Miin Riaai, iroun Steven Lloyd Neal

Tianuare 13-19

1 Nibwaai 8-10

“Roko ao Katoonga te Uaanikai”

I rarikin are ko nooriko ni miin Riaai, kataia nooriia ataei ake ko reireiniia. E kanga te mii ni burabeti aei ni kaineti nakoia?

Korea Am Namakin

Kaungaa te Tibwatibwa

Reitaki ma tabeman ataei imwain te kiraati ao tuangiia bwa a na iangoa te bwai are a tia n rinanona ke kiibu man koroboki aika tabu ake a tia ni buokiia n namakina ana tangira te Atua.

Reirei te Reirei: Ataei aika a Uarereke

1 Nibwaai 8:2, 5-34

Ana taeka te Atua e kairai nakon te Atua ao e buokai n namakina Ana tangira.

Ni miin ni burabeti Riaai, ti kaoaki bwa ti na karekea ana tangira te Atua, are e kabotauaki n te kai ao uaana. Ko na kanga ni buokiia ataei bwa a na ira nanon te kakao aei?

Waaki ni Kakukurei aika a Kona ni Karaoaki

• Kaoiia ataei bwa a na buokiko ni karakina rongorongon miin ni burabeti Riaai man 1 Nibwaai 8: 10-34. Ni buokiia ataei ni katamneia te karaki, ko kona ni kaota tamnein miin ni burabeti Riaai (taraa te kabwarabwara n te wiiki aei n Nakomai,Iriirai--Ibukiia Aomata n Tatabemaniia ao Utu) ke tamnei n “Mwakoro 6: Miin Riaai” (Karakin Ana Boki Moomon, 18-20, ke te witeo ae irekereke ma ngaia iaon ChurchofJesusChrist.org). Kakoaua raoi bwa a mataata ataei ae te kai te biti e tei ibukin ana taeka te Atua, are ti warekia ni koroboki aika tabu ao n ongo mai irouia burabeti aika maiu. Buokiia bwa a na ataia ae te kai e tei ibukin ana tangira te Atua ibukira.

• Uota te roobu bwa e na tei ibukin te kai te biti ni miin ni burabeti Riaai. Tuangiia ataei bwa a na taua ngkai ko kairiia ni katobibia te ruu nakon tamnein te kai. Buokiia bwa a na mataata ae ana taeka te Atua e kairiira ni kaniira Nakoina, n aron naba te roobu are e tei ibukin te kai te biti e kairiira nakon te kai. Ni kaotia ae te kai e tei ibukin ana tangira te Atua, ko kona ni kaotii tamnein bwaai ake e anganiira te Atua ni kaota Ana tangira ibukira, n aron te Tia Kamaiu, ara utu, ao te aonaaba ae e tamaroa.

• Uotii uaanikai ma tamnein te aati ae e kanimwaki nako iai. Anganiia ataei tatabeuta te uaanikai bwa a na katoonga ao titirakiniia ibukin te uaanikai ae a tatangiria. Kabwarabwaraa bwa te uaanikai ni miin ni burabeti Riaai bon te kabanea ni kangkang ae e bon tuai man katoonga, ao e kaona tamneina n te kimwareirei. N aron te uaanikai ae e karewerewe e anganiira te kukurei, ti na karekea te kukurei ngkana ti iriira Iesu ao ni manga maeka ma Tamara are i Karawa.

• Wareka 1 Nibwaai 8:12, ao kaoiia ataei bwa a na ongora raoi bwa tera ae e tangiria ni karaoia Riaai imwin katoongan te uaanikai. Anganiia ataei bwa a na ikaruoruo n riki bwa Riaai ni kaoiia tabeman bwa a na roko ao ni katoonga te uaanikai. Tera ae ti kona ni karaoia ni kaoiia tabeman ao n namakina te kakabwaia n te euangkerio ma ngaira?

1 Nibwaai 10:17, 19

E na kaota te koaua te Atua nakoiu ni mwakan te Tamnei ae Raoiroi.

Imwin ongoraana ni miin ni burabeti tamana, iai nanon Nibwaai ae e riai naba n reke iroura--ae te nano ni kan ataa te koaua i boun irouna.

Waaki ni Kakukurei aika a Kona ni Karaoaki

• Wareka 1 Nephi 10:19, ao kaoiia ataei bwa a na katei baia ngkana a ongo te taeka ae “a na kaotaki ana bwai te Atua aika raba ” ao “Te Tamnei ae Raoiroi.” Buokiia ataei bwa a na mataata n taekan te koroboki ae e tabu aei, are e reiakinna bwa te Tamnei ae Raoiroi e na buokiira n atai kaekaan ara titiraki. Ni buokiia ataei ni katamneia bwa tera ae nanonaki ibukin te koaua are “a na kaotaki ana bwai te Atua aika raba,” uota te burangketi ae e rukumaki ae inanona tamnein te Tia Kamaiu, ao tuangiia ataei bwa a na taakinna.

• Anenea te anene ae ibukin ukoran te koaua ma ataei, n aron ae “Search, Ponder, and Pray” (Aia Boki n Anene Ataei, 109). Kaotii tamnei ake a taekinaki taekaia n te anene ni buokiia ataei n uringa aron te Tamnei ae Raoiroi n reireiniira.

• Iangoia bwa ko na tibwaua te bwai are e a tia n reke iroum ngke e buokiko te Tamnei ae Raoiroi n atai koauan bwaai tabeua. Tuangiia ataei bwa e kanga te Tamnei ae Raoiroi n taetae nakoim.

Reirei te Reirei: Ataei aika a Ikawai

1 Nibwaai 8:2, 5–34

Ana taeka te Atua e kairai nakon te Atua ao e buokai n namakina Ana tangira.

Inanon aia tai ataein am kiraati n reiakina miin ni burabeti Riaai, kaungaia bwa a na kamatebwaia ana taeka te Atua ao n tibwaua ana tangira te Atua ma tabeman.

Waaki ni Kakukurei aika a Kona ni Karaoaki

• Inanon aia tai ataei ni warekii kiibu tabeua man 1 Nibwaai 8, kaoiia bwa a na kakaea kabwarabwaraana man kiibu aikai n tamnein miin ni burabeti Riaai (n aron are e kaotaki ni te kabwarabwara n te wiiki aei n Nakomai, Iriirai—Ibukiia Aomata n Tatabemaniia ao Utu). Ke kaoiia bwa a na korea tamnein kabwarabwaraan te bwai are a tia ni warekia iaon te burakiboti. Ngkanne buokiia ataei bwa a na kunea bwa tera kanikina ake n te mii ae a tei ibukina (taraa 1 Nibwaai 11:21–22; 12:16–18; 15:23–33, 36).

• Ngkana e kona, uota te mwakoro ni biti ke tabeua riki nakon te kiraati ao kaoiia ataei bwa a na kabwarabwaraa bwa aekakira teia ao baikara bwaai ae a kona ni kabonganaaki ibukina. E kanga ana taeka te Atua n riki bwa ai aron te kai te biti? Ti na kunea iaa ana taeka te Atua? Bukin tera bwa e rangi ni kakawaki te kai te biti ni miin Riaai?

  

  E kana uaan te kai ni kamaiu Riaai. Te Kai ni Kamaiu, iroun Marcus Alan Vincent

• Kaoiia ataei bwa a na koreia iaon te beebwa te bwai are e a tia n riki irouia ngke a buokaki n ana taeka te Atua n ataa te bwai ae a na karaoia ke e na buokiia bwa a na namakina ae a kaaniaki riki ma Tamaia are i Karawa. N aia tai n tibwaua te bwai are a a tia ni koreia, kaoiia bwa a na ninira aia beebwa ni karaoia bwa tein te kai. Ko kona ni katomatomai aia “kai” ni karikia bwa katotongan te kai te biti ni miin Riaai.

• Kaoiia tabeman ataei bwa a na bane ni wareka 1 Nibwaai 8:10–12 ao kabwarabwaraa tera are e nooria Riaai. Tuangiia tabeman bwa a na wareka 1 Nibwaai 11:20–23 ao kabwarabwaraa bwa tera are e nooria Nibwaai. Bukin tera te anera e kaota nakon Nibwaai Iesu te teei n reireinna taekan ana tangira te Atua? Ni buoka kaekaan te titiraki aio, kam na bane ni wareka Ioane 3:16 ke anenea te anene ibukin te Tia Kamaiu, n aron “He Sent His Son” (Aia Boki N Anene Ataei, 34–35). Tuangiia ataei bwa e kanga aron namakinan ana tangira Tamara are i Karawa ao Natina Iesu Kristo ni maium.

• Korea iaon te burakibooti: Tera ae ti reiakinna man ana katooto Riaai? Kaoiia ataei ni iangoa taekan miin ni burabeti Riaai ao korei kaeka aika a mwaiti n aron are a kona. Tuangiia bwa a na tibwaua aia reke ma kain te kiraati. Ngkanne tuangiia ataei bwa a na iangoa temanna are a na kona ni tibwaua te kukurei man te euangkerio ma ngaia.

1 Nibwaai 10:17–19; 11:1

E na kaota te koaua nakoiu te Atua man mwaakan te Tamnei ae Raoiroi.

Ngkana ti titirakina Tamara are i Karawa ma te onimaki, te koaua e na “kaotaki ana bwai te Atua aika raba [nakoira] ni Mwakan te Tamnei ae Raoiroi” (1 Nibwaai 10:19). Ko na kanga ni buokiia ataei ake ko reireiniia bwa a na mataata n te koaua aio?

Waaki ni Kakukurei aika a Kona ni Karaoaki

• Kaoiia ataei bwa a na marooro ibukin kawai ake a kona ni karekei ni kaekaan te titiraki. Kaungaiia ataei bwa a na wareka 1 Nibwaai 10:17–19 ao 11:1. Tera ae e na taekinna Nibwaai ngkana temanna e titirakinna bwa e na kanga ni karekea kaekaan te titiraki ibukin te euangkerio? E kanga te Atua n reireiniira rinanon te Tamnei ae Raoiroi? (taraa RB 8:2).

• Tuangiia ataei bwa a na maroroakina te tai are e buokiia iai te Tamnei ae Raoiroi n ataa koauan te bwai teuana. Tuangiia bwa a na iangoia bwa iai raoraoia teuanne ke neienne ae taku bwa e aki kona ni karekea te kaeka rinanon te Tamnei ae Raoiroi. Tera ae a kona n tibwauaia man 1 Nibwaai 10:17–19 ao 11:1 ni buoka raoraoia anne?

Kaungaa te kamatebwai n te mweenga

Kaungaiia ataei bwa a na kabongana iteranibaan te waaki n te wiiki aei n tibwauaia ma aia utu bwa tera ae a reiakinna man miin burabeti Riaai n te kai ni kamaiu.

Kanakoraoan Ara Anga reirei

A reiakinii bwaai ataei n aanga aika mwaiti. A kukurei ataei n reiakini bwaai n rinanon taneiai aika a kakaokoro. Kabonganai waaki ni kakukurei are e na buokiia ni kakamwakuri, ni kabonganai aia namakin, ao ni katai bwaai aika a boou. (Taraa Anga reirei n Ana Kawai te Tia Kamaiu, 25–26.)