eb’ li winq li yookeb’ chi k’anjelak sa’ xyanqeb’ lix toonal olivo

Li jaljookil ru aatin chirix li toon olivo, xb’aan laj Brad Teare

16–22 marzo

Jakob 5–7

Li Qaawa’ qochb’een nak’anjelak

Tikib’ xkawresinkil aawib’ chi k’utuk rik’in rilb’al ru Jakob 5–7, aajunes ut rik’in laa junkab’al. K’a’ru xatzol li taak’anjelaq reheb’ li tzolb’ileb’ aab’aan? Li tusleb’ aatin a’in naru tixk’e chik xkomon aana’leb’.

Xtz’iib’ankil li nakak’oxla

reetalil li wotzok

Xkanab’ankileb’ chi wotzok

K’a’ru xe’xtaw li komon sa’ li tzoleb’aal sa’ Jakob 5–7 li xwaklesi xch’ooleb’ chi “k’anjelak sa’ li awimq” b’ar wankeb’ wi’? (Jakob 5:15).

reetalil li k‘utuk

Xk’utb’al li tzol’leb’

Jakob 5

Li Qaawa’ naxb’oqeb’ lix moos chi k’anjelak rochb’een a’an sa’ li rawimq.

• Rik’in naq li jaljookil ru aatin chirixeb’ lix toonal li che’ olivo najt roq ut ch’a’aj b’ayaq, maare usaq k’anjelak sa’ komonil jo’ tzoleb’aal, re xk’osb’al ru li jaljookil ru aatin. Qayehaq, taaruuq taayiib’ xjalam-uuch li xninqal ru na’leb’ re li jaljookil ru aatin chiru li pizarron, malaj taayiib’ jun xtzolil lix numik li kutan (jo’ eetalil, chi’ilmanq li wan sa’ xraqik li tusleb’ aatin a’in). Eb’ li komon sa’ li tzoleb’aal te’ruuq chixtiqb’aleb’ li raqal sa’eb’ li loq’laj hu malaj li ch’olob’anb’il sa’eb’ a’an chiru li jalam-uuch, ut taaruuq te’aatinaq chirix k’a’ru xyaalalileb’ li eetalil, jo’eb’ li chaab’il xtoonal olivo ut li olivo re k’iche’, li Qaawa’ re li awimq, li moos, ut li ru che’ li us ut li ink’a’ us. Sa’ li seraq’ a’in, numsihomaq wi’chik eb’ li raqal 61–75, li neke’aatinak chirix lix k’anjel li Qaawa’ sa’ li qakutan laa’o. Chan ru naq yooko chi k’anjelak sa’ li rawimq li Qaawa’? Chan ru naq eb’ li raqal a’in neke’xk’am rib’ rik’in li k’anjel li yooko chixb’aanunkil?

• Li raatin li “Qaawa’ re li awimq” naru chixk’ojob’ankil xch’ooleb’ lix na’ xyuwa’eb’ li alal k’ajolb’ej li xe’sach xb’e. Qayehaq, k’a’ru naxye sa’ Jakob 5:41, 46–47 chirix k’a’ru nareek’a li qaChoxahil Yuwa’ chirixeb’ li ralal xk’ajol li neke’sach xb’eheb’? Chan ru naq a’an naxyal xkolb’aleb’? (che’ilmanq li raqal 61–75).

• Sa’ Jakob 5:61–75, k’utb’il naq li Qaawa’ nak’anjelak rochb’eeneb’ lix moos sa’ li awimq. Eb’ li komon sa’ li tzoleb’aal taaruuq te’rileb’ ru li raqal a’in sa’ kok’ ch’uut, ut te’aatinaq chirix li k’a’ru xe’xk’ul eb’ a’an li naxk’ut chiruheb’ naq li Qaawa’ yoo chi k’anjelak rochb’eeneb’ lix moos re xtiikisinkil chi uub’ej lix k’anjel. K’a’ chik ru li na’leb’ naru neke’xtaw li komon sa’ li tzoleb’aal sa’ li raatin li Awa’b’ej Henry B. Eyring, “Li Qaawa’ najolomin re lix Iglees”? (Jolomil ch’utub’aj-ib’ re octubre 2017).

  jun sumaleb’ li tiixil misioneer yookeb’ chi k’anjelak rik’in xkomoneb’ chik chiru jun ulul ch’iich’

  Naru nokok’anjelak qochb’een li “Qaawa’ re li awimq” arin sa’ li ruchich’och’.

Jakob 6:3–13

Li Qaawa’ naxk’oxlaheb’ lix tenamit rik’in rahok ut uxtaan.

• Sa’ Kim, Taaqehin—Choq’ reheb’ li komon ut li junkab’al, k’eeb’il qab’oqb’al chi sik’ok sa’ Jakob 6:3–5 re xtawb’aleb’ li esil kiraj laj Jakob xch’olob’ankil chi us, ut chirix a’an xsik’b’aleb’ li esil a’an sa’ li jaljookil ru aatin chirixeb’ lix toonal li olivo (chi’ilmanq Jakob 5). Maare usaq choq’ reheb’ li komon sa’ li tzoleb’aal wi eb’ li xe’b’aanunk re li ch’ina k’anjel a’in te’xye resil, malaj wi te’xb’aanu li k’anjel a’in jo’ tzoleb’aal. Taaruuq te’xtz’iib’a chi tusb’il eb’ li yaalil na’leb’ re li evangelio li neke’xtaw sa’ Jakob 6. Chirix a’an, rub’el li junjunq chi yaalil na’leb’, taaruuq te’xtz’iib’a k’a’ruheb’ li raqal sa’ li jaljookil ru aatin sa’ Jakob 5 li neke’xk’ut li na’leb’ a’an. Chan ru naq eb’ li komon sa’ li tzoleb’aal neke’rileb’ li esil a’in chi k’utk’u sa’ xyu’ameb’?

• Jun xyaalalil li aatin jilok a’an xchapb’al rib’ chiru k’a’ruhaq chi ink’a’ noko’eek’an. Maare usaq xyeeb’al lix yaalalil a’in reheb’ li wankeb’ sa’ aatzoleb’aal, ut taapatz’ k’a’ru li na’leb’ naxk’e reheb’ chirix Jakob 6:5.

Jakob 7:1–23

Naru nokowan chi xaqxo chi kaw naq wan ani naxyal xsachb’al li qapaab’aal.

• Chiqajunilo xqanumsi xyalb’al rix li qapaab’aal jo’ li kixk’ul laj Jakob naq ki’aatinak rik’in laj Xerem. Jun na’leb’ re xtenq’ankileb’ li komon sa’ li tzoleb’aal chixkawresinkil rib’ choq’ re li yalok-ix a’in, a’an xkanab’ankileb’ chixsik’b’al sa’ Jakob 7:1–23 re xtawb’aleb’ li na’leb’ li ke’tenq’ank re laj Jakob chi wank chi xaqxo chi kaw. K’a’ chik ru li esilal chirix li wank chi xaqxo chi kaw sa’ li paab’aal naru naqawotz—sa’eb’ li loq’laj hu, sa’ resileb’ li qaxe’ qatoon, malaj sa’ li qayu’am laa’o? Maare wankeb’ li raatineb’ laj jolominel re li Iglees li xe’tenq’ank qe naq wankeb’ li xe’xyal ru re xsachb’al li qapaab’aal (jo’ jun eetalil, chi’ilmanq, Quentin L. Cook, “Kawilal sa’ li ch’olob’anb’il yaal chirix li Jesus,” Jolomil ch’utub’aj-ib’ re octubre 2016). Waklesiheb’ xch’ool li komon sa’ li tzoleb’aal re te’xwotzeb’ li esil li xtenq’ank reheb’.

• Naq laj Jakob kiwan chi aatinak rik’in laj Xerem, laj Xerem kiraj raj xchiq’b’al xpaab’aal laj Jakob, a’ut lix paab’aal laj Jakob ink’a’ naru chi chiq’mank (chi’ilmanq Jakob 7:5). Eb’ li komon sa’ li tzoleb’aal maare taawulaq chiruheb’ xb’aanunkil jun k’utb’esink rik’in li raatin laj Jakob ut laj Xerem, li natawman sa’ Jakob 7:1–23. K’a’ru naqatzol sa’eb’ li raqal a’in chirix lix na’leb’eb’ ut li raatineb’ li neke’xyal xsachb’al lix k’anjel li Dios? K’a’ru naqatzol rik’in laj Jakob chirix chan ru naq ink’a’ toochiq’manq sa’ li qapaab’aal?

Jakob 7:24–25

Naru taqakanab’ qib’ chiru li Dios.

• Eb’ laj Nefita rajlal wan naq neke’chal laj Lamanita chi pleetik rik’ineb’. Us ta laa’o ink’a’ wanko chi pleetinb’il wulaj wulaj sa’ tz’ejwalej, k’a’ru li xiwxiw re li musiq’ej li naqak’ul? K’a’ru naqatzol rik’in li k’a’ru ke’xb’aanu eb’ laj Nefita sa’ li wankeb’ wi’, jo’ yeeb’il resil sa’ Jakob 7:24–25? Maare taawaj xb’ichankil malaj xyaab’asinkileb’ li b’ich re li Iglees li neke’oksink re li pleetik jo’ jaljookil ru aatin, jo’ “B’oqb’ilo chixpleetinkil li maa’usilal” malaj “Cheril! Lix teep li rey” (Eb’ li B’ich, 160, 161).

reetalil li tzolok

Xb‘oqb‘aleb‘ chi tzolok sa‘ kab‘l

Re xwaklesinkileb’ xch’ool li komon sa’ li tzoleb’aal chirilb’al ru lix hu laj Enos, ye reheb’ naq a’an tixk’ut chiruheb’ chan ru xchaab’ilob’resinkil lix tijeb’.

Xchaab’ilob’resinkil li qak’utum

K’e aach’ool chixk’utb’al li tz’aqal tzol’leb’. K’e reetal naq li seraq’ sa’ laa tzoleb’aal taawanq chi kab’lanb’il sa’ xb’eeneb’ li tzol’leb’ li neke’tawman sa’eb’ li loq’laj hu. Naru taab’aanu a’in rik’in xpatz’b’al reheb’ li komon sa’ li tzoleb’aal naq te’rileb’ li raqal sa’eb’ li loq’laj hu, ut te’xwotz li yaalil na’leb’ neke’xtaw, jo’ ajwi’ li k’a’ru xe’xk’ul rik’in xyu’aminkil li yaalil na’leb’ a’an. (Chi’ilmanq Li k’utuk jo’ li Kolonel, 20–21.)

xjalam-uuch li jaljookil ru aatin chirix lix toonal li che’ olivo