li Kristo naq yoo chi tijok sa’ Getsemani

Ink’a’ chi’uxmanq li nawaj laa’in, a’b’an laa wajom laa’at, xb’aan laj Harry Anderson

10–16 febrero

2 Nefi 6–10

“Aay, k’a’jo’ xnimal lix k’uub’anb’il na’leb’ li qaDios!”

Jun chaab’il na’leb’ re xkawresinkil aawib’ chi k’utuk, a’an rilb’al ru xb’een wa 2 Nefi 6–10. Tz’iib’a li musiq’anb’il na’leb’ nakak’ul, ut oksi li tusleb’ aatin a’in re xtawb’al chik li aatin ut li na’leb’ chirix li k’utuk.

Xtz’iib’ankil li nakak’oxla

reetalil li wotzok

Xkanab’ankileb’ chi wotzok

Laj Jakob kixk’ut chiru lix tenamit naq li raatin laj Isaias “naru xjuntaq’eetankil eerik’in” (2 Nefi 6:5). Naru taatikib’ rik’in xpatz’b’al reheb’ li komon sa’ li tzoleb’aal naq te’xwotz junaq reheb’ lix k’utum laj Jakob sa’ 2 Nefi 6–10 li neke’reek’a naq neke’ru chixjuntaq’eetankil rik’in lix yu’ameb’. Naru neke’xch’olob’ xyaalal k’a’ut naq xe’toch’e’ xch’ool xb’aan li k’utum a’an.

reetalil li k‘utuk

Xk’utb’al li tzol’leb’

2 Nefi 6–8

Li Qaawa’ a’an aj uxtaan rik’in lix tenamit, ut tixtz’aqob’resiheb’ ru lix yeechi’ihom.

• Re taatawmanq xyaalal k’a’ru yoo chi k’ulmank sa’ 2 Nefi 6–8, maare usaq choq’ re laa tzoleb’aal xyiib’ankil jun xtzolil xnumikeb’ li chihab’, sa’ li taak’e wi’ li k’a’aq re ru yeeb’il resil sa’ 2 Nefi 6:8–15. K’a’ru neke’xk’ut li na’leb’ a’in chirix li Qaawa’, ut li nareek’a chirix lix tenamit? (chi’ilmanq ajwi’ 2 Nefi 7:1–3; 8:3). Maare usaq xyeeb’al naq jo’ komon sa’ li Iglees, wanko choq’ xtenamit li Dios re li sumwank sa’ li kutan a’in, ut yooko chi ch’utub’aak chalen chaq sa’ li ruchich’och’, toj sa’ li kolok-ib’ re li evangelio. K’a’ruheb’ li esil sa’eb’ li ch’ol a’in wankeb’ choq’ qe anajwan?

2 Nefi 9

Rik’in lix tojb’al rix li maak xb’aan li Jesukristo, a’an naxkol chixjunileb’ li tenamit chiru li kamk sa’ tz’ejwalej ut sa’ musiq’ej.

• Jun na’leb’ re xchamob’resinkil li qatawom ru chirix lix tojb’al rix li maak xb’aan li Jesukristo, a’an xk’oxlankil k’a’ raj ru kik’ulman qik’in wi ta maak’a’ lix tojb’al rix li maak. Eb’ li komon sa’ li tzoleb’aal naru te’xk’oxla sa’ xch’ool li na’leb’ a’in naq neke’xtzol 2 Nefi 9. Naru taaye reheb’ li komon sa’ li tzoleb’aal naq te’xtikib’ rik’in xtzolb’aleb’ li raqal 4–9, ut chirix a’an te’xtz’iib’a chiru li pizarron k’a’ raj ru kik’ulman wi ta li Kristo ink’a’ kixtoj rix li maak. Jo’ naxye sa’eb’ li raqal 10–14, chan ru naq li Kolonel kooxkol chiru li rahilal a’in? Li raatin li Elder Jeffrey R. Holland sa’ “Xkomon chik li k’anjeleb’aal” naru tixtenq’aheb’ li wankeb’ sa’ laa tzoleb’aal chixtawb’al ru naq aajel ru choq’ qe lix tojb’al rix li maak xb’aan li Jesukristo. Naru taak’ut li video chirix li raatin a’an—“Merced, justicia y amor” (ChurchofJesusChrist.org). Eb’ li komon sa’ li tzoleb’aal naru te’xwotz li k’a’ru neke’xk’oxla malaj neke’reek’a chirix li Kolonel rik’in li raatin li Elder Holland.

• Ye reheb’ li komon naq te’xk’oxla chan raj ru te’xch’olob’ xyaalal lix tojb’al rix li maak xb’aan li Jesukristo re anihaq li ink’a’ naxnaw chirix, ut ink’a’ naxnaw k’a’ut naq na’ajman ru. Eb’ li yaalil na’leb’ li neke’tawman sa’ 2 Nefi 9 naru neke’xkawresi li komon sa’ li tzoleb’aal re aatinak chirix a’in. Maare taaruq te’iloq sa’eb’ li raqal 4–12, re xsik’b’al chan ru naq lix tojb’al rix li maak xb’aan li Kolonel nanumta sa’ xb’een li kamk sa’ tz’ejwalej ut sa’ musiq’ej. Rik’in li k’a’ru naqatzol sa’eb’ li raqal a’in, k’a’ut naq lix mayej li Kolonel nak’ab’a’iman “jun xtojb’al rix li maak li maak’a’ roso’jik”? (2 Nefi 9:7).

• Laj Jakob k’a’jo’ naq sachso xch’ool rik’in lix k’uub’anb’il na’leb’ li Dios re li tojok-ix, jo’kan naq kixye, “Aay, k’a’jo’ xnimal” naq kixch’olob’ xyaalal li k’uub’anb’il na’leb’. Re xtenq’ankileb’ li komon sa’ li tzoleb’aal chixtawb’al ru li reek’ahom a’an chirix li Kolonel ut lix tojb’al rix li maak xb’aan, naru taab’oqeb’ chixtz’ilb’al rix 2 Nefi 9 re xtawb’al li aatin re anchal ch’oolej re laj Jakob (lix k’ihaleb’ neke’tawman sa’eb’ li raqal 8–20). K’a’ru neke’xk’ut li raqal a’in chirix li Dios ut lix k’uub’anb’il na’leb’? K’a’ru qanumsihom li nokoxtenq’a chireek’ankil li kireek’a laj Jakob chirix lix k’uub’anb’il na’leb’ li Dios choq’ reheb’ li ralal xk’ajol? Naru ajwi’ teeb’icha jun li b’ich chirix lix nimal ru li Dios, jo’ “Jwal nim aawu” (Eb’ li B’ich, 46), re xk’eeb’al xwankil li seraq’ a’in.

2 Nefi 9:27–54

Naru toochalq rik’in li Kristo ut taqak’ul li nimla osob’tesink re lix tojb’al rix li maak xb’aan a’an.

• Naru taatikib’ li aatinak chirix lix k’utum laj Jakob sa’eb’ li raqal a’in rik’in xyeeb’al reheb’ li komon sa’ li tzoleb’aal naq te’xk’oxla chan ru naq te’xk’e raj xb’oqb’al anihaq chixjalb’al xk’a’uxl ut chi chalk rik’in li Kristo. Chan ru naq laj Jakob kixb’aanu a’in sa’ 2 Nefi 9:50–53? K’a’ru li osob’tesink jo’ kixye a’an, li te’chalq sa’ li qayu’am naq naqak’ul li b’oqok a’in?

• Sa’ 2 Nefi 9, laj Jakob kiroksi wiib’ ch’ol aatin li wankeb’ chi ka’pak’al: “li k’uub’anb’il na’leb’ aj uxtan re li nimla aj Yo’ob’tesinel” ut “li b’alaq’il k’uub’anb’il na’leb’ a’an re li maa’us” (2 Nefi 9:6, 28). Re xtenq’ankileb’ li komon sa’ li tzoleb’aal chi tzolok chirix xka’pak’al li ch’ol aatin a’in, naru taayiib’ xjalam-uuch jun b’e chiru li pizarron, ut taatz’iib’a choq’ xk’ab’a’, Lix k’uub’anb’il na’leb’ li qaChoxahil Yuwa’. Ye reheb’ li komon sa’ li tzoleb’aal naq te’xtz’il rix 2 Nefi 9:27–52, re xsik’b’al li na’leb’ kixk’e laj Jakob re qatenq’ankil chixtaaqenkil lix k’uub’anb’il’ na’leb’ li qaChoxahil Yuwa’. Ye reheb’ naq te’xtz’iib’a chire li b’e li k’a’ru neke’xtaw. K’a’ru kixye laj Jakob chirix chan ru naq laj Satanas nokoraale chixnajtob’resinkil qib’ rik’in lix k’uub’anb’il na’leb’ li qaChoxahil Yuwa’? K’a’ru naqatzol sa’eb’ li raqal a’in chirix b’ar tooxk’am lix k’uub’anb’il na’leb’ li qaChoxahil Yuwa’, ut b’ar tooxk’am lix k’uub’anb’il na’leb’ laj Satanas? (chi’ilmanq 2 Nefi 9:9, 18). Jo’ naxye sa’eb’ li raqal a’in, k’a’ru naru naqab’aanu re xtaaqenkil chi chaab’il lix k’uub’anb’il na’leb’ li qaChoxahil Yuwa’?

• Sa’ 2 Nefi 9:28–38, laj Jakob naxk’e qatijb’al chirixeb’ li na’leb’ ut li b’aanuhom li toohe’xram chixtaaqenkil lix k’uub’anb’il na’leb’ li Dios choq’ qe. Naru taapatz’ reheb’ li komon sa’ li tzoleb’aal naq te’xsik’eb’ a’an. K’a’ru reheb’ li na’leb’ ut b’aanuhom a’in k’a’jo’ neke’ilman sa’eb’ li kutan a’in? K’a’ut naq xiwxiweb’? K’a’ru naqatzol sa’ 2 Nefi 9:50–53 chirix chan ru risinkil qib’ chiru li xiwxiw a’in?

reetalil li tzolok

Xb’oqb’aleb’ chi tzolok sa’ kab’l

Re xtenq’ankileb’ li komon sa’ li tzoleb’aal re kawaqeb’ xch’ool chirilb’al ru lix tz’iib’ahom laj Isaias li yeeb’il xb’aan laj Nefi sa’ 2 Nefi 11–24, naru taach’olob’ naq laj Nefi kixtz’iib’aheb’ li aatin a’in re xkawob’resinkil xpaab’aaleb’ lix tenamit chirix li Jesukristo. B’oqeb’ li komon sa’ li tzoleb’aal re te’xk’oxla li k’a’ru te’ril ru sa’ li xamaan jun chik jo’ jun hoonal re xkawob’resinkil lix paab’aaleb’ chirix li Kristo.

reetalil li k’anjeleb’aal

Xkomon chik li k’anjeleb’aal

Naqaj ru jun aj Kolonel

Li Elder Jeffrey R. Holland kixye resil jun saaj winq li yoo chi taqe’q chiru jun xaqxookil saqoonaq, ut kiwan chi t’uyt’u chaq sa’ ch’ina helhookil pek sa’ xb’een jun nimla uul, ut maak’a’ li taaramoq re chi t’ane’k ut chi kamk. Naq eb’ li ruq’ yookeb’ chi xolk’ok chaq chi ixej sa’ li helho, kireek’a xkab’ichal li ruq’ li riitz’in chixchapb’al xkux li ruq’ ut chixkelonkil sa’ xb’een li helho. Li Elder Holland kixjuntaq’eeta li k’a’ru kixk’ul li saaj winq a’in rik’in chan ru naq wanko laa’o sa’ li ruchich’och’ a’in li t’anenaq:

“Kiwan jun aj Adan ut jun xEva li ke’t’ane’ chaq sa’ Eden, ut ke’xk’am sa’ qab’een chixjunil li na’ux xb’aan li t’ane’k a’an. … Rik’in naq laa’o ajwi’ xooyo’la sa’ li t’anenaqil ruchich’och’ a’in, ut rik’in naq laa’o ajwi’ taqaq’eteb’ lix chaq’rab’ li Dios, xk’eeman ajwi’ sa’ qab’een laa’o li tojb’a-maak ke’xk’ul laj Adan ut li xEva.

“Nimla ch’a’ajkilal a’in! Chixjunileb’ li winq yookeb’ chi t’ane’k’—chixjunqaleb’ li winq, li ixq, ut li kok’al sa’ li tz’ejwalej yookeb’ chi xik taq’a sa’ jun li kamk li ink’a’ taaraqe’q, ut sa’ musiq’ej yookeb’ chi t’ane’k sa’ li junelikil rahil ch’oolejil. Ma a’an xyaalalil li qayu’am? Ma a’an xraqik li k’a’ru naqak’ul sa’ li yu’am a’in? Ma yal t’uyt’uuko chiqajunqal chiru jun xaqxookil saqoonak sa’ jun li ruchich’och’ li maak’a’ xyaalal, chi wan li junjunq chixsik’inkil xna’aj li roq, chixsik’inkil k’a’ru taachapoq wi’ chiru, ut yal samahi’ naqeek’a rub’el li ru’uj quq’, chi maak’a’ li taakoloq qe, chi maak’a’ li toochapoq wi’, ut chi maak’a’ ajwi’ li taachapoq qe laa’o? …

“Lix sumenkil li patz’om a’in, a’an jun kawil ut junelikil ink’a’! … Lix tojb’al rix li maak tixk’am chaq chi junajwa xq’axb’al ru lix kamik li tz’ejwalej, xb’aan naq tixk’e xwaklijikeb’ chi yo’yo chixjunqaleb’ li winq ut ixq li xe’yo’la malaj toj te’yo’laaq sa’ li ruchich’och’ a’in. Jo’kan ajwi’, tixk’e xkuyb’al xmaakeb’ chixjunil, chalen chaq laj Adan toj sa’ roso’jik li ruchich’och’, a’ yaal jo’ neke’xjal xk’a’uxl ut neke’ab’ink chiruheb’ li choxahil taqlahom” (“Raqleb’ aatin, rahok, uxtaan tz’aqal sa’ junajil,” Jolomil ch’utub’aj-ib’ re abril 2015).

Xchaab’ilob’resinkil li qak’utum

Ye xnawom aach’ool chi kok’ aj xsa’. Wi yal taaye chi anchal aach’ool lix nawom aach’ool chirix li yaal, naru taawanq xnimal xwankil rik’ineb’ li ani tzolb’ileb’ aab’aan. Ink’a’ na’ajman ru naq utz’u’ujinb’ilaq ru laa waatin malaj naq najt tat-aatinaq. Naru taawotz xnawom aach’ool chirix li Kolonel naq nekex’aatinak chirix 2 Nefi 9.