li rey aj Benjamin naq kixtzoleb’ lix tenamit

Li xMinerva K. Teichert (1888–1976), Li raatin li rey aj Benjamin ki’aatinak sa’ xraqik xyu’am, 1935, oléo en masonite, 36 x 48 pulgadas. Museo de Arte, Universidad de Brigham Young

13–19 abril

Mosiah 1–3

“Taanumtaaq rik’ineb’ li rahok choq’ re li Dios ut chixjunileb’ li winq”

Wankeb’ k’iila na’leb’ sa’ Mosiah 1–3 li maare taawaj xseraq’inkil rik’in laa tzoleb’aal. Tijon re xk’ulb’al aab’eresinkil, re taanaw k’a’ruheb’ li na’leb’ li mas te’wanq xwankil choq’ reheb’ li tzolb’ileb’ aab’aan.

Xtz’iib’ankil li nakak’oxla

reetalil li wotzok

Xkanab’ankileb’ chi wotzok

Re xkanab’ankileb’ li komon sa’ li tzoleb’aal chi aatinak chirix li k’a’ru xe’xtzol xjuneseb’ malaj sa’ junkab’al sa’ Mosiah 1–3, ye reheb’ naq te’xwotz rik’in jalan chik kristiaan junaq raqal xe’reek’a naq naxtoch’eb’ xch’ool.

reetalil li k‘utuk

Xk’utb’al li tzol’leb’

Mosiah 2:1–9

Na’ajman ru xkawresinkil qib’ re xk’ulb’al li raatin li Dios.

• Jun na’leb’ re xtikib’ankil jun seraq’ chirix xkawresinkil qib’ chixk’ulb’al li raatin li Dios, a’an aatinak chirix k’a’ru taak’ulmanq wi naqakawresi qib’—malaj wi ink’a’ naqakawresi qib’—choq’ re k’a’aq chik re ru. Qayehaq, eb’ li komon sa’ li tzoleb’aal te’ruuq chixwotzb’al k’a’ru xe’xk’ul chirix naq xe’xkawresi rib’ malaj ink’a’ xe’xkawresi rib’ choq’ re li eskweel, malaj choq’ re jun trab’aaj, malaj choq’ re junaq chik k’anjel. Chirix naq xe’xwotz, naru taaye re lix yijach li tzoleb’aal naq te’ril ru Mosiah 2:1–9, ut te’xsik’ li k’a’aq re ru ke’xb’aanu lix tenamit li rey aj Benjamin re xkawresinkil rib’ chixk’ulb’al li raatin li Dios. Lix yijach chik te’ruuq chixsik’b’al sa’eb’ li raqal ajwi’ a’an li k’a’aq re ru kixb’aanu li rey aj Benjamin re xk’utb’al li k’a’ru nareek’a chirix li raatin li Dios, ut naq aajel ru xwotzb’al. Chirix a’an, patz’ re xkab’ichal li ch’uut naq te’xwotz lix na’leb’eb’. K’a’ru naqatzol sa’eb’ li raqal a’in li nokohe’xtenq’a chixk’ulb’al li raatin li Dios?

Mosiah 2:10–26

Naq nokok’anjelak chiruheb’ li qas qiitz’in, yooko ajwi’ chi k’anjelak chiru li Dios.

• Li rey aj Benjamin kixk’ut rik’in xb’aanuhom chan ru wank choq’ chaab’il moos chiru li Dios ut chiruheb’ li wankeb’ sa’ xsutam. K’a’ru naru te’xtzol li komon sa’ laa tzoleb’aal rik’in a’an li taatenq’anq reheb’ chi k’anjelak chiru li ras riitz’ineb’? Naru taatikib’ li aatinak rik’in xpatz’b’al reheb’ li komon sa’ li tzoleb’aal naq te’xtz’iib’a xtusulaleb’ li k’a’aq re ru naramok reheb’ li kristiaan chi k’anjelak chiru li ras riitz’ineb’—k’a’ut naq ink’a’ nokok’anjelak chiruheb’, malaj naq li qak’anjel ink’a’ naxtenq’aheb’. Chirix a’an, taaruuq te’xtzol Mosiah 2:10–26 ut te’xtz’iib’a chi tusb’il eb’ li yaalil na’leb’ kixk’ut li rey aj Benjamin chirix k’anjelak chiruheb’ li ras riitz’in, li taatenq’anq reheb’ chixq’axb’al ru li ramleb’ xe’xtz’iib’a. K’a’ru naru te’xb’aanu li komon ut li junkab’al re te’wanq chi k’anjelak chiruheb’ li ras riitz’ineb’ sa’ lix yu’am re wulaj wulaj? Naru taawotz li esil yeeb’il xb’aan li Awa’b’ej Thomas S. Monson sa’ “Xkomon chik li k’anjeleb’aal” re xb’aanunkil a’in.

• Jun b’ich jo’ “Jun winq neb’a’ aj numel b’e” (Eb’ li B’ich, 17) naru tixk’e xkawilal li esil tawb’il sa’ Mosiah 2:17—naq nokok’anjelak chiruheb’ li qas qiitz’in, yooko chi k’anjelak chiru li Dios. Chan ru naq eb’ li k’anjeleb’aal a’in te’ruuq chixxaqab’ankil xwankil li raatin li rey aj Benjamin? Maare eb’ li komon sa’ li tzoleb’aal te’ruuq chixwotzb’al k’a’ru xe’xk’ul naq xe’k’anjelak chiruheb’ li ras riitz’in, malaj naq anihaq xk’anjelak chiruheb’ a’an. Jo’ jun raqal lee seraq’, maare taawaj xwotzb’al li aatin a’in re li Awa’b’ej Henry B. Eyring: “Naq naqak’e xtenq’ankil yalaq ani, li Kolonel nareek’a naq A’an ajwi’ li xqatenq’a” (“Ma ink’a’ ta a’in li kuyuk sa’ sik’b’il ru inb’aan?” Jolomil ch’utub’aj-ib’ re abril 2015). K’a’ut nakak’oxla laa’at naq yooko chi k’anjelak chiru li Dios naq nokok’anjelak chiruheb’ li qas qiitz’in?

wiib’ li ixq yookeb’ chixq’alunkil rib’eb’.

Li k’anjelak chiru qas qiitz’in nokoxtenq’a chireek’ankil lix rahom li Dios.

Mosiah 2:38–41

Li sahil ch’oolejil nachal rik’in xpaab’ankileb’ lix taqlahom li Dios.

• Re xtenq’ankileb’ li komon sa’ li tzoleb’aal re “te’xk’oxla li osob’tesiik ut li saho’k ch’oolej wankeb’ wi’ li neke’paab’ank reheb’ lix taqlahom li Dios,” maare us xb’een wa xk’oxlankil k’a’ru xyaalalil li saho’k ch’oolej. Chan ru li sahil ch’oolejil li nachal rik’in ab’ink chiru li Dios, jo’ neke’xk’oxla li komon sa’ laa tzoleb’aal? Maare taaruuq te’xk’oxla naq wan raj jun ramiiweb’ li naxye naq sa xch’ool us ta ink’a’ naxpaab’eb’ li taqlahom. Kanab’eb’ chirilb’al ru Mosiah 2:38–41 ut chi aatinak chirix chan ru naq te’ruuq chixtenq’ankil li ramiiw chixtawb’al ru naq jalan wi’ li ruchich’och’il sahil ch’oolejil rik’in li sahil ch’oolejil re junelik. Ma wan k’a’ru xk’ul anihaq sa’ xyu’am li naxk’ut xyaalal li sahil ch’oolejil re junelik, li taaruuq te’xye li komon sa’ li tzoleb’aal?

Mosiah 3:1–12

Li kolb’a-ib’ ka’ajwi’ nachal “xb’aan lix k’ab’a’ li Kristo, li Qaawa’.”

• Sa’ li raatin li rey aj Benjamin, wankeb’ li xninqal ru profeetil aatin chirix lix yo’lajik, lix k’anjel, ut lix mayej li Jesukristo re xtojb’al rix li maak. Naru taapatz’ reheb’ li komon sa’ li tzoleb’aal naq te’xwotzeb’ li raqal sa’ Mosiah 3:1–20 li neke’xtoch’ xch’ooleb’, ut neke’xtenq’aheb’ chixtawb’al ru li Kolonel ut lix k’anjel. Ye reheb’ naq te’xwotz k’a’ut naq eb’ li raqal a’in neke’xtoch’ xch’ooleb’.

• Li Xtikib’ankil lix Hu laj Mormon naxk’ut naq li hu “naxk’ut chi tzoltzo li k’uub’anb’il na’leb’ re li kolb’a-ib’.” Re xtenq’ankileb’ li komon sa’ li tzoleb’aal chirilb’al chan ru naq li raatin li rey aj Benjamin natenq’an chixtz’aqob’resinkil ru li ajom a’in re lix Hu laj Mormon, naru taatz’iib’a chiru li pizarron, Li Jesukristo naxk’e chi uxmank li kolb’a-ib’. Eb’ li komon sa’ li tzoleb’aal te’ruuq chirilb’al ru Mosiah 3:1–20, toja’ naq laa’at malaj eb’ a’an te’ruuq chixtz’iib’ankil chi tustu chiru li pizarron li yaalil na’leb’ neke’xtzol chirix li k’uub’anb’il na’leb’ re li kolb’a-ib’. Patz’ reheb’ li komon sa’ li tzoleb’aal chirix chan ru naq li Jesukristo kixk’e chi uxmank li k’uub’anb’il na’leb’ re li kolb’a-ib’. Chirix a’an, kanab’eb’ li komon sa’ li tzoleb’aal chirilb’al ru Mosiah 3:18–19 ut wotz k’a’ru tento taqab’aanu re wank choq’ aj santil paab’anel ut xk’ulb’al li kolb’a-ib’. Chan ru naq lix tojb’al rix li maak xb’aan li Jesukristo naxk’e chi uxmank a’in? Kanab’eb’ li komon chixwotzb’al li reek’ahom xch’ooleb’ chirix lix k’anjel li Kolonel sa’ li k’uub’anb’il na’leb’ re li kolb’a-ib’.

reetalil li tzolok

Xb’oqb’aleb’ chi tzolok sa’ kab’l

Ma wan jun sut naq junaq tzol’leb’ li k’utb’il sa’ jun ch’utam, jun tzoleb’aal, malaj jun reheb’ li loq’laj hu xjal xyu’ameb’ li ani wankeb’ sa’ laa tzoleb’aal? Ye reheb’ naq sa’ Mosiah 4–6 te’ril resil chan ru naq li yaalil na’leb’ k’utb’il xb’aan li rey aj Benjamin kixjal xyu’ameb’ lix tenamit.

reetalil li k’anjeleb’aal

Xkomon chik li k’anjeleb’aal

K’anjelak chiru qas qiitz’in.

Li Awa’b’ej Thomas S. Monson kixye:

“Junjunq chihab’ chaq xwil ru jun raqal li hu tz’iib’anb’il xb’aan laj Jack McConnell, jun aj b’anonel. A’an kiniman sa’ k’aleb’aal sa’ Virginia sa’ li tenamit Estados Unidos; a’an jun reheb’ li wuqub’ alal k’ajolb’ej, lix yuwa’ a’an pastor aj Metodista, ut lix na’ wan sa’ kab’l. Moko mas ta li wan reheb’. A’an kixye naq chiru lix ka’ch’inal, wulaj wulaj naq ke’chunla lix junkab’al chi sutsu chirix li meex, lix yuwa’ kixpatz’ re li junjunq, “Ut k’a’ru xab’aanu choq’ re anihaq anajwan?” Eb’ li kok’al k’eek’ookeb’ xch’ool chixb’aanunkil junaq chaab’ilal wulaj wulaj re te’ruuq chixyeeb’al re lix yuwa’ naq xe’xtenq’a anihaq. Li Doctor McConnell kixye naq li na’leb’ a’in, a’an li eechanihom q’axal nim kixkanab’ lix yuwa’ reheb’ li ralal xk’ajol, xb’aan naq li na’leb’ a’an ut li aatin a’an kixtoch’ xch’ool a’an ut eb’ lix komon sa’ lix junkab’al re te’xtenq’aheb’ li ras riitz’in chiru lix yu’ameb’. Naq ke’niman ut ke’winqilo’ ut ke’ixqilo’, kikana sa’ xch’ooleb’ li rajomeb’ naq te’xtenq’aheb’ li ras riitz’in.

“Rochb’een lix chaab’il k’anjel li Doctor McConnell jo’ aj b’anonel, a’an kixtikib’ jun molam, Eb’ laj Tenq’anel sa’ li B’anok naxye re, li naxkanab’eb’ li tiixil aj b’anonel chi tenq’ank chi maak’a’ xtojb’aleb’ sa’eb’ li b’anleb’aal choq’ reheb’ li neb’a’. Li Doctor McConnell naxye naq maak’a’ chik xhoonal chi hilank chirix xkanab’ankil lix trab’aaj jo’ aj b’anonel, xb’aan naq naxb’aanu 60 hoonal chi maak’a’ xtojb’al rajlal xamaan, a’ut kaw xmetz’ew, ut k’ojk’o xch’ool chirix lix yu’am. [Jack McConnell, “And What Did You Do for Someone Today?” Newsweek, 18 junio 2001, 13.] …

“Ch’olch’o naq moko chiqajunil ta nokoru chi wank jo’ li Doctor McConnell, ut ink’a’ naru taqatikib’ jun b’anleb’aal re xtenq’ankileb’ li neb’a’, a’ut yalaq b’ar wankeb’ li neke’raj xtenq’ankil, ut chiqajunqal naru naqab’aanu k’a’ruhaq re xtenq’ankil anihaq. …

“Ex was wiitz’in, sutinb’ilo xb’aaneb’ li ani neke’raj ru naq taqatenq’aheb’, taqawaklesi xch’ooleb’, taqaxaqab’ xwankileb’, taqak’ojob’ xch’ooleb’, ut naq chaab’ilaq qach’ool rik’ineb’—maak’a’ naxye ma a’anaqeb’ xkomon li qajunkab’al, li qamiiw, li ani naqanaw ru, malaj aj jalanil tenamit. Laa’o li ruq’ li Qaawa’ arin sa’ li ruchich’och’, rik’in jun taqlahom re k’anjelak chiru ut xwaklesinkileb’ li ralal xk’ajol. A’an naraj lix tenq’ li junjunq qe. … Chiqapatz’ qib’ li patz’om li xpatz’man re li Doctor Jack McConnell ut eb’ li ras riitz’in rajlal ewu naq okeb’ re chi wa’ak: “K’a’ru xinb’aanu choq’ re anihaq anajwan?”” (“¿Qué he hecho hoy para alguien?” Liahona, noviembre 2009, 84–87).

Xchaab’ilob’resinkil li qak’utum

Chatwanq choq’ k’anjeleb’aal sa’ ruq’ li Musiq’ej. Laa k’anjel jo’ aj k’utunel maawa’ k’utuk na’leb’, a’an b’an xtenq’ankileb’ laa komon chixk’ulb’al lix wankil li Santil Musiq’ej—a’an li tz’aqal aj k’utunel. (Chi’ilmanq Li k’utuk jo’ li Kolonel, 10.)