Ritembwa 30–Tianuare 5

Iteraniba ni kabwarabwara Ana Boki Moomon

“Kakoauan Taekan Iesu Kristo”

Moana am katauraoi n anga reirei man warekan Ana Boki Moomon atuun te iteraniba ao kabwarabwaraan; aia koaua Taan Kakoaua aika Teniman, Taan Kakoaua aika Waniman, ao te Burabeti Iotebwa Timiti; ao “Te Kabwarabwara ae Kimototo Ibukin Ana Boki Moomon.” Iangoia bwa ko na kangaa ni kaunga nanoia ataei n reirei man Ana Boki Moomon.

Korea Am Namakin

Kaungaa te Tibwatibwa

Kaoiia ataei bwa a na tibwauai karaki ake a tai man Ana Boki Moomon, ni kabonganai tamnei 67-86 n te Boki n Tamnei n te Euangkerio ke tamnei tabeua ake iai iroum.

Reirei te Reirei: Ataei aika a Uarereke

Atuun te iteraniba n Ana Boki Moomon

Ana Boki Moomon e kona ni buokai ni karekea au koaua iroun Iesu Kristo.

Buokiia ataei n nooria bwa te kantaninga n Ana Boki Moomon e na anga te kakoaua iaon Iesu Kristo.

Waaki ni Kakukurei aika Konaa ni Karaoaki

• Taua ieta Ana Boki Moomon, ao kaota ae koreaki, Kakoauan Taekan Iesu Kristo. Karekea aia tai ataei temanna imwin temanna bwa a na taekina, “Kakoauan Taekan Iesu Kristo.” Tuangiia ataei ni kakimototoa bwa e kanga Ana Boki Moomon n tia ni kakorakoraa am onimaki iroun Iesu Kristo.

• Karakina te rongorongo man Ana Boki Moomon ae e reirei aron Iesu Kristo, n aron rongorongon Tamuera te Reimwanaite n taetae ni burabeti ibukin Kristo (taraa Ereman 14-16), e kakabwaiaia ataei te tia Kamaiu (taraa 3 Nibwaai 17), ke Tarin Iareta ngke e noora Iesu Kristo (taraa Ita 2–3). Karaki man taian mwakoro n Ana Boki Moomon (ao te witeo are aekan ae iaon ChurchofJesusChrist.org) e na ibuobuoki. Kaotia nakoia ataei tera ae ti reiakinna n aron Iesu man karaki aikai. Tuangiia ae e na korakora te bwai ae a na reiakinna iaon Iesu Kristo man Ana Boki Moomon n te ririki aei.

• Anenei anene aika kaineti ma Ana Boki Moomon, n aron “Karaki Man ana Boki Moomon” (Aia Boki n Anene Ataei, 118). Anene ni kabane ao kaokiokia, kariaia ataei bwa a na reke aia tai n taua tamnein te Tia Kamaiu temanna imwin temanna inanon tain te anene.

Kabwarabwaraan ana Boki Moomon

Ana Boki Moomon bon ngaia kingin ara ekaretia.

Beretitenti Thomas S. Monson e kabwarabwaraa: “Ngkana [Ana Boki Moomon] e koaua—ao I kaotia ma te koaua bwa e bon koaua—ngkanne Iotebwa Timiti bon ana burabeti … , Ana Ekaretia Iesu Kristo ibukiia Aika Itiaki ni Boong aika Kaitira bon ana Ekaretia te Uea iaon te aba, ao ana nakoanibonga te Atua ae mimitong e a tia ni kaokaki” (“Mwaakan ana Boki Moomon,” Ensign ke Riaona, Meei 2017, 86–87).

Waaki ni Kakukurei aika a Kona ni Karaoaki

• Wareka nakoia ataei te rongorongo mai iroun Iotebwa Timiti n te iteraniba ni kabwarabwaraan Ana Boki Moomon: “Ana Boki Moomon bon [ngaia] kingin ara ekaretia.” Kabwarabwaraa bwa n aron te kititoun ae e taua ni kamatoa te aake te mataroa ae karaoaki etana n te aro ae mron raoi, ara koaua n Ana Boki Moomon e kamatoa ao ni kakorakora ara koaua ibukin bwaai riki tabeua, n aron Iotebwa Timiti ao te euangkerio.

• Kaoa ana karo temanna te ataei bwa e na tibwauaia bwa e kanga ni karekea ana koaua man Ana Boki Moomon. Wareware ma ataei n te kakao are e reke ni kabanean kabwarabwaraan Ana Boki Moomon, ao buokiia ni katea kain bwaai ake a kona ni karaoi bwa aonga ni karekea aia koaua.

“Ana kakoaua te Burabeti ae Iotebwa Timiti”

Ti karekea Ana Boki Moomon man mwakaan te Atua.

Ana koaua Iotebwa Timiti e kona ni buokiia ataei ni mataata bwa tera oin te kantaninga mairoun te Atua n Ana Boki Moomon.

Waaki ni Kakukurei aika Konaa ni Karaoaki

• Taekinna nakoia ataei ni kakimototoa Karakinan moan rokon Ana Boki Moomon n aron are e kabwarabwaraaki n “Ana Kakoaua te Burabeti Iotebwa Timiti.” Ko kona naba ni kabongana “Mwakoro 1: Ti Kangaa ni Karekea Ana Boki Moomon” (Karaki man Ana Boki Moomon, 2-4, ke te tamnei ae e kairaki n ChurchofJesusChrist.org). Buokiia ataei ni katea kain te karaki tabeua te tai ngkai ko a manga warekia.

• Kaotia nakoia ataei tamnein koroboki man te bwaatua koora. Kabwarabwaraa bwa te Atua e buoka Iotebwa Timiti n rairii taian koroboki aikai nakon te taeka ae ti kona ni warekia ao ni mataata iai.

  

  Iotebwa Timiti e rairii taian banna ake a koreaki iaon bwaatua koora.

Reirei te Reirei: Ataei aika i Kawai

Atuun te iteraniba n Ana Boki Moomon

Ana Boki Moomon e buokai ni karekea te onimaki iroun Iesu Kristo.

Uringnga bwa te kantaninga ibukim n reiakinaia ataei iaon Ana Boki Moomon bwa ko na karikirakea aia onimaki iroun te Tia Kamaiu.

Waaki ni Kakukurei aika Kona ni Karaoaki

• Kamaenakoia ataei ni katoatoaia. Kaoiia ake a katoatoaki bwa a na wareka te kauoua ni barakaraba man atuun te iteraniba n Ana Boki Moomon, kakaea te bwai are e na tuangiia bwa tera ae e nanonaki bwa e na karaoia Ana Boki Moomon. Ngkanne kaoiia ake a katoatoaki bwa a na tibwauaia ma kaain te kiraati.

• Buokiia ataei bwa a na kakaea iaon te iteraniba are atuun te boki iai te mwakoro n taeka “anaakin nanoia Iutaia ma Tientaire bwa Iesu bon te Kristo.” E na kangaa Ana Boki Moomon n anai nanora bwa ti na ataa ae Iesu bon te Kristo? Kaoiia bwa a na tibwaua te karaki man Ana Boki Moomon are e a tia ni kakorakoraa aia onimaki iroun Kristo, ke tibwaua teuana mai iroum.

Kabwarabwaraan ana Boki Moomon

Ana Boki Moomon bon kingin ara ekaretia.

Karekean te koaua n Ana Boki Moomon e na buokiia ataei n ataia bwa ana Ekaretia Iesu Kristo Ibukia Aika Itiaki ni Boong aika Kaitira bon ana Ekaretia ni koaua te Atua.

Waaki ni Kakukurei aika a Kona ni Karaoaki

• Tuangiia ataei bwa a na iangoaia ae aongkoa ko tuai man ongo taekan Ana Boki Moomon mai mwaina. Kaoiia bwa a na mwakuri ma toaia ni iangoi kawai ae a na kona ni kabwarabwaraa nakoim bwa tera ao e roko mai iaa, ni kabonganai taekana aika kamatataaki man kabwarabwaraana. Anganiia te tai ake a kaitoatoaaki bwa a na reireiniko. Te tamnei Te Baibwara ao Ana Boki Moomon a Kakoaua ibukin Kristo (ChurchofJesusChrist.org) e kona naba ni ibuobuoki.

• Kaoa te tei bwa e na wareka ana rongorongo Iotebwa Timiti n te kaonoua ni barakaraba man te iteraniba ni kabwarabwaraan te boki. Ni kabonganaan waaki ni Kakukurei ibukin te wiiki aei, kabwarabwaraa bwa e kanga te kiititoun n taua te aake. Ni kaineti ma te kabanea ni barakaraba n te iteraniba ni kabwarabwaraan te boki, baikara bwaai tabeua ae ti atai inanon reken ara koaua ae e bon koaua Ana Boki Moomon?

“Aia Koaua Taan Kakoaua Aika Teniman”; “Aia Koaua Taan Kakoaua Aika Waniman”

I kona n riki bwa te tia kakoaua n Ana Boki Moomon.

Ko na kangaa ni buokiia ataei ni karekea ao n tibwaa aia koaua n Ana Boki Moomon?

Waaki ni Kakukurei aika a Kona ni Karaoaki

• Kaoiia ataei bwa a na kabwarabwaraa te bwai teuana ae a tia n nooria ae aki nooria kaain te kiraati. Kabwarabwaraa bwa Ana Boki Moomon iai inanona aia koaua 11 aomata irarikin Iotebwa Timiti are a noori bwaatua koora are e rairaki mai iai Ana Boki Moomon. Ni kabane wareka te kakoaua. Tera ae a tangiria taan kakoaua aikai bwa aomata nako a na ataia man aia koaua?

• Tuangiia ngkana iai mai buakoia ataei ae e tangiria n tibwauaia bwa e kanga n ataa Ana Boki Moomon bwa e koaua. Ni kabane wareka Moronaai 10: 3-5, ao kaoiia ataei bwa a na wareka Ana Boki Moomon n te ririki aei ao ni karekea ke ni kakorakoraa aia koaua bwa e bon koaua. Tuangiia ataei aron reken am koaua iaon Ana Boki Moomon.

Kaungaa te Kamatebwai n te Mweenga

Ngkana e riai, taraia bwa te teei temanna nakon temanna e na reke irouna Ana Boki Moomon, ao kaoiia bwa a na moana warekana i bon irouia ke ma aia utu.

Kanakoraoan Ara Anga reirei

Ukoukora oin am kaotioti. Irarikin ae ko na tarai kairan iango aikai bwa kawai n anga reirei ae ko na irii, kabonganai bwa bwaai ni kairan te iango are e na kawaekoa reken am kaotioti inanon am tai ni iangoi kainnanoia ataei ake ko na reireiniia.