laj Enos jo’ saaj al rik’in laj Jakob lix yuwa’, ut lix na’

Laj Jakob ut laj Enos, xb’aan laj Scott Snow

23–29 marzo

Enos–Raatin laj Mormon

Nak’anjelak wik’in re xb’aanunkil li rajom xch’ool

Kawresi aawib’ chi k’utuk rik’in rilb’al ru Enos–Raatin laj Mormon, ut taak’uub’ aana’leb’ re k’utuk (chi’ilmanq Li k’utuk jo’ li Kolonel, 19). Eb’ li na’leb’ ut li tzol’leb’ sa’ li tusleb’ aatin a’in naru ajwi’ te’xk’e aana’leb’.

Xtz’iib’ankil li nakak’oxla

reetalil li wotzok

Xkanab’ankileb’ chi wotzok

Re xk’eeb’al xhoonaleb’ li komon sa’ li tzoleb’aal chixwotzb’al li k’a’ru yookeb’ chixtzolb’al sa’ kab’l, naru taajacheb’ ru sa’ kok’ ch’uut, ut taaye re li junjunq ch’uut naq te’ril ru jun ch’ol sa’ Enos–Raatin laj Mormon. Ye reheb’ naq te’xye k’a’ruheb’ li raqal sa’ li ch’ol a’an li neke’xk’oxla naq tento raj teetzol sa’ li tzoleb’aal. Tz’iib’a chiru li pizarron k’a’ruheb’ li raqal a’in, ut sik’ ru junjunq re tex’aatinaq chirix.

reetalil li k’utuk

Xk’utb’al li tzol’leb’

Enos 1:1–17

Naru naqak’ul xkuyb’al qamaak naq naqak’anjela li qapaab’aal chirix li Jesukristo.

• A’in junjunq li patz’om taaruuq taaye reheb’ li komon sa’ li tzoleb’aal re te’xk’oxlaheb’ naq yookex chixtzolb’al Enos 1:1–17: K’a’ru naqatzol rik’in li k’a’ru kixnumsi laj Enos chirix xk’ulb’al li risinkil li qamaak? Chan ru naq laj Enos kixk’ut lix paab’aal chirix li Jesukristo? Chan ru naq li numsihom a’in kixjal laj Enos, jo’ ajwi’chan ru naq naril rib’ ut narileb’ li ras riitz’in?

Enos 1:4–17

Taasumemanq li tijok naqab’aanu chi anchal qach’ool.

• Re xtenq’ankileb’ li komon sa’ li tzoleb’aal chixnimankil lix tawomeb’ ru chirix li tijok, naru taajacheb’ ru sa’ kok’ ch’uut, ut taaye re li junjunq ch’uut naq te’ril jun reheb’ li raqal a’in sa’ Enos 1: eb’ li raqal 2–8, 9–11, malaj 12–17. Chirix a’an, ye re li junjunq ch’uut naq te’xk’ut chiru li tzoleb’aal k’a’ruhaq li xe’xtzol chirix li tijok sa’eb’ li raqal li xk’eeman reheb’. Jo’ eetalil, naru taaye reheb’ naq te’xwotz li aatin ut li ch’ol aatin chirix chan ru naq kitijok laj Enos.

• Rochb’een xtzolb’al chan ru naq kitijok laj Enos, wan naab’al li naru naqatzol rik’in k’a’ chi aj-ix kitijok laj Enos. Maare eb’ li komon sa’ li tzoleb’aal te’ruuq chixyeeb’al ani chi aj-ix ut k’a’ru chi aj-ix kitijok laj Enos sa’ Enos 1:4–17. Jo’ yeeb’il sa’eb’ li raqal a’in, k’a’ut naq Enos kiraj tijok chirixeb’ li jun siir chik? K’a’ chik ru li yaalil na’leb’ chirix li tijok naqatzol rik’in laj Enos?

Jarom–Omni

Wi naqapaab’eb’ li taqlahom, too’usaaq.

• Laj Jarom ut eb’ li ke’tz’iib’ak sa’ lix hu laj Omni ke’xtz’iib’a resil lix tenamiteb’ laj Nefita, a’ut nak’anjelak li raatineb’ choq’ re li junjunq kristiaan. K’a’ru naqatzol sa’eb’ lix hu laj Jarom ut laj Omni chirix chan ru naq li tiikilal nak’amok sa’ li usaak? (jo’ eetalil, chi’ilmanq Jarom 1:7–12 ut Omni 1:5–7, 12–18). Maare usaq choq’ reheb’ li komon xsik’b’al xyaalalil li aatin usaak sa’ jun tusleb’aal aatin ut sa’eb’ li loq’laj hu (qayehaq, chi’ilmanq Alma 37:13; 48:15). Chan ru naq li wan sa’ li tusleb’aal aatin jalan rik’in li yeeb’il xb’aan li Qaawa’? Chan ru naq li Qaawa’ naxtenq’a lix tenamit chi usaak?

• Jo’ chanru naq eb’ li profeet aj Nefita ke’k’anjelak chi yalb’ileb’ xq’e chixk’utb’aleb’ li taqlahom chiruheb’ li tenamit, eb’ li qaprofeet sa’ roso’jikeb’ li kutan nokohe’xtzol ajwi’ chirixeb’ li taqlahom. Chirix rilb’al ru Jarom 1:9–12, eb’ li komon sa’ li tzoleb’aal te’ruuq chi aatinak chirixeb’ lix k’utumeb’ laj jolominel re li Iglees li neke’musiq’ank reheb’ chixpaab’ankileb’ li taqlahom. Maare usaq choq’ reheb’ li komon sa’ li tzoleb’aal rilb’aleb’ ru li aatin re li jolomil ch’utub’aj-ib’ sa’ li Liahona, malaj sa’ li aplicación Biblioteca del Evangelio. Malaj ut taaruuq te’rileb’ li chaq’rab’ yeeb’ileb’ resil sa’ Para la Fortaleza de la Juventud. Wi na’ajman, taaruuq taasik’eb’ li yehom sa’ “Xkomon chik li k’anjeleb’aal.” Chan ru naq ab’ink chiruheb’ li taqlahom nokoxtenq’a chi “usaak” sa’ li qayu’am?

Omni

Li Qawa’ kixk’am naab’al li tenamit sa’ li yeechi’inb’il ch’och’.

• Sa’ lix Hu laj Mormon wan xk’ihal li esilal, ut wan naq ch’a’aj xk’eeb’al reetal chixjunileb’ li teep chi tenamit li yeeb’ileb’ resil aran. Jun na’leb’ re tzolok chirix chixjunileb’ li tenamit sa’ lix Hu laj Mormon, a’an xyiib’ankil jun li kaaxukuut chiru li pizarron, ut taapatz’ reheb’ li wankeb’ sa’ li tzoleb’aal naq te’xnujob’resi rik’in li na’leb’ chirix li junjunq teep chi tenamit (jo’eb’ laj Nefita, eb’ laj Lamanita, ut eb’ lix tenamit laj Tzarahemla). Jo’ jun eetalil, chi tzuul sa’ li kaaxukuut naru te’wanq li jolomil aatin a’in: Xk’ab’a’ li teep, Jo’q’e ut chan ru ke’wulak, ut K’a’ru kik’ulman rik’ineb’. Aatinanqex sa’ komonil chirix k’a’ut naq us xtawb’al ru li k’a’aq re ru xetzol chirix li junjunq teep. Eb’ li aatin a’in sa’ li K’utul Raqal reheb’ li Loq’laj Hu naru te’tenq’anq aawe: “Koriantumr,” “Jaredita,” “Lamanita,” “Mulek,” “Nefita,” ut “Tzarahemla.”

Raatin laj Mormon 1:1–8

Li Dios taak’anjelaq qik’in wi naqataaqe lix b’eresihom.

• Jo’ jun raqal li seraq’ chirix li Raatin laj Mormon, naru taaye re jun komon sa’ li tzoleb’aal naq taachalq chi kawresinb’il chixwotzb’al k’a’ut naq laj Mormon kimusiq’aak chixk’eeb’aleb’ li kok’ perel ch’iich’ (1 Nefi–Omni) sa’ lix Hu laj Mormon. Li komon a’an naru chixkawresinkil rib’ rik’in rilb’al ru li Raatin laj Mormon ut xkomoneb’ chik li hu, jo’ Tzol’leb’ ut Sumwank 10:8–19, 39–45 ut li tusleb’ aatin re li xamaan a’in sa’ Kim, Taaqehin—Choq’ reheb’ li komon ut li junkab’al; ut ch’ol 5 re Santos, tomo 1. Ye re li komon a’an naq taa’aatinaq chirix lix sachik li 116 perel re lix Hu laj Mormon li tz’iib’anb’il, ut k’a’ut naq ke’ajman ru li kok’ perel ch’iich’ re xk’ulb’al xna’aj li k’a’ru sachso. K’a’ru li yaalil na’leb’ neke’xtzol li komon sa’ li tzoleb’aal rik’in a’in chirix chan ru naq li Qaawa’ nak’anjelak rik’in ruq’eb’ li winq? K’a’ru neke’xtaw li komon sa’ li tzoleb’aal sa’ Raatin laj Mormon 1:1–8 li naxwaklesi xch’ooleb’ chixtaaqenkil lix b’eresihom li Dios us ta ink’a’ neke’xtaw tz’aqal xyaalal k’a’ut?

  laj Mormon naq kixch’utub’eb’ li perel ch’iich’ oor

  Laj Mormon kixch’utub’eb’ li perel ch’iich’, xb’aan laj Jorge Cocco

• Laj Mormon kirosob’tesi lix yu’ameb’ k’iila millon rik’in naq kixtaaqe li raatin li Musiq’ej chirixeb’ li kok’ perel ch’iich’ (chi’ilmanq Raatin laj Mormon 1:7). K’oxla chan ru naru taatenq’aheb’ li komon sa’ laa tzoleb’aal chixtawb’al ru naq te’ruuq chi tz’aqonk sa’ rosob’tesinkileb’ li ras riitz’in naq neke’xsik’ wank choq’ k’anjeleb’aal sa’ ruq’ li Dios, ut xtaaqenkil lix b’eresihom li Santil Musiq’ej. Chan ru naq li Dios kik’anjelak rik’in ruq’ laj Mormon? K’a’ru rilomeb’ li komon sa’ li tzoleb’aal naq xb’aanu li Qaawa’ rik’in ruq’eb’ a’an malaj ruq’ jalan chik naq xe’ab’in chiru li Musiq’ej ut xe’xsik’ xb’aanunkil li rajom li Dios? Li aatin chirix li Awa’b’ej Thomas S. Monson sa’ “Xkomon chik li k’anjeleb’aal” naxk’ut jun esil li maare tixtenq’aheb’ li komon chixk’oxlankil chan ru naq xk’ulman a’in sa’ xyu’ameb’ a’an.

reetalil li tzolok

Xb’oqb’aleb’ chi tzolok sa’ kab’l

Rik’in naq chalk re li jolomil ch’utub’aj-ib’, jo’ ajwi’ li Paswa sa’eb’ li xamaan chalel, waklesi xch’ooleb’ li komon sa’ li tzoleb’aal chixk’eeb’al reetal naq eb’ li wankeb’ sa’ li Xb’eenil Awa’b’ejil ut lix Molameb’ li Kab’laju chi Apostol te’xch’olob’ lix nawomeb’ xch’ool chirix li Jesukristo.

reetalil li k’anjeleb’aal

Xkomon chik li k’anjeleb’aal

Eb’ li video re lix Hu laj Mormon chirix laj Enos.

Sik’eb’ li video li neke’xk’ut resil lix Hu laj Enos sa’eb’ li video chirix lix Hu laj Mormon sa’ ChurchofJesusChrist.org, malaj sa’ li aplicación Biblioteca del Evangelio.

Eb’ li aatin sa’ li jolomil ch’utub’aj-ib’ chirix xpaab’ankileb’ li taqlahom.

• Thomas S. Monson, “Paab’eb’ li Taqlahom,” Jolomil ch’utub’aj-ib’ re octubre 2015

• Dieter F. Uchtdorf, “Xk’ulub’ankil li Evangelio chi sa sa’ qach’ool,” Jolomil ch’utub’aj-ib’ re octubre 2014

• Dallin H. Oaks, “No tendrás dioses ajenos,” Liahona, noviembre 2013, 72–75

“Xchapb’al li ruq’ chixjunqaleb’ li kok’al.”

Naq li Awa’b’ej Thomas S. Monson yoo chaq chi k’anjelak jo’ komon sa’ lix Molameb’ li Kab’laju chi Apostol, ki’aatinak chiru jun ch’uut chi kok’al re li Tzoleb’aal reheb’ li Kok’al sa’ jun k’aleb’aal aran Samoa. Moqon, kireek’a chi musiq’anb’il naq tento tixk’ul chixjunqaleb’ li 247 kok’al li wankeb’ aran. Kixnaw naq maak’a’ li hoonal choq’ re a’an, ut kixyal xq’e re taasachq sa’ xch’ool li na’leb’ a’an re xk’ulb’al li junjunq, a’ut ink’a’ kiru chiru.

A’an ki’aatinak rik’in laj k’utunel reheb’ li kok’al, ut kixye, “Nawaj raj xchapb’al ruq’ li junjunq al ut xqa’al. Ma naru a’an?”

Laj k’utunel chi sa sa’ rilob’aal kiraatinaheb’ li kok’al sa’ raatinob’aaleb’ laj Samoa. Chi anchaleb’ xch’ool ke’xsume naq us. Toja’ naq laj k’utunel kixye re laj Elder Monson naq chirix rab’inkil naq jun reheb’ li kab’laju chi apostol ok re chi wulak Samoa, kixye chaq reheb’ li kok’al naq wi te’tijoq chi anchaleb’ xch’ool ut te’wanq xpaab’aal, li Elder Monson taawulaq sa’ xk’aaleb’aaleb’ ut taa’eek’asiiq xb’aan li Santil Musiq’ej chixchapb’aleb’ ruq’ chixjunqaleb’ li kok’al (chi’ilmanq Thomas S. Monson, “Friend to Friend: Talofa Lava,” Friend, mayo 1972, 12–13).