua? (taraa 1 Nibwai 4:1–3; 5:1–8; 7:6–21). Tera ae ko reiakinna man aia banna ni katoto ake a kona ni buokiko imwiina ngkana ko ngurengure ke ni kaitara?
Iango ibukin Kamatebwai ni Koroboki aika Tabu n te Utu ao Bootakin te Utu n te Tairiki
Inanon warekan koroboki aika tabu ma am utu, e kona ni buokiko te Tamnei n ataia bwa tera taian reirei ae a riai ni kamatataaki ao ni maroroakinaki bwa e aonga ni buoka kainnanoia am utu. Aikai tabeua iango.
1 Nibwaai 1–7
Rinanon 1 Nibwaai 1–7, ko kona ni kaungaia kaain am utu bwa a na tarai aroia kaain ana utu Riaai ma Tiera. Tera ae ti kona n reiakinna man aroaro aikai are e kona ni buokiia ara utu?
Nibwaai ma ana utu a kabonganai aia taeka burabeti.
1 Nibwaai 2:20
Te reirei n 1 Nibwaai 2:20 e okioki n tabetai rinanon Ana Boki Moomon. A na kanga kain am utu ni karaoi inanon maiuia ngkai a kamatebwai n ikotaki n ana Boki Moomon n te ririki aei? Tao ko kona ni karaoa te boutita n ikotaki ni kaoti ana berita te Uea n te kibu aei ao ni katekea ni mweengam. E kona n riki bwa te kauring n marooroakinna ni katoa tai bwa aanga raa ake ti nora iai te Uea n katokanikaia am utu ngkana koa tia ni kawakin Ana tua nako. Iangoia ni korei taneiai aikai iaon te boutita.
1 Nibwaai 2:11–13; 3:5–7
Tao am utu a na buokaki man ataakin te kaokoro n aia kaeka Reimwan ao Remuera nakon ana kairi te Uea ao ana kaeka Nibwaai. Tera ae ti kona n reiakinna man 1 Nibwaai 2:11–13; 3:5–7 ibukin te ngurengure? Tera kakabwaia aika a na roko ngkana ti kamwakura te onimaki?
1 Nibwaai 3:19–20; 5:10–22; 6
Kiibu aikai a kona ni kaungaia am utu ni kawakin rekooti aika kakaawaki ni bwaai aika kam rinanona inanon maiumi. Tao ko kona ni waaki ma te tieno n te utu, ae titebo ma ana rekooti Nibwaai ao Riaai are a kawakinna ni korei taekan rongorongoia aia utu. Tera ae ko kona ni karinna n rongorongon am utu?
1 Nibwaai 7:19–21
Tera ae kaungai nanora n ana banna ni katoto Nibwaai man kiibu aikai? A kanga ara utu ni kakabwaiaki ngkana ti “tii kabwarabure” imarenara?
Ibukin iango riki tabeua iaon reiakinaia ataei, taraa te kabwarabwara n te wiiki aei inanon Nakomai, Iriirai—Ibukiia Utu.
Kanakoraoan Ara Anga reirei
Reitinako Kamatebwai korobooki aika tabu. Teuana te kiing n te reirei ae nano n te mweenga bon karekean te tai n reirei ae reitinako ibukiia am utu. Beretitenti Thomas S. Monson e reirei, “Reirei ike ko reireiaki baika a mwaiti n te tai ae uarereke e aki rangi n nakoraoi ni kabotauaki ma te wareware ni katoa bong ao karekean reirei man koroboki aika a tabu inanon maiura” (“Be Your Best Self,” Ensign ke Riaona, Meei 2009, 68).
I Ongeaba ni Bwanaan te Tamnei, iroun Walter Rane