li Jesus yoo chixye’b’al li ruq’ re jun li ixq

Tixk’am aab’e chiruq’, xb’aan li xSandra Rast

24 febrero–1 marzo

2 Nefi 26–30

“Jun li sachb’a-ch’oolejil k’anjel ut jun li eetalil”

Chijultiko’q aawe naq li junkab’al tento raj naq taawanq choq’ xch’oolil li tzolok chirix li evangelio. A’an rik’in tzolok aajunes ut sa’ junkab’al sa’ 2 Nefi 26–30 naq tento taakawresi aawib’ chi k’utuk. K’uub’ aana’leb’ chan ru naq taanima ru, taak’e xkawilal, ut taawaklesiheb’ xch’ool li ani wankeb’ sa’ laa tzoleb’aal re te’tzoloq xjuneseb’ ut sa’ junkab’al.

Xtz’iib’ankil li nakak’oxla

reetalil li wotzok

Xkanab’ankileb’ chi wotzok

Sa’ xtiklajik li tzolok, kanab’eb’ li komon chixwotzb’al k’a’ruhaq sa’ 2 Nefi 26–30 li xwulak chiruheb’ naq xe’tzolok sa’ kab’l. Qayehaq, naru taapatz’ naq te’xwotz sa’ junpaat junaq raqal li xtenq’an reheb’ chixtawb’al ru li kutan wanko wi’ ut eb’ li ch’a’ajkilal naqak’ul.

reetalil li k‘utuk

Xk’utb’al li tzol’leb’

2 Nefi 26:24–28, 33

Chixjunil li naxb’aanu li Qaawa’ a’an xb’aan lix rahom choq’ qe.

• Wi nakaweek’a naq us aatinak chirix lix k’utum laj Nefi chirix lix rahom li Qaawa’, naru taab’aanu a’in: Chirix rilb’al ru 2 Nefi 26:24 sa’ komonil, kanab’eb’ li komon sa’ li tzoleb’aal chixtz’iib’ankil chi tustu li k’a’aq re ru xb’aanu li Jesukristo choq’ reheb’ sa’ xk’ab’a’ naq naxraheb’. Chan ru naq a’an “naxjilosi chaq chixjunileb’ li winq rik’in”? K’a’ru naqeek’a laa’o naq eek’asinb’ilo chixb’aanunkil re xsumenkil lix rahom choq’ qe?

• Eb’ lix b’oqom li Qaawa’ sa’ 2 Nefi 26:24–28, 33 a’aneb’ jun nimla reetalil lix rahom. Jun na’leb’ re taatenq’aheb’ li komon chixtawb’aleb’ li b’oqok a’in, a’an xyeeb’al reheb’ naq te’xk’os ru li raatin li Qaawa’ sa’ jun ajwi’ li ch’ol aatin. Maare junjunqeb’ li komon sa’ li tzoleb’aal te’raj xwotzb’al chan ru naq xe’xk’os ru. Chan ru naq eb’ li raqal a’in maare te’xjal chan ru naq naqab’oqeb’ li qas qiitz’in chi chalk rik’in li Kristo? Waklesiheb’ xch’ool li wankeb’ sa’ li tzoleb’aal re te’xwotz lix k’oxlahomeb’ ut li reek’ahomeb’. Re xk’eeb’al xb’oqb’al li Musiq’ej, naru taak’oxla xyaab’asinkil xyaab’ jun li b’ich chirix lix rahom li Jesus, jo’ “Chalqex rik’in li Kolonel” (Eb’ li B’ich, 68), naq eb’ li komon sa’ li tzoleb’aal yookeb’ chi k’oxlak.

2 Nefi 27; 29; 30:3–8

Aajel ru lix Hu laj Mormon sa’ lix k’anjel li Dios sa’ roso’jikeb’ li kutan.

• Eb’ li wankeb’ sa’ laa tzoleb’aal maare te’raj ru xtenq’ankileb’ re xtawb’al ru li profeetil aatin sa’ 2 Nefi 27 chirix jun li hu li k’eeb’il xtz’apb’al, ut jun li winq li tzolb’il. Li esilal sa’ “Xkomon chik li k’anjeleb’aal” maare tatxtenq’a. Ma taak’anjelaq choq’ re laa junkab’al wi junjunqeb’ li komon te’xb’aanu jun k’utb’esink chirix li k’a’ru yeeb’il resil sa’ li esilal a’an, ut sa’ 2 Nefi 27:15–22? K’a’ut nakak’oxla naq kik’utb’esiman li na’leb’ a’in chiru laj Nefi naab’al chihab’ ma nak’ulman? K’a’ru naxk’ut lix profeetil aatin laj Nefi chirix lix aajelil ru lix Hu laj Mormon? Kanab’eb’ li komon sa’ li tzoleb’aal chi wotzok chirib’ileb’ rib’ chirix chan ru xe’xk’ul xnawomeb’ xch’ool chirix lix Hu laj Mormon.

• Ma wan ani sa’ laa tzoleb’aal li xb’oqok re anihaq chik chirilb’al ru lix Hu laj Mormon, li taaruuq raj tixwotz resil? K’a’ut naq wan naq maare wankeb’ li ink’a’ te’k’uluq re lix b’oqb’aleb’ chirilb’al xsa’ lix Hu laj Mormon? Lix yehom li Qaawa’ chirix jun reheb’ li na’leb’ a’in natawman sa’ 2 Nefi 29:6–11. Naru taab’oqeb’ li komon sa’ li tzoleb’aal chirilb’aleb’ ru li raqal a’in, ut chirix a’an te’xk’utb’esi chan ru naq te’xsume rik’in rahok anihaq li taayehoq re naq moko aajel ta ru lix Hu laj Mormon. K’a’ chik ru neke’ru chixk’oxlankil li komon sa’ li tzoleb’aal chirix chan ru xtenq’ankileb’ li ras riitz’in chixnawb’al naq lix Hu laj Mormon “a’an jun osob’tesink ke’xk’ul sa’ ruq’ li Dios”? (2 Nefi 30:6).

2 Nefi 28

Laj Satanas naxsik’ b’alaq’ink.

• Sa’ li tusleb’ aatin choq’ re li xamaan a’in sa’ Kim, Taaqehin—Choq’ reheb’ li komon ut li junkab’al, na’aatinak chirix xsik’b’aleb’ lix tik’ti’ laj Satanas li yeeb’ileb’ resil sa’ 2 Nefi 28. Maare eb’ li komon sa’ li tzoleb’aal te’ruuq chixwotzb’al k’a’ru xe’xtaw, malaj te’ruuq chirilb’al ru sa’ junpaat 2 Nefi 28 sa’ li tzoleb’aal, ut te’xtz’iib’a chi tustu eb’ lix tik’ti’ laj Satanas li neke’ru chixtawb’al. Maare usaq xkanab’ankileb’ chi k’anjelak sa’ kok’ ch’uut re xsik’b’aleb’ li raqal sa’eb’ li loq’laj hu li neke’sumenk reheb’ li b’alaq’il na’leb’ a’in (wi neke’raj xtenq’ankil, naru taawotz li k’a’ru yeeb’il sa’ “Xkomon chik li k’anjeleb’aal”). Chirix a’an, eb’ li jar ch’uut te’ruuq chixwotzb’al chirib’ileb’ rib’, ut te’aatinaq chirix chan ru naq te’ruuq chixk’eeb’al reetal eb’ li “tzol’leb’ moko yaal ta ut jo’maajo’ ut maak’a’ xyaalal” re laj tza (2 Nefi 28:9).

reetalil li tzolok

Xb’oqb’aleb’ chi tzolok sa’ kab’l

Eb’ li komon sa’ li tzoleb’aal maare te’eek’asiiq chirilb’al ru 2 Nefi 31–33 wi neke’xnaw naq sa’eb’ li ch’ol a’in wan li raatin laj Nefi kixtz’iib’a sa’ roso’jik lix yu’am, ut naq sa’eb’ a’an naxye resil li tzol’leb’ re li Kristo chi k’osb’il ru ut chi ch’olch’o ru.

reetalil li k’anjeleb’aal

Xkomon chik li k’anjeleb’aal

“Toja’ naq li tzolb’il tixye: Ink’a’ ninru chirilb’al xsa’ ” (2 Nefi 27:18).

Sa’ febrero 1828, laj Martin Harris, jun ramiiw laj Jose Smith, “xko’o sa’ li nimla tenamit Nueva York sa’ releb’aal saq’e, ut kixk’am junjunqeb’ li tz’iib’ isinb’il chaq sa’eb’ li perel ch’iich’ oor, re xk’utb’al chiruheb’ laj tzolonel. Maare kiraj xnawb’al naq tz’aqal yaaleb’ li perel ch’iich’, malaj ut maare kixk’oxla naq wi te’xch’olob’ xyaalal, taaruuq chixk’ulb’al li tumin chi to’ninb’il re xpuktesinkil li hu. A’an kixye naq li Qaawa’ ki’eek’asink re chi xik sa’ li tenamit a’an.

“Sa’eb’ li kutan a’an, laj Jose ut laj Martin ka’ch’in ajwi’ li neke’xnaw chirix li aatinob’aal li tz’iib’anb’il chiruheb’ li perel ch’iich’. Ka’ajwi’ neke’xnaw li k’a’ru kixye li anjel Moroni chiru laj Jose: naq a’an jun najteril esilal chirix li ch’och’ America. Chi jo’kan, ruuchil xsik’b’al junaq tzolb’il winq li wan xnawom chirix li aatinob’aal Egipcio (moqon laj Jose kixtzol naq li aatinob’aal sa’eb’ li perel ch’iich’ a’an “jaljookil ru Egipcio” yeeb’il re), laj Martin kiwulak rik’in junjunq aj tzolonel li neke’tzolok chirix li najteril na’leb’, ut k’a’jo’ wi’chik li wan sa’ America.

“… Sa’ xyanqeb’ laj tzolonel kiwulak wi’ laj Martin a’an laj Charles Anthon, jun saaj aj tzolonel chirixeb’ li aatinob’aal, li nak’anjelak sa’ li nimla tzoleb’aal re Columbia. Li Qawa’ Anthon yoo chaq chixtz’iib’ankileb’ li esilal ut li seraq’ reheb’ chaq li ral ch’och’ aj America re xpuktesinkil, ut kiraj xtz’ilb’al rix li hu li kixk’am laj Martin rik’in.

“Laj Martin kixye naq li Qawa’ Anthon kixye naq tz’aqal yaaleb’ li tz’iib’ toj reetal naq kixtzol chan ru naq laj Jose Smith kixtaweb’. Kixye re laj Martin naq tixk’ameb’ chaq li perel ch’iich’. Laj Martin kixye naq ink’a’ tixb’aanu, ut li Qawa’ Anthon kichaq’ok rik’in aatin natawman sa’ jun raqal re Isaias, “Ink’a’ naru nawil ru jun li tz’aptz’ookil hu.” Us ta li Qawa’ Anthon moqon kixye naq ink’a’ kik’ulman jo’ kixye laj Martin, naqanaw chi yaal a’in: laj Martin ki’el chaq rik’ineb’ laj tzolonel sa’ releb’aal saq’e chi k’eek’o xch’ool naq laj Jose Smith b’oqb’il xb’aan li Dios, ut naq eb’ li perel hu ut li tz’iib’ a’aneb’ re najter kutan. A’an ut laj Jose ke’ril lix wulajik rik’in li Qawa’ Anthon jo’ jun xtz’aqob’resinkil ru lix profeetil aatin laj Isaias (li yeeb’il resil sa’ ajwi’ lix Hu laj Mormon), chirix jun li “hu tz’apb’il chi us; wi li hu a’an taak’eemanq chixyaab’asi junaq li naxnaw ilok ru hu, ut taayeemanq re, Yaab’asi xsa’ li hu a’in, a’an tixsume: Ink’a’ tinruuq xb’aan naq tz’aptz’o chi us li hu” (Isaias 29:11; chi’ilmanq ajwi’ 2 Nefi 27:15–18)” (“Las contribuciones de Martin Harris,” Revelaciones en contexto [2016], history.ChurchofJesusChrist.org).

Eb’ li raqal sa’eb’ li loq’laj hu li neke’xsach xwankil lix b’alaq’il na’leb’ laj Satanas.

B’alaq’il tzol’leb’	Yaalil tzol’leb’
“Sa’ li kutan a’in moko a’an wan ta choq’ Dios re sachb’a-ch’oolej; ak xb’aanu lix k’anjel“ (2 Nefi 28:6).	Moroni 7:35–37
“Li Dios … tixtiikob’resi eeru rik’in xb’aanunkil b’ayaq li maak” (2 Nefi 28:8).	Tzol’leb’ ut Sumwank 1:31
“Chaab’il chixjunil arin Sion” (2 Nefi 28:21).	Tzol’leb’ ut Sumwank 63:31; 82:14
“Maawa’in aj tza, xb’aan naq maak’a’ junaq” (2 Nefi 28:22).	2 Nefi 2:17; Tzol’leb’ ut Sumwank 76:25–27
“Maajun chik raatin li Dios naqaj ru, xb’aan naq ak tz’aqal qe” (2 Nefi 28:29).	2 Nefi 28:30; Eb’ lix Raqalil li Paab’aal 1:9

Xchaab’ilob’resinkil li qak’utum.

Matk’oxlak naq maa’ani na’aatinak. “Eb’ li chaab’il patz’om hoonal neke’raj re xsumenkil. Neke’raj li tz’ilok-ix sa’ ch’oolej, li sik’ok, ut li musiq’anb’il na’leb’. Li hoonal na’oyb’eniik wi’ xsumenkil jun li patz’om naru taa’ok choq’ jun loq’laj hoonal re tz’ilok-ix sa’ ch’oolej. Mat-aaleek chixraqb’al li hoonal a’in sa’ junpaat rik’in xsumenkil aajunes aapatz’om, malaj rik’in xtikib’ankil jalan chik li na’leb’ ” (Li k’utuk jo’ li Kolonel, 31).