“Tianuare 20-26. 1 Nibwaai 11–15: ‘Otanganiko n te Raoiroi ma Mwaakan te Atua,’” Nakomai, Iriirai—Ibukin te Moanrinan: Ana Boki Moomon 2020 (2020)
“Tianuare 20-26. 1 Nibwaai 11-15,” Otanganiko n te Raoiroi ma Mwaakan te Atua,’” Nakomai, Iriirai—Ibukin te Moanrinan: Ana Boki Moomon 2020
E Karewe nakon Karewerewe Nako, iroun Miguel Angel Gonzalez Romero
Tianuare 20-26
1 Nibwaai 11-15
“Otanganiko n te Raoiroi ma Mwakaan te Atua”
Wareka 1 Nibwaai 11–15 ma ataei ake ko reireiniia n am iango, ao korei namakin ake ko karekei.
Korea Am Namakin
Kaungaa te Tibwatibwa
Kaota tamnein miin Riaai n te kai ni kamaiu, ao kaoiia ataei bwa a na tibwaua te bwai are a uringnga are a reiakinna ibukin te mii ni burabeti aei man te wiiki ae nako. Titirakiniia ngkana iai te bwai ae a reiakinna ae boou iaona imwin te tai ae e nako.
Reirei te Reirei: Ataei aika a Uarereke
Tamara are i Karawa e kanakoa Iesu Kristo nako aon te aba ibukin ae E tangiriira.
Nibwaai e noora maiun ao ana mwakuri Iesu Kristo n te mii ni burabeti. Iangoa te bwai ae a na konaa ataei n am kiraati n reiakinna iaon te Tia Kamaiu man 1 Nibwaai 11.
Waaki ni Kakukurei aika a Kona ni Karaoaki
-
Anganiia ataei n tatabemaniia te tamnei are e kaota teuana te bwai ae e riki man maiun te Tia Kamaiu are e a kaman taekinaki n 1 Nibwaai 11:20, 24, 27, 31, and 33 (taraa Te Boki n Tamnei n te Euangkerio, nambwa. 30, 35, 39, 42, 57). Ngkana ko wareki kiibu aikai, tuangiia ataei bwa a na tabeki aia tamnei ngkana a ongo te kiibu are titebo ma ngaia.
-
Tuangiia ataei tabeua bwaai ake e reiakinna Nibwaai bwa e na karaoi Iesu Kristo n ana tai ni maiu (taraa 1 Nibwaai 11:16–33), ao kaotii nakoia tabeua tamnein baike a karaoaki akanne (taraa, n ai aron, Te Boki n Tamnei n te Euangkerio, nambwa. 41, 46, 47, 49, 56, 57, 58, 59). Tibwaua te bwai are e a tia ni karaoia te Tia Kamaiu ibukim. Kaoti tamnei ni buokiia ataei bwa a na iangoi kawai are ti kona ni tibwaua ana tangira te Atua (taraa Te Boki n Tamnei n te Euangkerio, nambwa. 109, 110, 115).
E reirei koaua aika a kakawaki Ana Boki Moomon.
Bukin tera ko kakaitau ibukin Ana Boki Moomon? Iangoia bwa ko na kanga n tibwaua am koaua n Ana Boki Moomon ma ataei.
Waaki ni Kakukurei aika a Kona ni Karaoaki
-
Korea te tamnei iaon te burakiboti, ao kaoiia ataei bwa a na bita ke ni kamaunai mwakoron te tamnei tabeua bwa e aonga ni kaokoro taraana. Buokiia ni mataata bwa, n aron te tamnei aei, tabeua bwaai inanon te Baibwara a bitaki ao a anaaki inanon te tai teuana ma teuana. Wareka mwakoron 1 Nibwaai 13:40 are e reireia bwa Ana Boki Moomon (are e taekinna Nibwaai bwa “taian kabanea n rongorongo”) e buokiira n atai “bwaai aika a mataata ma ni kakawaki” ake a tia ni bua man te Baibwara.
-
Karabai tamnei ake a tei ibukin te koaua n te eunangkerio are a kamatataaki n Ana Boki Moomon ni katobibia te ruu, n aron te bwabetito, te toa, ao te mangauti. Kaoiia ataei bwa a na kakaei tamnei aikai. Kabwarabwaraa bwa Ana Boki Moomon e a manga kaoki koaua n te euangkerio ake a tia ni bua.
Ana taeka te Atua e anganai te korakora.
Ko na kanga ni kabongana bannan te kai te biti n reireiniia ataei ibukin te korakora, te kamanomano, ao mwaakan ana taeka te Atua?
Waaki ni Kakukurei aika a Kona ni Karaoaki
-
Kaota tamnein miin Riaai, n aron teuana are n te kabwarabwara man te wiiki ae nako n Nakomai, Iriirai—Ibukiia Aomata n Tatabemaniia ao Utu. Kaoiia ataei bwa a na kakaea te kai te biti n te tamnei, ao buokiia bwa a na ataia bwa e kanga tauakin ana taeka te Atua ni kamanoira (taraa 1 Nibwaai 15:23–24). Anganiia ataei te bwai ae titebo ma te kai te biti bwa a na taua, n aron te bwaibu ke te kai, inanon am tai ni wareka kibu 24. Ti na kunea iaa ana taeka te Atua? Tera ae ti kona ni karaoia bwa ti na karika ana taeka te Atua bwa irian maiura ni katoa bong?
-
Buokiia ataei bwa a na karana ao ni katiaa iteranibaan te waaki n te wiiki aei. Ti na kanga n “taua ni kamatoa” ana taeka te Atua? (1 Nibwaai 15:24).
Reirei te Reirei: Ataei aika a Ikawai
Tamara are i Karawa e kanakoa Iesu Kristo nako aon te aba ibukina bwa E tangiriira.
E mii ni burabeti Nibwaai n te aro are e kakoaua n ana kainibaire Tamara are i Karawa ibukira, ao Iesu Kristo bon oin raoi te mii ni burabeti anne.
Waaki ni Kakukurei aika a Kona ni Karaoaki
-
Kaoiia ataei bwa a na katoai taian kibu man 1 Nibwaai 11:16–33 ma tamnei ake a kaota kabwarabwaraan te kibu (n aron 1 Nibwaai 11:20, 24, 27, 29, 31, 33; taraa Te Boki n Tamnei n te Euangkerio, nambwa. 30, 35, 38, 39, 42, 57). Tera ae a reiakinna ataei ibukin Kristo man kiibu ao tamnei aikai?
-
Titirakiniia ataei bwa bukin tera Iesu Kristo e rangi ni kakawaki irouiia. Anenea te anene ibukin te Tia Kamaiu, n aron ae “He Sent His Son” (Aia Boki n Anene Ataei, 34-35), ao titirakiniia ataei bwa tera ae e reireiia te anene aei ibukin Iesu. Kaoiia ataei bwa a na karekea te tai n te wiiki aei ni iangoa Iesu Kristo ao n tibwaua te bwai ae e riki nakoia nakon te wiiki ae e na roko n te kiraati.
Ana Boki Moomon iai inanona ana euangkerio Iesu Kristo.
Ana Boki Moomon e reirei koaua aika kakawaki.
Tera ae a ataia ataei iaon Kitanakin te Koaua? Ko na kanga ni buokiia bwa a na mataata ni kakawakin Ana Boki Moomon ni kaokan koaua n te euangkerio ake a bua n tain Kitanakin te Koaua?
Waaki ni Kakukurei aika a Kona ni Karaoaki
-
Kaai ni wareka, 1 Nibwaai 13:26–29 ao kaoiia ataei bwa a na nooria bwa tera ae riki ngkana aomata akea irouia “bwaai aika a mataata ma ni kakawaki” aika koauan te euangkerio. E kanga te Uea ni kaoki koaua ake a tia ni bua? (taraa kiibu 35–36, 40). Kaoiia ataei bwa a na tibwaua aia koaua n taian koaua ake a tia n reiakini man Ana Boki Moomon, ke tibwaua oin am koaua.
-
Kaota te witeo “Ana Boki Moomon—te Boki mai iroun te Atua” (ChurchofJesusChrist.org) ni kaotia bwa e kanga te Baibwara ao Ana Boki Moomon n uaia n reiakina te koaua. Bukin tera e na ibuobuoki ae e na raka iaon temanna te tia kakoaua? Korea te mwake ae mronron iaon te burakibooti, ao korea arana ae te Baibwara, ao kaoiia ataei n tatabemaniia bwa a na korea te rain ae eeti ae e rinanon te mwake are e mronron ni kaotia bwa reirei inanon te Baibwara a kona n rairaki n aanga aika mwaiti ngkana bon tii te Baibwara n ti ngaia. Kamaunai taian rain, ao korea te kauoua ni mwake ae e mronron ao korea arana ae Ana Boki Moomon. Kaoa te teei bwa e na korea te rain ae eeti are e na rinanon mwaake akana uoua akanne ni kaotia bwa bon ti teuana te kawai n raira te euangkerio ngkana te Baibwara ao Ana Boki Moomon a uaia ni kabonganaaki.
-
Buokiia ataei bwa a na kamatenanoa taekan te onimaki te kawaniua.
Ana taeka te Atua e anganai te korakora n totokoa te kariiri.
Ko na kanga ni buokiia ataei ake ko reireiniia ni kakorakorai aia koaua ni koroboki aika tabu? Iangoa te titiraki aei ngkana ko wareka 1 Nibwaai 15:23–25, ao kabonganai waaki ni mwakuri n aron ae inano ni karaka riki am iango.
Waaki ni Kakukurei aika a Kona ni Karaoaki
-
Tuangiia ataei bwa a na manga kauringa te mii ni burabeti n te kai ni kamaiu (taraa 1 Nibwaai 8; 11). Tera ae e tukiia aomata bwa a na roko n te kai? Tera ae e buokiia bwa a na roko iai? Kaoiia ataei bwa a na wareka 1 Nibwaai 15:23–25. E kanga te kai te biti ni buokiia aomata n rinanon bubun te nangi roo? E kanga warekan ana taeka te Atua ni buokiira n totokoa te kariiri ao te rotongitong ni boong aikai?
-
Katiaa kanoan te iteraniba ibukin te waaki ni kakukurei ma ataei. Inanon aia tai ni karaoia, tuangiia bwa a na marooroakin tabeua kariiri ake a kaaitarai ataei. A na kanga n uringnga bwa a na taua te kai ae te biti ni katoa bong? Anenea “The Iron Rod” (Anene n Taromauri, nambwa. 274) bwa kanoan naba te waaki ni kakukurei aio.
Kaungaa te Kamatebwai n te Mweenga
Kaungaiia ataei bwa a na kaotia nakoia aia utu “te kai ae te biti” are a karaoia man te iteraniba n te waaki ni kakukurei ao tibwauaia bwa a na kanga n taua te kai te biti man warekan koroboki aika tabu.
Kanakoraoan Ara Anga Reirei
Kabonganai korobanna ni kairiia ake a kan reirei. Ngkana ko reireiia ataei karaki man koroboki aika tabu, kakaei aanga are e na kona ni buokiia ni katamneia. Ko kona ni kabonganai tamnei, witeo, taore ake ko kataetaei, kunnikai ni kaotioti, ao a bati riki.