laj Isaias naq yoo chi tz’iib’ak chiru b’otb’ookil hu

17–23 febrero

2 Nefi 11–25

“Nasaho’ sa’ qach’ool rik’in li Kristo”

Rochb’een xjuntaq’eetankil 2 Nefi 11–25 aawik’in, k’oxla chan ru naq taatenq’aheb’ li tzolb’ileb’ aab’an chixjuntaq’eetankileb’ li ch’ol a’in rik’ineb’ (chi’ilmanq 2 Nefi 11:8). Naq li Musiq’ej naxk’e aawe li na’leb’ ut li k’oxlahom, tz’iib’a resil.

Xtz’iib’ankil li nakak’oxla

reetalil li wotzok

Xkanab’ankileb’ chi wotzok

Rub’elaj aatinak chirixeb’ li jar raqal sa’ 2 Nefi 11–25, maare us raj xpatz’b’al reheb’ li komon sa’ li tzoleb’aal naq te’xk’oxla naq wan jun ramiiw li ch’a’aj chiru xtawb’al ut reek’ankil xyaalal lix hu laj Isaias. K’a’ruheb’ li raqal te’ruuq chixk’utb’al chiru li ramiiw a’an?

reetalil li k‘utuk

Xk’utb’al li tzol’leb’

2 Nefi 11–24

Laj Isaias kixch’olob’ xyaalal li Jesukristo.

• Wan naq q’axal wi’chik ink’a’ ch’a’aj xtawb’aleb’ ru lix profeetil aatin laj Isaias wi naqanaw k’a’ut naq ke’tz’iib’aman. Re xtikib’ankil aatinak chirixeb’ lix profeetil aatin laj Isaias sa’ 2 Nefi, naru taapatz’ reheb’ li komon sa’ li tzoleb’aal naq te’xtz’il rix li ch’ol 11 ut te’xtz’iib’a chi tusb’il wiib’ oxib’ li rajom laj Nefi naq kixtz’iib’a xk’ihal li raatin laj Isaias. Naru ajwi’ te’xwotzeb’ li raqal xe’xtaw naq yookeb’ chixtzolb’al 2 Nefi 12–24 xjuneseb’ malaj sa’ junkab’al, li neke’xk’oxla naq xe’xtz’aqob’resi ru li rajom laj Nefi. Chan ru naq xtawb’al ru li rajom laj Nefi naxtenq’aheb’ li komon sa’ li tzoleb’aal chixtawb’al ru lix tz’iib’ahom laj Isaias? Waklesiheb’ xch’ool re te’xk’oxlaheb’ li ajom a’in naq neke’aatinak chirix lix tz’iib’ahom laj Isaias sa’ li tzoleb’aal.

• Rik’in naq laj Isaias kiroksiheb’ k’iila jaljookil ru eetalil, wan naq ink’a’ nak’eeman reetal naq kixch’olob’ xyaalal li Jesukristo rik’in nimla wankilal. A’in jun ch’ina k’anjel li naru chixjayalinkil ru laa tzoleb’aal rik’in li ch’olob’ank xyaalal a’in. Naru taakawresiheb’ chi rub’elaj junjunq kok’ setb’il hu tz’iib’anb’il wi’ b’ar wankeb’ li raqal sa’ 2 Nefi 12–24 li neke’xk’ut xyaalal li Kolonel (qayehaq, 2 Nefi 13:13; 14:4–6; 15:1–7; 16:1–7; 17:14; 18:14–15; 19:6–7; 21:1–5; 22:2). Li junjunq komon sa’ li tzoleb’aal naru chixsik’b’al ru jun reheb’ li kok’ setb’il hu a’in, tixtz’ileb’ rix li raqal li tz’iib’anb’ileb’ chiru, ut tixtz’iib’a chiru li setb’il hu k’a’ru xtzol chirix li Jesukristo. Chirix a’an, eb’ li komon sa’ li tzoleb’aal te’ruuq chixnumsinkil lix setb’il hu rik’in jalan chik, ut te’xtz’iib’a chik li na’leb’ malaj k’oxlahom xe’xtzol chirix li Kolonel sa’eb’ li raqal ajwi’ a’an. Chirix a’an naru taak’e xhoonaleb’ li komon sa’ li tzoleb’aal re te’xwotz k’a’ru xe’xtzol rik’in laj Isaias li naxchamob’resi lix nawomeb’ chirix li Jesukristo.

• Sa’ li profeetil aatin sa’ 2 Nefi 19:6, tz’iib’anb’il junjunq lix k’ab’a’ li Jesukristo. Naru taapatz’ re junaq naq tixtz’iib’aheb’ chiru li pizarron, ut taab’oqeb’ li komon sa’ li tzoleb’aal chi aatinak chirix k’a’ut naq li junjunq chi k’ab’a’ej naxye xyaalal li Kolonel. Chan ru naq a’an xb’aanuheb’ li k’anjel a’an sa’ li qayu’am? Re xtzolb’al chik chirixeb’ li k’ab’a’ej a’an, maare us raj xsik’b’aleb’ li raqal eetalinb’il toj rub’el li perel sa’ 2 Nefi 19:6.

2 Nefi 12:2–5; 21:10–12; 22

Sa’ roso’jikeb’ li kutan, eb’ lix tenamit li Qaawa’ te’ch’utub’amanq sa’ junajil ut te’wanq sa’ tuqtuukilal.

• Wankeb’ li raqal sa’eb’ lix profeetil aatin laj Isaias li k’a’jo’ neke’k’anjelak choq’ qe, xb’aan naq neke’aatinak chirix lix k’anjel li Dios sa’ roso’jikeb’ li kutan. Qayehaq, naru teetz’il rix 2 Nefi 21:10–12, li na’aatinak chirix jun li “eetalil” li taataqsimanq re xch’utub’ankileb’ lix tenamit li Dios. Chan ru naq qilom li Qaawa’ chixch’utub’ankileb’ lix tenamit sa’ musiq’ejil? Maare junjunq reheb’ li komon sa’ li tzoleb’aal taaruuq te’aatinaq chirix k’a’ut naq neke’raj ch’utub’aak rik’in lix tenamit li Dios sa’ li Iglees. Taaruuq ajwi’ te’xyiib’ jun li eetalil, li naxk’ut xyaalal junjunq li yaalil na’leb’ sa’ li evangelio, li “neke’xsik’ “ li tenamit, ut li te’xtenq’a “chixch’utub’ankileb’ ” (eb’ li raqal 10 ut 12) li ralal xk’ajol li Dios sa’ li qakutan laa’o. Chan ru nokotenq’ank laa’o sa’ li ch’utub’ank?

• Jun chik na’leb’ re aatinak chirix li raqal chi na’leb’ a’in, a’an xtz’iib’ankileb’ li jolomil aatin a’in chiru li pizarron: Xjek’inkileb’ laj Israel, Xch’utub’ankileb’ laj Israel, ut Profeetil aatin chirix li Kristo. Naru ajwi’ taak’eheb’ li ch’ol sa’ 2 Nefi 12–24 reheb’ kok’ ch’uut chi komon sa’ li tzoleb’aal, ut taakanab’eb’ chixtawb’aleb’ li raqal li neke’aatinak chirix li k’a’aq re ru a’in, ut te’xtz’iib’a rub’el jun reheb’ li jolomil aatin chiru li pizarron li na’ok wi’. K’a’ruheb’ li esilal sa’eb’ li raqal a’in choq’ qe laa’o? (Maare us raj xyeeb’al reheb’ li komon sa’ li tzoleb’aal naq Tzol’leb’ ut Sumwank 113:1–6 naru naxtenq’aheb’ chixtawb’al ru 2 Nefi 21:1–5, 10.)

• Eb’ li b’ich jo’ “Taqe’q sa’ xb’een li tzuul” (Eb’ li B’ich, 4) malaj “Laa’at lin saqen” (Eb’ li B’ich, 47), li neke’aatinak chirixeb’ li profeetil aatin sa’ 2 Nefi 12:2–5 ut 2 Nefi 22, neke’ru chixxaqab’ankil xwankil li esilal ut li musiq’ej sa’ li raatin laj Isaias.

2 Nefi 14:4–6

Eb’ li qochoch ut eb’ li “ch’utleb’aal” sa’ Sion naru te’wanq choq’ xna’aj li kolok-ib’.

• Sa’ 2 Nefi 14:4–6, laj Isaias kixye proofetil aatin chirix li kole’k ut li tuqtuukilal t’exk’ul li tiikeb’ xch’ool chirix naq li Qaawa’ “tixchoy xch’ajb’al chaq” ut “tixchoy risinkil” lix maakeb’. Us ta eb’ li raqal a’in neke’aatinak chirix li k’a’ru taak’ulmanq sa’ li Jun Mil Chihab’, maare te’xtenq’aheb’ li komon naq neke’xsik’ li musiq’ejil kole’k sa’ xyi li maa’usilal li natawman sa’ roso’jikeb’ li kutan. Ye reheb’ naq te’xk’oxla ut te’aatinaq chirix k’a’ru xyaalal naq taawanq “jun choql ut sib’ ” ut jun “xam naxamnak” sa’ xb’een li “rochocheb’ ” ut lix “ch’utleb’aaleb’ ” (raqal 5; chi’ilmanq ajwi’ Exodo 13:21–22). K’a’ru li natawman anajwan li naru xjuntaq’eetankil rik’in li tiq, li kaq-sut-iq’, ut li hab’ li yeeb’ileb’ resil sa’ li raqal 6? Chan ru naru naqataw qamuheb’aal? (chi’ilmanq ajwi’ Tzol’leb’ ut Sumwank 115:6).  Maare eb’ li komon sa’ li tzoleb’aal te’ruuq chixyeeb’al chan ru naq naru naqak’e reetal naq eb’ li qochoch ut li qach’utleb’aal te’wanq choq’ xna’aj li musiq’ejil kole’k.

2 Nefi 25:19–29

“Li tiikil b’e a’an xpaab’ankil li Kristo.”

• Eb’ li komon sa’ laa tzoleb’aal maare reek’ahomeb’ li kiraj laj Nefi, a’an “xq’unb’esinkileb’ xch’ool li qalal qak’ajol, jo’keb’ ajwi’ li qas qiitz’in, naq te’xpaab’ li Kristo.” Chan ru naq laj Nefi “kik’anjelak chi yalb’il xq’e” re xb’aanunkil a’in? (2 Nefi 25:23). Maare eb’ li komon sa’ li tzoleb’aal te’ruuq chi sik’ok sa’ 2 Nefi 25:19–29 re xtawb’aleb’ li yaalil na’leb’ chirix li Kolonel ut lix evangelio li kiraj laj Nefi naq eb’ lix tenamit te’xnaw. Chirix a’an, taaruuq te’xwotz k’a’ru xe’xb’aanu re xk’utb’al li yaalil na’leb’ a’an chiruheb’ lix junkab’al malaj eb’ li ramiiw. Qayehaq, chan ru naq xe’xk’ut li yaal naq “a’ sa’ xk’ab’a’ li usilal naq nokokole’, chirix chixjunil li nokoru chixb’aanunkil laa’o”? (Li raatin li Awa’b’ej Dieter F. Uchtdorf sa’ “Xkomon chik li k’anjeleb’aal” taaruuq texxtenq’a chixtawb’al ru li yaalil na’leb’ a’in.) Chan ru naq eb’ a’an xe’xtenq’aheb’ li ras riitz’in chi “saho’k sa’ xch’ool rik’in li Kristo”?

reetalil li tzolok

Xb’oqb’aleb’ chi tzolok sa’ kab’l

Eb’ li komon sa’ li tzoleb’aal maare te’raj xnawb’al naq 2 Nefi 26–30 naru naxtenq’aheb’ chixk’eeb’al xsumenkil li ani neke’yehok re, “Ink’a’ naqaj ru lix Hu laj Mormon.”

reetalil li k’anjeleb’aal

Xkomon chik li k’anjeleb’aal

“Xb’aan naq yo’lajenaq choq’ qe jun li k’uula’al.”

Re xnimankil ru lee seraq’ chirix 2 Nefi 19:6 naru teeril malaj teerab’i li Coro Tabernaculo re li Manzana re li Templo chixb’ichankil “For unto Us a Child is Born” (ChurchofJesusChrist.org).

“A’ sa’ xk’ab’a’ li usilal naq nokokole’, chirix chixjunil li nokoru chixb’aanunkil laa’o.”

Naq yoo chi aatinak chirix li raatin laj Nefi sa’ 2 Nefi 25:23 li Awa’b’ej Dieter F. Uchtdorf kixye:

“A’b’anan, maare wan naq ink’a’ naqataw ru chi us li raqal “chirix chixjunil li nokoru chixb’aanunkil.” Tento taqataw ru naq li aatin “chirix” moko juntaq’eet ta rik’in “xb’aan.”

“Moko tookole’q ta “xb’aan” chixjunil li nokoru chixb’aanunkil. Ma wan ta b’i’ sa’ qayanq ani kixb’aanu chixjunil li naru tixb’aanu?` Ma tento taalajq chixjunil qametz’ew rub’elaj naq li Dios taa’ok chi k’anjelak sa’ li qayu’am rik’in li rusilal li nakolok? …

“Ch’olch’o chiwu naq laj Nefi kixnaw naq li rusilal li Kolonel nokoxkanab’ ut nokoxtenq’a chi numtaak sa’ xb’een li maak (chi’ilmanq 2 Nefi 4:19–35; Alma 34:31). Xb’aan a’in naq laj Nefi kik’anjelak chi kaw re xq’unb’esinkileb’ xch’ool li ralal xk’ajol jo’keb’ ajwi’ li ras riitz’in naq “te’xpaab’ li Kristo, ut te’xk’am wi’chik rib’ sa’ usilal rik’in li Dios” (2 Nefi 25:23).

“Sa’ roso’jik, a’an a’an chixjunil li nokoru chixb’aanunkil! Ut a’an a’an li qak’anjel sa’ li qayu’am!” (“Li maatan re usilal,” Jolomil ch’utub’aj-ib’ re abril 2015).

XChaab’ilob’resinkil li qak’utum

Patz’eb’ li patz’om li neke’xb’oq chaq li xnawom ch’oolej. “Rik’in xpatz’b’aleb’ li patz’om li neke’waklesi xch’ooleb’ li komon sa’ li tzoleb’aal chixwotzb’al xnawomeb’ xch’ool chirixeb’ li na’leb’ li yoo chi k’utmank, naru nab’oqman li Musiq’ej rik’in wankilal. Eb’ lix nawomeb’ xch’ool—ut lix nawomeb’ xch’ool li jun ch’ol chik sa’ li tzoleb’aal—te’nimanq naq li Musiq’ej naxch’olob’ xyaalal li yaal” (Li k’utuk jo’ li Kolonel, 32).