Kuyb’il xmaak, xb’aan laj Greg K. Olsen

9–15 marzo

Jakob 1–4

K’amomaq wi’chik eerib’ sa’ usilal rik’in li Dios xb’aan lix tojb’al rix li maak xb’aan li Kristo

Sa’ Jakob 1–4 wan naab’al li k’utum li nak’anjelak sa’ li kutan wanko wi’. Naq nakawileb’ ru li ch’ol a’in, k’oxla chan ru naru taatenq’aheb’ li nakatzoleb’ chixyu’aminkil li tzol’leb’ kixk’ut laj Jakob.

Xtz’iib’ankil li nakak’oxla

Xkanab’ankileb’ chi wotzok

Re xtenq’ankileb’ li komon chixwotzb’al li na’leb’ xe’xtaw sa’ Jakob 1–4, naru taajek’iheb’ li kok’ setb’il hu ut taaye reheb’ li komon sa’ li tzoleb’aal naq te’xtz’iib’a k’a’ru junaq raqal sa’eb’ li ch’ol a’in li xwulak chiruheb’. K’eheb’ li setb’il hu sa’ jun k’uleb’aal, isi junjunq, ut kanab’eb’ li ani xe’tz’iib’ank re li raqal a’an chixwotzb’al lix na’leb’eb’ chirix.

Xk’utb’al li tzol’leb’

Jakob 1:6–8, 15–19; 2:1–11; 4:18

Eb’ laj b’eresinel li tiikeb’ xch’ool neke’k’anjelak chi yalb’ileb’ xq’e re xkolb’aleb’ li aamej.

• Naru taatikib’ jun seraq’ chirix lix k’anjel laj Jakob sa’ xyanqeb’ lix tenamit, rik’in xpatz’b’al reheb’ li komon sa’ li tzoleb’aal naq te’xwotz lix numsihomeb’ naq xe’osob’tesiik xb’aan xk’anjel jun aj b’eresinel sa’ li Iglees. Malaj ut naru taapatz’ re jun aj b’eresinel—jun li wan anajwan malaj li wanjenaq junxil—re tixye resil jun hoonal naq kireek’a naq musiq’anb’il chixtenq’ankil anihaq. Chirix a’an, eb’ li komon sa’ li tzoleb’aal te’ruuq chixtawb’aleb’ li aatin ut li ch’ol aatin sa’ Jakob 1:6–8, 15–19; 2:1–11; and 4:18 li neke’tenq’an qe chixtawb’al ru k’a’ru kireek’a laj Jakob chirix lix b’oqb’al ut chirixeb’ li b’eresinb’ileb’ xb’aan. Chan ru naq xqileb’ laj b’eresihom qe chixnimob’resinkil ru lix b’oqb’aleb’? K’a’ru neke’xye li raqal a’in chirix chan ru naru taqaxaqab’eb’ xwankil li qab’eresinel?

Jo’ laj Jakob, eb’ laj b’eresinel sa’ li Iglees sa’ li kutan a’in “neke’xnimob’resi ru li ropiis chiru li Qaawa’.”

Jakob 2:12–21

Tento taqisi qib’ chiru li q’etq’etil ut taqatenq’aheb’ li neke’raj xtenq’ankil.

• Li Qaawa’ kaw lix tijom reheb’ laj Nefita chirix li q’etq’etil. Re xtikib’ankil li seraq’ chirix li na’leb’ a’in, naru taab’oqeb’ wiib’ oxib’ li komon chi rub’elaj, ut taaye reheb’ naq te’xsik’ li na’leb’ chan ru naq laj tza naxwaklesi li rahok b’ihomal sa’ li ruchich’och’ anajwan. Chirix a’an, b’oqeb’ chixwotzb’al rik’in li tzoleb’aal k’a’ru xe’xk’e reetal. Eb’ li komon sa’ li tzoleb’aal te’ruuq chi k’anjelak chi ka’kab’il re rilb’al ru Jakob 2:12–21 ut te’xsik’ k’a’ru kixk’ut li Qaawa’ chirix chan ru naq tento taqil li ruchich’och’il b’ihomal. Chirix a’an, te’ruuq chixyiib’ankil ut chixwotzb’al jun nimla perel hu li na’aatinak chirix li na’leb’ a’in. K’eheb’ xhoonal li komon sa’ li tzoleb’aal re te’xk’oxla xjuneseb’ k’a’ru neke’ru chixb’aanunkil re xk’anjelankil li k’a’ru xe’xtzol sa’ li raatin laj Jakob.

• Eb’ li komon sa’ laa tzoleb’aal te’ruuq chixnumsinkil wi’chik Jakob 2:12–21 ut te’xtz’iib’a lix patz’omeb’ re xtiqb’al sa’ lix tusleb’ aatin li Elder Perry. Chan ru naq li raatin li Elder Perry sa’ “Xkomon chik li k’anjeleb’aal” nokoxtenq’a chixtawb’al ru li raatin laj Jakob?

Jakob 2:23–35

Li Qaawa’ nasaho’ xch’ool rik’in li saq ru ch’oolejil.

• Li Elder David A. Bednar kixk’ut naq wanko “sa’ jun li ruchich’och’ li nareetz’u chi kok’ aj xsa’ lix santilal li k’iresink k’uula’al, ut naxsach xloq’al li yu’am reheb’ li winq” (“Creemos en ser castos,” Liahona, mayo 2013, 41–44). Chan ru naru taatenq’aheb’ li komon sa’ li tzoleb’aal chiroksinkil Jakob 2:23–35 re xyalb’aleb’ ru rik’in lix na’leb’ li ruchich’och’ chirix li saq ru ch’oolej? Maare jun na’leb’, a’an xtz’iib’ankil chiru li pizarron li aatin K’a’ru nareek’a li Qaawa’ chirix li saq ru ch’oolej? ut taapatz’ reheb’ li komon sa’ li tzoleb’aal naq te’xsik’ xsumenkil li patz’om. Junjunq reheb’ te’ruuq chi sik’ok sa’ Jakob 2:23–35, ut junjunq chik te’ruuq chi sik’ok sa’ li raatin li Elder Bednar li yeeb’il resil arin. Taaruuq te’xtz’iib’a chiru li pizarron li sumenk neke’xtaw. Re aatinak chirixeb’ li chaq’rab’, ut eb’ li osob’tesink neke’k’ule’ rik’in xpaab’ankil li chaq’rab’ re saq ru ch’oolej, naru teeril ru “Pureza sexual” (Para la Fortaleza de la Juventud, 35–37), malaj taak’ut jun reheb’ li video li yeeb’ileb’ resil sa’ “Xkomon chik li k’anjeleb’aal.” K’a’ru li osob’tesink li nachal rik’in wank chi saq ru qach’ool?

Jakob 4:4–11

Eb’ laj Nefita ke’xpaab’ li Jesukristo.

• Laj Jakob kiraj naq taqanaw naq us ta kiwan a’an ut lix tenamit k’iila cient chihab’ rub’elaj lix k’anjel li Kolonel sa’ ruchich’och’, eb’ a’an ke’xnaw ru a’an ut ke’ilok wan wi’ re xk’ulb’al lix kolb’aleb’. Jo’ yeeb’il sa’ Jakob 4:4–5, k’a’ut naq eb’ laj Nefita ke’xpaab’ lix chaq’rab’ laj Moises? K’a’ru wan qik’in sa’ li kutan a’in li nab’eresink re li qaam rik’in li Kolonel? K’a’ru li eetalil ut li jaljookil ru aatin kiroksi laj Jakob re k’utuk chirix li Jesukristo? (chi’ilmanq ajwi’ Genesis 22:1–13).

Jakob 4:8–18

Naru nawisi wib’ sa’ li musiq’ejil mutz’il rik’in xjayalinkil wib’ rik’in li Kolonel.

• Ma wan ani sa’ laa tzoleb’aal li xwulak rik’in laj yiib’anel lem re taaril lix naq’ ru? Wi wan, naru taapatz’ re li kristiaan a’an chan ru naq laj b’anonel xyal rix li rilom. Eb’ li komon te’ruuq chixwotzb’al k’a’ru neke’xk’oxla naq naraj naxye li musiq’ejil mutz’il. Chan ru naq lix mutz’il li musiq’ej chanchan lix mutz’il li tz’ejwalej? B’oqeb’ li komon sa’ li tzoleb’aal chixyeeb’al chan ru naru taqanaw ma mutz’o sa’ musiq’ejil. Naru ajwi’ te’ril ru Jakob 4:8–18 ut te’xye k’a’ru naru taqab’aanu re naq mas wi’chik tooruuq chirilb’al li k’a’aq re ru re musiq’ej.

• Li Elder Quentin L. Cook kixye kaahib’ paay chan ru naq eb’ li kristiaan naru “neke’xq’ax li aajel raj ru xsik’b’al” sa’ li kutan a’in (chi’ilmanq “Xkomon chik li k’anjeleb’aal”). Chan ru naq li raatin a’an nokoxtenq’a chixtawb’al ru Jakob 4:13–15? K’a’ru xyaalal xq’axb’al li aajel raj ru xsik’b’al? Chan ru naru taqak’e reetal naq ink’a’ taqaq’ax li aajel raj ru xsik’b’al?

Xb’oqb’aleb’ chi tzolok sa’ kab’l

Re xwaklesinkileb’ xch’ool li komon sa’ li tzoleb’aal chirilb’al ru Jakob 5–7, ye reheb’ naq te’xtaw xsumenkil li patz’om sa’ Jakob 4:17 naq neke’ril ru rik’in tijok li oxib’ chik ch’ol.

Xkomon chik li k’anjeleb’aal

Li qana’leb’ chirix li ruchich’och’il b’ihomal

Sa’ aatinak chirix Jakob 2:13–19, li Elder L. Tom Perry kixk’ut: “Tento taqak’ul sa’ qach’ool li raatin laj Jakob. Tento raj taqil ru li raqal a’in chanchan tz’iib’anb’il tz’aqal choq’ qe laa’o sa’ li kutan a’in, xb’aan naq yaal a’an. Rik’in li raatin tento raj taqapatz’ qib’ li patz’om sa’ li qaam. Ma chaab’il li wanko wi’ sa’ li qayu’am? Ma yooko chixk’uulankil xb’een wa li k’a’aq re ru li taakanaaq chi junelik? Ma yooko chirilb’al li k’a’aq re ru re li junelik q’e kutan? Malaj ma xoot’ane’ sa’ li ra’al re xsik’b’al xb’een wa li k’a’aq re ru re li ruchich’och’, ut chirix a’an xkanab’ankil li Qaawa’?” (“Edifiquemos el reino de Dios,” Liahona, julio1987, 32).

Eb’ li video chirix li saq ru ch’oolej (ChurchofJesusChrist.org)

• “Yo escojo ser limpio”

• “La castidad: ¿Cuáles son los límites?”

• “Normas: La pureza sexual y la modestia - La verdadera confianza”

Xq’axb’al li aajel raj ru xsik’b’al

Li Elder Quentin L. Cook kixk’ut chan ru naq naru “naqaq’ax li aajel raj ru xsik’b’al”:

“Xk’eeb’al lix na’leb’eb’ li winq choq’ ruuchil li yaalil na’leb’ re li evangelio”

“Wankeb’ li neke’xutaanak xb’aan naq ch’olch’o ru li raatin li Kolonel. Neke’raj naq ch’a’ajaq ut toj reetal naq moymooq ru li yaal, re naq taa’ajmanq ru xnimal ru li na’leb’ re xtawb’al ru, jo’ k’aynaqeb’ sa’eb’ li ninqi tzoleb’aal. … Naqaq’ax li aajel raj ru xsik’b’al naq ink’a’ naqaj xk’ulb’al jo’ yaal li saqen ruhil yaal re li evangelio.

“Li q’axok-ib’ chirix li evangelio”

Naqaq’ax li aajel raj ru xsik’b’al naq naqataqsi jun raqal chi na’leb’, us ta maare chaab’il, ut naqak’e xnimal xwankil toj reetal naq ink’a’ chik k’eek’o qach’ool rik’ineb’ chik li raqal chi na’leb’ li aajeleb’ ajwi’ ru, malaj naq naqak’oxla li k’a’ru naka’pak’alink re li yeeb’il xb’aaneb’ laj jolominel sa’ li Iglees.”

“Li xninqal ru k’anjel ruuchil li q’axtesink-ib’ wulaj wulaj”

“Wankeb’ li komon li neke’xye naq te’xq’axtesi rib’ chi anchaleb’ xch’ool wi neke’xk’ul jun xnimal ru b’oqb’al, a’ut ink’a’ neke’xk’oxla naq li k’anjelak jo’ aj ilol komon wan tz’aqal xnimal ru re te’xb’aanu rajlal.”

“Xtaqsinkil li kok’ chaq’rab’ sa’ xb’een li tzol’leb’ ”

“Eb’ li k’eek’ookeb’ xch’ool chixtaaqenkileb’ li kok’ chaq’rab’ chi ink’a’ neke’xk’oxla li tzol’leb’ ut li na’leb’ li k’ojk’ookeb’ wi’, a’aneb’ ajwi’ li neke’xq’ax li aajel raj ru xsik’b’al” (“Traspasar lo señalado,” Liahona, marzo 2003, 22–24).