“Tianuare 6–12. 1 Nibwaai 1–7: ‘N na nako ao N na karaoi,’” Nakomai, Iriirai—Ibukin te Moanrinan: Ana Boki Moomon 2020 (2020)
“Tianuare 6–12. 1 Nibwaai 1–7,” Nakomai, Iriirai—Ibukin te Moanrinan:2020
Riai e Mwanaga Irarikin Tari ae Uraura, iroun Gary Smith
Tianuare 6–12
1 Nibwaai 1–7
“N na nako ao N na karaoi”
Ngkai ko wareka 1 Nibwaai 1–7, iangoi kiibu, taneiai, titiraki, ao bwaai n ibuobuoki tabeua ake ko namakinna bwa ko na kabonganai n reireiniia ataei. Waaki ake a koreaki ikai a kona ni kabonganaaki ibukiia ataei aika a ikawai ao aika a uarereke.
Korea am Namakin
Kaungaa te tibwatibwa
Tabeman ataein am kiraati a bae n tia n ongo taekan ke ni wareka te bwai are a rinanona ana utu Nibwaai n 1 Nibwaai 1–7. Kaoiia bwa a na tibwauai bwaai ake a atai. Ngkana e karako aia atatai n te bwai are e rinanona Nibwaai, anganiia aia tai ni banen te reirei bwa a na tibwaua te bwai are a reiakinna.
Reirei te Reirei: Ataei aika a Uarereke
I kainnanoa ae bon au koaua.
Nibwaai e a kakoauai ana taeka tamana ibukina bwa iai nanona ni kan ataia i bon irouna ao e tataro nakon te Uea. Buokiia ataei bwa a na reiakinaki man ana banna ni katooto.
Waaki ni Kakukurei aika a Kona ni Karaoaki
-
Uota te bwaoki ae e in matana ma tamnein te Tia Kamaiu inanona, ao katoaia ataei anganiia aia tai bwa a na bon nooria bwa tera are inanon te bwaoki. Tuangiia ataei bwa Nibwaai e tangira oin Ana kakoaua bwa te Uea e a tia n tua nakoia ana utu bwa a na kiitana Ierutarem. Tuangiia ataei bwa a na kakauongo nakon te bwai are e karaoia Nibwaai ni karekean ana koaua ngkai ko wareka 1 Nibwaai 2:16. Kakoaua bwa n aron ae ti na riai ni kauka te bwaoki n nooria bwa tera kanoana, ti bane n riai ni butiia te Atua bwa e na anganiira oin ara kakoaua.
-
Uotii tamnei ke bwaai ake a tei ibukin te bwai teuana are e tei ibukin bwaai ake a kan karekei iai aia koaua ataei n aron, tamnein Iesu Kristo, ana Boki Moomon, ke tamnein te burabeti ae maiu. Kaoiia ataei bwa a na rinei tamnei ke bwaai ake a na tibwaua iai aia koaua ma kaain te kiraati.
Te Atua e na buokai ni kawakin Ana tua.
Ko na kanga ni kabonganai rongorongo aikai ni buokiia ataei n ataia bwa te Atua e buokiira ni kawakin Ana tua, riki ngkana e taraa ni kaangaanga te ongeaba nako iai?
Waaki ni Kakukurei aika a Kona ni Karaoaki
-
Wareka 1 Nibwaai 2:2–4 nakoia ataei, ao katekei tamnei tabeua n tamnein bwaai ake a na kona n anai Riaai ma ana utu nakon te rereua, n aron aia umwa n rianna, burangketi, kaini katebe ao kanoan katebe. Tuangiia bwa a na iangoia bwa e na tera aia namakin ngkana arona bwa a na kiitani mweengaia n nakon te rereua. Tera ae e tuangiira te Uea bwa ti na karaoia n ongeaba nakoina n te bong aei?
-
Buokiia ataei bwa a na karani ao ni korei tamnei iaon beebwa n iteranibaan te waaki n te wiiki aei; ngkanne tuangiia bwa a na kabonganai tamnei ake iaon te beebwa ni kakimototoa rongorongon Nibwaai ma tarina ni karekean bwaatua aika buraati.(taraa 1 Nibwaai 3–4). Te kuna “Nephi’s Courage” (Aia Boki n Anene Ataei, 120–21) ao “Mwakoro 4: Bwaatua aika Koora” (Karaki man ana Boki Moomon, 8–12; taraa naba te witeo ae irekereke ma ngaia iaon ChurchofJesusChrist.org) e kona ni buokiko ni karakina te karaki aei.
-
Kabonganai tamnei 103–15 n te Te Boki n Tamnei n te Euangkerio ni buokiia ataei n iangoi bwaai ake e tua te Uea bwa ti na karaoi. Ti kanga ni kakabwaiaaki ngkana ti ongeaba Irouna? Buokiia ni katamaroai meetera ake a kabongana are e kangai N na nako ao N na karaoi baike e a tia n tua te Uea (1 Nibwaai 3:7). Ikotaki ni kaokioki kiibu aikai tabeua te tai.
Koroboki aika tabu bon kaubwai aika a rangi n tamaroa.
Ko na kanga ni buokiia ataei bwa a na kaungaa nooran kakaawakin koroboki aika tabu, ke ana taeka te Atua?
Waaki ni Kakukurei aika a Kona ni Karaoaki
-
Kaota nakoia ataei te bwai teuana (ke tamnein te bwai teuana) ae rangi ni kakaawaki iroum. Taekina aron kawakinana iroum ke tararuaana. Kabwarabwaraa anne nakoia ana utu Riaai, koroboki aika tabu e rangi ni kakaawaki, n ai aron te kaubwai.
-
Kaoiia ataei bwa a na buokiko n taekinna ke ni karaoia n te kaotioti te bwai are a karaoia Nibwaai ma tarina ni karekean bwaatua aika buraati: a mwananga n te kawai ae abwabwaki, a anganako aia koora ma aia tirewa, ao a karabaia n te nangananga ni kamanoi maiuia. Wareka 1 Nibwaai 5:21. Bukin tera a rangi ni kakaawaki koroboki aika tabu irouia ana utu Riaai? Ti na kanga ni kawakin koroboki aika tabu n ai aron te kaubwai?
Riaai e Karekei Bwaatua aika Buraati, iroun Clark Kelley Price
Reirei te Reirei: Ataei aika a Ikawai
I kona ni karekea oin au koaua.
Tera ae ko reiakinna man ana banna ni katooto Nibwaai ni karekean oin am koaua? Ko na kanga ni buokiia ataei bwa a na reiakinaki man ana banna ni katooto?
Waaki ni Kakukurei aika a Kona ni Karaoaki
-
Tuangiia ataei bwa a na kakaea 1 Nibwaai 2:16, 19 bwa a na nooria bwa e kanga Nibwaai ni karekea ana kakoaua n ana taeka tamana. Kaoiia bwa a na korea te bwai are e karaoia Nibwaai iaon mwakoro ni kai ke bwaai riki tabeua ao imwiina a na katea te bwai teuana man bwaai are e na tei ibukin aron bwaai akanne ni buokiira ni katea ara koaua.
-
Tuangiia ataei bwa ko kanga ni karekea am koaua n te euangkerio. Kaoiia naba bwa a na tibwaua naba are a tia n rinanona, ao kaungaia bwa a na ira ana banna ni katooto Nibwaai ni kateimatoa katean aia koaua. E kanga karekean oin ara koaua ni buokiira?
I kona ni kaeka ma te onimaki nakon are e tua te Uea.
Karikirakean te anua ae aekakin Nibwaai e na buokiia iai ngkana e tuangiia te Uea bwa a na karaoi bwaai aika a taraa ni kaangaanga.
Waaki ni Kakukurei aika a Kona ni Karaoaki
-
Bwenaua te kiraati inanon uoua te kurubu. Kaoa teuana te kurubu bwa e na wareka aia kaeka Reimwan ao Remuera nakon Riaai (taraa 1 Nibwaai 3:2–5) ao te kurubu are teuana bwa a na wareka ana kaeka Nibwaai (taraa 1 Nibwaai 3:2–4, 7). Kaoa te ataei bwa e na riki bwa aongkoa Riaai ao e na tuangiia ataei ake tabeman bwa aongkoa a na oki nako Ierutarem n anai bwaatua aika buraati. Kaoi taian kurubu bwa a na kaeka n oin aia taeka ngke tao ngaiia aomata ake a tia ni warekaki taekaia. Tera bwaai tabeua aika e a tia n tuangira te Atua bwa ti na karaoi? Ti na kanga n riki n ai aron Nibwaai?
-
Ni kabane anenea te kuna ae taekan te ongeaba, n aron “Nephi’s Courage” ke “Keep the Commandments” (Aia Boki n Anene Ataei, 120–21, 146–47), ao tuangiia ataei bwa a na kakauongo nakon kibuntaeka ake a reirei aroia bwa a na kanga ni kaeka nakon te Uea.
Te Tamnei ae Raoiroi e na kairai ngkai I ukoukora ana kantaninga te Uea.
Nibwaai e ira te Tamnei, “n aki atai moa baika [e] riai ni karaoi” (1 Nibwaai 4:6). Ko na kanga ni buokiia ataei ake ko reireiniia bwa a na ukoukora ana kairi te Tamnei ae Raoiroi?
Waaki ni Kakukurei aika a Kona ni Karaoaki
-
Kaoiia ataei bwa a na kaotioti n rongorongon Nibwaai ma tarina ngke a kataia n anai bwaatua aika buraati (taraa 1 Nibwaai 3–4). Kaoa te ataei bwa e na wareka 1 Nibwaai 4:6, ao tuangiia kaain te kiraati bwa a na kakauongo nakon te bwai are e karaoia Nibwaai bwa aonga ni kona n tokanikai.
-
Tibwauaia ma ataei tabeua katooto ni bwaai ake e tangiria te Atua bwa a na karaoia, n aron ae a na iraorao ma temanna n te reirei are taraa n akea raoraona, kabwara ana bure tarina ke mwanena, ke taekina te koaua imwiin karaoan te kairua. Titirakiniia ataei bwa a na tibwauaia bwa e kanga te Tamnei ae Raoiroi ni konaa ni buokiia inanon taai akanne. Ti na kanga ni kaoa te Tamnei ae Raoiroi bwa e na buokiira n ongeaba nakon te Atua?
Kaungaa te Kamatebwai n te Mweenga
Kaoiia ataei bwa a na tibwaua te bwai ae a rinanona ma aia utu ngke a kakabwaiaaki ibukin kawakinan tuua. Kaungaia bwa a na tuangiia kaain aia utu bwa a na tibwaua ae aekakin naba anne.
Kanakoraoan Ara Anga reirei
Buokiia ataei aika a rikirake n reireiaki man koroboki aika tabu. Ni buokiia ataei bwa a na reiakinaki man koroboki aika tabu, kabanea am tai iaon te kibu teuana ke te koroboki ke bon boton raoi te kibuntaeka. Ko na bae ni kaoiia ataei bwa a na teirake ke ni katei baia ngkana a ongo te taeka ke te kibuntaeka. (Taraa naba Reirei n Ana Kawai te Uea, 21.)