li Jesus naq yoo chixtzolb’aleb’ lix tzolom

Li Kristo naxtzoleb’ lix tzolom, xb’aan laj Justin Kunz

2–8 marzo

2 Nefi 31–33

“A’in li b’e”

Naq nakatzol 2 Nefi 31–33, che’wanq sa’ aach’ool li komon sa’ laa tzoleb’aal, ut k’oxla k’a’ru maare ak xe’xtzol rik’ineb’ li yaalil na’leb’ kixk’ut laj Nefi. Chan ru naru taab’oqeb’ chixtzolb’al rib’ chirib’ileb’ rib’ chirix li k’a’ru xe’xtzol ut xe’reek’a rik’ineb’ li tzol’leb’ a’in?

Xtz’iib’ankil li nakak’oxla

reetalil li wotzok

Xkanab’ankileb’ chi wotzok

Ma wan ani sa’ laa tzoleb’aal li xk’ul xchaab’ilal rik’in jun reheb’ li na’leb’ re tzolok sa’ Kim, Taaqehin—Choq’ reheb’ li komon ut li junkab’al? Kanab’eb’ li komon sa’ li tzoleb’aal chixwotzb’al li k’a’ru xe’xk’ul.

reetalil li k‘utuk

Xk’utb’al li tzol’leb’

2 Nefi 31–32

Li Jesukristo ut lix tzol’leb’ a’an li junaj chi b’e sa’ li junelik yu’am.

• Maare usaq choq’ re laa tzoleb’aal rilb’al chan ru naq li paab’aal, li jalb’a-k’a’uxlej, li kub’iha’, li maatan re li Santil Musiq’ej, ut kuyuk toj sa’ roso’jik neke’xk’am rib’ li jun rik’in li jun chik, ut chan ru naq neke’xk’am rib’ rik’in lix tojb’al rix li maak xb’aan li Jesukristo. Re xb’aanunkil a’in, naru taayiib’ xjalam-uuch jun b’e chiru li pizarron ut taaye reheb’ li komon sa’ li tzoleb’aal naq te’xtz’iib’a chiru li b’e junjunq li na’leb’ li neke’tawman sa’ 2 Nefi 31. Li junjunq chi komon sa’ li tzoleb’aal taaruuq chixsik’b’al jun reheb’ li na’leb’ a’in, ut taasik’oq sa’ 2 Nefi 31–32 re xtawb’al k’a’ruhaq li kixk’ut laj Nefi chirix. Chirix a’an taaruuq te’xwotz chirib’ileb’ rib’ li k’a’ru xe’xtaw, ut te’aatinaq chirix chan ru naq a’an naxtenq’aheb’ chixtawb’al ru chi us li na’leb’ a’an. Chan ru naq xyu’aminkileb’ li na’leb’ a’in naxk’am chaq li rosob’tesihom li Jesukristo sa’ li qayu’am?

• Chan ru naru taatikib’ jun seraq’ chirix lix saqen ruhil aatin laj Nefi chirix “li b’e” li nak’amok sa’ li kolb’a-ib’? (2 Nefi 31:21). Maare taaruuq taapatz’ reheb’ li komon sa’ li tzoleb’aal k’a’ raj ru te’xye wi yal jun k’asal taak’eemanq reheb’ re xch’olob’ankil k’a’ru tento tixb’aanu jun li kristiaan re xk’ulb’al li kolb’a-ib’. Chirix a’an, eb’ li komon sa’ li tzoleb’aal naru te’ril ru sa’ junpaat 2 Nefi 31–32, re xsik’b’al li aatin li taaruuq chi tenq’ank. K’a’ru naqatzol sa’eb’ li ch’ol a’in chirix lix aajel ru k’anjel li Kolonel sa’ li qakolb’al? Eb’ li aatin sa’ “Xkomon chik li k’anjeleb’aal” naru texxtenq’a sa’ li seraq’ a’in.

• Wan naq naqak’oxlaheb’ li na’leb’ re li evangelio jo’ jachjookeb’ ru, a’ut neke’xk’am rib’ chirib’ileb’ rib’ chi yaal. Re xtenq’ankileb’ li komon chirilb’al chan ru naq eb’ li na’leb’ sa’ 2 Nefi 31 neke’xk’am rib’ chirib’ileb’ rib’, kanab’eb’ li komon, sa’ junesal malaj sa’eb’ li kok’ ch’uut, chirilb’aleb’ ru li raqal 4–21 ut te’xyiib’ jun kaaxukuut li naxk’ut chan ru naq li paab’aal chirix li Kristo, li jalb’a-k’a’uxlej, li kub’iha’, li maatan re li Santil Musiq’ej, ut kuyuk toj sa’ roso’jik, neke’xk’am rib’ chirib’ileb’ rib’, ut jo’kan wi’chik. Ye reheb’ naq te’xsik’ k’iila paay chan ru xb’aanunkil. Naq neke’xk’ut lix kaaxukuuteb’ chiru li tzoleb’aal, ye reheb’ naq te’xwotz k’a’ru xe’xtzol chirixeb’ li na’leb’ a’in. Chan ru naru taqak’anjela li na’leb’ a’in sa’ li qayu’am wulaj wulaj?

2 Nefi 31:15–20

“Ani nakuyuk toj saʼ rosoʼjik, aʼan li taakoleʼq.”

• Ma neke’xtaw ru li komon sa’ li tzoleb’aal k’a’ru xyaalal li kuyuk toj sa’ roso’jik? A’in jun ch’ina k’anjel li naru nekexxtenq’a. Tz’iib’a chiru li pizarron, Chan ru ninnaw ma yookin chi kuyuk toj sa’ roso’jik? Chirix a’an, ye reheb’ li komon sa’ li tzoleb’aal naq te’sik’oq sa’ 2 Nefi 31:15–20 re xtawb’al xsumenkil li patz’om a’in. Ye reheb’ li komon sa’ li tzoleb’aal naq te’xtz’iib’a chiru li pizarron eb’ li aatin malaj ch’ol aatin neke’xtaw li natenq’ank reheb’ sa’ xsumenkil. K’a’ut naq aajel ru li kuyuk toj sa’ roso’jik sa’ li tzol’leb’ re li Kristo? Naru ajwi’ taawotz li raatin li Elder Dieter F. Uchtdorf sa’ “Xkomon chik li k’anjeleb’aal,” malaj li atin chirix kuyuk toj sa’ roso’jik sa’ li perel 6 re Predicad mi Evangelio.

• Ma neke’xnaw ru li komon anihaq li naxk’ut rik’in xb’aanuhom li kuyuk toj sa’ roso’jik? K’a’ru xtenq’ank re li kristiaan a’in “chixtiikisinkil rib’ chi uub’ej chi xaqxo junelik rik’in li Kristo”? (raqal 20). K’oxla xwotzb’al resilaleb’ chik li kristiaan sa’eb’ li loq’laj hu li ke’kuyuk toj sa’ roso’jik.

2 Nefi 32:1–6

Li Santil Musiq’ej tixk’ut chiqu k’a’ru tento taqab’aanu.

• Sa’ 2 Nefi 32, laj Nefi ki’aatinak chirix jun ch’a’ajkilal kiril sa’ xtenamit chirix xk’anjelankil li tzol’leb’ re li Kristo. Naru taab’oqeb’ li komon sa’ li tzoleb’aal chixsik’b’al li ch’a’ajkilal a’in sa’ 2 Nefi 32:1, ut chirix a’an teeril ru lix sumehom laj Nefi sa’ 2 Nefi 32:2–6. Chan ru naq eb’ li komon sa’ li tzoleb’aal te’xye raj sa’ tz’aqal li raatineb’ li k’a’ru kixk’ut laj Nefi? K’a’ru xe’xnumsi li komon sa’ li tzoleb’aal, naq li Santil Musiq’ej malaj li raatin li Kristo xk’ut chiruheb’ k’a’ru tento te’xb’aanu?

2 Nefi 33

Lix Hu laj Mormon naxq’unb’esi qach’ool re taqapaab’ li Kristo.

• Laj Nefi kiraj naq li raatin tixq’unb’esi qach’ool “chixb’aanunkil li us ut chixpaab’ankil li Kristo” (2 Nefi 33:4). K’a’ruheb’ li aatin malaj li esilal sa’ 1 ut 2 Nefi li xe’xq’unb’esi qach’ool chixb’aanunkil li us ut chixpaab’ankil li Kristo? Naru taak’oxla xsik’b’aleb’ li b’ich te’ruuq chixb’ichankil malaj chirab’inkil laa tzoleb’aal li neke’aatinak chirixeb’ li na’leb’ a’in, jo’ “Ninpaab’ li Kristo” malaj “Ma chaab’il anajwan xninb’aanu arin?” (Eb’ li B’ich, 75, 143).

reetalil li tzolok

Xb’oqb’aleb’ chi tzolok sa’ kab’l

Jun na’leb’ re xwaklesinkileb’ xch’ool li komon chixtzolb’al Jakob 1–4 a’an xch’olob’ankil chiruheb’ naq sa’eb’ li ch’ol a’in te’xtaw lix tijom laj Jakob chirix wiib’ li maak li jwal ilb’ileb’ sa’ li qakutan laa’o.

reetalil li k’anjeleb’aal

Xkomon chik li k’anjeleb’aal

Li tzol’leb’ re li Kristo.

Li Elder Jeffrey R. Holland kixk’ut: “Li “tzol’leb’ re li Kristo” jo’ k’utb’il xb’aan laj Nefi sa’ lix nimal ru aatin naxjayali rib’ rik’in li paab’aal chirix li Qaawa’ Jesukristo, li kub’iha’ chi sub’b’il, xk’ulb’al li maatan re li Santil Musiq’ej, ut li kuyuk toj sa’ roso’jik. Ink’a’ naxyal xch’olob’ankil chixjunil li k’uub’anb’il na’leb’ re li kolb’a-ib’, chixjunileb’ li chaab’ilal re li Kristiaanil, malaj eb’ li qaq’ajkamunkil naru taqak’ul sa’ li jar tasal re choxahil loq’al. Sa’ li ch’olob’ank a’in, ink’a’ na’aatinak chirixeb’ li opiis sa’ li tijonelil, eb’ li k’ojob’anb’il k’anjel re li santil ochoch, ut naab’al chik li yaalil tzol’leb’. Chixjunileb’ a’in aajeleb’ ru, a’ut jo’ chanru naq yeeb’il sa’ lix Hu laj Mormon, “li tzol’leb’ re li Kristo” a’an ch’olch’o ru ut ink’a’ ch’a’aj. Na’aatinak ka’ajwi’ chirix li xb’eenileb’ na’leb’ re li evangelio, ut naxwaklesi qach’ool re tookuyuq, re tookanaaq chi paab’ank, re toob’eeq chi uub’ej. Relik chi yaal, a’ xb’aan naq ch’olch’o ru ut ink’a’ ch’a’aj “li tzol’leb’ re li Kristo” naq wan xnimal xwankil” (Christ and the New Covenant: The Messianic Message of the Book of Mormon [1997], 49–50).

Li Elder D. Todd Christofferson kixye: “Nintz’aama chiru chixjunileb’ … naq te’xsik’ rik’in li tijok ut rik’in tzolb’aleb’ li loq’laj hu jun xnawomeb’ xch’ool chirix lix diosilal li Jesukristo, chirix lix tojb’al rix li maak xb’aan, ut chirix lix waklijik chi yo’yo. K’ulub’omaq lix tzol’leb’ rik’in xjalb’al eek’a’uxl, xk’ulb’al li kub’iha’, xk’ulb’al li maatan re li Santil Musiq’ej, ut chirix a’an, chiru chixjunil eeyu’am rik’in xtaaqenkileb’ li chaq’rab’ ut li sumwank re lix evangelio li Jesukristo” (“La Doctrina de Cristo,” Liahona, mayo 2012, 89).

Li kuyuk toj sa’ roso’jik.

Li Elder Dieter F. Uchtdorf kixch’olob’:

“Naq toj alin chaq, lix yaalalil li “kuyuk toj sa’ roso’jik” a’an naq tento tinyal inq’e re tinwanq chi aj-o wu toj sa’ roso’jik li qach’utam sa’ li Iglees. Moqon, jo’ saaj winq … xink’oxla sa’ insaajil naq a’an reheb’ li tiixil komon li tento te’kuyuq toj sa’ roso’jik lix yu’ameb’. …

“… Li kuyuk toj sa’ roso’jik maawa’ yal naq taqakuyeb’ li ch’a’ajkilal sa’ li qayu’am, ut naq ink’a’ taqaq’axtesi qib’. Li qapaab’aal a’an jun paab’aal aj k’anjenel, li naxtenq’aheb’ li ralal xk’ajol li Dios sa’ li b’e laatz’ ut ka’ch’in ru re te’xtaw tz’aqal li naru chiruheb’ sa’ li yu’am a’in, ut re te’sutq’iiq rik’in a’an sa’ junaq kutan. Naq naqil chi jo’ka’in, li kuyuk toj sa’ roso’jik a’an nim xloq’al ut ch’ina-us, ink’a’ ch’a’aj ut ra xb’aanunkil. A’in jun paab’aal re sahil ch’oolejil, jun paab’aal re yo’onink, re metz’ew, ut re kole’k. …

“Li kuyuk toj sa’ roso’jik naraj naxye “xnimal qakuyum chixb’aanunkil li us,” (Romanos 2:7), xyalb’al qaq’e chixpaab’ankileb’ li taqlahom (chi’ilmanq 2 Nefi 31:10), ut xb’aanunkil li k’anjel re tiikilal (chi’ilmanq Tzol’leb’ ut Sumwank 59:23)” (“¿No tenemos razón para regocijarnos?” Liahona, noviembre 2007, 20).

Xchaab’ilob’resinkil li qak’utum

Nokotzolok sa’ komonil. Jo’ aj k’utunel, ink’a’ yal nakajek’i li na’leb’—yookat b’an chi tzolok aawochb’een li ani wankeb’ sa’ laa tzoleb’aal. Wotz rik’ineb’ li k’a’ru yookat chixb’aanunkil re tzolok sa’eb’ li loq’laj hu.