li Kristo chi waklijenaq chi yoʼyo, rikʼinebʼ lix apostol

Li Kristo ut eb’ li apostol, xb’aan laj Del Parson

30 marzo–12 abril

Li Paswa

“Taawakliiq chaq … chi wanq li k’irtesink sa’ xxik’ ”

Li domingo re Paswa aʼan jun chaabʼil hoonal re naq ebʼ li komon saʼ laa tzolebʼaal teʼxkawobʼresi lix nawomebʼ xchʼool chirix li Jesukristo ut lix waklijik chi yoʼyo—ut re teʼxkawobʼresi xnawomebʼ xchʼool chiribʼilebʼ ribʼ. Chiwanq aʼin saʼ aakʼaʼuxl naq nakatzolebʼ li loqʼlaj hu re xkawresinkil aawibʼ choqʼ re li tzolok aʼin. Sikʼ li musiqʼejil bʼeresink chirix kʼaʼru tixtochʼebʼ xchʼool li ani wankebʼ saʼ laa tzolebʼaal.

Xtz’iib’ankil li nakak’oxla

reetalil li wotzok

Xkanab’ankileb’ chi wotzok

Ebʼ li komon saʼ laa tzolebʼaal maare wan kʼaʼru xeʼxkʼul chiru li wiibʼ xamaan aʼin rikʼin rilbʼal ru li kʼaʼru naxkʼut lix Hu laj Mormon chirix lix waklijik li Jesukristo chi yoʼyo ut lix tojbʼal rix li maak xbʼaan aʼan. Kanabʼebʼ chiru wiibʼ oxibʼ kʼasal chixsikʼbʼal jun raqal li xwulak chiruhebʼ, ut chirix aʼan kanabʼebʼ chixwotzbʼal li kʼaʼru xeʼxtaw.

reetalil li k‘utuk

Xk’utb’al li tzol’leb’

2 Nefi 9:7–15; Alma 11:41–45; 40:21–23

Li wakliik chi yoʼyo, aʼan naq naxjunaji ribʼ chi junajwa li tzʼejwalej rikʼin li musiqʼej.

• Li juntaqʼeetank naru nakʼanjelak re xkʼutbʼalebʼ li naʼlebʼ saʼ li evangelio. Maare taaruuq taakʼe xbʼoqbʼalebʼ li komon saʼ li tzolebʼaal chirilbʼal ru 2 Nefi 9:7–15 ut Alma 11:41–45, ut teʼxkʼe reetal li aatin ut li chʼol aatin saʼebʼ li raqal aʼin li nekeʼaatinak chirix li wakliik chi yoʼyo. Kʼaʼru li juntaqʼeetanbʼil wiʼ li kamk? Chan ru naq yeebʼil resil li wakliik chi yoʼyo? Kʼaʼut naq naqaj ru li qajunxaqalil chi waklijenaq wi’chik chi yo’yo? (chi’ilmanq ajwi’ Tzol’leb’ ut Sumwank 93:33–34). Ebʼ li komon saʼ li tzolebʼaal taaruuq teʼaatinaq chirix chan ru taaruuq teʼrokshihebʼ li juntaqʼeetank aʼin re xtzolbʼal anihaq chik chirix li wakliik chi yoʼyo. Naq yookebʼ chixwotzbʼal lix naʼlebʼebʼ rikʼin li tzolebʼaal, naru tat-aatinaq rikʼinebʼ chirix kʼaʼut naq nawulak chiruhebʼ li yaalil naʼlebʼ aʼin chirix li wakliik chi yoʼyo.

• Naru taabʼoqebʼ li komon saʼ li tzolebʼaal chixwotzbʼal resil jun hoonal naq keʼxbʼantioxi li wakliik chi yoʼyo. Chan ru naq li naʼlebʼ aʼin naru chi wank chik xwankil saʼ li qayuʼam? Naru taatenqʼahebʼ li komon saʼ laa tzolebʼaal chixsumenkil li patzʼok aʼin rikʼin xyeebʼal re li junjunq naq tixtzʼil rix 2 Nefi 9:7–15; Alma 11:41–45; malaj Alma 40:21–23, ut tixtzʼiibʼa chi tusbʼil chiru li pizarron li yaalil naʼlebʼ naxtaw chirix li wakliik chi yoʼyo. Chirix aʼan, naru taatzʼiibʼa chiru li pizarron li wiibʼ chʼol aatin aʼin ut taaye rehebʼ li komon saʼ li tzolebʼaal naq teʼkʼoxlaq saʼ xchʼool chiru junpaat, tojaʼ naq teʼxwotz chan ru taaruuq teʼxtzʼaqobʼresi ru: Wi ta inkʼaʼ xinnaw li kʼaʼaq re ru aʼin… ut Rikʼin naq ninnaw li kʼaʼaq re ru aʼin….

li Jesus naq yoo chi tijok sa’ li Awimq Getsemani

Getsemani, xb’aan laj Michael T. Malm

Mosiah 3:5–7; 15:5–9; Alma 7:11–13

Li Jesukristo kixkʼul saʼ xbʼeen aʼan li qamaak, li qarahilal, ut li qayajel.

• Wi naqakʼoxla ut nokoʼaatinak chirix li rahilal kixkʼul li Kolonel choqʼ qe, naru naxkʼe xbʼoqbʼal li Musiqʼej ut nokoxtenqʼa chireekʼankil li rahok ut li bʼantioxink choqʼ re li Kolonel. Re taaʼuxq li kʼoxlak ut li aatinak aʼin, naru taayiibʼ jun kaaxukuut chiru li pizarron chanchan li wan saʼ li tuslebʼ aatin re li xamaan aʼin saʼ Kim, Taaqehin—Choqʼ rehebʼ li komon ut li junkabʼal, ut taaye rehebʼ li komon saʼ li tzolebʼaal naq teʼxnujobʼresi li kaaxukuut rikʼin li wan saʼ Mosiah 3:5–7; 15:5–9; ut Alma 7:11–13, joʼ ajwiʼ li kʼaʼru xeʼxkʼul saʼ xyuʼamebʼ. Joʼ bʼeresinbʼil xbʼaan li Musiqʼej, naru ajwiʼ taabʼoqebʼ li komon saʼ li tzolebʼaal chixwotzbʼal li kʼaʼru nekeʼreekʼa chirix li kʼaʼru xbʼaanu li Jesukristo choqʼ rehebʼ.

• Ebʼ li loqʼlaj bʼich naru nekeʼxkʼe xbʼoqbʼal li Musiqʼej ut teʼxkʼe xkawilal li tzolʼlebʼ yookat chixkʼutbʼal. Maare ebʼ li komon saʼ li tzolebʼaal teʼruuq chixkaʼsutinkil Mosiah 3:5–7; 15:5–9; ut Alma 7:11–13, ut teʼxtawebʼ ut teʼxbʼichahebʼ li bʼich nekeʼreekʼa naq nekeʼxkʼam ribʼ rikʼin li esil saʼebʼ li raqal aʼin (naru ajwiʼ taapatzʼ re junaq naq tixbʼicha malaj tixyaabʼasi li bʼich aʼan). Li tusulal rehebʼ li raqal saʼebʼ li loqʼlaj hu, li natawman saʼ rosoʼjik li bʼichlebʼaal, naru chetenqʼankil, ut wankebʼ chik li bʼich li yeebʼilebʼ resil saʼ “Xkomon chik li kʼanjelebʼaal.” Waklesihebʼ xchʼool li komon saʼ li tzolebʼaal chixwotzbʼalebʼ li chʼol aatin saʼebʼ li bʼich ut saʼebʼ li loqʼlaj hu li nekeʼtenqʼank rehebʼ chireekʼankil saʼ xchʼoolebʼ li mayej kixkʼe li Kolonel.

Enos 1:1–19; Mosiah 5:1–2; 27:8–28:4; Alma 24:7–19

Lix tojbʼal rix li maak xbʼaan li Jesukristo nokoxsaqobʼresi ut nokoxtenqʼa chixtawbʼal xtzʼaqalil qe qu.

• Jun naʼlebʼ re tzolok chirix lix wankil li Kolonel re xjalbʼal li qayuʼam, aʼan xtzolbʼal chan ru naq aʼan kixjal xyuʼamebʼ jalanebʼ chik naq keʼxjal xkʼaʼuxl ut keʼchal rikʼin. Saʼ lix Hu laj Mormon wankebʼ kʼiila esilal chirix aʼan. Maare taaruuq taaye re li junjunq komon saʼ li tzolebʼaal naq taaril ru jun rehebʼ li esilal aʼin, joʼ laj Enos (chiʼilmanq Enos 1:1–19), lix tenamit li rey aj Benjamin (chiʼilmanq Mosiah 5:1–2), laj Alma li alalbʼej (chiʼilmanq Mosiah 27:8–28), malaj ebʼ laj Anti-Nefi-Lehi (chiʼilmanq Alma 24:7–19), malaj ut maare teʼxkʼoxla jalanebʼ chik li esilal saʼebʼ li loqʼlaj hu. Chirix aʼan, junjunq rehebʼ li komon saʼ li tzolebʼaal teʼruuq chixyeebʼal chi kʼosbʼil ru li esilal keʼril ru. Maare taawulaq chiruhebʼ li wankebʼ saʼ li tzolebʼaal xyeebʼal bʼayaq resil li kʼaʼru kikʼulman, aʼut inkʼaʼ teʼxye ani chi aj-ix yookebʼ chi aatinak. Teʼruuq ajwiʼ teʼaatinaq chirixebʼ li patzʼom joʼ aʼin: Chan ru naq keʼjalaak li ani wankebʼ saʼebʼ li esilal aʼin? Kʼaʼru lix kʼanjel li Kolonel saʼ xjalbʼalebʼ? Maare junjunq komon saʼ li tzolebʼaal teʼruuq chi aatinak chirix chan ru naq li Kolonel “xkʼanjela jun nimla jalok saʼ xchʼoolebʼ ” (Mosiah 5:2). Re xtzolbʼal chik li naʼlebʼ chirix chan ru naq li Kolonel nokoxjal—ut kʼaʼut naq aajel ru li jalok aʼin—naru taakʼut chiru li tzolebʼaal li jaljookil ru aatin yeebʼil xbʼaan li Awaʼbʼej Dallin H. Oaks saʼ “Xkomon chik li kʼanjelebʼaal.”

reetalil li tzolok

Xb’oqb’aleb’ chi tzolok sa’ kab’l

Re xwaklesinkilebʼ xchʼool li komon chirilbʼal ru Mosiah 1–3, naru taaye rehebʼ naq teʼxkʼoxla joʼqʼe xeʼreekʼa naq xeʼraj sahoʼk xchʼool chirix rilbʼal ru malaj rabʼinkil jun esil chirix li evangelio. Ye rehebʼ naq teʼxsikʼebʼ li yaalil naʼlebʼ naru nekeʼsahoʼ wiʼ xchʼool naq nekeʼril ru Mosiah 1–3.

reetalil li k’anjeleb’aal

Xkomon chik li k’anjeleb’aal

Ebʼ li bʼich chirix lix tojbʼal rix li maak xbʼaan li Kolonel.

• “Ninpaabʼ li Kristo,” Ebʼ li Bʼich, 75

• “Ninnaw naq yoʼyo inKolonel,” Ebʼ li Bʼich, 77

• “Joʼ nakawaj, at Dios,” Ebʼ li Bʼich, 113

• “Ak xwakli,” Ebʼ li Bʼich, 121

Ebʼ li video wan wiʼ li Coro Tabernaculo re li Manzana re li Templo chixbʼichankilebʼ li bʼich aʼin nekeʼtawman saʼ ChurchofJesusChrist.org.

Jaljookil ru aatin: Tento naq inkʼaʼ kaʼajwiʼ saqobʼresinbʼilaqo.

Li Awa’b’ej Dallin H. Oaks kixwotz jun jaljookil ru aatin re xchʼolobʼankil chan ru naq li Kolonel nokoxkawresi chi sutqʼiik rikʼin li Dios:

“Wan naq naqakʼoxla naq li nakʼulman rikʼin li jalbʼa-kʼaʼuxlej aʼan naq nasaqobʼresiik qu chirix li qamaak, aʼut moko tzʼaqal ta li naʼlebʼ aʼin. … Jun kristiaan li namaakobʼ chanchan jun xtoonal li cheʼ li naʼeekʼasiik xbʼaan li iqʼ. Naq kaw li iqʼ ut li habʼ, lix toon li cheʼ nabʼaseʼ toj chi chʼochʼ, ut ebʼ lix xaq nekeʼtzʼajnoʼ rikʼin sulul, chanchan li maak. Wi kaʼajwiʼ naqakʼoxla xchʼajbʼal li xaq, naru nakana lix qʼunal lix toonal li cheʼ, li nakanabʼank re chi bʼaseʼk ut chixtzʼajninkil lix xaq. Chi joʼkan ajwiʼ, jun kristiaan li yal ra nareekʼa xbʼaan naq tzʼajninbʼil xbʼaan li maak, taamaakobʼq wiʼchik naq taachalq wiʼchik jun kawil iqʼ. Ak re naq taaruuq taatzʼajniiq wiʼchik wi inkʼaʼ nakawobʼresiik lix toonal li cheʼ.

“Naq jun li kristiaan xnumsi li kʼaʼru yeebʼil saʼebʼ li loqʼlaj hu, naq “yotʼbʼil lix chʼool ut tuulan lix musiqʼ,” li Kolonel inkʼaʼ kaʼajwiʼ naxsaqobʼresi li kristiaan aʼan chiru lix maak. Naxkʼe bʼan xkawilal xmetzʼew. Aajel ru xkawilal li metzʼew aʼan re taqakʼe reetal kʼaʼru aj-e naq saqobʼresinbʼilo: re naq toosutqʼiiq rikʼin li qaChoxahil Yuwaʼ. Re taaruuq tooʼok chiru li rilobʼaal, moko tzʼaqal ta naq yal saqobʼresinbʼilaqo. Tento ajwiʼ toojaleʼq, re naq maawaʼaqo chik jun kristiaan qʼun xmusiqʼ li xmaakobʼk, re bʼan naq laaʼaqo chik jun kristiaan li wank xmusiqʼejil kawilal chi wank chiru rilobʼaal li Dios” (“La Expiación y la fe,” Liahona, abril 2009, 12–13).

Xchaabʼilobʼresinkil li qakʼutum

Chatwanq chi kʼulubʼej re xkʼulbʼal aabʼeresinkil xbʼaan li Musiqʼej. Naq nakayuʼami li evangelio, kʼulubʼejat re tat-ochbʼeniiq xbʼaan li Musiqʼej, aʼan laj kʼutunel li qʼaxal chaabʼil. Naq nakasikʼ aatenqʼankil, li Santil Musiqʼej tixkʼe aanaʼlebʼ ut tatreekʼasi chixnawbʼal chan ru xkʼeebʼal li ajbʼil ru xbʼaanebʼ li tzolbʼilebʼ aabʼaan. (Chi’ilmanq Li k’utuk jo’ li Kolonel, 5.)