Laj Adan ut li xEva, xb’aan laj Douglas Fryer

3–9 febrero

2 Nefi 1 5

“Koowan jo’ chanru li sahil ch’oolejil”

Tikib’ xkawresinkil aawib’ sa’ musiq’ej rik’in rilb’al ru 2 Nefi 1–5 ut xtz’iib’ankil li musiq’anb’il na’leb’ nakak’ul. Wan xk’ihal li na’leb’ sa’eb’ li ch’ol a’in, ut maak’a’aq li hoonal re aatinak chirix chixjunil; chi jo’kan, taaqe li Musiq’ej sa’ xkawresinkil aawib’, ut k’e reetaleb’ li na’leb’ wotzb’il xb’aaneb’ li komon sa’ li tzoleb’aal, re taanaw k’a’ruheb’ li na’leb’ tex’aatinaq wi’, ut chan ru xb’eresinkil li aatinak.

Xtz’iib’ankil li nakak’oxla

Xkanab’ankileb’ chi wotzok

Naru naq eb’ li komon sa’ laa tzoleb’aal ak xe’xk’e xjuch’ul malaj xe’xtz’iib’a resil junaq raqal sa’ 2 Nefi 1–5. Re xtikib’ankil li tzolok, naru taapatz’ reheb’ li komon sa’ li tzoleb’aal naq te’xwotzeb’ li raqal li xwulak chiruheb’. Ye reheb’ li wankeb’ sa’ li tzoleb’aal naq te’xye chi k’osb’il ru k’a’ru li tzol’leb’ xe’xtzol sa’eb’ li raqal li xe’xwotz.

Xk’utb’al li tzol’leb’

2 Nefi 2:11–30

Kanabʼanbʼilo chixbʼaanunkil qajunes li naqaj.

• K’iila sut eb’ li kristiaan neke’roksi lix taql xch’ooleb’ re xb’aanunkil rahilal reheb’ li ras riitz’in. Rik’in a’an, k’a’ut naq aajel ru choq’ re li qaChoxahil Yuwa’ naq taawanq xtaql qach’ool? Maare naru taatz’iib’a li patz’om a’in chiru li pizarron, ut eb’ li komon sa’ li tzoleb’aal te’ruuq chixsik’b’al xsumenkil sa’ 2 Nefi 2:11–30, ut te’xtz’iib’a lix sumenkil chiru li pizarron. Chan ru naxyal xq’e laj tza chixsachb’al lix taql qach’ool? Chan ru naq li Kolonel nokoxtenq’a “chixsik’b’al ru li ach’ab’aak ut li junelik yu’am”? (2 Nefi 2:27). Naru teeb’icha sa’ komonil jun b’ich chirix li xtaql ch’oolej, jo’ “Chanaw naq wan xwankil aawaam” (Eb’ li B’ich, 152), ut taab’oqeb’ li komon sa’ li tzoleb’aal re te’xk’e sa’ lix tusleb’ aatin li na’leb’ neke’xtaw sa’ li b’ich a’an.

• Sa’ li tusleb’ aatin re li xamaan a’in sa’ Kim, Taaqehin—Choq’ reheb’ li komon ut li junkab’al, wankeb’ kaahib’ na’leb’ li neke’ajman re taawanq li xtaql ch’oolej. A’in jun k’anjel re taanimob’resi ru li k’a’ru ak xe’xtzol li komon sa’ kab’l: Tz’iib’aheb’ li kaahib’ chi na’leb’ chiru li pizarron. Chirix a’an, kanab’eb’ li komon chixwotzb’aleb’ li ch’ol aatin sa’ 2 Nefi 2 li neke’xk’ut k’a’ut naq aajeleb’ ru li na’leb’ a’in re taqataw li choxahilal li naru naqak’ul.

2 Nefi 2:15–29

Lix t’anik laj Adan ut lix tojb’al rix li maak xb’aan li Jesukristo a’aneb’ raqal aajel ru sa’ lix k’uub’anb’il na’leb’ li qaChoxahil Yuwa’.

• Naab’aleb’ laj Kristiano neke’xk’oxla naq nimla sachk li t’ane’k, ut naq q’axal ink’a’ us li kixb’aanu li xEva. Eb’ li raqal a’in sa’ 2 Nefi 2 neke’xkutanob’resi li yaalil na’leb’ chirix laj Adan ut li xEva, ut neke’xch’olob’ naq li Jesukristo kixtoj qix chiru li t’ane’k. Jun na’leb’ re xseraq’inkileb’ li na’leb’ a’in, a’an xyeeb’al reheb’ li komon sa’ li tzoleb’aal naq te’xtz’il rix 2 Nefi 2:15–25 ut te’xtz’iib’a chi tusb’il li yaalil na’leb’ neke’xtzol chirix k’a’ru li kik’ulman sa’ li Awimq Eden. K’a’ chik ru li na’leb’ neke’xtaw sa’ li raatin li Awa’b’ej Dallin H. Oaks sa’ “Xkomon chik li k’anjeleb’aal”? Chan ru naq li Jesukristo kixtoj qix chiru li t’ane’k? (chi’ilmanq 2 Nefi 2:6–8, 26–29).

• Chirix xb’aanunkil jun li k’anjel jo’ li toja’ xnume’, naru taak’ut wiib’ oxib’ li patz’om jo’ a’in, ut taakanab’eb’ li komon sa’ li tzoleb’aal chixwotzb’al lix na’leb’eb’ chirix:

  • Chan ru naq li k’a’ru kixk’ut laj Lehi sa’eb’ li raqal a’in naxtuqub’ junjunq li b’alaq’il na’leb’ chirix li t’ane’k?

  • Chan ru naq li t’ane’k nawan choq’ osob’tesink?

  • Chan ru naq rik’in xtawb’al ru chi us li t’ane’k naqataw wi’chik ru chan ru naq naqaj ru li Jesukristo ut lix tojb’al rix li maak xb’aan a’an?

  • K’a’ut naq nakab’antioxi li k’a’ru ke’xsik’ ru xb’aanunkil laj Adan ut li xEva sa’ li Awimq Eden?

  • Naq xasik’ ru chalk sa’ li ruchich’och’, chan ru naq juntaq’eet a’in rik’in li ke’xsik’ ru laj Adan ut li xEva naq ke’xyal li ru li che’ re xnawb’al ru li us ut li ink’a’ us?

  • Kʼaʼru aj-e li yuʼam aʼin? K’a’ut naq ki’ajman ru li t’ane’k re taa’uxmanq a’in?

2 Nefi 4:15–35

Naru naqajilosi qib’ rik’in li Dios sa’ xq’unal qu.

• Lix tz’iib’ahom laj Nefi sa’ 2 Nefi 4:15–35 naru naxk’am chaq qayo’onihom ut xk’ojob’ankil qach’ool naq naqeek’a naq numtajenaq nim li qach’a’ajkilal ut lix q’unal qu. Maare eb’ li komon sa’ li tzoleb’aal te’ruuq chixnumsinkileb’ li raqal a’in sa’ ka’kab’il, ut te’xtaweb’ li ch’ol aatin li te’ruuq raj chiroksinkil rik’in li ani nareek’a naq numtajenaq nim lix ch’a’ajkilal. Chirix a’in, li junjunq sumal taaruuq chixwotzb’aleb’ li ch’ol aatin a’in rik’in li tzoleb’aal. Maare junaq li wan sa’ li tzoleb’aal taaruuq chixwotzb’al junaq xnumsihom sa’ li xk’ojob’aak wi’ xch’ool rik’in xjilosinkil rib’ rik’in li Dios, jo’ kixb’aanu laj Nefi.

• Jun chik na’leb’ re xtzolb’al 2 Nefi 4 a’an xpatz’b’al re wiib’ oxib’ li komon sa’ li tzoleb’aal chi junxilaj naq te’chalq chi kawresinb’il chixwotzb’aleb’ li raqal ut li ch’ol aatin sa’ li jun ch’ol a’in li xwulak chiruheb’. Ye reheb’ naq te’xwotz k’a’ru neke’xb’aanu naq neke’reek’a naq q’axb’ileb’ ru xb’aan xq’unaleb’ xmetz’ew. Jun li b’ich chirix li k’ojob’aak ch’oolej ut li yo’onink, jo’ “B’ar wan xhiilal li waam?” (Eb’ li B’ich, 67), naru chetenq’ankil sa’ li seraq’ a’in. Qayehaq, eb’ li komon sa’ li tzoleb’aal te’ruuq chixwotzb’al chan ru naq li b’ich naxk’am rib’ rik’in lix b’aanuhom laj Nefi naq kixkanab’ rib’ chiru li Qaawa’ naq tawajenaq xch’ool.

2 Nefi 5

Natawman li sahil ch’oolejil rik’in xyu’aminkil li evangelio.

• Us ta wan li ch’a’ajkilal ke’xk’ul laj Nefi ut lix tenamit, ke’ru chixyiib’ankil jun tenamit li k’ojob’anb’il sa’ xb’eeneb’ li na’leb’ li neke’k’amok sa’ li sahil ch’oolejil. K’a’ru li na’leb’ xe’xtaw li komon sa’ li tzoleb’aal sa’ xtzolb’al 2 Nefi 5 li kik’amok sa’ li sahil ch’oolejil li ke’xk’ul laj Nefita? Naru taak’e jun perel li hu reheb’ li komon sa’ li tzoleb’aal, ut taaye reheb’ naq te’xsik’ sa’ 2 Nefi 5 eb’ li na’leb’ li neke’xk’am sa’ li sahil ch’oolejil, ut te’xtz’iib’a. Chan ru naq lix na’leb’ li ruchich’och’ chirix xsik’b’al li sahil ch’oolejil jalan wi’ rik’in li k’a’ru naqataw sa’ 2 Nefi 5? K’a’ru li jayalihom naru neke’xk’uub’ li komon sa’ li tzoleb’aal re xyu’aminkil jun reheb’ li na’leb’ a’in?

Xb’oqb’aleb’ chi tzolok sa’ kab’l

Ye reheb’ li komon naq sa’ 2 Nefi 6–10 wan jun reheb’ li aatin q’axal chaab’il natawman sa’eb’ li loq’laj hu chirix lix tojb’al rix li maak xb’aan li Kristo. Naru ajwi’ taawotz jun raqal nakataw sa’eb’ li ch’ol a’in li naxwaklesi aach’ool naq nakawil ru.

Xkomon chik li k’anjeleb’aal

Li t’ane’k a’an jun raqal re lix k’uub’anb’il na’leb’ li Dios.

Li Awa’b’ej Dallin H. Oaks kixye:

“Naq laj Adan ut li xEva ke’xk’ul li xb’een taqlahom, ke’wan sa’ jun wanjik re jalok-ib’; moko wankeb’ ta chik sa’ li ruchich’och’ reheb’ li musiq’ej, a’ut lix junxaqalil toj maji’ wan li kamk sa’ xb’een, ut toj maji’ naru chi alank k’uula’al. Ink’a’ ke’ru chixtz’aqob’resinkil ru li xb’een taqlahom chi ink’a’ neke’xq’ax ru li ramleb’ li naxjach ru li sahil ch’oolejil sa’ li Awimq Eden rik’ineb’ li xuwajel ch’a’ajkilal ut eb’ li chaab’il b’e li wankeb’ sa’ li yu’am a’in. …

“… Li profeet aj Lehi kixye naq “wi ta ink’a’ kiq’etok aatin laj Adan, ink’a’ raj kit’ane’ ” (2 Nefi 2:22); kikana raj b’an sa’ li yo’ob’tesinb’il wi’ chaq.

“… Ak k’oxlanb’il li t’ane’k, jo’ naxye laj Nefi, xb’aan naq ”xb’aanuman chixjunil li k’a’a’q re ru sa’ lix chaab’ilal xna’leb’ li nanawok re chixjunil li k’a’aq re ru” (2 Nefi 2:24).

“A’an li xEva li xb’een wa kiq’axok re li ramleb’ sa’ Eden re taaruuq taa’uxq li natawman sa’ li yu’am a’in. Li k’a’ru kixb’aanu, maak’a’ naxye k’a’ut naq kixb’aanu, a’an ajwi’ jun q’etok aatin, a’ut aajel ajwi’ ru chi junajwa re taateemanq li okeb’aal sa’ li junelik yu’am. Laj Adan kixk’ut xchaab’ilal lix na’leb’ rik’in xb’aanunkil ajwi’ chi jo’kan. Chi jo’kan, li xEva ut laj Adan “ke’t’ane’ re naq te’wanq li winq” (2 Nefi 2:25).

Wankeb’ laj Kristiano li neke’xjit li xEva xb’aan li kixb’aanu, ut neke’xk’oxla naq wan xmajelal a’an ut xmajelaleb’ lix ko’ xb’aan a’an. A’b’anan moko jo’kaneb’ ta laj Santil Paab’anel sa’ Roso’jikeb’ li Kutan! Chi kutanob’resinb’il rik’in li k’utb’esinb’il na’leb’, naqab’antioxi li kixb’aanu li xEva, ut naqanima ru xb’aan xchaab’ilal xna’leb’ ut xkawilal xch’ool sa’ li nimla k’anjel, li t’ane’k yeeb’il re. …

“Rik’in li k’utb’esinb’il sa’ li kutan a’in, naqanaw naq eb’ li xb’een qana’ qayuwa’ ke’xtaw ru naq aajel ru li t’ane’k. Laj Adan kixye, “Osob’tesinb’ilaq taxaq xk’ab’a’ li Dios, xb’aan naq xb’aan li q’etok aatin inb’aan teeb’il xnaq’ wu, ut sa’ li yu’am a’in taawanq xsahil inch’ool, ut sa’ li tz’ejwalej tinwil wi’chik ru li Dios” (Moises 5:10)” (“Gran Plan De Salvación,” Liahona, noviembre 1993, 72–73).

Xchaab’ilob’resinkil li qak’utum

Sik’eb’ li ink’a’ neke’wulak. Li tzolok maawa’ ka’ajwi’ xb’eresinkil li aatinak sa’ domingo, a’an ajwi’ k’anjelak rik’in rahok chiruheb’ li qas qiitz’in rik’in li evangelio. Maare naru taak’oxla anihaq li ink’a’ yoo chi wulak, ut taak’e xb’oqb’al re taatz’aqonq sa’ jun li tzolok chalel. (Chi’ilmanq Li k’utuk jo’ li Kolonel, 8–9.)